ລັດຖະບານທະຫານໄທ ໄດ້ເປີດເຜີຍ ລັດຖະທຳມະນູນຊົ່ວຄາວ
ທີ່ອະນຸມັດໃຫ້ທະຫານ ຮັກສາອຳນາດທີ່ມີຢ່າງກ້ວາງຂວາງນັ້ນ
ໄວ້. ແລະຫົວໜ້າກອງທັບ ຜູ້ທີ່ປັດຈຸບັນນີ້ ມີອຳນາດກຳກັບເບິ່ງ
ນຳ ວຽກງານບໍລິຫານ ແລະນິຕິບັນຍັດທັງໝົດ ໂດຍເຕັມຢູ່ແລ້ວ
ນັ້ນ ອາດສາມາດກ້າວຂຶ້ນມາເປັນ ນາຍົກລັດຖະມົນຕີຄົນຕໍ່ໄປ
ກໍໄດ້. ນັກຂ່າວວີໂອເອ Steve Herman ມີ ລາຍງານຈາກ
ບາງກອກ ຊຶ່ງກິ່ງສະຫວັນ ຈະນຳມາສະເໜີທ່ານ.
ລັດຖະທຳມະນູນຊົ່ວຄາວຂອງໄທ ຈະເຮັດໃຫ້ການລັດຖະປະ
ຫານ ຄັ້ງວັນທີ 22 ເດືອນພຶດສະພານັ້ນ ຖືກຕ້ອງຕາມກົດໝາຍ
ແລະຈະອະນຸມັດໃຫ້ ລັດຖະບານທະຫານ ມີອຳນາດສູງສຸດໃນການຄວບຄຸມເວທີການເມືອງ ແລະຕຸລາການ ຂອງປະເທດ.
ກອງທັບທີ່ໄດ້ຍຶດເອົາອຳນາດໃນການກໍ່ລັດຖະປະຫານ ເມື່ອສອງເດືອນປາຍຜ່ານມານັ້ນ
ຈະເປັນຜູ້ຄັດເລືອກເອົາສະພານິຕິບັນຍັດ ຊຶ່ງຈະມີສະມາຊິກທັງໝົດ 220 ຄົນນັ້ນ ດ້ວຍ
ຕົນເອງ ເພື່ອແທນທີ່ ສະພາຜູ້ແທນລັດຖະດອນແລະວຸດທິສະພາ. ແລະສະພານິຕິບັນຍັດ
ໃໝ່ນີ້ ກໍຈະເປັນຜູ້ເລືອກເອົາ ນາຍົກລັດຖະມົນຕີ ແລະຄະນະລັດຖະບານ. ຜູ້ໃດກໍຕາມ
ທີ່ມີຕຳແໜ່ງທາງການເມືອງ ຢູ່ໃນພັກໃດນຶ່ງໃນປັດຈຸບັນນີ້ ແມ່ນຈະບໍ່ໃຫ້ເຂົ້າຮ່ວມຢູ່ໃນ
ກຸ່ມຜູ້ແທນຊຸດໃໝ່.
ບັນດາສະມາຊິກສະພາຊຸດໃໝ່ ຕ້ອງມີອາຍຸຢ່າງນ້ອຍ 40 ປີ ແລະຕ້ອງບໍ່ໄດ້ ຖືກຍ້າຍ
ຈາກໜ້າທີ່ໃນລັດຖະບານມາກ່ອນ ຍ້ອນການ “ສໍ້ລາດບັງຫລວງ ຕົ້ວຕົ້ມ ຫລືປະພຶດຜິດ.”
ທີ່ປຶກສາດ້ານເສດຖະກິດຄົນນຶ່ງ ຂອງລັດຖະບານທະຫານ ອະດີດລັດຖະມົນຕີການຄ້າ Naronchai Akransanee ກ່າວວ່າ ນີ້ອາດຈະນຳໄປສູ່ການເລືອກຕັ້ງ ໃນເດືອນຕຸລາ
ປີໜ້າ.
