ລັດຖະບານ ເຢຍຣະມັນ ໄດ້ກ່າວໃນວັນຈັນມື້ນີ້ວ່າ ສະຫະພາບ ຢູໂຣບ ແມ່ນກຳລັງພິຈາລະນາຮັບເອົາເດັກນ້ອຍຍົກຍ້າຍຖິ່ນຖານເຖິງ 1,500 ຄົນທີ່ອາໄສຢູ່ໃນສູນທີ່ປະເທດ ກຣີສ ໃນປັດຈຸບັນນີ້.
ລັດຖະບານໄດ້ກ່າວໃນຖະແຫຼງການສະບັບນຶ່ງວ່າ “ການແກ້ໄຂບັນຫາດ້ານມະນຸດສະທຳ ແມ່ນກຳລັງມີການເຈລະຈາຢູ່ໃນລະດັບທະວີບ ຢູໂຣບ ສຳລັບ ‘ລວມກັນຮັບເອົາ’ ເດັກນ້ອຍພວກນີ້. ພວກເຮົາຢາກສະໜັບສະໜູນ ກຣີສ ໃນສະຖານະການດ້ານມະນຸດສະທຳທີ່ຫຍຸ້ງຍາກ ທີ່ມີເດັກນ້ອຍປະມານ 1,000 ຫາ 1,500 ຄົນຢູ່ເທິງເກາະຫຼາຍແຫ່ງຂອງ ກຣີສ.”
ຖະແຫຼງການດັ່ງກ່າວໄດ້ມີຂຶ້ນຫຼັງຈາກນາຍົກລັດຖະມົນຕີ ເຢຍຣະມັນ ທ່ານນາງ ແອນເຈີລາ ເມີໂກລ ໄດ້ຈັດກອງປະຊຸມຄະນະລັດຖະມົນຕີ ກັບພັກ
ທີ່ຮ່ວມຢູ່ໃນລັດຖະບານປະສົມປົກຄອງປະເທດ ເພື່ອປຶກສາຫາລື ກ່ຽວກັບ ວິກິດການຜູ້ຍົກຍ້າຍຖິ່ນຖານ ແລະ ພາວະສຸກເສີນດ້ານສຸຂະພາບ COVID-19.
ປະທານາທິບໍດີ ເທີກີ ທ່ານ ຣີເຊັບ ໄຕຢິບ ເອີດູອານ ແມ່ນຄາດວ່າຈະພົບປະກັບບັນດາເຈົ້າໜ້າທີ່ອາວຸໂສ ສະຫະພາບ ຢູໂຣບ ໃນນະຄອນຫຼວງ ບຣັສໂຊລສ໌ ປະເທດ ແບລຈຽມ ໃນວັນຈັນມື້ນີ້ ເພື່ອປຶກສາຫາລື ກ່ຽວກັບ ການຫຼັ່ງໄຫຼຂອງຜູ້ຍົກຍ້າຍຖິ່ນຖານເຂົ້າໃນ ເທີກີ.
ທ່ານ ເອີດູອານ ໄດ້ກ່າວໃນຄຳປາໄສທີ່ນະຄອນ ອິສຕານບູລ ທ່າມກາງການ ຮຽກຮ້ອງຈາກລັດຖະບານຂອງທ່ານ ເພື່ອຮຽກຮ້ອງໃຫ້ ກຣີສ ເປີດເຂດຊາຍແດນຂອງເຂົາເຈົ້າໃນວັນອາທິດວານນີ້ວ່າ “ຂ້າພະເຈົ້າຫວັງວ່າ ຈະໄດ້ກັບມາຈາກປະເທດ ແບລຈຽມ ພ້ອມກັບຜົນທີ່ແຕກຕ່າງ.”
ໃນຂະນະທີ່ຜູ້ຍົກຍ້າຍຖິ່ນຖານຈາກປະເທດ ຊີເຣຍ ໄດ້ສືບຕໍ່ຂ້າມເຂົ້າໄປໃນ ເທີກີ ນັ້ນ, ທ່ານ ເອີດູອານ ໄດ້ກ່າວວ່າລັດຖະບານ ອັງກາຣາ ບໍ່ສາມາດທີ່ຈະປະຕິບັດຕາມຂໍ້ຕົກລົງປີ 2016 ທີ່ກີດກັ້ນຜູ້ຍົກຍ້າຍຖິ່ນຖານທີ່ເຂົ້າໄປໃນ ເທີກີ ຈາກການເຂົ້າໄປໃນ ສະຫະພາບ ຢູໂຣບ. ເທີກີ ໄດ້ຮັບເອົາອົບພະຍົບ ສາມລ້ານເຈັດແສນຄົນແລ້ວ, ເຊິ່ງສ່ວນຫຼາຍແມ່ນມາຈາກປະເທດ ຊີເຣຍ.
ອີງຕາມຂໍ້ຕົກລົງປີ 2016 ນັ້ນ, ສະຫະພາບ ຢູໂຣບ ຄວນສະໜອງເງິນປະມານ ຫົກລ້ານແປດແສນໂດລາ ເພື່ອສ້າງທີ່ຢູ່ ແລະ ການສຶກສາໃຫ້ຜູ້ຍົກຍ້າຍຖິ່ນຖານ. ແຕ່ລັດຖະບານ ອັງກາຣາ ເວົ້າວ່າ ເຂົາເຈົ້າບໍ່ໄດ້ຮັບເງິນນັ້ນ.
ໃນວັນເສົາທີ່ຜ່ານມາ, ລັດຖະບານ ອັງກາຣາ ໄດ້ໃຫ້ສັນຍານທີ່ເປັນແງ່ບວກ, ໃນຂະນະທີ່ບັນດາເຈົ້າໜ້າທີ່ໄດ້ປະກາດວ່າ ເຂົາເຈົ້າຈະບໍ່ອານຸຍາດໃຫ້ຜູ້ຍົກຍ້າຍຖິ່ນຖານເຂົ້າໃນປະເທດ ກຣີສ ຜ່ານທະເລ ອ່າຈຽນ (Aegean) ອີກຕໍ່ໄປ ຍ້ອນເປັນຫ່ວງດ້ານຄວາມປອດໄພ. ແຕ່ເຂົາເຈົ້າກໍໄດ້ບໍ່ທຳການຫ້າມທີ່ຄ້າຍຄືກັນ ຢູ່ເຂດຊາແດນຂອງເຂົາເຈົ້າຕິດກັບປະເທດ ບຸລກາເຣຍ ແລະ ກຣີສ, ບ່ອນທີ່ການປະທະກັນ ລະຫວ່າງ ຜູ້ຍົກຍ້າຍຖິ່ນຖານ ກັບ ຍາມປ້ອງກັນເຂດຊາຍແດນ ກຣີສ ໄດ້ເຮັດໃຫ້ຄວາມເຄັ່ງຕຶງຮຸນແຮງຂຶ້ນ.
