ການປະທະກັນໄດ້ເກີດຂຶ້ນໃນວັນສຸກວານນີ້ ລະຫວ່າງກຳລັງຮັກສາຄວາມສະຫງົບຂອງເທີກີ ແລະພວກຊາວເຄີດໃນຊີເຣຍ ໃກ້ໆເມືອງຊາຍແດນ Kobani.
ກຳລັງຮັກສາຄວາມສະຫງົບຂອງເທີກີ ໄດ້ໃຊ້ລະເບີດນ້ຳຕາແລະລົດສີດນ້ຳຂະໜາດແຮງ ສີດເຂົ້າໃສ່ພວກປະທ້ວງ ທີ່ແກວ່ງກ້ອນຫີນເຂົ້າໃສ່ ການກໍ່ສ້າງຮົ້ວ ຂອງເທີກີ ໃນບໍລິເວນຊາຍແດນນັ້ນ.
ເຈົ້າໜ້າທີ່ຊາວເຄີດກ່າວຕໍ່ວີໂອເອວ່າ ກຳລັງຮັກສາຄວາມສະຫງົບຂອງເທີກີຍັງໄດ້ຍິງປືນໃສ່ພວກປະທ້ວງ ເຮັດໃຫ້ມີຜູ້ເສຍຊີວິດ ຢ່າງໜ້ອຍ 1 ຄົນ ແລະບາດເຈັບອີກຫຼາຍສິບຄົນ. ກອງທັບເທີກີໄດ້ປະຕິເສດຕໍ່ການກ່າວຫາດັ່ງກ່າວ.
ທ່ານ Ibrahim Kurdo ລັດຖະມົນຕີການຕ່າງປະເທດຂອງຊາວເຄີດ ໃນເຂດ Kobani ກ່າວວ່າ ມີສອງຄົນເສຍຊີວິດຍ້ອນຖືກຍິງ ແລະຫລາຍໆຄົນໄດ້ຮັບບາດເຈັບ ແລະກໍໄດ້ຮັບການປິ່ນປົວທີ່ໂຮງໝໍເມືອງ Qamishli ແລະເມືອງ Kobani.
ເມື່ອມີການຖາມກ່ຽວກັບລາຍງານຂ່າວນີ້ ແຫຼ່ງຂ່າວຈາກກອງທັບເທີກີກ່າວຕໍ່ອົງການຂ່າວຣອຍເຕີ້ວ່າ “ມີຄົນກຸ່ມນຶ່ງ ເຂົ້າໄປໃກ້ໆຊາຍແດນ ແລ້ວກໍທຳລາຍ ເຄື່ອງຈັກກໍ່ສ້າງ ໂຈມຕີຄົນງານແລະທະຫານທີ່ຢູ່ໃນບໍລິເວນຊາຍແດນ ດ້ວຍກ້ອນຫີນ. ໄດ້ມີການນຳໃຊ້ລະເບີດນ້ຳຕາແລະລົດສີດນ້ຳຂະໜາດແຮງ ສີດໃສ່ພວກເຂົາ. ແຕ່ບໍ່ມີການຍິງປືນເຂົ້າໃສ່.”
ລັດຖະບານເທີກີເລີ້ມສ້າງຮົ້ວຢູ່ຕາມຊາຍແດນຂອງຕົນ ທີ່ຕິດກັບເມືອງ Kobani ຂອງຊີເຣຍເມື່ອສີ່ມື້ກ່ອນ. ລັດຖະບານເທີກີມອງເບິ່ງເມືອງດັ່ງກ່າວນີ້ ດ້ວຍຄວາມບໍ່ສະບາຍໃຈ ຍ້ອນຢູ່ພາຍໃຕ້ການຄວບຄຸມຂອງກຳລັງທະຫານບ້ານຊາວເຄີດໃນຊີເຣຍທີ່ມີຊື່ວ່າໜ່ວຍຄຸ້ມຄອງປະຊາຊົນຫຼື PYG.
