ທ່ານນາງຮີນລາຣີ ຄລິນຕັນ ລັດຖະມົນຕີການຕ່າງປະເທດສະຫະລັດກໍານົດຈະຮຽກຮ້ອງໃຫ້ສະພາຄວາມໝັ້ນຄົງສະຫະປະຊາຊາດສະໜັບສະໜຸນແຜນການຂອງສັນນິບາດຊາດອາຫຣັບສໍາລັບຊີເຣຍ ຫລັງຈາກລັດຖະບານກຸງວໍຊິງຕັນໄດ້ປະນາມຢ່າງແຂງແຮງຕໍ່ຄວາມຮຸນແຮງທີ່ກໍາລັງເພີ່ມຂຶ້ນໂດຍລັດຖະບານຂອງປະທານາທິບໍດີ Bashar al-Assad ແຫ່ງຊີເຣຍນັ້ນ.
ທ່ານນາງຄລິນຕັນ ຈະເຂົ້າຮ່ວມກັບພວກລັດຖະມົນຕີຕ່າງປະເທດຂອງຝຣັ່ງແລະອັງກິດໃນສະໄໝປະຊຸມຂອງສະພາຄວາມໝັ້ນຄົງໃນວັນອັງຄານມື້ນີ້. ພວກປະເທດມະຫາອໍານາດຝ່າຍຕາເວັນຕົກໄດ້ດໍາເນີນການມາກ່ຽວກັບຮ່າງຍັດຕິສະບັບນຶ່ງເພື່ອໃຫ້ການສະໜັບສະໜຸນຕໍ່ແຜນການຂອງສັນນິບາດຊາດອາຫຣັບຊຶ່ງຮຽກຮ້ອງໃຫ້ທ່ານ Assad ລາອອກຈາກຕໍາແໜ່ງ ອັນເປັນຊ່ອງທາງນຶ່ງເພື່ອແກ້ໄຂວິກິດການໃນຊີເຣຍນັ້ນ.
ຊີເຣຍໄດ້ປະຕິເສດຕໍ່ຂໍ້ສະເໜີດັ່ງກ່າວ ວ່າເປັນການຝ່າຝືນຕໍ່ອະທິປະໄຕຂອງຕົນ.
ທ່ານນາງຄລິນຕັນ ກ່າວຢູ່ໃນຖະແຫລງການສະບັບນຶ່ງໃນວັນຈັນວານນີ້ວ່າ ສະພາຄວາມໝັ້ນຄົງຈະຕ້ອງທໍາການເຄື່ອນໄຫວ ໂດຍສະແດງທັດສະນະປະຊາຄົມໂລກກ່ຽວກັບການປາບປາມຂອງລັດຖະບານຊີເຣຍຕໍ່ພວກຝ່າຍຄ້ານທີ່ດໍາເນີນມາໄດ້ 10 ເດືອນແລ້ວນັ້ນ ວ່າເປັນໄພຂົ່ມຂູ່ຕໍ່ສັນຕິພາບແລະຄວາມໝັ້ນຄົງ.
ທ່ານນາງຄລິນຕັນກ່າວຕື່ມວ່າ ສະຫະລັດປະນາມຕໍ່ອັນທີ່ຕົນເອີ້ນວ່າ ການໂຈມຕີທີ່ຮຸນແຮງແລະທາລຸນຂອງລັດຖະບານຊີເຣຍ ທີ່ໄດ້ສັງຫານພວກພົນລະເຮືອນຫລາຍຮ້ອຍຄົນໃນຫວ່າງບໍ່ເທົາໃດມື້ຜ່ານມານີ້.
ນາຍົກລັດຖະມົນຕີອັງກິດ ທ່ານ David Cameron ຮຽກຮ້ອງໃຫ້ຣັດເຊຍໃຫ້ການສະ
ໜັບສະໜຸນຕໍ່ຮ່າງຍັດຕິດັ່ງກ່າວ ໂດຍກ່າວວ່າ ມັນສົມຄວນແກ່ເວລາແລ້ວສໍາລັບພວກປະ
ເທດສະມາຊິກຂອງສະພາຄວາມໝັ້ນຄົງຢຸດປ້ອງກັນພວກທີ່ທໍາການປາບປາມປະຊາ
ຊົນຢ່າງນອງເລືອດນີ້.
ຣັດເຊຍແລະຈີນ ຊຶ່ງທັງສອງເປັນສະມາຊິກສະພາຄວາມໝັ້ນຄົງ ໄດ້ໃຊ້ສິດຍັບຍັ້ງຕໍ່ຮ່າງ
ຍັດຕິທີ່ໄດ້ຮັບການໜຸນຫລັງຈາກຝ່າຍຕາເວັນຕົກໃນເດືອນຕຸລາຜ່ານມາ ຊຶ່ງຈະໄດ້ປະ
ນາມການປາບປາມຂອງລັດຖະບານຊີເຣຍຕໍ່ການລຸກຮືຂຶ້ນຂອງປະຊາຊົນຕໍ່ຕ້ານລັດຖະ
ບານນັ້ນ.
