ຫົວໜ້າອົງການອາຫານໂລກຂອງອົງການສະຫະປະຊາຊາດ ກ່າວວ່າ ພາກເໜືອຂອງເຂດ ກາຊາ ໄດ້ເຂົ້າສູ່ "ຄວາມອຶດຢາກຢ່າງເຕັມຮູບແບບ" ຫຼັງຈາກສົງຄາມເກືອບ 7 ເດືອນລະຫວ່າງ ອິສຣາແອລ ແລະ ກຸ່ມຮາມາສ. ແຕ່ການປະກາດຄວາມອຶດຢາກຢ່າງເປັນທາງການ, ແລະ ຄວາມອ່ອນໄຫວສູງ ຕ້ອງປະເຊີນໜ້າກັບຄວາມຊັບຊ້ອນທາງດ້ານການເມືອງ ແລະການຢືນຢັນຈຳນວນຜູ້ເສຍຊີວິດ, ອີງຕາມອົງການຂ່າວ ເອພີ.
ທ່ານນາງ ຊິນດີ ແມັກເຄນ (Cindy McCain) ໃນການໃຫ້ສໍາພາດກັບສະຖານີໂທລະພາບ NBC ທີ່ອອກອາກາດ ໃນວັນອາທິດທີ່ຜ່ານມາ ກ່າວວ່າຂໍ້ຈໍາກັດທີ່ເຂັ້ມງວດຂອງອິສຣາແອລ ໃນການຈັດສົ່ງດ້ານມະນຸດສະທໍາ ໄປທີ່ດິນແດນທີ່ຕ້ອງອາໄສການຊ່ວຍເຫຼືອດ້ານສະບຽງອາຫານຈາກພາຍນອກມາດົນນານນັ້ນ ໄດ້ກົດດັນໃຫ້ພົນລະເຮືອນໃນເຂດທີ່ຫ່າງໄກ ແລະໄດ້ຮັບຄວາມເສຍຫາຍທີ່ສຸດຂອງ ເຂດກາຊາ ຕ້ອງຕົກຢູ່ໃນໄພອັນຕະລາຍ. ນາງກ່າວວ່າ ຄວາມອຶດຢາກກຳລັງເຄື່ອນຍ້າຍລົງໄປທາງໃຕ້ ໃນເຂດ ກາຊາ.
ຕໍ່ມາໂຄສົກຂອງ WFP ກ່າວຕໍ່ອົງການຂ່າວ AP ໃນເວລາຕໍ່ມາວ່າ ນຶ່ງໃນສາມມາດຕະຖານສໍາລັບການປະກາດພາວະອຶດຢາກຢ່າງເປັນທາງການນັ້ນ ໄດ້ ບັນລຸແລ້ວໃນພາກເຫນືອຂອງ ເຂດກາຊາ ແລະ ອີກມາດຕະຖານນຶ່ງ ກໍເກືອບຈະບັນລຸແລ້ວ ເຊິ່ງແມ່ນລາຍລະອຽດທີ່ສໍາຄັນກ່ຽວກັບຄວາມພະຍາຍາມໃນການບັນທຶກຂໍ້ມູນຄວາມອຶດຢາກທີ່ຮ້າຍແຮງ ວ່າໄດ້ດຳເນີນໄປຮອດໃສແລ້ວ.
ອິສຣາແອລປະເຊີນກັບແຮງກົດດັນທີ່ເພີ່ມຂື້ນຈາກພັນທະມິດອັນດັບຕົ້ນໆຄືສະຫະລັດ ແລະປະເທດອື່ນໆ ເພື່ອໃຫ້ການຊ່ວຍເຫລືອເຂົ້າໄປໃນເຂດກາຊາຫຼາຍຂຶ້ນ, ໂດຍສະເພາະແມ່ນໂດຍການເປີດຈຸດຜ່ານແດນໃຫ້ຫຼາຍຂຶ້ນກວ່າເກົ່າສຳລັບການຂົນສົ່ງດ້ວຍລົດບັນທຸກທີ່ມີປະສິດທິພາບທີ່ສຸດ. ກຸ່ມຊ່ວຍເຫຼືອກ່າວວ່າ ການຈັດສົ່ງທາງອາກາດ ແລະທາງທະເລ ໂດຍສະຫະລັດ ແລະປະເທດອື່ນໆ ບໍ່ສາມາດຕອບສະໜອງຄວາມຕ້ອງການຂອງປະຊາຊົນ 2.3 ລ້ານຄົນ ໃນເຂດກາຊາໄດ້, ເຊິ່ງຈໍານວນທີ່ເພີ່ມຂຶ້ນຂອງພວກເຂົາ ມາຮອດລະດັບຂອງພາວະການຂາດສານອາຫານ ທີ່ການຈະເລີນເຕີບໂຕຂອງເດັກນ້ອຍແມ່ນ ຈະເລີນເຕີບໂຕຊ້າ ແລະເຮັດໃຫ້ມີການເສຍຊີວິດເກີດຂຶ້ນ.
ຄວາມອຶດຢາກໄດ້ຖືກຄາດຄະເນຢູ່ໃນບາງສ່ວນຂອງເຂດກາຊາ ໃນເດືອນນີ້ ໃນບົດລາຍງານເດືອນມີນາ ໂດຍການຈັດປະເພດໄລຍະຄວາມປອດໄພດ້ານອາຫານແບບປະສົມປະສານ, ເຊິ່ງແມ່ນໂຄງການລິເລີ່ມລະດັບໂລກ ທີ່ປະກອບມີ WFP ເປັນຄູ່ຮ່ວມງານ. ລາຍງານໄດ້ກ່າວວ່າ ເກືອບນຶ່ງສ່ວນສາມຂອງປະຊາກອນຂອງ ເຂດກາຊາ ກຳລັງປະເຊີນກັບລະດັບຄວາມອຶດຫິວຂັ້ນສູງສຸດ, ແລະ ອາດຈະເພີ່ມຂຶ້ນເປັນເກືອບເຄິ່ງນຶ່ງໃນເດືອນກໍລະກົດນີ້.
ຟໍຣັມສະແດງຄວາມຄິດເຫັນ