ທ່ານນາງ ຢິ່ງລັກ ຊິນນະວັດ ໄດ້ໂຜ່ໂຕຂຶ້ນມາເປັນຜູ້ຊະນະໃນນຶ່ງຂອງການເລືອກຕັ້ງທີ່ມີ
ເດີມພັນສູງທີ່ສຸດ ໃນປະວັດສາດບໍ່ດົນຜ່ານມາຂອງປະເທດໄທ.
ພັກເພື່ອໄທຂອງທ່ານນາງ ໄດ້ຮັບໄຊຊະນະເປັນຜູ້ກໍາສຽງສ່ວນຫລາຍຢ່າງງ່າຍດາຍ ໃນອັນ
ທີ່ເປັນການປະຕິເສດຢ່າງສິ້ນເຊີງຕໍ່ພວກເຈົ້າຂຸນມູນນາຍຫົວກະທິດັ້ງເດີມຂອງໄທ ທີ່ສະໜັບ
ສະໜຸນພັກປະຊາທິປັດຂອງນາຍົກລັດຖະມົນຕີ ອະພິສິດ ເວດຊາຊີວະ ຊຶ່ງເປັນພັກທີ່ປົກ ຄອງປະເທດຢູ່ໃນເວລານີ້.
ເວລານີ້ ນັກທຸລະກິດ ໄວ 44 ປີຄົນນີ້ ກໍາລັງຕຽມໂຕເຂົ້າຮັບຕໍາແໜ່ງທາງການເມືອງເປັນ ເທື່ອທໍາອິດ ໃນຖານະນາຍົກລັດຖະມົນຕີຍິງຄົນທໍາອິດຂອງໄທ.
ທ່ານນາງ ຢິ່ງລັກ ກ່າວວ່າ ຫລັງຈາກຄວາມວຸ້ນວາຍບໍ່ສະຫງົບສຸກດ້ານການເມືອງ ແລະຄວາມຮຸນແຮງຢູ່ຕາມຖະໜົນຫົນທາງມາເປັນເວລາຫລາຍປີແລ້ວນັ້ນ ບັດນີ້ ປະເທດໄທອາດສາມາດໄດ້ຮັບຜົນປະໂຫຍດ ຈາກການມີແມ່ຍິງ ເປັນຜູ້ນໍາກໍໄດ້ ຊຶ່ງທ່ານນາງກ່າວວ່າ:
“ຂ້າພະເຈົ້າຄິດວ່າ ຂ້າພະເຈົ້າສາມາດໃຊ້ວິທີການໃນຖານະແມ່ຍິງ ເພື່ອໂອ້ລົມກັບທຸກໆຄົນ ເພື່ອ ເຮັດໃຫ້ປະເທດຊາດກ້າວໄປຂ້າງໜ້າ ໂດຍຍຸທະສາດທີ່ສັນຕິ.”
ແຕ່ພວກທີ່ຕ້ອງຕິແລະວິຈານທ່ານນາງຢິ່ງລັກກ່າວວ່າ ທ່ານນາງເປັນພຽງຫຸ່ນຂອງອ້າຍ
ກໍຄືທ່ານທັກສິນ ຊິນນະວັດ ຜູ້ນໍາທີ່ສ້າງຄວາມແຕກແຍກ ທີ່ຖືກທະຫານໂຄ່ນລົ້ມໃນປີ 2006 ນັ້ນ
ການກໍ່ລັດຖະປະຫານໄດ້ນໍາໄປສູ່ການຍາດແຍ່ງອໍານາດກັນເປັນເວລານຶ່ງປີ ລະຫວ່າງພວກເຈົ້າຂຸນມູນນາຍດັ້ງເດີມຂອງບາງກອກ ກັບຜູ້ສະໜັບສະໜຸນທ່ານທັກສິນ ທີ່ໄດ້ພາກັນທໍາການປະທ້ວງ ທີ່ໄດ້ຍັງຜົນໃຫ້ເຂດໃຈກາງນະຄອນຫລວງບາງກອກ ຕ້ອງໄດ້ອັດລົງເມື່ອປີຜ່ານມາ.
