ຄູ່ໝັ້ນຂອງນັກຂ່າວ ຊາອຸດີ ອາຣາເບຍ ຜູ້ທີ່ໄດ້ຫາຍສາບສູນໄປ ຫຼັງຈາກໄດ້ເຂົ້າໄປ
ໃນສະຖານກົງສຸນ ຂອງປະເທດດັ່ງກ່າວ ທີ່ຕັ້ງຢູ່ນະຄອນ ອິສຕັນບູລ ປະເທດ ເທີກີ
ເມື່ອສັບປະດາທີ່ຜ່ານມາໄດ້ເວົ້າວ່າ ລາວ “ໄດ້ເປັນຫ່ວງຢ່າງໃດຢ່າງນຶ່ງວ່າ ລາວອາດ
ຕົກຢູ່ໃນອັນຕະລາຍ,” ແຕ່ສິ່ງດັ່ງກ່າວນັ້ນ ບໍ່ໄດ້ເຮັດໃຫ້ລາວຢ້ານວ່າ ຈະມີຫຍັງເກີດ
ຂຶ້ນກັບລາວ ຢູ່ສະຖານທີ່ການທູດນັ້ນ.
ນາງ ຮາຕິສ ເຊັນກິສ ໄດ້ຂຽນລົງໃນໜັງສືພິມ ວໍຊິງຕັນ ໂພສທ໌ ວ່າຄູ່ໝັ້ນຂອງລາວ,
ທ້າວ ຈາມາລ ຄາຊອກກີ, ທຳອິດໄດ້ໄປສະຖານກົງສຸນໃນວັນທີ 28 ກັນຍາທີ່ຜ່ານມາ
ແລະໄດ້ກັບຄືນໄປຕາມນັດ ເພື່ອຮັບເອົາເອກະສານທີ່ສອງຄົນນັ້ນຕ້ອງການເພື່ອໄປ
ແຕ່ງງານ. ແລະລາວກໍບໍ່ໄດ້ຖືກພົບເຫັນນັບຕັ້ງ ແຕ່ນັ້ນມາ.
ນາງ ເຊັນກິສ ໄດ້ສະແດງຄວາມໝັ້ນໃຈໃນຄວາມສາມາດຂອງບັນດາເຈົ້າໜ້າທີ່ ເທີກີ
ໃນການຊອກຫາສິ່ງທີ່ໄດ້ເກີດຂຶ້ນກັບທ້າວ ຄາຊອກກີ, ແລະ ຕໍ່ມາໄດ້ຮຽກຮ້ອງໃຫ້ປະ
ທານາທິບໍດີ ສະຫະລັດ ທ່ານ ດໍໂນລ ທຣຳ “ຊ່ວຍກະຈາຍຂ່າວ” ກ່ຽວກັບ ການຫາຍຕົວ
ຂອງນັກຂ່າວຄົນດັ່ງກ່າວ. ລາວຍັງໄດ້ຮຽກຮ້ອງໃຫ້ບັນດາຜູ້ນຳຂອງ ຊາອຸດີ ອາຣາ
ເບຍ ເປີດເຜີຍວິດີໂອຈາກກ້ອງວົງຈອນປິດ ໃນບໍລິເວນຂອງສະຖານກົງສຸນນັ້ນ.
ຊາອຸດີ ອາຣາເບຍ ເວົ້າວ່າທ້າວ ຄາຊອກກີ ໄດ້ອອກໄປຈາກສະຖານກົງສຸນ ແລະ ໄດ້
ປະຕິເສດຂໍ້ກ່າວຫາຈາກບັນດາເຈົ້າໜ້າທີ່ ຜູ້ທີ່ໄດ້ເວົ້າວ່າ ລາວໄດ້ຖືກຂ້າຕາຍຢູ່ທີ່ນັ້ນ.
ທັງສອງຝ່າຍບໍ່ສະໄດ້ສະແດງຫຼັກຖານ ເພື່ອສະໜັບສະໜູນ ຄຳເວົ້າຂອງເຂົາເຈົ້າ ກ່ຽວ
ກັບ ສິ່ງທີ່ໄດ້ເກີດຂຶ້ນ.
ທ້າວ ຄາຊອກກີ ໄດ້ຕ້ອງຕິລັດຖະບານ ຊາລມານ, ລວມທັງໃນຫຼາຍບົດຂ່າວຂອງໜັງ
ສືພິມ ວໍຊິງຕັນ ໂພສທ໌ ກ່ຽວກັບ ອົງມົງກຸດ ໂມຮຳເມັດ ບິນ ຊາລມານ, ແລະ ໄດ້ມາອາ
ໄສແບບລີ້ໄພຕົນເອງໃນ ສະຫະລັດ ນຶ່ງປີ ຫຼັງຈາກລັດຖະບານ ຣີຢາດ ໄດ້ທຳການປາບ
ປາມພວກຄັດຄ້ານ ໃນຣາຊະອານາຈັກດັ່ງກ່າວ.
ຜູ້ບໍລິຫານໜັງສືພິມ ວໍຊິງຕັນ ໂພສທ໌ ທ່ານ ເຟຣັດ ຣາຍອັນ (Fred Ryan) ທີ່ໄດ້ອອກ
ຄຳຮ້ອງຂອງໜັງສືພິມ ເພື່ອຂໍຂໍ້ມູນນັ້ນ ໃນວັນອັງຄານວານນີ້, ໄດ້ກ່າວວ່າ ທັງຊາອຸດີ
ອາຣາເບຍ ແລະ ເທີກີ ບໍ່ໄດ້ສະໜອງຄຳຕອບທີ່ໜ້າເພິ່ງພໍໃຈໃຫ້.
ທ່ານ ຣາຍອັນ ໄດ້ກ່າວໃນຖະແຫຼງການສະບັບນຶ່ງວ່າ “ການມິດງຽບ, ປະຕິເສດ ແລະ
ເລື່ອນເວລາແມ່ນບໍ່ເປັນທີ່ຍອມຮັບໄດ້. ພວກເຮົາຕ້ອງການຄວາມຈິງ.”
ໜັງສືພິມທີ່ສະໜັບສະນູນລັດຖະບານ ເທີກີ ຊື່ວ່າ ຊາບາ (Sabah) ໄດ້ກ່າວໃນວັນພຸດ
ມື້ນີ້ວ່າ ເຂົາເຈົ້າຮູ້ ກ່ຽວກັບ ກຸ່ມຂອງຜູ້ຊາຍ ຊາອຸດີ ອາຣາເບຍ 15 ຄົນ ຜູ້ທີ່ຖືກກ່າວວ່າ
ໄດ້ເດີນທາງໄປນະຄອນ ອິສຕັນບູລ ໃນວັນທີ່ທ້າວ ຄາຊອກກີ ຫາຍສາບສູນ, ແລ້ວ
ເດີນທາງອອກຈາກ ເທີກີ ໃນຕອນແລງຂອງວັນດຽວກັນນັ້ນ.
ອ່ານຂ່າວນີ້ຕື່ມເປັນພາສາອັງກິດ
