ເວລານີ້ ຍັງບໍ່ມີການປະເມີນທີ່ໜ້າເຊື່ອຖືໄດ້ເທື່ອວ່າ ມີປະຊາຊົນຈໍານວນຫລາຍປານໃດທີ່
ຍັງຕົກຕ້າງຢູ່ໃນຫລາຍໆເຂດປະຊາຄົມທີ່ຖືກນໍ້າຖ້ວມ ຢູ່ໃນບາງກອກ ແລະພວກເຂດທາງທິດເໜືອຂອງບາງກອກ. ພວກພະນັກງານຊ່ວຍເຫລືອກ່າວວ່າ ໃນຈໍານວນປະຊາຊົນຫລາຍ
ລ້ານທີ່ຖືກກະທົບໂດຍໄພນໍ້າຖ້ວມໃນໄທນັ້ນ ມີພວກແຮງງານຕ່າງດ້າວ ຫລາຍເຖິງ 6 ແສນ
ຄົນ ສ່ວນໃຫຍ່ແມ່ນຈາກມຽນມາ ທີ່ຕົກຄ້າງຢູ່ໃນສະພາບການທີ່ຮ້າຍແຮງຂຶ້ນນັບມື້ນັ້ນ.
ການຕົກຄ້າງຢູ່ຕາມຕຶກຫ້ອງແຖວ ອະພາດເມ້ນ ບໍ່ມີໄຟຟ້າ ບໍ່ມີນໍ້າດື່ມນໍ້າໃຊ້ນັ້ນ ເປັນເຫດ
ໃຫ້ຫລາຍໆຄົນຕ້ອງຍອມຈ່າຍເງິນ ໃນຈໍານວນຫລວງຫລາຍ ເພື່ອຈ້າງຄົນຈ້າງລົດໃຫ້ໄປ
ສົ່ງຢູ່ພື້ນທີ່ທີ່ນໍ້າບໍ່ຖ້ວມ.
ແຕ່ເຖິງແມ່ນສະຖານະການຈະຮ້າຍແຮງປານນັ້ນກໍຕາມ ທີ່ພັກພາຊົ່ວຄາວຂອງລັດຖະບານ
ຫລາຍໆແຫ່ງ ກໍຍັງບໍ່ເຕັມແລະມີບ່ອນເປົ່າເຫລືອຢູ່ ສໍາລັບໃຫ້ຜູ້ປະສົບໄພໄປຫລົບໄພອາ
ໄສຢູ່ ທັງນີ້ກໍຍ້ອນວ່າພວກຊາວບ້ານຊາວເມືອງພາກັນໄປຂໍພັກເຊົາຊົ່ວຄາວຢູ່ກັບພີ່ນ້ອງ ຫລື
ບໍ່ ກໍບໍ່ຍອມໜີອອກຈາກບ້ານໄປ ເພື່ອປ້ອງກັນບໍ່ໃຫ້ຄົນມາລັກຂະໂມຍເຄຶ່ອງຂອງຢູ່ໃນບ້ານ
ຂອງເຂົາເຈົ້ານັ້ນເອງ.
ທ່ານ Andy Hall ທີ່ປຶກສາມູນນິທິສິດທິມະນຸດແລະການພັດທະນາ ກ່າວວ່າ ຊາຕາກໍາ
ຂອງພວກຄົນງານຕ່າງດ້າວແມ່ນຍັງໜັກໜ່ວງຢູ່ຕໍ່ໄປ. ທ່ານແອນດີ ຮອລ ກ່າວວ່າ
“ເປັນຫຍັງພວກຄົນງານຕ່າງດ້າວເຫລົ່ານັ້ນ ຈຶ່ງຍັງພາກັນຢູ່ທີ່ນັ້ນ ບໍ່ພາກັນຫລົບໜີ
ໄປໃສ? ເຫດຜົນທີ່ພວກເຂົາເຈົ້າຍັງຢູ່ທີ່ນັ້ນ ກໍຍ້ອນວ່າ ບາງທີພວກເຂົາເຈົ້າບໍ່ເຂົ້າໃຈ
ສະຖານະການແທ້ໆ ບາງທີພວກເຂົາເຈົ້າກໍຢ້ານກົວຈະຖືກຈັບເພາະບໍ່ມີໜັງສືຖືກຕ້ອງ
ບາງທີ ກໍຖືກບັງຄັບໃຫ້ຢູ່ໃນປະຊາຄົມຂອງພວກເຂົາເຈົ້າ. ມີພວກມາເຟຍຢູ່ໃນຂົງເຂດ
ເຫລົ່ານັ້ນ ພວກທີ່ຕ້ອງການຂັດຂວາງຫລືປ້ອງກັນບໍ່ໃຫ້ ພວກຄົນງານທີ່ບໍ່ມີໜເອກະ
ສານຫຍັງເລີຍນັ້ນ ໄປຕິດຕໍ່ກັບພວກເຈົ້າໜ້າທີ່ໄທ.”
