ທະຫານເທີກີສອງຄົນ ຖືກສັງຫານ ແລະ ອີກສີ່ຄົນບາດເຈັບ
ເມື່ອຕອນຄ່ຳວັນເສົາວານນີ້ ໃນເຫດລົດວາງລະເບີດແຕກຂຶ້ນ
ຢູ່ໃນແຂວງທີ່ມີຊາວເຄີດອາໃສຢູ່ເປັນສ່ວນໃຫຍ່ ຢູ່ທາງພາກ
ຕາເວັນອອກສຽງໃຕ້ຂອງເທີກີ.
ເມື່ອຕອນເຊົ້າວັນເສົາວານນີ້ເຊັ່ນກັນ ເຮືອບິນລົບເທີກີຫຼາຍລຳ
ໄດ້ໂຈມຕີຄ້າຍຕ່າງໆ ຂອງພວກຫົວຮຸນແຮງລັດອິສລາມ ຢູ່ໃນ
ຊີເຣຍ ໃນຂະນະດຽວກັນ ກອງກຳລັງເທີກີອີກສ່ວນນຶ່ງ ກໍໄດ້
ໂຈມຕີ ສະຖານທີ່ຂອງພວກ ພັກກຳມະກອນເຄີດ ຫຼື PKK ຢູ່
ທາງພາກຕາເວັນອອກສຽງໃຕ້ ຂອງເທີກີ ແລະ ການໂຈມຕີ
ທາງອາກາດຫຼາຍບັ້ນແນຖືກເປົ້າພວກກະບົດ PKK ທີ່ຕັ້ງຢູ່
ສະຖານທີ່ຕ່າງໆ ໃນພາກເໜືອຂອງອີຣັກ.
ບັນດາເຈົ້າໜ້າທີ່ເທີກີ ກ່າວວ່າ ການໂຈມຕີທາງອາກາດດັ່ງກ່າວ ໃນຊີເຣຍ ແມ່ນໄດ້ແນເປົ້າ ໝາຍໃສ່ເພື່ອສ້າງ “ເຂດປອດໄພ” ໃນທົ່ວບໍລິເວນສ່ວນນຶ່ງ ທີ່ກວ້າງຂວາງ ທາງພາກເໜືອ ຂອງຊີເຣຍ.
ນາຍົກລັດຖະມົນຕີເທີກີ Ahmet Davutoglu ກ່າວໃນວັນເສົາວານນີ້ ວ່າ ການປະຕິບັດ
ການຮັກສາຄວາມໝັ້ນຄົງຂອງເທີກີ ຈະສືບຕໍ່ໄປ ຖ້າຫາກວ່າ ມີຄວາມຈຳເປັນ. ທ່ານ
Davutoglu ເວົ້າວ່າ “ພາລະກິດ ເຫຼົ່ານັ້ນ ບໍ່ແມ່ນເປັນຈຸດດຽວຂອງການປະຕິບັດການຕ່າງໆ ແລະ ຈະສືບຕໍ່ໄປ ຖ້າຫາກວ່າ ຍັງມີການຂົ່ມຂູ່ຕໍ່ເທີກີຢູ່.” ທ່ານເວົ້າອີກ
ວ່າ ບໍ່ມີຜູ້ໃດຄວນສົງໃສຄວາມຕັ້ງໃຈຂອງພວກເຮົາເລີຍ. ພວກເຮົາຈະບໍ່ອະນຸຍາດໃຫ້
ເທີກີ ກາຍມາເປັນປະເທດທີ່ປາດສະຈາກກົດໝາຍ.”
