ໃນການແຂ່ງຂັນກິລາໂອລິມປິກຄັ້ງນີ້ແຕກຕ່າງຈາກເມື່ອກ່ອນ, ທາງການລາວໄດ້ ຄັດເລືອກເອົານັກກິລາເຊື້ອສາຍລາວຢູ່ໃນສະຫະລັດ 2 ຄົນ ໃຫ້ເປັນຜູ້ຕາງໜ້າ ປະເທດເຂົ້າຮ່ວມງານມະຫາກໍາກິລາໂອລິມປິກ ປາຣີ 2024 ທີ່ຈະຈັດຂຶ້ນໃນທ້າຍ ເດືອນນີ້.
ສປປ ລາວ ເຄີຍໄດ້ສົ່ງນັກກິລາເຂົ້າຮ່ວມການແຂ່ງຂັນໂອລິມປິກມາໄດ້ 10 ຄັ້ງ ແລ້ວ ຊຶ່ງເຂົາເຈົ້າລ້ວນແຕ່ເປັນນັກກິລາຢູ່ພາຍໃນປະເທດ. ແຕ່ມາຮອດງານ ແຂ່ງຂັນໂອລິມປິກປີ 2024 ນີ້ ຢູ່ປາຣີ ທາງຄະນະກໍາມະການໂອລິມປິກ ແຫ່ງຊາດລາວໄດ້ຄັດເລືອກເອົານັກກິລາລາວ-ອາເມຣິກັນສອງຄົນບວກກັບ ນັກກິລາຢູ່ພາຍໃນປະເທດຄົນນຶ່ງໄປຮ່ວມການແຂ່ງຂັນທີ່ຈະຈັດຂຶ້ນໃນວັນທີ 26 ເດືອນີ້ຫາ 11 ເດືອນສິງຫາ ຊຶ່ງໄດ້ນໍາເອົາຄວາມປິຕິຊົມຊື່ນມາໃຫ້ແກ່ນັກກິລາທັງ ສອງຄົນແລະຄອບຄົວຂອງເຂົາເຈົ້າຫລາຍທີ່ສຸດ.
ນາງອາຣີອານາ ເດີກສະເວເກີ (Ariana Dirkzwager), ນັກກິລາລອຍນໍ້າແບບ ຟຣີສະຕາຍ 200 ແມັດ ຈາກມະຫາວິທະຍາໄລຈໍເຈຍ ເທັກໂນໂລຈີ ຂ້ອນຂ້າງ ມີຄວາມຫວັງໜ້ອຍນຶ່ງວ່າອາດຖືກຄັດເລືອກໃຫ້ຕາງໜ້າລາວໄປຮ່ວມກິລາໂອລິມປິກປີນີ້ ເພາະນາງທໍາຄະແນນໄດ້ສູງກວ່າໝູ່ໃນທີມຈາກລາວ ຢູ່ໃນການແຂ່ງຂັນ ລອຍນໍ້າແຊມປ້ຽນໂລກທີ່ນະຄອນຫລວງໂດຮາຂອງກາຕາ ໃນເດືອນກຸມພາປີນີ້ ແຕ່ນາງກໍຍັງແທບບໍ່ຢາກເຊື່ອເມື່ອໄດ້ຍິນວ່າ ນາງໄດ້ຖືກຄັດເລືອກອີ່ຫລີໃນວັນທີ 3 ຜ່ານມານີ້ ຊຶ່ງນາງບອກກັບພວກເຮົາວ່າ:
“ຂ້ອຍຕົກໃຈແທ້ໆ. ຂ້ອຍຮູ້ສຶກຕື່ນເຕັ້ນຫຼາຍເພາະວ່າມັນບໍ່ມີວີ້ແວວແນວໃດເລີຍ ແລະບໍ່ຮູ້ແນ່ນອນ, ສະນັ້ນ ການໄດ້ຮັບການຢັ້ງຢືນເຊັ່ນນີ້ ມັນຄືວ່າພາໃຫ້ເກີດການປ່ຽນແປງຫລາຍຢ່າງ. ຂ້ອຍຮູ້ວ່າພໍ່ແມ່ຂອງຂ້ອຍຕື່ນເຕັ້ນ ແລະພາກພູມໃຈຫຼາຍ ແລະຂ້ອຍເອງກໍ່ຕື່ນເຕັ້ນແລະພູມໃຈຢ່າງບອກບໍ່ຖືກ, ມັັນຕື້ນຕັນໃຈຫຼາຍ ເພາະວ່ານີ້ເປັນເລື້ອງຍິ່ງໃຫຍ່ແທ້ໆ ແລະມັນເປັນບາງສິ່ງບາງຢ່າງທີ່ຂ້ອຍໄຝ່ຝັນມາຕະຫລອດຊີວິດ ແລະໃນທີ່ສຸດມັນກໍໄດ້ກາຍມາເປັນຄວາມຈິງໄດ້ ມັນອັດສະ ຈັນອີ່ຫລີ.”
