ຕຳຫລວດແລະທະຫານໃນພາກໃຕ້ຂອງໄທ ໄດ້ກູ້ເອົາຊາກສົບ
ມາໄດ້ 30 ກ່ວາສົບ ຈາກຂຸມຝັງສົບຕື້ນໆ ຢູ່ຄ້າຍແຫ່ງໜຶ່ງໃນປ່າ
ດົງຫ່າງໄກ ທີ່ຮູ້ກັນວ່າ ເປັນຄ້າຍທີ່ພວກແກ໊ງລັກລອບຂົນສົ່ງຄົນ
ແລະຄ້າມະນຸດເຄີຍໃຊ້. Ron Corben ນັກຂ່າວວີໂອເອ ທີ່ບາງ
ກອກ ລາຍງານວ່າ ການຄົ້ນພົບຄ້າຍແຫ່ງນີ້ ມີຂຶ້ນໃນຂະນະທີ່ທັງ
ປະເທດໄທ ແລະມາເລເຊຍ ພາກັນເພີ້ມທະວີຄວາມພະຍາຍາມ
ຂຶ້ນ ເພື່ອຢຸດກິດຈະການອັນຊົ່ວຮ້າຍດັ່ງກ່າວຂອງພວກແກ໊ງອາຊະ
ຍາກອນນັ້ນ. ດາຣາມີລາຍລະອຽດມາສະເໜີທ່ານ.
ພະນັກງານທະຫານແລະຕຳຫລວດ ປະມານ 200 ຄົນ ໄດ້ກູ້ເອົາສົບເຫລົ່ານັ້ນ ຂຶ້ນມາຂຸມຫລາຍໆແຫ່ງ ຢູ່ໃນຄ້າຍແຫ່ງໜຶ່ງໃນເຂດປ່າດົງໃກ້ກັບຊາຍແດນມາເລເຊຍ. ເຈົ້າໜ້າທີ່
ກ່າວວ່າ ເປັນທີ່ເຊື່ອກັນວ່າພວກເຄາະຮ້າຍ ສ່ວນໃຫຍ່ແມ່ນຊາວອົບພະຍົບມຸສລິມໂຣຮິງ
ຢາ ທີ່ເດີນທາງໂດຍທາງເຮືອ ມາຈາກມຽນມາແລະບັງກະລາແດສ.
ຊາຍຄົນໜຶ່ງ ທີ່ເປັນຄົນສັນຊາດບັງກະລາແດສ ຖືກພົບເຫັນຍັງມີຊີວິດຢູ່ ແຕ່ວ່າອ່ອນເພຍຫລາຍ ຍ້ອນໄດ້ປະສົບກັບຄວາມອຶດຢາກ ຫລັງຈາກພວກລັກລອບຄ້າມະນຸດໄດ້ປະຖີ້ມ
ຄ້າຍນັ້ນໄປ.
ຄ້າຍດັ່ງກ່າວ ຢູ່ໃນເຂດຊາຍແດນຕິດກັບມາເລເຊຍ ແມ່ນໜຶ່ງໃນຫລາຍໆຄ້າຍທີ່ພວກແກ໊ງ
ໃຊ້ເປັນບ່ອນກັກຄົນໄວ້ ກ່ອນທີ່ຈະລັກລອບສົ່ງເຂົາເຈົ້າຂ້າມຊາຍແດນໄປ.
ທ່ານນາງ Chris Lewa ເປັນຜູ້ປະສານງານຂອງໂຄງການ Arakan ທີ່ຕິດຕາມເບິ່ງການລັກລອບຂົນສົ່ງຄົນ ຈາກພາກຕາເວັນຕົກຂອງມຽນມາ ແລະຈາກບັງກະລາແດສ. ທ່ານນາງ
Lewa ກ່າວວ່າ ການເສຍຊີວິດຂອງຄົນ ເຫລົ່ານັ້ນເນ້ນໃຫ້ເຫັນເຖິງ ຊະຕາກຳອັນຮ້າຍແຮງ
ທີ່ພວກອົບພະຍົບທາງເຮືອສືບຕໍ່ປະເຊີນ ຢູ່ໃນກຳມືຂອງຂອງພວກແກ໊ງລັກລອບຂົນສົ່ງຄົນ
ແລະຄ້າມະນຸດ.
ທ່ານນາງ Lewa ກ່າວວ່າ “ເລື້ອງແບບນີ້ ແມ່ນໄດ້ມີມາເປັນເວລາດົນນານແລ້ວ.
