ລິ້ງ ສຳຫລັບເຂົ້າຫາ

logo-print

ທ. ​ໄບ​ເດັນ ຊະ​ນະ​ໃນ 8 ລັດ ຂະ​ນະ​ທີ່​ ທ. ແຊນ​ເດີ​ສ໌ ມີ​ຄະ​ແນນ​ນຳ​ໜ້າ ໃນ​ລັດ​ຄາ​ລິ​ຟໍ​ເນຍ


ພວກ​ສະ​ໜັບ​ສະ​ໜຸນ​ພາ​ກັນ​ເອົາ​ປ້າຍ​ຊື່​ຂອງທ.​ ໂຈ ໄບ​ເດັນ, ຜູ້​ສະ​ໝັກ​ເລືອກ​ຕັ້ງປະ​ທາ​ນາ​ທິ​ບໍ​ດີຈາກພັກ​ເດ​ໂມ​ແຄ​ຣັດ ຢູ່​ໃນ​ການ​ໂຮມ​ຊຸມ​ນຸມໃນ​ນະ​ຄອນ​ລອ​ສ ແອນ​ເຈ​ແລ​ສ, ລັດ​ຄາ​ລິ​ຟໍ​ເນຍ, ວັນ​ທີ 3 ມີ​ນາ 2020

ການ​ໂຄ​ສະ​ນາ​ຫາ​ສຽງ​ຂອງ​ອະ​ດີ​ດ​ຮອງປະ​ທາ​ນາ​ທິ​ບໍ​ດີ ໂຈ​ ໄບເດັນ (Joe Biden) ເພື່ອ​ໃຫ້​ຖືກ​ແຕ່ງ​ຕັ້ງ​ເປັນ​ຜູ້​ຕາງ​ໜ້າ​ພັກເດ​ໂມ​ແຄ​ຣັດໄປ​ແຂ່ງ​ຂັນ​ເປັນປະ​ທາ​ນາ​ທິ​ບໍ​ດີ ​ໄດ້ຮັບແຮງ​ກະ​ຕຸ້ນ​ພຸ້ງ​ສູງຂຶ້ນ​ ໃນ​ວັນ​ອັງ​ຄານ​ວານນີ້ ເມື່ອ​ທ່ານ​ໄດ້​ຮັບ​ໄຊ​ຊະ​ນະ​ໃນຢ່າ​ໜ້ອຍ 8 ລັດ​ຂອງ​ຈຳ​ນວນທັງ​ໝົດ 14 ລັດ​ ທີ່​ບັນ​ດາ​ພວກ​ປ່ອນ​ບັດໄປເລືອກ​ເອົາ​ຜູ້​ສະ​ໝັກ​ທີ່​ເຂົາ​ເຈົ້າ​ມັກ​ຢູ່ໃນ​ການ​ເລືອກ​ຕັ້ງ​ຂັ້ນ​ຕົ້ນ. ໃນ​ຕອນ​ເຊົ້າໆ​ ຂອງວັນ​ພຸດມື້ນີ້ ສະ​ມາ​ຊິກ​ສະ​ພາ​ສູງເບີ​ນີ ແຊນ​ເດີ​ສ໌ (Bernie Sanders) ໄດ້ຮັບ​ຄະ​ແນນ​ນຳ​ໜ້າໝູ່ຢູ່​ໃນ​ລັດ​ຄາ​ລິ​ຟໍ​ເນຍ, ຊຶ່ງ​ເປັນຈຳ​ນວນ​ຄະ​ແນນ​ທີ່​ໃຫຍ່​ທີ່​ສຸດ​ໃນ​ການ​ແຂ່ງ​ຂັນນີ້ ແລະ​ລັດ​ເທັກ​ຊັ​ສແມ່ນ​ຍັງ​ມີ​ຄະ​ແນນ​ສູ​ສີ​ກັນ​ຫລາຍ ຊຶ່ງ​ຍາກ​ທີ່​ຈະ​ບອກ​ໄດ້. Mike O'Sullivan, ນັກ​ຂ່າວ​ວີ​ໂອ​ເອ​ມີ​ລາຍ​ລະ​ອຽດ​ເພີ້ມ​ກ່ຽວ​ກັບ​ຜົນ​ການ​ເລືອກ​ຕັ້ງ​ໃນ​ວັນ​ອັງ​ຄານ​ພິ​ເສດ ຊຶ່ງ​ບົວ​ສະ​ຫວັນ​ຈະ​ນຳ​ມາ​ສະ​ເໜີ​ທ່ານ​ໃນ​ອັນ​ດັບ​ຕໍ່​ໄປ.


ບັນ​ດາ​ຜູ້ປ່ອນ​ບັດ​ໄດ້ພາ​ກັນ​ໄປ​ຫາ​ສະ​ຖານ​ທີ່​ປ່ອນ​ບັດຢູ່​ໃນລັດຕ່າງໆທີ່​ຢູ່​ໃນ​ວົງລັດ​ສະ​ໝີ​ອັນ​ກວ້າງໆ - ນັບ​ແຕ່ລັດເວີ​ຈີ​ເນຍ ໄປຈົນ​ເຖິງ​ລັດ​ຄາ​ລິ​ຟໍ​ເນຍ-- ຊຶ່ງ​ເປັນ​ບ່ອນ​ໃຫ້​ຄະ​ແນນ​ໃຫຍ່​ທີ່​ສຸດຂອງວັນ​ອັງ​ຄານວານນີ້.