ອາຣີອານາ, ອາຍຸຊາວປີ ເກີດຢູ່ນະຄອນວິຈິຕາ, ລັດແຄນຊັສ ນາງເປັນລູກສາວ ຂອງຍານາງກຸນທອງທີ່ມາຈາກວຽງຈັນ ແລະທ່ານເດີກສະເວເຈີທີ່ເປັນຄົນອາ ເມຣິກັນເຊື້ອສາຍນໍເວ.
ຜູ້ທີສອງທີ່ໄດ້ຮັບຄັດເລືອກໃຫ້ຕາງໜ້າປະເທດລາວ ເຂົ້າຮ່ວມການແຂ່ງຂັນກິລາ ທີ່ໂດ່ງດັັງຂອງໂລກທີ່ວ່ານີ້ ກໍຄືທ້າວສະຕີບເວັນ ອິນສີຊຽງໃໝ່, ອາຍຸ 20 ປີ ຈາກ ມະຫາວິທະຍາໄລລັດຈໍເຈຍ. ລາວເກີດຢູ່ລັດຄາໂລຣີນາເໜືອເປັນລູກຂອງຍາ ນາງເພັດ ໄຊຍະພັນທອງ ແລະທ່ານດາລາວົງ ອິນສີຊຽງໃໝ່. ລາວຮູ້ສຶກຕື່ນເຕັ້ນ ເຊັ່ນກັນເມື່ອໄດ້ຮັບຂ່າວແບບບໍ່ຄາດຝັນໃນວັນທີ 5 ຜ່ານມານີ້ເອງ ຊຶ່ງລາວເວົ້າ ວ່າ:
“ຂ້ອຍຮູ້ສຶກຕື່ນເຕັ້ນຫຼາຍ ເພາະຂ້ອຍຮູ້ວ່າປະເທດລາວສົ່ງຄົນອື່ນທີ່ມາຈາກປະເທດລາວແທ້ໆໄປ ບໍ່ແມ່ນຂ້ອຍ. ແລະຂ້ອຍຮູ້ວ່າຂ້ອຍບໍ່ສາມາດເຮັດຫຍັງໄດ້. ເມື່ອຂ້ອຍໄດ້ຍິນວ່າຂ່າວຜູ້ນັ້ນຖືກປະຕິເສດ ແລະຂ້ອຍຖືກເລືອກ, ຂ້ອຍຮູ້ສຶກດີໃຈແທ້ໆ ເພາະຂ້ອຍບໍ່ຄາດຄິດວ່າຕົນເອງຈະສາມາດເປັນຕົວແທນຂອງລາວເຂົ້າຮ່ວມໃນກິລາໂອລິມປິກໄດ້.”