ພວກປະກອບອາວຸດໃນກຸ່ມພວກປະທ້ວງ ໄດ້ທໍາການຕໍ່ສູ້ຕາມຖະໜົນຫົນທາງກັບກໍາລັງທະຫານ ທີ່ລັດຖະບານສົ່ງໄປປາບການປະທ້ວງນັ້ນ ຍັງຜົນໃຫ້ມີຜູ້ເສຍຊີວິດ ຫລາຍກວ່າ 90 ຄົນ ຊຶ່ງສ່ວນໃຫຍ່ເປັນພົນລະເຮືອນ.
ໃນການເຄື່ອນໄຫວຕອບຕໍ່ຄວາມຮຸນແຮງດັ່ງກ່າວ ພວກອົງການຕ່າງໆຂອງແມ່ຍິງຫລາຍກວ່າ 60 ອົງການ ໄດ້ຮ່ວມກັນຈັດຕັ້ງ ເຄືອຂ່າຍແມ່ຍິງເພື່ອຫລໍ່ຫລອມປະເທດໄທຄືນໃໝ່ ເພື່ອຊຸກຍູ້ໃຫ້ພວກແມ່ຍິງເຂົ້າພົວພັນໃນການເມືອງຫລາຍຂຶ້ນ. ໃນບໍ່ເທົ່າໃດປີຜ່ານມານັ້ນ ແມ່ຍິງແມ່ນປະກອບເປັນພຽງແຕ່ປະມານ 15 ເປີເຊັນ ຂອງພວກຜູ້ນໍາທີ່ຖືກເລືອກຕັ້ງຂອງປະເທດ.
ຄລິກຢູ່ບ່ອນນີ້ ເພື່ອເບິ່ງວີດີໂອພາສາລາວ ຫລືບ່ອນ mp4 ຫລື window media ຂ້າງເທິງຂວາມື
ຜູ້ປະສານງານກຸ່ມເຄືອຂ່າຍແມ່ຍິງ ນາງ ສຸທາດາ ເມກຣຸ່ງເຣືອງກຸລ ສົມທຽບການແບ່ງແຍກໃນປັດຈຸບັນຂອງໄທ ໃສ່ກັບເດັກນ້ອຍຜູ້ຊາຍສອງຄົນ ທີ່ກໍາລັງຊົກຕ່ອຍກັນຢູ່ເດີນໂຮງຮຽນ. ນາງເວົ້າວ່າ: “ຄວາມຮູ້ສຶກຂອງພວກເຮົາ ວິທີແກ້ໄຂບັນຫາຂອງພວກເຮົາ ຂໍ້ສະເໜີແນະຂອງພວກເຮົາ ກໍຄື ເຈລະຈາກັນ ນັ່ງລົມກັນ. ບາງທີພວກເຮົາບໍ່ຈໍາເປັນຈະຕ້ອງຕົບຕີກັນ ພວກເຮົາບໍ່ຈໍາເປັນຕ້ອງໃຊ້ອໍານາດເພື່ອກໍາຈັດປັດເຂ່ຍຜູ້ໃດຜູ້ນຶ່ງອອກໄປ”
ວົງການທຸລະກິດຂອງໄທແມ່ນເປັນຜູ້ນຶ່ງທີ່ນໍາໜ້າໂລກຢູ່ແລ້ວ ໃນການວ່າຈ້າງແມ່ຍິງເຂົ້າ ຮັບຕໍາແໜ່ງລະດັບຫົວໜ້າບໍລິຫານ. ການສໍາຫລວດເມື່ອບໍ່ດົນຜ່ານມານີ້ ລາຍງານວ່າ 30 ເປີເຊັນຂອງພວກບໍລິສັດຕ່າງໆນັ້ນມີແມ່ຍິງເປັນຫົວໜ້າບໍລິຫານງານ ຫລື CEO ແຕ່ແມ່ຍິງໄທກໍຍັງລ້າຫລັງຜູ້ຊາຍໄທຢູ່ ໃນເລຶ່ອງການເມືອງນັ້ນ.
