ລິ້ງ ສຳຫລັບເຂົ້າຫາ

ວັນອາທິດ, ໐໓ ມີນາ ໒໐໒໔

ຣັດເຊຍວ່າ ບໍ່ມີໂອກາດທີ່ ສະພາຄວາມໝັ້ນຄົງ ຈະຮັບຜ່ານຍັດຕິ ກ່ຽວກັບຊີເຣຍ (ເບິ່ງວີດີໂອ)


ທ່ານນາງ ຄລິນຕັນ ລມຕ ຕ່າງປະເທດສະຫະລັດ ແລະທ່ານ William Hague ລັດຖະມົນຕີຕ່າງປະເທດ ອັງກິດຂະນະປະຊຸມກັນເລຶ່ອງຊີເຣຍ
ທ່ານນາງ ຄລິນຕັນ ລມຕ ຕ່າງປະເທດສະຫະລັດ ແລະທ່ານ William Hague ລັດຖະມົນຕີຕ່າງປະເທດ ອັງກິດຂະນະປະຊຸມກັນເລຶ່ອງຊີເຣຍ

ທູດ​ພິ​ເສດ​ປະ​ຈໍາ​ສະຫະພາບ​ຢູ​ໂຣບຂອງ​ຣັດ​ເຊ​ຍກ່າວ​ວ່າ ທ່ານ​ຍັງ​ບໍ່​ຫຼິງ​ເຫັນ​ໂອກາດໃດໆ
ທີ່​ສະພາ​ຄວາມ​ໝັ້ນຄົງສະຫະ​ປະຊາ​ຊາດ ​ຈະ​ຮັບ​ຜ່ານຮ່າງ​ຍັດຕິ​ກ່ຽວ​ກັບ​ຊີ​ເຣຍເທື່ອ ​ໃນ
ຂະນະ​ທີ່​ພວກ​ປະ​ເທດ​ອາຫຣັບ​ແລະ​ຕາ​ເວັນ​ຕົກ ພາກັນ​ຜັກ​ດັນ​ໃຫ້ເອົາມາດ​ຕະການ​ເພື່ອ
ຍຸຕິ​ການ​ກໍ່​ຄວາມ​ຮຸນ​ແຮງ​ຢ່າງ​ນອງເລືອດ ​ທີ່​ດໍາ​ເນີນມາ​ໄດ້​ຫລາຍ​ເດືອນ​ແລ້ວ​ນັ້ນ.

ທ່ານ​ທູດ​ພິ​ເສດ Vladimir Chizhov ບອກ​ອົງການ​ຂ່າວ Interfax ​ເມື່ອວັນ​ພຸດ​ມື້​ນີ້​ວ່າ
ຂໍ້​ສະ​ເໜີ​ດັ່ງກ່າວ​ແມ່ນ​ຂາດ​ຂໍ້​ກຳນົດ​ທີ່​ສໍາຄັນ ​ເພື່ອຈະບໍ່ໃຫ້​ມີການ​ແຊກ​ແຊງ​ທາງ​ທະຫານ.
ຄວາມ​ເຫັນ​ຂອງ​ທ່ານ​ແມ່ນຂັດ​ກັບ​ຄວາມ​ເຫັນ​ຂອງ​ທ່ານ William Hague ລັດຖະມົນຕີ
ຕ່າງປະ​ເທດອັງກິດ ທີ່​ໄດ້​ບອກ​ສະພາ​ຄວາມ​ໝັ້ນຄົງ​ເມື່ອ​ວັນ​ອັງຄານ​ວານ​ນີ້​ວ່າ ມະຕິ​ດັ່ງ
ກ່າວ​ບໍ່​ໄດ້​ບົ່ງ​ເຖິງ​ການ​ປະຕິບັດ​ການ​ທາງທະຫານ ​ແລະ​ອາດ​ໃຊ້​ການ​ບໍ່​ໄດ້.

ພາຍ​ໃຕ້​ຮ່າງ​ຍັດຕິຂອງອາຫຣັບ​ແລະ​ສະຫະພາບ​ຢູ​ໂຣບທີ່​ນຳ​ສະ​ເໜີ​ໂດຍ Moroccan ນັ້ນ
ປະທານາທິບໍດີ​ຊີ​ເຣຍ ທ່ານ Bashar al-Assad ​ຈະ​ຕ້ອງເຫັນ​ພ້ອມ​ທີ່​ຈະ​ຍຸຕິ​ການໃຊ້
ຄວາມ​ຮຸນ​ແຮງ ​ຕໍ່​ພວກ​ປະ​ທ້ວງ​ຕໍ່ຕ້ານ​ລັດ ຖະບານ​ ແລະ​ລາ​ອອກ. ຊີ​ເຣຍ​ໄດ້​ປະຕິ​ເສດຕໍ່
ແຜນການນັ້ນ​ວ່າ ​ເປັນ​ການ​ຝ່າຝືນ​ອະທິປະ​ໄຕ​ຂອງ​ຕົນ.

