ຊາວໂຣຮິງຢາຈາກລັດ Arakan ຂອງມຽນມາ ແລະຈາກ
ບັງກລາເທດ ພາກັນຫລົບໜີອອກມາເປັນຈໍານວນຫລາຍ
ພັນຄົນໃນແຕ່ລະປີ ເພື່ອໜີການປະຫັດປະຫານກົດຂີ່ຂົ່ມ
ເຫງໃນມຽນມາ ແລະຄວາມທຸກຈົນ ໃນປະເທດບັງກລາ ເທດນັ້ນ.
ມີຊາວໂຣຮິງຢາຫລາຍກວ່າ 25,000 ຄົນ ອາໃສຢູ່ໃນ
ບັງກລາເທດໃນສູນອົບພະຍົບ ທີ່ກໍາກັບດູແລໂດຍຫ້ອງ
ການຂ້າຫລວງໃຫຍ່ຝ່າຍດູແລຜູ້ອົບພະຍົບຂອງອົງການ ສະຫະປະຊາຊາດ
ແຕ່ກໍຍັງມີອີກ 200,000 ຄົນທີ່ອາໃສຢູ່ໃນສະພາບເປື້ອນ
ເປີະຢູ່ໃນສູນອົບພະຍົບຫລາຍໆແຫ່ງ ໂດຍບໍ່ໄດ້ຮັບການ
ຊ່ວຍເຫລືອໃດໆເລີຍ. ຢູ່ໃກ້ໆກັນນັ້ນ ກໍຄືໃນລັດ Arakan
ຂອງມຽນມານັ້ນ ພວກກຸ່ມສິດທິກ່າວວ່າ ຊາວໂຣຮິງຢາ ທີ່
ເປັນປະຊາຄົມຊາວມຸສລິມ ແມ່ນປະເຊີນກັບການກົດຂີ່ຂົ່ມ ເຫັງໂດຍລັດຖະບານທະຫານມຽນມາ ຢູ່ຕະຫລອດມາ.
ທຸກໆປີ ຫລັງຈາກລະດູຝົນມໍລະສຸມ ຊາວໂຣຮິງຢາຈໍານວນຫລາຍໆຄົນ ພາກັນຈ່າຍເງິນ
ຈ້າງພວກລັກລອກຂົນສົ່ງ ໃຫ້ພາພວກເຂົາເຈົ້າຂີ່ເຮືອ ມຸ້ງໜ້າໄປສູ່ຂົງເຂດເອເຊຍຕາເວັນ
ອອກສຽງໃຕ້ ບ່ອນທີ່ພວກເຂົ້າເຈົ້າຫວັງວ່າ ຈະໄດ້ພົບກັບຊີວິດທີ່ດີຂື້ນ.
ປີນີ້ກໍຄືກັນ ບໍ່ມີການຍົກເວັ້ນໃດໆ.
ກຸ່ມສິ້ງຊອມດ້ານສິດທິມະນຸດ ຫລື Human Rights Watch ກ່າວວ່າ ມີເຮືອຂົນສົ່ງເຖິງ
10 ລໍາ ທີ່ເລີ່ມແລ່ນອອກມາ ໃນບໍ່ເທົ່າໃດອາທິດຜ່ານມານີ້. ໃນອາທິດແລ້ວນີ້ ຕໍາຫລວດ
ນໍ້າອິນໂດເນເຊຍໄດ້ກູ້ໄພ ພວກຊາວໂຣຮິງຢາ ຈໍານວນ 129 ຄົນທີ່ລອຍລໍາຢູ່ໜ້ານໍ້າ ເປັນ
ເວລາຫລາຍມື້ ຫລັງຈາກເຄຶ່ອງຈັກເຮືອຂອງເຂົາເຈົ້າເພ.
