ບັນດາເຈົ້າໜ້າທີ່ເທີກີກ່າວວ່າ ພວກຊາວເຄີດຊີເຣຍ ຈຳນວນ
ຫຼາຍກວ່າ 130 ພັນຄົນ ໄດ້ຂ້າມຊາຍແດນເຂົ້າໄປໃນເທີກີ ຕັ້ງ
ແຕ່ທ້າຍສັບປະດາຜ່ານມານີ້ ເພື່ອຫລົບໜີຈາກການບຸກຄືບໜ້າ
ໃກ້ເຂົ້າມາຂອງພວກຫົວຮຸນແຮງກຸ່ມລັດອິສລາມ.
ຮອງນາຍົກລັດຖະມົນຕີເທີກີ ທ່ານ Numan Kurtulmus ກ່າ
ວໃນວັນຈັນມື້ນີ້ວ່າ ລັດຖະບານຄາດວ່າ ຈຳນວນດັ່ງກ່າວຈະ
ເພີ້ມຂຶ້ນອີກ ແລະກະກຽມເພື່ອຮັບມືກັບ “ສະຖານະການທີ່
ຮ້າຍແຮງທີ່ສຸດ ທີ່ອາດຈະເກີດຂຶ້ນໄດ້ນັ້ນ”.
ເທີກີ ໄດ້ຮັບເອົາອົບພະຍົບຈາກຊີເຣຍ ປະມານ 850 ພັນຄົນ
ຢູ່ແລ້ວນັບແຕ່ສົງຄາມກາງເມືອງໄດ້ເລີ້ມຂຶ້ນຢູ່ທີ່ນັ້ນ ໃນເດືອນມີນາປີ 2011 ເປັນຕົ້ນມາ. ປະມານ 3 ແສນຄົນແມ່ນໄດ້ເດີນທາງໄປຮອດໃນປີນີ້ເອງ.
ວີດີໂອ: ການບຸກຄືບໜ້າຂອງກຸ່ມລັດອິສລາມ ເຮັດໃຫ້ຊາວເຄີດສ໌ຕ້ອງຫລົບໜີ:
ການຫລັ່ງໄຫລເຂົ້າໄປໃນເທີກີຂອງພວກອົບພະຍົບຄັ້ງຫຼ້າສຸດນີ້ ມີຂຶ້ນໃນຂະນະທີ່ກຸ່ມລັດອິສລາມກຳລັງບຸກຄືບໜ້າເຂົ້າໄປຍັງຂົງເຂດຕ່າງໆຂອງຊາວເຄີດສ໌ ໃນພາກເໜືອຂອງ
ຊີເຣຍໃນໄລຍະນຶ່ງອາທິດມານີ້.
ການບຸກຄືບໜ້າໄປທາງທິດເໜືອຂອງທີ່ໝັ້ນຂອງພວກເຂົາໃນເມືອງ Raqqa ຂອງຊີເຣຍນັ້ນ ໄດ້ເພີ້ມດິນແດນໃສ່ພື້ນທີ່ ທີ່ກຸ່ມລັດອິສລາມ ໄດ້ເຂົ້າຄວບຄຸມຢູ່ໃນພາກຕາເວັນອອກຂອງຊີເຣຍ ຕະຫຼອດທັງພາກ ສ່ວນໃຫຍ່ໆຫຼາຍແຫ່ງໃນພາກເໜືອແລະພາກຕາ
ເວັນຕົກຂອງອີຣັກນຳ.
ພັກແຮງງານເຄີດີສຖານ ຫຼື PKK ໄດ້ອອກຄຳຮຽກຮ້ອງໃຫ້ຊາວເຄີດໃນເທີກີ ຈົ່ງລຸກຂຶ້ນຈັບອາວຸດ ເພື່ອປ້ອງກັນພວກຫົວເມືອງຕ່າງໆໃນເຂດຊາຍແດນຊີເຣຍນັ້ນ.
