ຄະນະລັດຖະມົນຕີກ່າວໃນວັນພະຫັດມື້ນີ້ວ່າ ລາຍຈ່າຍດ້ານການປ້ອງກັນປະເທດຂອງໄຕ້ຫວັນຈະເພີ້ມຂຶ້ນເປັນ 7.7 ເປີເຊັນໃນປີໜ້າ, ເຊິ່ງຄາດວ່າ ກາຍຈໍາ ນວນການເຕີບທາງດ້ານເສດຖະກິດ.
ຈີນ, ທີ່ຖື ໄຕ້ຫວັນ ເຊິ່ງປົກຄອງຕົນເອງດ້ວຍລະບອບປະຊາທິປະໄຕນັ້ນ ເປັນສ່ວນນຶ່ງຂອງດິນແດນຕົນ, ໄດ້ເພີ້ມທະວີຄວາມກົດດັນທາງທະຫານ ແລະດ້ານການເມືອງໃນຮອບ 5 ປີທີ່ຜ່ານມາ ກ່ຽວກັບການຢືນຢັນກ່າວອ້າງດັ່ງກ່າວນັ້ນ, ໂດຍລັດຖະບານ ໄທເປ ໄດ້ອອກມາປະຕິເສດຢ່າງເຂັ້ມແຂງ.
ຄະນະລັດຖະມົນຕີຂອງໄຕ້ຫວັນໄດ້ກ່າວລຸນຫຼັງກອງປະຊຸມທົ່ວໄປປະຈຳອາທິດວ່າ ປີ 2025 ລາຍຈ່າຍດ້ານປ້ອງກັນປະເທດຈະເພີ້ມຂຶ້ນເປັນ 7.7 ເປີເຊັນເມື່ອທຽບໃສ່ປີແລ້ວນີ້ ເປັນຈໍານວນເງິນ 647 ພັນຕື້ໂດລາໄຕ້ຫວັນ ຫຼື 20,25 ຕື້ໂດລາສະຫະລັດ, ເຊິ່ງກວມເອົາ 2.45 ເປີເຊັນຂອງລວມຍອດຜະລິດຕະພັນພາຍໃນປະເທດ ທີ່ເພີ້ມຂຶ້ນຈາກ 2.38 ເປີເຊັນໃນປີນີ້. ແລະເກີນຄວາມຄາດ ໝາຍທີ່ລັດຖະບານຄາດການໄວ້ ສໍາລັບການເຕີບໃຫຍ່ຂະຫຍາຍໂຕທາງດ້ານ ເສດຖະກິດ ໃນຈໍານວນ 3.26 ເປີເຊັນ.
ການໃຊ້ຈ່າຍດັ່ງກ່າວລວມມີ ງົບປະມານພິເສດທີ່ມີມູນຄ່າ 90.4 ຕື້ໂດໄຕ້ຫວັນ ເພື່ອຊື້ເຮືອບິນລໍາໃໝ່ ແລະ ເພີ້ມການຜະລິດລູກສອນໄຟ. ນັ້ນ ແມ່ນສ່ວນນຶ່ງຂອງລາຍຈ່າຍພິເສດສໍາລັບການທະຫານ ທີ່ມີມູນຄ່າ 240 ຕື້ໂດລາໄຕ້ຫວັນ ເຊິ່ງໄດ້ປະກາດໃນປີ 2021 ເປັນເວລາ 5 ປີ.
ທ່ານ ເຊ້ຍ ຊິ-ຊຽນ (Hsieh Chi-hsien), ຫົວໜ້າກົມຄຸ້ມຄອງກະຊວງປ້ອງກັນປະເທດ ກ່າວຕໍ່ບັນດານັກຂ່າວວ່າ ການໃຊ້ຈ່າຍດ້ານການປ້ອງກັນປະເທດ ບັນລຸ 3 ເປີເຊັນຂອງລວມຍອດຜະລິດຕະພັນພາຍໃນ ເຊິ່ງແມ່ນເປົ້າໝາຍທີ່ພວກເຂົາເຈົ້າຫວັງວ່າຈະບັນລຸໄດ້, ແລະໃນຂະນະນີ້ ການໃຊ້ຈ່າຍດ້ານປ້ອງກັນປະເທດຂອງໄຕ້ຫວັນແມ່ນ “ກາລັງເພີ້ມຂຶ້ນຢ່າງບໍ່ຢຸດຢັ້ງ.”
ທ່ານກ່າວວ່າ “ພວກເຮົາຈະບໍ່ເຂົ້າຮ່ວມການແຂ່ງຂັນດ້ານອາວຸດກັບປະເທດ ອື່ນໆ. ພວກເຮົາຈະເພີ້ມການໃຊ້ຈ່າຍແບບບໍ່ຢຸດຢັ້ງນັ້ນ ຕາມຄວາມຈໍາເປັນ ຂອງພວກເຮົາ.”
ທ່ານ ເຊ້ຍ ກ່າວຕື່ມວ່າ ການໃຊ້ຈ່າຍໃນອະນາຄົດຍັງຂຶ້ນຢູ່ກັບວ່າ ໄຕ້ຫວັນ ຈະສາມາດຈັດຫາອຸປະກອນທີ່ຈໍາເປັນ ແລະສຳຄັນ ໄດ້ ຫຼື ບໍ່, ໂດຍທ່ານ ບໍ່ໄດ້ໃຫ້ລາຍລະອຽດໃດໆເພີ້ມເຕີມ.