ທັງສອງຄົນນີ້ ແມ່ນໄດ້ຫລິ້ນກິິລາລອຍນໍ້າຕັ້ງແຕ່ໄວເດັກ ແລະເປັນນັກກິລາ ໃນທີມລອຍນໍ້າຂອງມະຫາວິທະຍາໄລເຂົາເຈົ້າ. ໂດຍທີ່ໄດ້ຖືກຄັດເລືອກ ເປັນຄັ້ງທໍາອິດທີ່ຕາງໜ້າໃຫ້ລາວ ທັງສອງຄົນມີຄວາມມຸ້ຫວັງສູງ ແລະກໍຈະ ເຮັດທຸ້ມເທສຸດຂີດເພື່ອໃຫ້ໄດ້ຢ່າງໜ້ອຍເຂົ້າແຂ່ງໃນຮອບຮອງຊະນະເລີດ ຂອງກິລາລອຍນໍ້າ ດັ່ງທີ່ທ້າວສະຕີບເວັນບອກວ່າ:
“ຂ້ອຍຢາກເປັນຕົວແທນຂອງປະເທດລາວ ເພາະຂ້ອຍຢາກເປັນຕົວແທນຂອງເຊື້ອຊາດຂອງພໍ່ແມ່ຂ້ອຍ ເຊິ່ງມັນສຳຄັນຫຼາຍແທ້ໆສຳລັບຂ້ອຍ. ແລະ ລາວ ຖ້າຂ້ອຍເດົາບໍ່ຜິດ ແມ່ນເປັນປະເທດທີ່ຄົນບໍ່ຄ່ອຍຮູ້ຈັກປານໃດໃນທົ່ວໂລກ ແລະຂ້ອຍຢາກຈະນໍາເອົາການເປັນຕົວແທນຂອງປະເທດລາວໄປໃຫ້ຄົນທີ່ບໍ່ຮູ້ ໃຫ້ຮູ້ຈັກປະເທດນີ້ດີຂຶ້ນ ເຊັ່ນວ່າ ຂ້ອຍອາດຈະຊິງເຂົ້າຮອບຮອງຊະນະເລີດສໍາລັບປະເທດລາວໄດ້, ຊຶ່ງເປັນສິ່ງທີ່ຍັງບໍ່ທັນມີໃຜເຄີຍເຮັດໄດ້ເທື່ອໃນໂອລິມປິກ, ຕາມທີ່ຂ້ອຍຄິດ.”
ນາງອາຣີຢານາກໍບອກຄວາມຮູ້ສຶກຂອງນາງກັບພວກເຮົາອີກວ່າ:
“ຂ້ອຍຕື່ນເຕັ້ນກັບໂອກາດອັນນີ້ແທ້ໆ. ຂ້ອຍຄິດວ່າມັນເປັນໂອກາດທີ່ດີທີ່ຈະສະແດງໃຫ້ຄົນຮູ້ກ່ຽວກັບປະເທດລາວ. ຄືວ່າໄດ້ເປັນຕົວແທນປະເທດຂອງຂ້ອຍ, ເຊື້ອຊາດຂອງຂ້ອຍ ແລະຂ້ອຍກໍຮູ້ສຶກຂອບໃຈສໍາລັບໂອກາດອັນນີ້. ເນື່ອງຈາກວ່າ ມັນເປັນສິ່ງທີ່ຄົນຝັນຢາກໄປ. ຂ້ອຍຄິດວ່າ Steve ແລະຂ້ອຍຈະເປັນຕົວແທນຂອງລາວໄດ້ດີ ເພາະຂ້ອຍຄິດວ່າເຮົາຈະເຮັດໄດ້ດີຢູ່ທີ່ນັ້ນ.”
