ລັດຖະບານທ່ານ Obama ເອົາທ່າທີຢ່າງລະມັດລະວັງຫລັງຈາກໄດ້ມີການພະ ຍາຍາມເຮັດລັດຖະປະຫານທີ່ປະສົບກັບຄວາມລົ້ມແຫລວໃນເທີກີ ໃນຂະນະທີ່ ຊອກຫາການສະໜັບສະໜູນ ຈາກອົງການ NATO ທີ່ເປັນພັນທະມິດສຳຄັນຢູ່ໃນວິກິດການ ແລະລະມັດລະວັງ ໃນການເອົາບາດກ້າວຂອງ Ankara ທີ່ອາດ ຈະທຳລາຍປະຊາທິປະໄຕ.
ໂຄສົກທຳນຽບຂາວ ທ່ານ Josh Ernest ກ່າວຕໍ່ບັນດານັກຂ່າວໃນວັນພະຫັດວານນີ້ວ່າ “ປະຊາຊົນຢູ່ໃນທົ່ວປະເທດພາກັນຢູ່ດ້ວຍຄວາມຕື່ນຕົກໃຈ ແລະບໍ່ສະບາຍໃຈ ເພາະສະນັ້ນ ສະຫະລັດ ກຳລັງສັງເກດເບິ່ງສະຖານະການຢ່າງໃກ້ ຊິດ ແລະເຄື່ອນໄຫວໄປໜ້າ.”
ນັບແຕ່ທະຫານໄດ້ພະຍາຍາມເຂົ້າຍຶດອຳນາດໃນວັນທີ 15 ເດືອນກໍລະກົດ ລັດຖະບານ ປະທານານທິບໍດີ Tayyip Recep Erdogan ໄດ້ທຳການເຄື່ອນ ໄຫວຢ່າງຮີບດ່ວນ ຈັບກຸມເກືອບ 10,000 ຄົນ. ເຈົ້າໜ້າທີ່ຕຳຫລວດຫລາຍພັນຄົນ ຜູ້ພິພາກສາ ແລະຄູອາຈານ ໄດ້ຖືກໄລ່ອອກ ຫລືສັ່ງໃຫ້ລາອອກ.
ລັດຖະບານໄດ້ປະກາດພາວະສຸກເສີນເປັນເວລາ 90 ມື້ ເພື່ອໃຫ້ລັດຖະບານ “ມີໂອກາດອັນດີເພື່ອຕໍ່ສູ້ຕ້ານຜູ້ວາງແຜນເຮັດລັດຖະປະຫານ” ອີງຕາມຮອງນາ ຍົກລັດຖະມົນຕີ ທ່ານ Numan Kurtulmas.
ລັດຖະບານເທີກີໄດ້ໂຈະ ກອງປະຊຸມກັບຢູໂຣບກ່ຽວກັບເລື້ອງສິດທິມະນຸດແລະ ທ່ານ Erdogan ໄດ້ກ່າວຫາອະດີດພັນທະມິດແລະອາຈານສອນສາສະໜາອິສ ລາມ ທ່ານ Felthullah Gulen ເປັນຜູ້ອອກຫົວຄິດພະຍາຍາມທີ່ຈະຂັບໄລ່ທ່ານອອກຈາກອຳນາດ.
ທ່ານ Gulen ກຳລັງລີ້ໄພຢູ່ເຂດຊົນນະບົດໃນຂອງລັດ Pensylvania ແລະລັດຖະບານເທີກີ ໄດ້ຕິດຕໍ່ກັບບັນດາເຈົ້າໜ້າທີ່ສະຫລັດ ກ່ຽວກັບການສົ່ງໂຕ ທ່ານໃຫ້ແກ່ເທີກີ.
ທຳນຽບຂາວກ່າວວ່າ ບັນດາເຈົ້າໜ້າທີ່ສະຫະລັດ ຍັງທົບທວນລາຍລະອຽດ ທີ່ເທີກີໄດ້ສົ່ງໃຫ້ກ່ຽວກັບທ່ານ Gulen ແລະເບິ່ງວ່າຂໍ້ສະເໜີເຫັນສົມຄວນເປັນຄຳຮ້ອງຂໍທີ່ຈະສົ່ງກັບຄືນ.
ຈຳນວນນື່ງເຫັນວ່າ ທ່ານ Erdogan ໃຊ້ຄວາມພະຍາຍາມເຮັດລັດຖະປະຫານ ເພື່ອເຂົ້າ ກຳອຳນາດໃຫ້ເຂັ້ມແຂງກວ່າເກົ່າ.
ຢູ່ໃນການໂທລະສັບຫາຜູ້ນຳເທີກີໃນວັນອັງຄານທີ່ຜ່ານມາ ປະທານາທິບໍດີ Barack Obama ໄດ້ສະແດງໃຫ້ເຫັນວ່າ ສະຫະລັດສະໜັບສະໜູນລັດຖະ ບານເທີກີ ທີ່ຖືກເລືອກຕັ້ງຢ່າງຖືກຕ້ອງແບບປະຊາທິປະໄຕ ແຕ່ຍັງມີຄວາມເປັນຫ່ວງກ່ຽວກັບການປາບປາມຂອງ Ankara.