ເຖິງແມ່ນການສະມັກເລືອກຕັ້ງຂອງທ່ານນາງຢິ່ງລັກ ໄດ້ຮັບການໂຄສະນາເຜີຍແຜ່ຢ່າງໂດ່ງ ດັງກໍຕາມ ພັກການເມືອງໃຫຍ່ໆທັງໝົດໃນການເລືອກຕັ້ງ ໂຮມທັງພັກຂອງທ່ານນາງເອງ ສ່ວນໃຫຍ່ແລ້ວແມ່ນໄດ້ບໍ່ເອົາຫົວຊາຕໍ່ກົດເກນແຫ່ງລັດຖະທໍາມະນູນ ທີ່ຮຽກຮ້ອງໃຫ້ມີການປະກອບສ່ວນໃນສັດສ່ວນທີ່ເທົ່າທຽມກັນກັບຜູ້ຊາຍ ຂອງຜູ້ສະໝັກທີ່ເປັນແມ່ຍິງນັ້ນ.
ພວກແມ່ຍິງແມ່ນປະກອບເປັນ 16 ເປີເຊັນຂອງຜູ້ຖືກຄັດເລືອກລົງສະໝັກ ສສ ຂອງພັກເພື່ອໄທ ໃນຂະນະທີ່ພັກປະຊາທິປັດມີພວກແມ່ຍິງພຽງ 11 ເປີເຊັນ ສ່ວນຫລາຍແມ່ນຢູ່ທ້າຍບັນຊີ.
ທີ່ກອງປະຊຸມກ່ອນການເລືອກຕັ້ງ ສໍາລັບພວກແມ່ຍິງທີ່ຖືກຄັດເລືອກລົງ ສະໝັກອັນດັບສູງສຸດ ມີແມ່ຍິງພຽງບໍ່ເທົ່າໃດຄົນທີ່ໄປຮ່ວມ ແລະກໍບໍ່ມີຜູ້ໃດສົນໃຈຢາກຈະຍົກເອົາບັນຫາເລຶ່ອງການຂາດແຄນການສະໜັບສະໜຸນພວກແມ່ຍິງໃນວົງການການເມືອງ ຂຶ້ນມາປຶກສາຫາລືກັນ.
ນາງ ສຸທາດາ ກ່າວວ່າ ມີແມ່ຍິງໃນຈໍານວນຫລາຍເກີນໄປ ທີ່ຮຽນຮູ້ການໃຊ້ວາທະສິນ ຫລື ສິນລະປະໃນການປາກເວົ້າດ້ານການເມືອງ ພຽງເພື່ອໃຫ້ ຖືກເລືອກຕັ້ງເທົ່ານັ້ນ ແລະກໍມີຄວາມສົນໃຈໜ້ອຍຫລາຍ ທີ່ຈະຜັກດັນພັກການເມືອງຕ່າງໆ ໃຫ້ຈັດໃຫ້ມີແມ່ຍິງເຂົ້າສະມັກ ຮັບເລືອກຕັ້ງຫລາຍຂຶ້ນ. ນາງ ສຸທາດາ ເວົ້າວ່າ:
“ຂ້າພະເຈົ້າຄິດວ່າມັນເປັນວັດທະນະທໍາຫລາຍກວ່າ ເວົ້າໂດຍທາງກົດໝາຍແລ້ວ ພວກເຮົາຕ້ອງປະຕິບັດຕາມ ແຕ່ໂດຍທໍາມະຊາດຫລືຕາມປະເພນີແລ້ວ ເຮົາແມ່ນບໍ່ເອົາຫົວຊາ ຄືເມີນເສີຍຢ່າງອັດຕະໂນມັດໄປເລີຍ.”
ນາງສຸທາດາກ່າວວ່າ ມັນຈະໄວເກີນໄປທີ່ຈະບອກໄດ້ວ່າ ການໂຜ່ໂຕຂຶ້ນມາສູ່ອໍານາດຂອງທ່ານນາງຢິ່ງລັກຄັ້ງນີ້ ຈະມີຄວາມໝາຍແນວໃດກ່ຽວກັບບົດບາດຂອງພວກແມ່ຍິງໃນວົງການເມືອງຂອງໄທ ຫລືຄວາມພະຍາຍາມຫາທາງສ້າງຄວາມປອງດອງພື່ອແກ້ໄຂບັນຫາການແຕກແຍກທາງການເມືອງອັນຂື່ນຂົມຂອງໄທນັ້ນ.