ຖ້າພວກຄົນເຫລົ່ານັ້ນບໍ່ສາມາດຈ່າຍເງິນໃຫ້ພວກເຂົາ ເຂົາເຈົ້າກໍຈະຖືກກັກໂຕໄວ້
ເປັນເວລາຫລາຍໆເດືອນ ເດືອນແລ້ວເດືອນເຫລົ່າ ແລະບາງຄົນກໍຮອດການເປັນ
ເປ້ຍລ່ອຍ ຍ້ອນໂຣກຂາດໄວຕະມິນບີ ເປັນມຶນໄປ ບໍ່ສາມາດເຄື່ອນໄຫວໄປມາໄດ້
ແລະກໍຕາຍໄປ ສ່ວນໃຫຍ່ແມ່ນຍ້ອນເຈັບປ່ວຍ ແລະຈິງໆແລ້ວ ບາງເທື່ອກໍຍ້ອນ
ຖືກຂ້າ ຖ້າເຂົາເຈົ້າພະຍາຍາມຈະລັກໜີ ແຕ່ໂດຍທົ່ວໄປແລ້ວ ມັນແມ່ນໄລຍະ
ເວລາທີ່ພວກເຂົາເຈົ້າຖືກກັກໂຕໄວ້ ແລະຕ້ອງມີຊີວິດຢູ່ໃນສະພາບແບບນັ້ນ.”
ບັນດາເຈົ້າໜ້າທີີ່ກ່າວວ່າ ຄຳບອກເລົ່າຂອງຕຳຫລວດທ້ອງຖິ່ນຄົນໜຶ່ງ ໄດ້ພາເຂົາເຈົ້າໄປ
ຍັງຄ້າຍແຫ່ງນັ້ນ. ພາບຂອງສື່ມວນຊົນສະແດງໃຫ້ເຫັນຕູບຫລາຍໆຫລັງທີ່ເຮັດດ້ວຍຫຍ້າ ທີ່ສາມາດກັກໂຕຄົນໄວ້ໄດ້ ຮອດ 300 ຄົນ. ທ່ານນາງ Lewa ກ່າວວ່າ ພວກທີ່ອົບພະຍົບ
ມາທາງເຮືອ ຕາມປົກກະຕິແລ້ວ ມັກຈະຖືກຍ້າຍໜີຢ່າງໄວ ແຕ່ວ່າ ຜູ້ທີ່ບໍ່ສາມາດຈ່າຍເງິນ
ໃຫ້ພວກແກ໊ງຂົນສົ່ງ ຈຳນວນປະມານ $2,000 ແມ່ນຈະຖືກທຸບຕີ.
ທ່ານນາງ Lewa ກ່າວວ່າ “ແມ່ນຕອນທີ່ພວກເຂົາເຈົ້າເດີນທາງມາຮອດປະເທດ
ໄທແລ້ວເທົ່ານັ້ນ ເຂົາເຈົ້າຈຶ່ງຈະຖືກກັກໂຕໄວ້ຢູ່ໃນປ່າ ແລະເຂົາເຈົ້າຕ້ອງໄດ້ຈ່າຍ
ເງິນໃຫ້ພວກລັກລອບເອົາເຂົາເຈົ້າມານັ້ນ ໃນລາຄາເຕັມ ຄືປະມານ 60,000 ບາດ
ຫລືປະມານ $1,800. ບາງຄັ້ງ ກໍຫລາຍກ່ວານັ້ນໜ້ອຍໜຶ່ງ ແຕ່ໂດຍສະເລ່ຍແລ້ວ
ແມ່ນ 60,000 ບາດ. ພວກທີ່ຕົກຄ້າງຢູ່ຫັ້ນແມ່ນພວກທີ່ບໍ່ໄດ້ຈ່າຍເງິນໃຫ້ເຂົາ ແລະ
ກໍຈະຖືກທຸບຕີຢ່າງຮຸນແຮງ ເພາະພວກນາຍໜ້າຄິດວ່າ ມັນແມ່ນວິທີກົດດັນພວກ
ອົບພະຍົບ ແລະກົດດັນຄອບຄົວຂອງເຂົາເຈົ້າ ໃຫ້ຈ່າຍເງິນ.”
ນັບແຕ່ປີ 2012 ເປັນຕົ້ນມາ ໄດ້ມີຊາວມຸສລິມໂຣຮິງຢາທີ່ໄຮ້ລັດຢູ່ ເດີນທາງມາໂດຍທາງ
ເຮືອທີ່ອັນຕະລາຍນັ້ນ ຈຳນວນຫລາຍກ່ວາ 100,000 ຄົນ ໂດຍຫວັງຈະໄປໃຫ້ຮອດມາ
ເລເຊຍແລະອິນໂດເນເຊຍ ເພື່ອຫລົບໜີຄວາມຮຸນແຮງ ແລະຄວາມທຸກຍາກຢູ່ໃນມຽນມາ. ການໂຈມຕີຕໍ່ພວກຊາວມຸສລິມໂຣຮິງຢາ ຢູ່ໃນລັດອາຣາການຂອງມຽນມາ ໄດ້ເພີ້ມທະວີ
ຂຶ້ນ ໃນໄລຍະຫລາຍໆປີຜ່ານມາໄວໆນີ້ ຊຶ່ງໄດ້ບີບບັງຄັບໃຫ້ຫລາຍໝື່ນຄົນ ຕ້ອງໄດ້ຫລົບ
ໜີເຂົ້າໄປຢູ່ໃນຄ້າຍອົບພະຍົບ.