ທ່ານ Phil Robertson ຮອງຜູ້ອໍານວຍການພາກພື້ນເອເຊຍຂອງກຸ່ມສິດທິມະນຸດ HRW
ກ່າວວ່າ ມີເຮືອຢ່າງໜ້ອຍສາມລໍາ ທີ່ໄດ້ໄປຮອດແລະເຂົ້າຈອດ ຝັ່ງ ຢູ່ເຂດພາກໃຕ້ຂອງໄທ ທີ່ບັນທຸກຊາວໂຣຮິງຢາຫລາຍກວ່າ 220 ຄົນ. ທ່ານໂຣບິນສັນ ກ່າວວ່າ:
“ພວກຊາວອົພຍົບທີ່ເດີນທາງໄປເຖິງຝັ່ງທະເລ ຂອງໄທນັ້ນ ຄວນຈະໄດ້ຮັບການ
ຕ້ອນຮັບແລະເບິ່ງແຍງເປັນຢ່າງດີ. ຂ້າພະເຈົ້າຢາກເວົ້າຕື່ມວ່າ ນອກນີ້ແລ້ວ ກໍຍັງ
ມີຄວາມເປັນຫ່ວງອັນໃຫຍ່ຫລວງອີກວ່າ ຍັງມີເຮືອອີກຫລາຍລໍາຢູ່ກາງທະເລ.
ສະນັ້ນ ມັນກໍບໍ່ເປັນທີ່ແຈ້ງຂາວວ່າ ກອງທັບເຮືອຂອງໄທ ຈະສະກັດເຮືອອີກລໍານຶ່ງ
ຫລືບໍ່ ແລະພວກເຂົາເຈົ້າຈະຈັດການຢ່າງໃດ ກັບເຮືອລໍານັ້ນ ຄືພວກເຮົາໄດ້ຮັບ
ແຈ້ງມາວ່າ ມີເຮືອ ຈໍານວນລະຫວ່າງ 9 ຫາ 10 ລໍາ ທີ່ໄດ້ແລ່ນອອກຈາກບັງ
ກລາເທດ ມຸ້ງໜ້າມາທາງຂົງເຂດນີ້.”
ໃນອະດີດຜ່ານມາ ກອງທັບເຮືອຂອງໄທຖືກຕໍາໜິຕິຕຽນວ່າ ໄດ້ບັງຄັບເຮືອບັນທຸກພວກໂຣ
ຮິງຢາ ກັບຄືນອອກສູ່ທະເລ.
ເມື່ອຕົ້ນເດືອນນີ້ ພວກເຈົ້າໜ້າທີ່ອິນເດຍໄດ້
ຊ່ວຍກູ້ໄພຊາວໂຣຮິງຢາ 91 ຄົນໃນເຂດທະ
ເລອັນດາມັນ ຊຶ່ງລາຍງານເວົ້າວ່າມີຫລາຍຄົນ
ຢູ່ໃນສະພາບອຶດຫິວແລະຂາດນໍ້າ. ພວກຊາວ
ອົບພະຍົບອ້າງວ່າ ພວກເຂົາເຈົ້າໄດ້ຖືກກອງ
ທັບເຮືອຂອງໄທ ບັງຄັບໃສສົ່ງເຮືອຂອງເຂົາ
ເຈົ້າກັບຄືນອອກໄປກາງທະເລ. ກຸ່ມສິ້ງຊອມ
ສິດທິມະນຸດ HRW ກ່າວວ່າ ການສຶກສາສໍາ
ຫລວດຂອງຕົນໄດ້ສະໜັບສະໜຸນການອ້າງ ອິງຂອງພວກອົບພະຍົບ.
ແຕ່ພວກເຈົ້າໜ້າທີ່ໄທໄດ້ບອກອົງການສະຫະ
ປະຊາຊາດວ່າ ພວກຕົນບໍ່ໄດ້ປະຕິບັດຢ່າງບໍ່
ຖືກບໍ່ຕ້ອງ ຕໍ່ພວກຊາວໂຣຮິງຢາແຕ່ຢ່າງໃດ.
ລັດຖະມົນຕີຕ່າງປະເທດຂອງໄທກ່າວວ່າ
ຊາວໂຣຮິງຢາອ້າງວ່າ ພວກເຂົາເຈົ້າເປັນຊາວມຽນມາ ແລະພວກເຈົ້າໜ້າທີ່ໄທກໍໄດ້ສົ່ງເຂົາ
ເຈົ້າກັບຄືນໄປ ທີ່ດ່ານຂ້າມຊາຍແດນໃນຈັງຫວັດຣະນອງ. ກະຊວງຕ່າງປະເທດໄທກ່າວວ່າ
ຕົນບໍ່ຮູ້ເລີຍວ່າພວກອົບພະຍົບເຫລົ່ານັ້ນເດີນທາງໂດຍວິທີໃດ ຫລັງຈາກອອກຈາກດິນໄທ ໄປແລ້ວນັ້ນ.