ທ່ານນະຣົງໄຊ ກ່າວວ່າ “ລຳດັບເວລາແມ່ນຈະເປັນຄືແນວນີ້: ດຽວນີ້ ພວກເຮົາມີ
ລັດຖະທຳມະນູນຊົ່ວຄາວແລ້ວ ລາຍຊື່ຂອງບັນດາສະມາຊິກສະພານິຕິບັນຍັດ
ແຫ່ງຊາດ (NLA) ແມ່ນຈະປະກາດໃຫ້ຮູ້ ຄົງຈະແມ່ນພາຍໃນສອງອາທິດຕໍ່
ໜ້າ ແລະກໍຈະມີການປະກອບລັດຖະບານຂຶ້ນຫລັງຈາກນັ້ນ. ແລະ ດັ່ງທີ່ທ່ານ
ພົນເອກ ປຣະຍຸດ ໄດ້ກ່າວຫັ້ນແຫລະ ລັດຖະບານທີມີທະຫານປະກອບສ່ວນ
ນຳ ແມ່ນຈະເຂົ້າປະຈຳໜ້າທີ່ຢ່າງແນ່ນອນ ໃນເດືອນກັນຍາ ທ້າຍປີນີ້.”
ໃນວັນອັງຄານ ທີ 22 ກໍລະກົດ ທີ່ຜ່ານມາ ກະສັດພູມີພົນ ອະດຸນຍະເດດ ທີ່ມີພະຊົນມາ
ຍຸ 86 ພັນສາ ແລະຊາວໄທເຄົາລົບບູຊາເໜືອຫົວນັ້ນ ໄດ້ຊົງຮັບຮອງເອົາກົດບັດຊົ່ວຄາວ
ສະບັບນັ້ນ ຢ່າງເປັນທາງການ ຢູ່ໃນພິທີນຶ່ງ ຮ່ວມກັບ ນາຍພົນ ປຣະຢຸດ ຈັນໂອຊາ ຜູ້ບັນ
ຊາການກອງທັບໄທ. ພິທີດັ່ງກ່າວທີ່ຈັດຂື້ນ ຢູ່ພະລາດຊະວັງທີ່ເມືອງແຄມທະເລ ຫົວຫີນ ແມ່ນເປັນການສະໜອງຄວາມຖືກຕ້ອງຊອບທຳເພີ້ມຕື່ມ ໃຫ້ແກ່ການລັດຖະປະຫານ
ໂດຍການຮັບຮອງເອົາ ກົດໝາຍຫລືລັດຖະທຳມະນູນໃໝ່ ທີ່ທະຫານເປັນຜູ້ຂຽນຂຶ້ນນັ້ນ.
ຄາດວ່າ ໃນໄລຍະຫລາຍໆເດືອນຕໍ່ໜ້ານີ້ ບັນດາຜູ້ແທນສະພານິຕິບັນຍັດຊົ່ວຄາວຂອງທະຫານ ຈະເລືອກເອົາຄະນະກຳມະການນຶ່ງຂຶ້ນມາ ເພື່ອຮ່າງລັດຖະທຳມະນູນສະບັບໃໝ່
ຊຶ່ງຫລັງຈາກນັ້ນ ກໍຈະຢື່ນສະເໜີຕໍ່ ຄະນະກໍາມະການປະຕິຮູບໃໝ່ ເພື່ອໃຫ້ຮັບຮອງເອົາ.
ໃນລະຫວ່າງນີ້ ກໍມີການສັນນິຖານກັນຢ່າງໃຫຍ່ວ່າ ນາຍພົນ ປຣະຍຸດ ຈະຖືກເລືອກໃຫ້
ເປັນນາຍົກລັດຖະມົນຕີ.