ປະເທດໄທແລະມາເລເຊຍ ໄດ້ຕົກຢູ່ພາຍໃຕ້ຄວາມກົດດັນຂອງນາໆຊາດ ຫລາຍຂຶ້ນ
ເລື້ອຍໆ ເພື່ອໃຫ້ຍັບຍັ້ງກິດຈະການລັກລອບຂົນສົ່ງຄົນ ແລະຄ້າມະນຸດນັ້ນ.
ຢູ່ໄທ ທາງການໄດ້ຮັດເຄັ່ງກົດໝາຍປາບປາມ ພວກແກ໊ງລັກລອບຂົນສົ່ງຄົນຫລາຍຂຶ້ນ
ໂດຍໄດ້ພາໃຫ້ມີການຈັບກຸມຄົນໄທຫລາຍໆຄົນ ທີ່ມີສ່ວນພົວພັນນຳການລັກລອບຄ້າ
ມະນຸດ.
ຢູ່ມາເລເຊຍນັ້ນ ເຈົ້າໜ້າທີ່ໄດ້ຈັບກຸມຫົວໜ້າຫລາຍໆຄົນຂອງພວກແກ໊ງລັກລອບຂົນສົ່ງ
ຊາວໂຣຮິງຢາ. ທ່ານ Lewa ກ່າວວ່າ ຍ້ອນການກວດລ້າງປາບປາມດັ່ງກ່າວນັ້ນ ບັດນີ້
ພວກແກ໊ງຄ້າມະນຸດຈຶ່ງພາກັນກັກຕົວພວກອົບພະຍົບໄວ້ ເທິງເຮືອຢູ່ກາງທະເລ ຫລາຍ
ກ່ວາຈະພາໄປ ກັກຕົວໄວ້ຢູ່ໃນຄ້າຍກາງປ່າ.
ທ່ານນາງ Lewa ເວົ້າວ່າ “ຂ້າພະເຈົ້າຄິດວ່າ ມີໃນລະຫວ່າງ 7 ຫາ 8 ພັນຄົນພຸ້ນ
ແຫລະ ທີ່ຕົກຄ້າງຢູ່ກາງທະເລ. ພວກເຂົາເຈົ້າຖືກກັກໄວ້ຢູ່ເທິງເຮືອທີ່ເຂົາເຈົ້າຂີ່ມາ
ບັດນີ້ເຮືອຂອງເຂົາເຈົ້າແມ່ນຄ້າຍອົບພະຍົບ ແຕ່ວ່າຢູ່ໃນເຂດນ່ານນ້ຳສາກົນ. ເບິ່ງ
ຄືວ່າໃນໄລຍະສອງອາທິດຜ່ານມານີ້ ໄດ້ມີການຈັດສົ່ງແບບງຽບໆ ແລະບາງຄົນກໍສາມາດເຂົ້າມາໃນໄທໄດ້ ແຕ່ຈຳນວນໜຶ່ງຜ່ານມາເລເຊຍເຂົ້າມາໂດຍກົງ ແຕ່ບໍ່
ໄດ້ຖືກສົ່ງໄປຢູ່ຄ້າຍກັກກັນ.”
ໃນລາຍງານສະບັບໜຶ່ງທີ່ນຳອອກເຜີຍແຜ່ເມື່ອໄວໆມານີ້ ຫ້ອງການປາບປາມຢາເສບຕິດ
ແລະອາຊະຍາກຳຂອງສະຫະປະຊາຊາດ ຫລື UNODC ປະເມິີນວ່າ ທຸລະກິດລັກລອບ
ຂົນສົ່ງພວກຄົນອົບພະຍົບ ຢູ່ໃນເອເຊຍນັ້ນ ສ້າງລາຍຮັບຫລາຍເຖິງ 2 ພັນລ້ານດອລລ່າ
ຕໍ່ປີ ໃຫ້ພວກແກ໊ງອາຊະຍາກອນ ທີ່ໄດ້ມີສ່ວນພົວພັນນຳການຕາຍແລະ ການລະເມີດສິດທິຂອງຫລາຍໆຄົນ. ອົງການ UNODC ກ່າວວ່າ ພວກແກ໊ງແບບນັ້ນແມ່ນເປັນ “ໄພຄຸກຄາມທີ່ສຳຄັນ” ຕໍ່ຂົງເຂດ.
ອົງການ UNODC ໄດ້ຮຽກຮ້ອງໃຫ້ມີການຮັດເຄັ່ງຂຶ້ນ ໃນດ້ານສະຖິ ຕິແລະກົດໝາຍຂອງ
ປະເທດ ຕະຫລອດທັງໃນການລະບຸຕົວພວກຕາ ໜ່າງລັກລອບຂົນສົ່ງຄົນ ກັບທັງໃຫ້ການ
ປົກປ້ອງຄຸ້ມຄອງຫລາຍຂຶ້ນ ແກ່ສິດທິຂອງພວກຄົນງານຕ່າງດ້າວ ແລະພວກຕົກເປັນ
ເຫຍື່ອຂອງການຄ້າມະນຸດ.
ເບິ່ງລາຍງານຂ່າວເພີ້ມຕື່ມ ກ່ຽວກັບເລື້ອງນີ້: