ຊາວຊີເຣຍ ປ່ອນປັດ ທີ່ຄາດວ່າ ທ່ານ Assad ຈະໄດ້ຮັບ ໄຊຊະນະອີກ (ສະໄລດ໌/ວີດີໂອ)

ຊາວ​ຊີ​ເຣຍ​ພວມພາກັນໄປ​ລົງ​ຄະ​ແນນ​ເລືອກ​ຕັ້ງ​ໃນ​ວັນ​ອັງຄານ
​ມື້​ນີ້ ທີ່​ຄາດໝາຍ​ວ່າປະທານາທິບໍດີຊິີເຣຍ ທ່ານ Bashar al-
Assad ຈະ​ໄດ້​ຮັບໄຊຊະນະ​ຢ່າງ​ຖ້ວມ​ລົ້ນ ​ເພື່ອເຂົ້າຮັບຕຳແໜ່ງ
ຕື່ມອີກສະໄໝນຶ່ງ ໃນ​ຂະນະ​ທີ່ສົງຄາມ​ການ​ເມືອງ​ຮ້າຍແຮງ ​ຍັງ​ດຳ
ເນີນຕໍ່ໄປ​ໃນ​ທົ່ວ​ປະ​ເທດ​ນັ້ນ.

ພວກຕໍ່ຕ້ານລັດຖະບານ​ຊີ​ເຣຍ​ແລະ​ບັນດາ​ພັນທະມິດຂອງປະເທດ​ຕາ​ເວັນ​ຕົກ ໄດ້​ປະນາມການ​ເລືອກ​ຕັ້ງ​ທີ່​ວ່າ​ນີ້ ຊຶ່ງທ່ານ Assad ໄດ້ລົງແຂ່ງຂັນ ກັບຜູ້​ສະໝັກ 2 ຄົນ ທີ່ລັດຖະບານໃຫ້ການອະນຸມັດ ທີ່ຜູ້ຄົນບໍ່ຄ່ອຍຮູ້ຈັກກັນເລີຍ.

ນາຍົກລັດຖະມົນຕີຊີ​ເຣຍ ທ່ານ Wael al-Halqi ​ໄດ້​ຮຽກຮ້ອງ​ໃຫ້​ປະຊາຊົນໄປປ່ອນບັດ ໃນການ​ເລືອກ​ຕັ້ງ ທີ່ທ່ານເອີ້ນ ໃນວັນ​ອັງຄານມື້ນີ້ວ່າ​ ເປັນ​ມື້ “ທີ່ມີຄວາມສຳຄັນທາງ​ປະ ຫວັດ​ສາດ” ສຳລັບຊີເຣຍ ທີ່​ທ່ານ​ກ່າວ​ວ່າ ​ຈະ​ນຳພາ​ປະ​ເທດ​ໄປສູ່​ເສັ້ນທາງ​ຂອງການ​ຟື້ນ​ໂຕຄືນ.

ພວກ​ນັກລົບຝ່າຍຕໍ່ຕ້ານ ​ໄດ້​ສູ້​ລົບມາ​ນານ​ກ່ວາ 3 ປີແລ້ວ ​ເພື່ອ​ໂຄ່ນ​ລົ້ມ​ທ່ານ Assad ອອກ​ຈາກ​ອຳນາດ.

ທ່ານ Assad ໄດ້ຂຶ້ນກຳອຳນາດນັບຕັ້ງແຕ່ປີ 2000 ເປັນຕົ້ນມາ ເວລາທ່ານເຂົ້າຮັບຕຳ ແໜ່ງເປັນປະທານາທິບໍດີ ຫຼັງຈາກບິດາຂອງທ່ານໄດ້ເຖິງແກ່ອະສັນະກຳ ແລະທ່ານເປັນ ຜູ້ສະໝັກພຽງຄົນດຽວເທົ່ານັ້ນ ເວລາທີ່ທ່ານໄດ້ຮັບໄຊຊະນະໃນຕອນເຂົ້າຮັບຕຳແໜ່ງ
ເປັນ ສະໄໝທີ 2 ໃນປີ 2007.

ກອງກຳລັງຂອງທ່ານ ໄດ້ທຳການປາບປາມພວກປະທ້ວງຢ່າງສັນຕິ ທີ່ຕໍ່ຕ້ານລັດຖະບານ ໃນເດືອນມີນາປີ 2011 ທີ່ໄດ້ເກີດຂຶ້ນ ພ້ອມໆກັນກັບຄື້ນຟອງຂອງອັນທີ່ເອີ້ນວ່າ ການລຸກ ຮືຂຶ້ນໃນລະດູບານໃໝ່ ຫລື “Arab Spring” ທີ່ໄດ້ມີຂຶ້ນ ໃນທົ່ວພາກພື້ນນັ້ນ.