ອີງຕາມການສຳຫລວດຄັ້ງໃໝ່ ຂໍ້ຂັດແຍ້ງກ່ຽວກັບທີ່ດິນ ໃນ
ກຳປູເຈຍນັ້ນ ກໍ່ໃຫ້ເກີດມີ ຄວາມບໍ່ໝັ້ນຄົງໃນວຽງງານ ພາໃຫ້
ເກີດສະພາບທຸກຈົນ ຄວາມບໍ່ໝັ້ນຄົງໃນດ້ານອາຫານການກິນ
ແລະ ໄດ້ເຮັດໃຫ້ມີຄວາມບໍ່ໝັ້ນຄົງ ໃນດ້ານຮ່າງກາຍ ແລະ
ສະພາບຈິດໃຈ ເພີ້ມຂຶ້ນ ນຳດ້ວຍ.
ບົດລາຍງານທີ່ຍາວ 110 ໜ້າ ຂອງການສຳຫລວດດັ່ງກ່າວ
ທີ່ມີຊື່ວ່າ “ຄວາມໝັ້ນຄົງຂອງມະນຸດ ແລະ ສິດທິໃນການ
ຄຸ້ມຄອງທີ່ດິນ ໃນກຳປູເຈຍ ຫຼື Human Security and
Land Rights in Cambodia” ຊຶ່ງໄດ້ດຳເນີນງານໂດຍ
ສະຖາບັນກຳປູເຈຍ ເພື່ອການຮ່ວມມື ແລະ ສັນຕິພາບ ຫຼື
Cambodia Institution for Cooperation and Peace ທີ່ໄດ້ຮັບທຶນ ຈາກສະຖານທູດ
ອັງກິດ ຢູ່ໃນນະຄອນຫລວງພະນົມເປັນ ໄດ້ພົບວ່າ ຂໍ້ຂັດແຍ້ງກ່ຽວກັບທີ່ດິນຕ່າງໆ ແມ່ນກໍ່
ໃຫ້ເກີດມີຄວາມບໍ່ໝັ້ນຄົງ ຕໍ່ສະພາບການເປັນຢູ່ ຄວາມທຸກຍາກ ແລະ ເຮັດໃຫ້ເຈັບປ່ວຍ
ທາງຈິດໃຈ. ສຳຫລັບພວກຄົນທີ່ມີການສຶກສາໜ້ອຍ ຫຼື ບໍ່ມີເລີຍນັ້ນ ພ້ອມທັງ ພວກແມ່
ໝ້າຍ ແມ່ນສ່ວນໃຫຍ່ ເປັນພວກທີ່ຖືກເອົາລັດເອົາປຽບ ຂອງການຢຶດເອົາທີ່ດິນ ໃນ
ກຳປູເຈຍ.
ບົດລາຍງານ ໄດ້ສຳຫລວດເບິ່ງ ປະມານ 400 ຄົນ ຈາກຊຸມຊົນຕ່າງໆ ໃນນະຄອນຫລວງ
Phnom Penh ແຂວງ Kampong Chnang ແລະ Ratanakkiri.
ທ່ານ Pou Savachana ຜູ້ຂຽນບົດລາຍງານຮ່ວມ ຂອງການສຳຫລວດນີ້ ແລະ ເປັນ
ຮອງອຳນວຍການ ຂອງສະຖາບັນ Cambodia Institution for Cooperation and
Peace ກ່າວວ່າ ບົດລາຍງານໄດ້ເນັ້ນໃຫ້ເຫັນ ເຖິງຄວາມຈຳເປັນ ທີ່ຈະຕ້ອງໃຫ້ມີ
ການປະຕິຮູບ.
ທ່ານນາງ Long Kim Heang ເຈົ້າໜ້າທີ່ຂອງ ໜ່ວຍກວດກາສິດຄຸ້ມຄອງເຮືອນຊານ
ຜູ້ທີ່ເຮັດວຽກຢ່າງໃກ້ຊິດ ກັບຊຸມຊົນທີ່ຖືກຂັບໄຫລ່ອອກຈາກທີ່ດິນ ໃນນະຄອນຫລວງ
ພະນົມເປັນ ກ່າວວ່າ ບົດລາຍງານດັ່ງກ່າວແມ່ນຖືກຕ້ອງ ທີ່ໄດ້ສະທ້ອນໃຫ້ເຫັນບັນຫາ
ຕ່າງໆ ທີ່ຜູ້ເຄາະຮ້າຍທັງຫຼາຍ ປະເຊີນໜ້າຢູ່ນັ້ນ.
ທ່ານນາງ Long Kim Heang ເວົ້າວ່າ “ພວກຜູ້ເຄາະຮ້າຍທີ່ຖືກຂັບໄຫລ່ອອກ ຈາກ
ພື້ນທີ່ ແມ່ນປະເຊີນກັບຄວາມທຸກຍາກ ພວກເຂົາເຈົ້າ ສູນເສຍເຮືອນຊານຂອງ
ເຂົາເຈົ້າ. ພວກເຂົາເຈົ້າປະເຊີນກັບ ຄວາມບອບຊ້ຳທາງດ້ານຈິດໃຈ ແລະ ບັນຫາ
ຕ່າງໆ ເຊັ່ນວ່າ ມີໜີ້ສິນຫຼາຍຂຶ້ນ ພວກລູກເຕົ້າພາກັນອອກໂຮງຮຽນ ເປັນຕົ້ນ.
ເລື້ອງເຫຼົ່ານີ້ແມ່ນເປັນຄວາມຈິງ.”