ຮອງຫົວໜ້າ ອຳນາດປົກຄອງທະຫານ ຫລື ຄສຊ ແລະທີ່ປຶກສາຄົນນຶ່ງ ບໍ່ໄດ້ປະຕິເສດ
ຕໍ່ຄວາມສາມາດເປັນໄປໄດ້ ແຕ່ກ່າວວ່າ ການເລືອກແມ່ນຂື້ນຢູ່ກັບ ສະພາຊົ່ວຄາວ.
ວີດີໂອ: ໝໍດູໄທ ໃຫ້ຄຳທຳນາຍ ທີ່ສະໜັບສະໜູນ ນາຍພົນປຣະຢຸດ ຈັນໂອຊາ:
ແຜນການປະຕິຮູບຂອງທະຫານ ໂດຍສ່ວນໃຫຍ່ແລ້ວ ແມ່ນຕອບສະໜອງຕໍ່ ຄຳຮຽກ
ຮ້ອງຂອງພວກປະທ້ວງ ທີ່ໄດ້ຄອບຄອງຫລາຍໆພື້ນທີ່ໃນນະຄອນ ຫລວງບາງກອກ ເປັນເວລາຫລາຍເດືອນ ໃນຄວາມພະຍາຍາມເພື່ອກົດດັນໃຫ້ ທ່ານນາງ ຍິ່ງລັກ ຊິນນະວັດ
ທີ່ເປັນນາຍົກລັດຖະມົນຕີໃນເວລານັ້ນ ລາອອກຈາກຕໍາແໜ່ງ. ແກນນຳພວກປະທ້ວງ ໄດ້ຮຽກຮ້ອງໃຫ້ຈັດຕັ້ງຄະນະກຳມະການ ຂຶ້ນມາປົກຄອງປະເທດ ແລະຈັດຕັ້ງປະຕິບັດການປະຕິຮູບໃນຂອບເຂດກ້ວາງໄກ ກ່ອນຈະຈັດໃຫ້ມີການເລືອກຕັ້ງໃໝ່.
ພວກທີ່ຕ້ອງຕິລັດຖະທຳມະນູນຊົ່ວຄາວໃໝ່ ຢູ່ໃນໄທ ປະກົດວ່າມິດງຽບ ຊຶ່ງກໍເປັນທີ່ເຂົ້າ
ໃຈໄດ້ ເນື່ອງຈາກທະຫານແມ່ນມີອຳນາດ ທີ່ຈະເອີ້ນຜູ້ໃດໄປສອບສວນກໍໄດ້ ຍ້ອນວ່າໄດ້
ສະແດງຄວາມເຫັນໃນທາງການເມືອງ ຫລືທີ່ອາດເຮັດໃຫ້ເກີດຄວາມບໍ່ສະຫງົບ.
ເວລານີ້ ສື່ມວນຊົນພາຍໃນປະເທດໄທ ແມ່ນກຳລັງປະຕິບັດງານພາຍໃຕ້ການກວດກາ
ຢ່າງໜັກ ເທົ່າທີ່ເຄີຍເຫັນມາ ໃນຮອບຫລາຍທົດສະວັດ.
ອຳນາດປົກຄອງທະຫານ ຊຶ່ງເອີ້ນກັນໃນຊື່ທາງການວ່າ ສະພາຮັກສາຄວາມສະຫງົບແຫ່ງ
ຊາດ ຫລື ຄສຊ ຢືນຢັນວ່າ ລັດຖະທຳມະນູນຊົ່ວຄາວສະບັບນີ້ “ຈະຊ່ວຍແກ້ໄຂວິກິດການ
ແລະນຳພາສະຖານະການກັບຄືນສູ່ປົກກະຕິ ກອບກູ້ຄວາມໝັ້ນຄົງແລະເອກະພາບກັບຄືນ
ມາ ຕະຫລອດທັງແກ້ໄຂບັນຫາ ທາງດ້ານເສດຖະກິດ.