ທ່ານ Nabil Elaraby ​ເລຂາທິການ​ໃຫຍ່​ຂອງ​ສັນນິບາດ​ຊາດ​ອາ​ຫຣັບ ​ໄດ້ຮຽກຮ້ອງ​ໃຫ້​
ສະພາ​ຄວາມ​ໝັ້ນຄົງ​ອົງການ​ສະຫະ​ປະຊາ​ຊາດ​ເມື່ອ​ວັນ​ອັງຄານ​ວານ​ນີ້ ຈົ່ງ​ເອົາ​ມາດ​ຕະການ
ຢ່າງ​ວ່ອງ​ໄວ​ແລະ​ເດັດຂາດ ໃນ​ຂະນະ​ທີ່ ທ່ານ Sheikh Hamad bin Jassim al-Thani
ນາ​ຍົກລັດຖະມົນຕີ ປະ​ເທດ​ຄາ​ຕ້າ​ໄດ້​ເຕືອນ 15 ປະ​ເທດ​ສະມາຊິກຂອງ​ສະພາ​ຄວາມ​ໝັ້ນ
ຄົງ​ນັ້ນ​ວ່າ ຂະ​ບວນການ​ເຂັ່ນຂ້າ​ປະຊາຊົນ​ຂອງ​ຊີ​ເຣຍນັ້ນ​ຍັງ​ດໍາ​ເນີນ​ໄປ​ຢ່າງ​ບໍ່​ລົດ​ລະ.

ທ່ານ​ນາງ ຮິ​ລ​ແລຣີ ຄລິນ​ຕັນ ລັດຖະມົນຕີ​ຕ່າງປະ​ເທດ​ສະຫະລັດ ​ໄດ້ກ່າວ​ຫາ​ທ່ານ
Assad ວ່າ​ ສົ່ງ​ເສີມ​ໃຫ້​ມີ​ການ​ກໍ່​ຄວາມ​ຮຸນ​ແຮງ​ທາງ​ດ້ານ​ສາສະໜາ. ທ່ານ​ນາງ​ໄດ້​ອ້າງ
ເຖິງ​ຫຼັກຖານ​ອັນ​ຊັດ​ເຈນວ່າ​ກໍາລັງ​ທະຫານ​ຂອງ​ລັດຖະບານ ​ເປັນຜູ້​ເລິ່ມທຳການ​ໂຈມ​ຕີ
ເກືອບ​ວ່າ​ທັງ​ໝົດ​ທີ່​ໄດ້​ເຂັ່ນຂ້າ​ປະຊາຊົນ ​ແລະເຕືອນ​ວ່າ ຊີ​ເຣຍກໍາລັງ​ກໍາລັງກ້າວ​ໄປ​ສູ່
ການ​ເກີດ​ສົງຄາມ ກາງ​ເມືອງ.

ທ່ານ Bashar Ja’afari ​ເອກ​ອັກຄະ​ລັດຖະທູດ​ຊີເຣຍປະ​ຈໍາ​ອົງການ ສະຫະ​ປະຊາ​ຊາດ
ບໍ່​ຍອມຮັບເອົາ​ຄໍາກ່າວ​ອ້າງ​ທີ່​ວ່າ​ລັດຖະ​ບານ​ຂອງ​ທ່ານ​ເປັນຜູ້​ຮັບຜິດ​ຊອບ​ຕໍ່ວິ​ກິດ​ການ​ນີ້
ແລະ​ຍັງ​ໄດ້​ກ່າວ​ຫາ​ສະຫະລັດ ​ແລະ​ພວກປະ​ເທດ​ພັນທະ​ມິດ​ໃນ​ຢູ​ໂຣບວ່າ​ຢາກ​ຮຸກ​ຮານ
ເອົາ​ເຂດ​ນໍ້າ​ແດນ ດິນ​ແຫ່ງໃໝ່​ໃນ​ພາກຕາ​ເວັນ​ອອກ​ກາງ.

XS
SM
MD
LG