ມີການປະເມີນກັນວ່າ ວົງການອຸດສາຫະກໍາໄທ ໄດ້ວ່າຈ້າງພວກແຮງງານຕ່າງດ້າວ
ຫລາຍກວ່າສອງລ້ານຄົນ ຊຶ່ງໃນຈໍານວນນີ້ສ່ວນຫລາຍ ແມ່ນຈ້າງໃຫ້ທໍາງານຢູ່ຕາມ
ບ່ອນກໍ່ສ້າງ ແລະພື້ນທີ່ອຸດສາຫະກໍາໃນພວກແຂວງໃກ້ຄຽງນະຄອນຫລວງບາງກອກ ບ່ອນທີ່ນໍ້າຖ້ວມຫລາຍກວ່າໝູ່ນັ້ນ.
ທ່ານນາງ Jackie Pollock ໂຄສົກເຄືອຂ່າຍຍ້າຍຖິ່ນໃນເຂດແມ່ນໍ້າຂອງ ກ່າວວ່າ ພວກຄົນງານຕ່າງດ້າວຈໍານວນຫລາຍ ໂດຍສະເພາະຈາກມຽນມາ ແມ່ນປະເຊີນກັບ
ການຈໍາແນກກີດກັນທີ່ບໍ່ໄດ້ຮັບການເອົາຫົວໃສ່ໃຈຊາ ເນຶ່ອງຈາກເວົ້າພາສາກັນບໍ່ເຂົ້າ
ໃຈ ກັບພວກອົງການຊ່ວຍເຫລືອໄທ. ທ່ານນາງ ແຈກກີ້ ໂພລລອ໊ກ ກ່າວວ່າ
“ການບໍລິການບັນເທົາທຸກນັ້ນ ແມ່ນຈະຕ້ອງໄປຮອດໄປເຖິງພວກຄົນຕ່າງດ້າວນໍາ.
ດັ່ງນັ້ນ ຂ້າພະເຈົ້າຢາກຈະຄິດວ່າ ມັນແມ່ນບັນຫາການເອົານາຍພາສາໄປພ້ອມກັນ
ກັບການບໍລິການບັນເທົາທຸກທີ່ມີການຈັດຕັ້ງປະສານງານກັນເປັນຢ່າງດີທີ່ສຸດ ບາງ
ທີສະພາກາແດງໄທຫັ້ນ ພວກອົງການຕ່າງໆທີ່ສາມາດອອກໄປສູ່ພື້ນທີ່ຖືກນໍ້າຖ້ວມ
ໄດ້ ແລະໄປໃຫ້ຮອດໃຫ້ເຖິງພວກປະສົບໄພຢ່າງແທ້ຈິງ ພ້ອມກັບເອົາພວກນາຍພາ
ສາໄປນໍາ. ສະພາກາແດງໄທຫັ້ນ ແມ່ນຍິນດີທີ່ຈະໄປຮອດໄປເຖິງພວກຄົນຕ່າງດ້າວ
ແຕ່ກໍເຂົ້າໄປຫາບໍ່ໄດ້.”
ພວກຄົນງານຕ່າງດ້າວທີ່ໄດ້ຈົດທະບຽນຢ່າງເປັນທາງການກັບລັດຖະບານໄທແລ້ວນັ້ນ ກໍບໍ່ຢາກຈະພາກັນກັບຄືນບ້ານ ເພາະວ່າໜັງສືອະນຸຍາດໃຫ້ທໍາງານຂອງພວກເຂົາເຈົ້າ ແມ່ນຈະຖືກໝົດສິດໄປທັນທີ ຖ້າຫາກວ່າພວກເຂົາເຈົ້າກັບບ້ານ.