ເວລານີ້ ພັກເພື່ອໄທກໍາລັງຄິດໄກ່ກອງທີ່ຈະໃຫ້ນີລະໂທດກໍາແກ່ພວກນັກເຄຶ່ອນໄຫວດ້ານການເມືອງ ແລະພວກນັກການເມືອງທີ່ຖືກສັ່ງຫ້າມບໍ່ໃຫ້ຫລິ້ນການເມືອງນັ້ນ. ນອກນີ້ແລ້ວ ທ່ານນາງຢິ່ງລັກ ກໍກໍາລັງພິຈາລະນາອະໄພໂທດໃຫ້ແກ່ອ້າຍຂອງທ່ານນາງ ຄືທ່ານທັກສິນ ຊິນນະວັດ ທີ່ລີ້ໄພ ຢູ່ຕ່າງປະເທດມາຕັ້ງແຕ່ປີ 2008 ເພື່ອຫລີກໂທດຈໍາຄຸກໃນຂໍ້ຫາສໍ້ລາດບັງຫລວງ.
ການກັບຄືນມາປະເທດໄທຂອງທ່ານທັກສິນ ອາດຈະກໍ່ໃຫ້ເກີດຄວາມບໍ່ສະຫງົບໃນໄທຂຶ້ນອີກຮອບນຶ່ງໄດ້ ແຕ່ທ່ານນາງຢິ່ງລັກກ່າວວ່າ ການກັບຄືນມາຂອງທ່ານທັກສິນ ບໍ່ແມ່ນບູລິມະສິດ ໃນເວລານີ້.
“ຂ້າພະເຈົ້າຢາກຈະເວົ້າວ່າ ການໃຫ້ນີລະໂທດກໍານັ້ນ ມັນເປັນພຽງເທັກນິກ ເທກນິກອັນນຶ່ງ ໃນການສ້າງຄວາມປອງດອງ ແຕ່ພວກເຮົາບໍ່ໄດ້ແນເປົ້າໝາຍໃສ່ການໃຫ້ນີລະໂທດກໍາເທື່ອໃນເວລານີ້. ພວກເຮົາແນເປົ້າໝາຍໃສ່ວ່າພວກເຮົາຈະນໍາພາປະເທດຊາດເຄຶ່ອນໄຫວໄປໜ້າໄດ້ແນວໃດ ພວກເຮົາຈະເຮັດວິທີໃດເພື່ອຊ່ວຍໃຫ້ໄທເປັນນໍ້ານຶ່ງໃຈດຽວກັນໄດ້.”
ໃນຂະນະທີ່ທ່ານນາງຢິ່ງລັກ ກຽມທີ່ຈະເຂົ້າດໍາລົງຕໍາແໜ່ງນາຍົກລັດຖະມົນຕີຄົນຕໍ່ໄປຂອງໄທໃນອີກບໍ່ເທົ່າໃດອາທິດຕໍ່ໜ້ານີ້ ປະຊາຊົນໄທທັງໝົດກໍກໍາລັງລໍຖ້າເບິ່ງວ່າ ຄວາມຊໍາ ນານດ້ານການເມືອງທີ່ຍັງບໍ່ໄດ້ຖືກທົດສອບຂອງທ່ານນາງນັ້ນ ຈະສາມາດເອົາຊະນະການແຕກແຍກອັນເລິກເຊິ່ງຂອງໄທໄດ້ຫລືບໍ່ ຫລື ທ່ານນາງຈະສາມາດຫັນປ່ຽນທັດສະນະຄະ ຕິທາງການເມືອງ ໃນລະຫວ່າງພວກຜູ້ຊາຍແລະແມ່ຍິງນັ້ນໄດ້ ຫລືບໍ່?
ເບິ່ງວີດີໂອ ພາສາອັງກິດ
