ກຸ່ມຕາລິບັນກ່າວວ່າ ຕົນ ບໍ່ແມ່ນປາກິສຖານ ເປັນຜູ້ຄວບຄຸມເຄືອຂ່າຍ Haqqani ທີ່ພວກ
ເຈົ້າໜ້າທີ່ສະຫະລັດຖິ້ມໂທດໃສ່ວ່າ ທໍາການໂຈມຕີຫລາຍບັ້ນຕໍ່ເປົ້າໝາຍອາເມຣິກັນຕ່າງໆ
ແລະວ່າກຸ່ມດັ່ງກ່າວມີການພົວພັນກັບອົງການສືບລັບຂອງລັດຖະບານອິສລາມາບັດນັ້ນ.
ຖະແຫຼງການສະບັບນຶ່ງທີ່ພິມເຜີຍແຜ່ໃນ web site ຂອງກຸ່ມຕາລີບັນນັ້ນກ່າວວ່າກິດຈະ
ກຳຂອງກະບົດທັງໝົດ ແມ່ນຄວາມຄິດລິເລີ້ມຂອງຕົນເອງ ແລະແມ່ນພຶດຕິກໍາຂອງຕົນເອງ
ແລະເວົ້າຕໍ່ໄປວ່າ ບໍ່ມີສາຍພົວພົນໃດໆລະຫວ່າງເຄືອຂ່າຍ Haqqani ແລະອົງການສືບລັບ
ISI ຂອງປາກິສຖານນັ້ນ.
ນອກນີ້ຖະແຫລງການສະບັບນີ້ຍັງເວົ້າເຊ່ນກັນວ່າ ຄວາມພະຍາຍາມໃດໆເພື່ອເຊື່ອມໂຍງ
ທ່ານ Jalaluddin Haqqani ຜູ້ກໍ່ຕັ້ງເຄືອຂ່າຍ Haqqani ໃສ່ກັບລັດຖະບານປາກິສຖານ
ໄດ້ເປັນຄວາມພະຍາຍາມອັນນຶ່ງເພື່ອໃຫ້ຊື່ສຽງບໍ່ດີແກ່ບຸກຄົນສໍາຄັນໆທີ່ມີຊື່ສຽງໂດງດັງ
ຂອງພວກເຮົາ ໂດຍການເຊື່ອມໂຍງຂອງບຸກຄົນເຫຼົ່ານີ້ໄປໃສ່ພວກອົງການສືບລັບຕ່າງປະ
ເທດນັ້ນ.
ໃນສັບປະດາຜ່ານມານີ້ ພົນເຮືອເອກ Mike Mullen ທີ່ຈະພົ້ນຈາກຕໍາແໜ່ງຫົວໜ້າ
ເສນາທິການຮ່ວມກອງທັບສະຫະລັດກ່າວວ່າ ກຸ່ມ Haqqani ເປັນສາຂານຶ່ງຂອງອົງ
ການສືບລັບຂອງປາກິສຖານຢ່າງແທ້ຈິງ ໂດຍຖິ້ມໂທດໃສ່ພວກນັກຕໍ່ສູ້ຂອງກຸ່ມດັ່ງກ່າວ
ໃນການບຸກໂຈມຕີສະຖານທູດສະຫະລັດໃນກຸງຄາບູລ ທີ່ພາໃຫ້ມີຜູ້ເສຍຊີວິດ ຕະຫຼອດ
ທັງການໂຈມຕີຕໍ່ກອງບັນຊາການຂອງກຸ່ມເນໂຕ້ໃນອັຟການິສຖານໃນຕົ້ນເດືອນນີ້.
ປາກິສຖານໄດ້ປະຕິເສດຊໍ້າແລ້ວຊໍ້າອີກຕໍ່ການກ່າວຫາຂອງສະຫະລັດນີ້.
ຫວ່າງໄວໆຜ່ານມານີ້ ບັນດາເຈົ້າໜ້າທີ່ສະຫະລັດໄດ້ທໍາຄວາມກົດດັນທາງການທູດເພີ່ມ
ຂຶ້ນໃສ່ປາກິສຖານ ໃຫ້ທໍາການເຄື່ອນໄຫວທາງທະຫານຕໍ່ກຸ່ມ Haqqani ນັ້ນ.