ແຕ່ພວກຄົນງານຕ່າງດ້າວຊາວມຽນມາຫລາຍພັນຄົນ ໄດ້ພາກັນຫລົບໜີໄປຍັງເມືອງ
ແມ່ສອດ ໃນຊາຍແດນໄທແລ້ວ ເພື່ອກັບຄືນໄປຍັງມຽນມາ. ມີລາຍງານວ່າພວກເຈົ້າ
ໜ້າທີ່ໄທໄດ້ກັກຕົວຫລາຍໆຄົນ ເນຶ່ອງຈາກວ່າ ພວກເຂົາເຈົ້າບໍ່ມີໜັງສືຄົບຖ້ວນ.
ພວກພະນັກງານຊ່ວຍເຫລືອກ່າວວ່າ ພວກເຈົ້າໜ້າທີ່ໄທແລະມຽນມາ ໄດ້ເຄຶ່ອນໄຫວ
ເພື່ອຍຸຕິພວກຍາມທີ່ດ່ານກວດຊາຍແດນຕ່າງໆ ບໍ່ໃຫ້ຮຽກຮ້ອງເອົາເງິນສິນບົນຈາກ
ພວກຄົນງານຕ່າງດ້າວທີ່ພາກັນຫລົບໜີກັບຄືນບ້ານນັ້ນ. ແຕ່ລາຍງານຫລາຍກະແສ
ໃນທ້ອງຖິ່ນວ່າ ພວກເຈົ້າໜ້າທີ່ກວດຄົນເຂົ້າເມືອງມຽນມາ ອະນຸຍາດໃຫ້ແຕ່ພຽງ 150
ຄົນເທົ່ານັ້ນ ຜ່ານດ່ານເຂົ້າໄປຍັງມຽນມາໄດ້ໃນມື້ນຶ່ງໆ ຊຶ່ງພາໃຫ້ມີພວກຕົກຄ້າງອັ່ງອໍ
ກັນ ໃນຈໍານວນຫລວງຫລາຍ.
ທ່ານ ແອນດີ ຮອລ ແຫ່ງມູນນິທິສິດທິມະນຸດແລະການພັດທະນາກ່າວວ່າ ຊາຕາກໍາ
ຂອງພວກຄົນງານຕ່າງດ້າວ ຍັງຄົງເປັນວິກິດການນຶ່ງ ທີ່ລັດຖະບານຈະຕ້ອງທໍາການ
ແກ້ໄຂ. ທ່ານ ຮອລ ກ່າວວ່າ:
“ກະຊວງແຮງງານຄວນເປັນຜູ້ຮັບຜິດຊອບໃນ ເລື່ອງນີ້ ແຕ່ກໍເບິ່ງຄືວ່າ ຍ້ອນມັນ
ມີການເມືອງແຊກຊ້ອນປົນຢູ່ໃນເລຶ່ອງນີ້ ຈຶ່ງບໍ່ມີຜູ້ໃດຍົກເອົາບັນຫາການພິທັກ
ປົກປ້ອງ ພວກຄົນງານຕ່າງດ້າວນັ້ນຂຶ້ນມາເວົ້າ ແລະພວກເຮົາກໍເຫັນກັນອີກຄັ້ງ
ນຶ່ງວ່າ ພວກຄົນງານຕ່າງດ້າວນັ້ນ ໃນເວລາທີ່ເກີດວິກິດການ ກໍແມ່ນຖືກປ່ອຍ
ປະໄວ້ ເຮັດໃຫ້ພວກເຂົາເຈົ້າຕົກຢູ່ໃນກໍາມືຂອງພວກນາຍໜ້າ ທີ່ສະແຫວງຫາ
ຜົນກໍາໄລຈາກພວກເຂົາເຈົ້າ ແລະນອກນີ້ແລ້ວ ກໍຍັງມີພວກອົງການບັງຄັບກົດ
ໝາຍຕ່າງໆນັ້ນນໍາ.”
ເຄືອຂ່າຍຍ້າຍຖິ່ນຖານໃນເຂດແມ່ນໍ້າຂອງກ່າວວ່າ ໄທຈະຕ້ອງອະນຸຍາດໃຫ້ພວກຄົນ
ງານຕ່າງດ້າວໄດ້ຈົດທະບຽນນັ້ນ ອອກຈາກໄທໄປໄດ້ເປັນການຊົ່ວຄາວ ແລະສາມາດ
ກັບຄືນມາໄທອີກ ຫລັງຈາກວິກິດການຜ່ານພົ້ນໄປແລ້ວ ໂດຍບໍ່ມີການລົງໂທດໃດໆ
ເພື່ອໃຫ້ເຂົາເຈົ້າໄດ້ຊ່ວຍໃນການຟື້ນຟູເສດຖະກິດຄືນມາ.