ໃນຊຸມປີໝໍ່ໆມານີ້ທາງການລາວເລີ້ມເປີດຮັບນັກກິລາເຊື້ອສາຍລາວຢູ່ຕ່າງ ປະ ເທດໄປເປັນຕົວແທນແກ່ລາວຫລາຍຂຶ້ນ ເພື່ອເຂົ້າແຂ່ງຂັນກິລາຢູ່ລະດັບຂົງເຂດ ແລະລະດັບໂລກ, ອີງຕາມທ່ານນາຣາ ສີຫາວົງ, ຮອງປະທານຮ່ວມສ້າງຕັ້ງ ອົງການກິລາສາກົນຂອງລາວ ຫລື Lao International Sports ທີ່ສ້າງຕັ້ງຂຶ້ນ ເມື່ອສາມເດືອນກ່ອນ. ທ່ານເລົ່າສູ່ຟັງວ່າ:
“ແທ້ຈິງແລ້ວ, ຂ້ອຍໄດ້ພົວພັນຢ່າງເລິກເຊິ່ງກັບຄົນລາວຢູ່ຕ່າງປະເທດ, ໂດຍສະເພາະແມ່ນຄົນລາວ-ອາເມຣິກັນໃຫ້ໄປຊ່ວຍເຫຼືອ ແລະເຂົ້າຮ່ວມເປັນນັກກິລາຕົວແທນຂອງລາວ. ກະຄືເຈົ້າຮູ້ ຂ້ອຍເປັນຄູຝຶກແກ່ລູກຊາຍຂ້ອຍ. ຂ້ອຍໃຫ້ລາວເປັນຕົວແທນຂອງປະເທດລາວ ແລະຈາກນັ້ນ ທ່ານຈອນ ເມສຊີນາ, ລູກສາວຂອງລາວ, ນາງແອງເຈລີນາ ກໍໄດ້ໄປລອຍນໍ້າໃຫ້ປະເທດລາວໃນງານຊີເກມຄັ້ງຫລ້າສຸດ. ແລະ ລູກຊາຍຂອງຂ້ອຍກໍໄດ້ໄປຕີມວຍຢູ່ຫັ້ນ. ແລະ ກໍໄດ້ໄປຮ່ວມງານເອຊຽນເກມເພື່ອເປັນຕົວແທນຂອງລາວ. ສິ່ງທີ່ພວກເຮົາໄດ້ເຮັດຕັ້ງແຕ່ນັ້ນມາ ກໍຄື ສ້າງຕັ້ງ Lao International Sports ຂຶ້ນ ຊຶ່ງເປັນອົງການບໍ່ຫວັງຜົນກໍາໄລ. ຈຸດປະສົງໃນນີ້ ກໍຄືເພື່ອເອົາປະສົບການຂອງພວກເຮົາຊ່ວຍສົ່ງເສີມນັກກິລາລາວຢູ່ຕ່າງປະເທດໃຫ້ຕາງໜ້າປະເທດລາວຫຼາຍຂຶ້ນ ເຊັ່ນໃນການລົງແຂ່ງຂັນກິລາຊີເກມທີ່ກຳປູເຈຍ ມີຄົນລາວ-ອາເມຣິກັນ ຫຼື ກ່ຽວພັນກັບອາເມຣິກາ 7 ຄົນທີ່ເປັນຕົວແທນຂອງປະເທດລາວ. ແລະພວກເຮົາຈົບລົງດ້ວຍ 3 ຫຼຽນຄຳ, 2 ຫຼຽນເງິນ ແລະ 1 ຫຼຽນທອງ. ຫຼັງຈາກນັ້ນພວກເຮົາຍັງມີຄົນລາວ-ຝຣັ່ງອີກສອງ ຫຼືສາມຄົນ.”
ຄົນເຊື້ອສາຍລາວຢູ່ຕ່າງປະເທດທີ່ຕາງໜ້າໃຫ້ແກ່ປະເທດລາວໃນການແຂ່ງຂັນກິລາລະດັບຂົງເຂດ ແລະລະດັບໂລກເຊັ່ນນາງອາຣີຢານາ ແລະສະຕີບເວັນນີ້ ທາງລັດຖະບານໄດ້ມອບສັນຊາດລາວແບບກິຕິມະສັກໃຫ້. ພ້ອມທັງຈ່າຍ ຄ່າເດີນ ທາງ ແລະຄ່າຢູ່ກິນທຸກຢ່າງໃນການໄປຮ່ວມການແຂ່ງຂັນກິລາໂອລິມປິກ ໃນນາມປະເທດລາວອີກດ້ວຍ, ອີງຕາມທ້າວສະຕີບເວັນ.
ຟໍຣັມສະແດງຄວາມຄິດເຫັນ