ທ່ານ Bashar al-Assad ປະທານາທິບໍດີຊີເຣຍ ໄດ້ກ່າວຫາປະເທດ ເພື່ອນບ້ານ Turkey ວ່າ ໃຫ້ການສະໜັບສະໜຸນພວກກໍ່ການຮ້າຍແລະ ເປັນຜູ້ສົ່ງເສີມໃຫ້ເກີດການສູ້ລົບຂັ້ນນອງເລືອດກັນຂຶ້ນຢູ່ໃນຊີເຣຍ.
ໜັງສືພິມ Cumhuriyet ຂອງເທີກີ ໄດ້ອ້າງເອົາຄໍາເວົ້າຂອງທ່ານອາຊັດ ທີ່ກ່າວວ່າ ເທີກີ ໄດ້ໃຫ້ການສະໜັບສະໜຸນດ້ານພະລາທິການ ແລະມີຈຸດ ປະສົງທີ່ຈະແຊກແຊງກິດຈະການພາຍໃນຂອງຊີເຣຍ.
ໃນຄວາມຄິດເຫັນ ທີ່ພິມເຜີຍແຜ່ໂດຍໜັງສືພິມດັ່ງກ່າວ ເມື່ອວັນພຸດມື້ນີ້ ທ່ານອາຊັດ ໄດ້ກ່າວຫາທ່ານ Recep Tayyib Erdogan ນາຍົກລັດ ຖະມົນຕີເທີກີ ວ່າມີແຜນການສ້າງຄວາມແຕກແຍກທາງດ້ານສາສະໜາ. ທັງເທີກີແລະຊີເຣຍ ເປັນປະເທດທີ່ມີຊາວມຸສລິມນິກາຍຊຸນນີ ເປັນສ່ວນໃຫຍ່. ແຕ່ທ່ານອາຊັດ ແລະພັກທີ່ປົກຄອງປະເທດໃນຂະນະນີ້ສ່ວນຫຼາຍແມ່ນຊົນສ່ວນນ້ອຍ ຄື ນິກາຍ Alawite ແລະມາຈາກສາສະໜາອີສລາມ ນິກາຍ Shi’ite.
ເມື່ອວັນອັງຄານວານນີ້ ໜັງສືພິມສະບັບນີ້ ໄດ້ລົງພິມບົດສໍາພາດຕອນທໍາອິດ ກັບທ່ານອາຊັດ ອັນທີ່ທ່ານໄດ້ເວົ້າໄປວ່າ ທ່ານເສຍໃຈ ທີ່ກອງທັບຂອງທ່ານ ໄດ້ຍິງເຮືອບິນລົບອາຍພົ່ນທະຫານເທີກີຕົກເມື່ອເດືອນຜ່ານມາ. ທ່ານອາຊັດ ເນັ້ນຍໍ້າວ່າເຮືອບິນລໍາດັ່ງກ່າວໄດ້ບິນລ່ວງລໍ້າເຂົ້າໄປໃນເຂດ ນ່ານຟ້າຂອງຊີເຣຍ ທີ່ເຮືອບິນຂອງອີສຣາແອລເຄີຍໃຊ້ມາແລ້ວເຖິງສາມເທື່ອນັ້ນ.
ເທີກີ ເວົ້າວ່າ ເຮືອບິນອາຍພົ່ນດັ່ງກ່າວໄດ້ບິນເຂົ້າໄປໃນເຂດນ່ານຟ້າຊີເຣຍ ໂດຍບໍ່ໄດ້ຕັ້ງໃຈ ແລະກໍໄດ້ບິນກັບຄືນສູ່ນ່ານຟ້າສາກົນ ກ່ອນຊີເຣຍຈະຍິງຕົກເມື່ອວັນທີ່ 22 ເດືອນມິຖຸນາຜ່ານມາ.
ຂະນະດຽວກັນ ກຸ່ມສິ້ງຊອມສິດທິມະນຸດ Human Rights Watch ເວົ້າ ວ່າ ພວກເຈົ້າໜ້າທີ່ຊີເຣຍ ໄດ້ສ້າງສູນທໍລະມານຢ່າງໜ້ອຍຮວມກັນຢູ່ 27 ແຫ່ງ. ໃນລາຍງານສະບັບນຶ່ງທີ່ພິມເຜີຍແຜ່ໃນວັນອັງຄານວານນີ້ ກຸ່ມສິ້ງ ຊອມສິດທິມະນຸດດັ່ງກ່າວເວົ້າວ່າ ການລ່ວງລະເມີດຢ່າງຮຸນແຮງໃນສູນກາງທໍລະມານເຫຼົ່ານີ້ ແມ່ນເປັນການກໍ່ອາດຊະຍາກໍາຕໍ່ຕ້ານມະນຸດຊາດ.
ທ່ານ David Mepham ຜູ້ອໍານວຍການກຸ່ມສິ້ງຊອມສິດທີມະນຸດ Human Rights Watch ທີ່ອັງກິດ ກ່າວວ່າ ການທໍລະມານແບບ ທີ່ພວກເຮົາເວົ້າເຖິງນັ້ນ ຄືການທໍລະມານແບບທີ່ໜ້າຢ້ານກົວແທ້ໆ.
ກຸ່ມສິ້ງຊອມສິດທິມະນຸດ Human Rights Watch ເລີ່ມສຶກສາຄົ້ນຄວ້າກ່ຽວກັບລາຍງານສະບັບນີ້ໃນເດືອນມີນາ ປີ 2011 ແລະຕັ້ງແຕ່ນັ້ນມາໄດ້ທໍາການສໍາພາດຫຼາຍກວ່າ 200 ຄັ້ງ. ລາຍງານມີແຜນທີ່ສະແດງເຖິງທີ່ຕັ້ງຂອງສູນກາງກັກຂັງທີ່ຖືກກ່າວຫານັ້ນ. ນອກນີ້ກຸ່ມດັ່ງກ່າວຍັງລົງຊື່ອົງການຕ່າງໆໄວ້ໃນບັນຊີ ແລະໃນຫຼາຍກໍລະນີແລ້ວ ກໍແມ່ນເຈາະຈົງໃສ່ພວກຜູ້ບັນຊາການທີ່ພົວພັນໃນການລະເມີດນັ້ນໂດຍສະເພາະ.