ເຈົ້າຊີວິດໄທ ກະສັດພູມິພົນ ອະດຸນຍະເດດ ທີ່ຊົງປ່ວຍບໍ່ສະບາຍ
ແລະເປັນກະສັດທີ່ຄອງລາດຊະບັນລັງດົນທີ່ສຸດໃນໂລກ ໄດ້ຊົງ
ອອກມາປະກົດຕົວຕໍ່ໜ້າປະຊາຊົນ ເພື່ອສະເຫຼີມສະຫຼອງວັນ
ຄົບຮອບ 65 ປີໃນການຂຶ້ນ ຄອງບັນລັງ.
ໃນວັນອັງຄານມື້ນີ້ ບັນດາສະຖານີໂທລະພາບຂອງໄທ ໄດ້ທຳການ
ຖ່າຍທອດສົດ ໃນຂະນະທີ່ເຈົ້າຊີວິດ ທີ່ມີພະຊົນມາຍຸ 87 ປີ ເຊິ່ງ
ເປັນທີ່ເຄົາ ລົບແລະບູຊາຂອງປະຊາຊົນໄທນັ້ນ ໄດ້ຊົງສະເດັດ
ອອກຈາກໂຮງໝໍໃນບາງກອກ ບ່ອນທີ່ພະອົງໄດ້ຊົງພັກປິ່ນປົວ
ສຸຂະພາບໃນຫຼາຍໆເດືອນ ທີ່ຜ່ານມາ.
ມີປະຊາຊົນຫຼາຍຮ້ອຍຄົນລຽນແຖວຕາມຖະໜົນຫົນທາງ ສົ່ງສຽງຮ້ອງເຊຍ “ເຈົ້າຊີວິດ ຈົ່ງ
ຊົງພະຈະເລີນ” ໃນຂະນະທີ່ພະອົງຊົງປະທັບຢູ່ໃນພະລາດຊະລົດຜ່ານໄປ ເພື່ອສະເດັດໄປຍັງພະລາຊະວັງ ເພື່ອເຂົ້າຮ່ວມພິທີທາງສາສະໜາ ເຊິ່ງມີບັນດາ ຜູ້ນຳຂັ້ນສູງຂອງໄທ ເຂົ້າ
ຮ່ວມນຳ.
ການສະເຫຼີມສະຫຼອງແມ່ນເປັນຂີດໝາຍວັນຂຶ້ນຄອງບັນລັງຂອງເຈົ້າຊີວິດ ເຊິ່ງເປັນວັນ
ພັກການ ໃນປະເທດໄທ ແມ່ນເພື່ອລະລຶກເຖິງການຂຶ້ນຄອງບັນລັງຢ່າງເປັນທາງການ
ຂອງກະສັດພູມີພົນ ໃນວັນທີ 5 ເດືອນພຶດສະພາ ປີ 1950, ສາມປີຫຼັງຈາກພະອົງໄດ້ຂຶ້ນ
ເປັນເຈົ້າຊີວິດ ລຸນຫລັງການສິ້ນພະຊົນຂອງພະເຊດຖາ ຫລືອ້າຍຂອງພະອົງ.
ກະສັດພູມີພົນ ເຊິ່ງປະຈຸບັນນີ້ເດີນທາງໄປມາດ້ວຍລົດເຂັນ ບໍ່ສູ້ໄດ້ເດີນທາງ ອອກຈາກໂຮງພະຍາບານ ຫຼັງຈາກທີ່ໄດ້ຜ່າຕັດພົກຍ່ຽວໃນເດືອນຕຸລາທີ່ຜ່ານມາ. ຄວາມເປັນຫ່ວງກ່ຽວກັບບັນຫາທາງສຸຂະພາບຂອງພະອົງ ໄດ້ເພີ້ມທະວີຂຶ້ນໃນເດືອນທັນວາທີ່ຜ່ານມາ ຫລັງຈາກພະອົງບໍ່ສາມາດອອກມາປະກົດຕົວ ສູ່ສາທາລະນະ ໃນວັນຄົບຮອບວັນປະສູດ
ຂອງພະອົງ.
