ທ່ານກະສິດ ພິຣົມ ລັດຖະມົນຕີວ່າການຕ່າງປະເທດຂອງໄທ ໄດ້ຖະແຫລງຢືນຢັນວ່າ ການ
ບໍລິຫານແລະຈັດການຊັບພະຍາກອນນໍ້າ ທີ່ມີປະສິດທິພາບແລະການປ້ອງກັນຜົນກະທົບ
ຕໍ່ສະພາບແວດລ້ອມທໍາມະຊາດໃນແມ່ນໍ້າຂອງ ເພື່ອການນໍາໃຊ້ປະໂຫຍດຢ່າງຍືນຍົງນັ້ນ
ຖືເປັນຫລັກການສໍາຄັນທີ່ສຸດ ທີ່ລັດຖະບານໄທ ຍຶດຖືເປັນແນວທາງປະຕິບັດໃນການຮ່ວມ ມືກັບປະເທດເພື່ອນບ້ານໃນເຂດລຸ່ມແມ່ນໍ້າຂອງດ້ວຍກັນ.
ໂດຍສະເພາະແມ່ນການພິຈາລະນາ ກ່ຽວກັບການຮັບຊື້ກະແສໄຟຟ້າຈາກປະເທດເພື່ອນ ບ້ານ ລວມເຖິງການທີ່ພາກເອກະຊົນໄທຈະໄປລົງທຶນກໍ່ສ້າງເຂື່ອນຜະລິດກະແສໄຟຟ້າໃນປະເທດເພື່ອນບ້ານໃນລຸ່ມແມ່ນໍ້າຂອງດ້ວຍກັນນັ້ນ ກໍຈະຕ້ອງຍຶດຖືຕາມແນວທາງປະຕິບັດດັ່ງກ່າວນີ້ ຢ່າງຄັກແນ່ດ້ວຍເຊັ່ນກັນ ດັ່ງທີ່ທ່ານກະສິດ ພິຣົມ ໄດ້ຖະແຫລງເນັ້ນຍໍ້າວ່າ:
“ໃນກອບລະຫວ່າງປະເທດກໍຄືເລື່ອງແມ່ນໍ້າຂອງກໍຈະມີຄວາມສໍາຄັນຫລາຍຂຶ້ນ ຊຶ່ງ
ກໍຄືໃນກອບຂອງ Greater Mekong ນີ້ກໍເປັນເລື່ອງທີ່ພວກເຮົາຕ້ອງດູແລເລື່ອງ
ສິ່ງແວດລ້ອມ ເລື່ອງຊຸມຊົນ ແລະກໍເພື່ອທີ່ຈະໄປລົງທຶນໃນ ເລື່ອງຂອງການໄຟຟ້າ
ໃນປະເທດເພື່ອນບ້ານ ຈະເປັນໃນລາວ ກໍາປູເຈຍ ຫລືໃນພະມ້າກໍຕາມ ກໍຈະ
ຕ້ອງເບິ່ງໃນສິ່ງແວດລ້ອມເປັນສໍາຄັນ ແລະຈະຕ້ອງໃຫ້ມັນຢັ້ງຢືນດ້ວຍ”
ກ່ອນໜ້ານີ້ ກໍຄືໃນການປະຊຸມຄະນະກໍາມາທິການຮ່ວມລະຫວ່າງລາວ-ໄທ ຄັ້ງທີ່ 16 ທີ່ທາງການໄທເປັນເຈົ້າພາບຈັດການປະຊຸມເມື່ອວັນທີ່ 14-15 ຕຸລາທີ່ຜ່ານມາຢູ່ບາງກອກ ທ່ານ ກະສິດກໍໄດ້ຢືນຢັນໃນຫລັກການດັ່ງກ່າວນີ້ຕໍ່ ທ່ານທອງລຸນ ສີສຸລິດ ຮອງນາຍົກລັດ ຖະມົນຕີ ແລະລັດຖະມົນຕີວ່າການຕ່າງປະເທດຂອງລາວທີ່ ເປັນປະທານຮ່ວມໃນກອງປະ ຊຸມ ຊຶ່ງກໍໝາຍຄວາມວ່າການທີ່ລັດຖະບານຈະຕັດສິນໃຈຮັບຊື້ກະແສໄຟຟ້າຈາກລາວເພີ່ມຕື່ມຂຶ້ນອີກໃນໄລຍະຕໍ່ໄປນີ້ກໍຈະຕ້ອງພິດຈາລະນາເຖິງມາດຕະການໃນການປ້ອງກັນບັນ ຫາຜົນກະທົບ ຕໍ່ສະພາບແວດລ້ອມທໍາມະຊາດເປັນສໍາຄັນນັ້ນເອງ.
ໃນປັດຈຸບັນນີ້ ລັດຖະບານໄທໄດ້ຕົກລົງໃນຫລັກການວ່າຈະຮັບຊື້ກະແສໄຟຟ້າຈາກລາວ ບໍ່ໜ້ອຍກວ່າ 7,000 ເມກະວັດ ນັບຈາກປີ 2015 ເປັນຕົ້ນໄປເປັນເວລາ 25 ປີຕິດຕໍ່ກັນ ຫາກແຕ່ວ່າອີງຕາມການປະມານການຂອງການໄຟຟ້າຝ່າຍຜະລິດແຫ່ງປະເທດໄທ (EGAT) ກໍເຊື່ອວ່າໃນໄລຍະດັ່ງກ່າວນີ້ ການຊົມໃຊ້ ພະລັງງານໄຟຟ້າໃນໄທຈະເພີ່ມຂຶ້ນໃນອັດຕາສະເລ່ຍທີ່ສູງກວ່າ 5% ຕໍ່ປີ ຫລືບໍ່ໜ້ອຍກວ່າ 1,200 ເມກະວັດ ພາຍໃນປີ 2040 ເປັນຢ່າງຊ້າ. ຊຶ່ງດ້ວຍສະພາບການດັ່ງກ່າວນີ້ ກໍໄດ້ເຮັດໃຫ້ທາງການກະຊວງພະ ລັງງານ ແລະບໍ່ແຮ່ຂອງລາວນັ້ນໄດ້ປະກາດເປົ້າໝາຍທີ່ຈະສົ່ງເສີມການລົງທຶນເພື່ອກໍ່ ສ້າງເຂື່ອນໃຫ້ໄດ້ປີລະ 2 ໂຄງການ ນັບຈາກປັດຈຸບັນໄປຈົນເຖິງປີ 2020 ໂດຍຖ້າຫາກວ່າສາມາດປະຕິບັດການໄດ້ຈິງແທ້ກໍຈະເຮັດໃຫ້ລາວ ມີເຂື່ອນເພີ່ມຂື້ນອີກເຖິງ 20 ໂຄງ ການ ແລະຈະເຮັດໃຫ້ລາວມີຄວາມສາມາດໃນການຜະລິດກະແສໄຟຟ້າໄດ້ ເພີ່ມຂຶ້ນຈາກ 2,540 ເມກະວັດໃນປັດຈຸບັນເປັນຫລາຍກວ່າ 9,000 ເມກະວັດພາຍໃນປີ 2020 ອີກດ້ວຍ.
ຫາກແຕ່ວ່າບັນຫາໃນເວລານີ້ ກໍຄືກຸ່ມອົງການອະນຸລັກສະພາບແວດລ້ອມທໍາມະຊາດທັງ ໃນລະດັບສາກົນແລະໃນ ໄທຕ່າງກໍໄດ້ປະກາດທ່າທີຢ່າງຊັດເຈນແລ້ວວ່າ ຈະຄັດຄ້ານ ແຜນການກໍ່ສ້າງເຂື່ອນໃນລຸ່ມແມ່ນໍ້າຂອງ ຢ່າງເຖິງທີ່ສຸດ ຊຶ່ງລວມເຖິງການຄັດຄ້ານແຜນການຂອງລັດຖະບານໄທ ທີ່ຈະ
ພິຈາລະນາຮັບຊື້ກະແສໄຟຟ້າຈາກລາວ ເພີ່ມຂຶ້ນດ້ວຍ.
