ພັກຝ່າຍຄ້ານໃຫຍ່ທີ່ສຸດຂອງໄທ ກໍາລັງຮຽກຮ້ອງຂໍຄໍາຊີ້ແຈງຈາກລັດຖະບານກ່ຽວກັບ
ບົດບາດຂອງຕົນໃນການຕັດສິນໃຈຂອງຍີ່ປຸ່ນ ອອກວີຊາໃຫ້ອະດີດນາຍົກລັດຖະມົນຕີ
ທັກສິນ ຊິນນະວັດ ຜູ້ຫລົບໜີຄະດີນັ້ນ.
ໂຄສົກພັກປະຊາທິປັດກ່າວວ່າ ລັດຖະບານ ອາດໄດ້ພາໃຫ້ປະຊາຊົນເຂົ້າໃຈຜິດກ່ຽວກັບ
ການໂອ້ລົມສົນທະນາຂອງຕົນກັບບັນດາເຈົ້າໜ້າທີ່ຍີ່ປຸ່ນ ໂດຍອ້າງເຖິງການໃຫ້ຄໍາຊີ້ແຈງ
ບໍ່ຕົງກັນ ໃນສັບປະດານີ້.
ລາຍງານຂ່າວເວົ້າວ່າ ພັກປະຊາທິປັດ ທີ່ຫາກໍໄດ້ຮັບການປລາໄຊເມື່ອໄວໆມານີ້ກໍາລັງ
ພິຈາລະນາທໍາການເຄື່ອນໄຫວທາງກົດໝາຍຕໍ່ທ່ານ ສຸຣະພົງ ໂຕວິຈັກໄຊກຸນ ລັດຖະມົນ
ຕີການຕ່າງປະເທດໃໝ່ຂອງໄທ ຖ້າຜູ້ກ່ຽວສະໜັບສະໜຸນ ຫລືສົ່ງເສີມໃຫ້ຍີ່ປຸ່ນອອກວີຊາ
ໃຫ້ທ່ານທັກສິນນັ້ນ. ກົດໝາຍຂອງຍີ່ປຸ່ນ ຫ້າມອອກວີຊາໃຫ້ຜູ້ຫລົບໜີຄະດີ ເວ້ນເສຍແຕ່
ພາຍໃຕ້ກໍລະນີພິເສດເທົ່ານັ້ນ.
ລາຍງານເວົ້າວ່າ ພັກຝ່າຍຄ້ານໂຕ້ແຍ້ງວ່າ ລັດຖະບານໃໝ່ຂອງໄທ ພາຍໃຕ້ການນໍາພາ
ຂອງທ່ານຍິ່ງຣັກ ນ້ອງສາວຂອງທ່ານທັກສິນ ມີພັນທະທາງດ້ານກົດໝາຍສືບຕໍ່ຊອກຫາ
ຈັບກຸມທ່ານທັກສິນ ແລະສົ່ງໂຕຜູ້ກ່ຽວມາດໍາເນີນຄະດີໃນປະເທດ. ທ່ານທັກສິນຖືກຕັດ
ສິນລັບຫລັງ ຖານມີຄວາມຜິດໃນຂໍ້ຫາທໍາການສໍ້ລາດບັງຫລວງ ຫລືທຸດຈະລິດໃນຂະນະທີ່
ພັກປະຊາທິປັດປົກຄອງປະເທດຢູ່ນັ້ນ.