ເວລານີ້ ພວກເຈົ້າໜ້າທີ່ກວດຄົນເຂົ້າເມືອງຂອງໄທກໍາລັງກັກຕົວຊາວໂຣຮິງຢາໄວ້ ຈໍານວນ
135 ຄົນ ໂຮມທັງເດັກນ້ອຍຈໍານວນນຶ່ງ ທີ່ເດີນທາງມາເຖິງຝັ່ງທະເລພາກໃຕ້ຂອງໄທ ໂດຍ ເຮືອສອງລໍາ.
ສະມາຄົມທະນາຍຄວາມຂອງໄທກ່າວວ່າ ສິດທິທາງກົດໝາຍຂອງຊາວໂຣຮິງຢານັ້ນ ແມ່ນ
ຈໍາເປັນຕ້ອງຖືກຮັບຮູ້ ແລະພວກເຂົາເຈົ້າບໍ່ຄວນຈະຖືກສົ່ງກັບຄືນໄປໂດຍອັດຕະໂນມັດ.
ນາຍສຸຣະພົງ ຄອງຈັນທຶກ ປະທານອະນຸກໍາມະການດ້ານພວກຊົນເຜົ່ານ້ອຍແລະພວກຄົນ
ງານຊາວຕ່າງດ້າວຂອງສະມາຄົມທະນາຍຄວາມໄທ ກ່າວວ່າ ກໍລະນີຂອງພວກອົບພະຍົບ
ເຫລົ່ານີ້ ຄວນຈະຜ່ານຂະບວນການຕຸລາການ.
ນາຍສຸຣະພົງເວົ້າວ່າ ພວກເຈົ້າໜ້າທີ່ກວດຄົນເຂົ້າເມືອງຂອງໄທ ແມ່ນໄດ້ລະເມີດກົດໝາຍ
ໃນການບັງຄັບໃສສົ່ງພວກຊາວຕ່າງດ້າວເຫລົ່ານີ້ ກັບຄືນບ້ານນັ້ນ. ລາວກ່າວຕໍ່ໄປວ່າ ຖ້າ
ຫາກວ່າພວກເຂົາເຈົ້າເຂົ້າມາໄທ ຢ່າງຜິດກົດໝາຍແທ້ແລ້ວ ພວກເຈົ້າໜ້າທີ່ກວດຄົນເຂົ້າ
ເມືອງຂອງໄທ ກໍຕ້ອງໄດ້ເອົາບາດກ້າວດໍາເນີນການຢ່າງຖືກຕ້ອງເໝາະສົມ ໂດຍຕິດຕໍ່ໄປຍັງ
ປະເທດເດີມຂອງພວກເຂົາເຈົ້າ ເຊັ່ນບັງກລາເທດນັ້ນ.
ສະມາຄົມປະຊາຊາດເອເຊຍຕາເວັນອອກສຽງໃຕ້ ຫລືອາຊ່ຽນ ໄດ້ຈັດຕັ້ງ ອັນທີ່ເອີ່ນວ່າ ຂັ້ນ
ຕອນບາຫລີ ຂື້ນມາ ຊຶ່ງເປັນກົນໄກສໍາລັບໃຫ້ພວກປະເທດໃນຂົງເຂດນໍາໃຊ້ ເພື່ອແກ້ໄຂບັນ
ຫາການຄ້າແລະລັກລອບຂົນສົ່ງມະນຸດ. ແຕ່ພວກກຸ່ມສິດທິກ່າວວ່າ ຂັ້ນຕອນທີ່ວ່ານັ້ນ ແມ່ນ
ບໍ່ໄດ້ສ້າງຄວາມກ້າວໜ້າໃດໆເລີຍ ໃນການຊ່ວຍຜ່ອນເບົາຊະຕາກໍາຂອງພວກກຸ່ມຄົນ ເຊັ່ນ ຊາວໂຣຮິງຢານັ້ນ.