ໃນ​ຂະ​ນະ​ທີ່​ບັດຄະ​ແນນ​ສຽງກຳ​ລັງ​ຖືກ​ນັບ​ຢູ່ນັ້ນ, ທ່ານ​ໄບ​ເດັນ ໄດ້ຮັບ​ຄະ​ແນນ​ຫລຸດ​ທ່ານ​ແຊນ​ເດີ​ສ໌ ຢູ່​ໃນ​ລັດ​ຄາ​ລິ​ຟໍ​ເນຍ ແຕ່ກໍ​ມີ​ຄະ​ແນນ​ຊະ​ນະຢູ່ ພາຍ​ຫລັງ​ທີ່​ໄດ້​ຮັບ​ໄຊ​ຊະ​ນະ​ຢູ່​ໃນ​ລັດ​ອື່ນໆ ໄປ​ແລ້ວ.

ທ່ານ​ ໂຈ ໄບ​ເດັນ, ຜູ້​ສະ​ໝັກ​ເລືອກ​ຕັ້ງປະ​ທາ​ນາ​ທິ​ບໍ​ດີຈາກພັກ​ເດ​ໂມ​ແຄ​ຣັດ ທ່ານ​ນຶ່ງກ່າວ​ວ່າ:
"ແລະ​ພວກ​ເຂົາ​ເວົ້າ​ວ່າ ໂຈ, ເມື່ອ​ເຈົ້າ​ໄປ​ຮອດວັນ​ອັງ​ຄານ​ພິ​ເສດ ຫລື Super Tuesday ແລ້ວ​ກໍ​ຈະ​ຈົບ​ລົງເທົ່າ​ນັ້ນຫລະ​. ເອີ່ ມັນ​ກໍອາດ​ຈະຈົບລົງສຳ​ລັບ​ຄົນ​ອື່ນ. ຈົ່ງ​ເວົ້າ​ເລື້ອງນັ້ນ​ໃຫ້​ພວກທີ່​ຢູ່​ໃນ​ລັດ​ເວີ​ຈີ​ເນຍ, ຄາ​ໂຣ​ໄລ​ນາ​ເໜືອ, ອາ​ລາ​ບາ​ມາ, ເທັນ​ເນັ​ສຊີ, ໂອກ​ລາ​ໂຮ​ມາ, ອາ​ແກນ​ຊໍ, ມິ​ນເນ​ໂຊ​ຕາ ​ຟັງແດ່."

ແລະ​ທ່ານ​ໄບ​ດັນ​ ໄດ້​ຮັບ​ໄຊ​ຊະ​ນະ​ຢູ່ໃນ​ລັດ​ແມັ​ສ​ຊາ​ຈູ​ແຊັ​ສ, ຊຶ່ງ​ເປັນ​ລັດ​ບ້ານຢູ່ ຂອງຄູ່​ແຂ່ງ​ຂອງ​ທ່ານ, ສະ​ມາ​ຊິກ​ສະ​ພາ​ສູງເອ​ລີ​ຊາ​ເບດ ວໍ​ເຣນ (Elizabeth Warren).

ການ​ແຂ່​ງ​ຂັນ​ແມ່ນ​ເຄັ່ງ​ຮ້ອນ​ຂຶ້ນ ​ໃນ​ວັນ​ຈັນ​ຜ່ານ​ມາ ເມື່ອ​ອະ​ດີດ​ເຈົ້າ​ເມືອງ ເມືອງເຊົ້າ​ເບນ, ລັດອິ​ເດຍ​ນາ, ທ່ານ​ພີດ ບູ​ຕິ​ເຈ​ຈ (Pete Buttigieg) ແລະ ສະ​ມາ​ຊິກ​ສະ​ພາ​ສູງລັດມິ​ນເນ​ໂຊ​ຕາ, ທ່ານ​ນາງ ເອມ​ມີ ໂຄ​ລ​ບູ​ຈາ​ຣ໌, ໄດ້​ຖອນ​ໂຕ​ອອກ​ຈາກ​ການ​ແຂ່ງ​ຂັນ ແລະ​ພາ​ກັນ​ໃຫ້​ການ​ຮັບ​ຮອງ​ຢ່າງ​ເປັນ​ທາງ​ການ​ແກ່​ທ່ານໄບ​ເດັນ.

ທ່ານ​ແຊນ​ເດີ​ສ໌ ໄດ້​ຮັບ​ໄຊ​ຊະ​ນະ​ຢູ່​ໃນ​ລັດເວີ​ມັນ​ທ໌ ທີ່​ເປັນ​ລັດ​ບ້ານ​ຂອງ​ທ່ານ​ເອງ ພ້ອມ​ກັ​ບ​ລັດ​ຢູ​ທາ ແລະ​ລັດ​ໂຄ​ໂລ​ຣາ​ໂດ.

ທ່ານເບີ​ນີ ​ແຊນ​ເດີ​ສ໌ (Bernie Sanders), ຜູ້​ສະ​ໝັກ​ເລືອກ​ຕັ້ງປະ​ທາ​ນາ​ທິ​ບໍ​ດີທ່ານ​ນຶ່ງ​ກ່າວ​ວ່າ:
"​ພວກ​ເຮົາ​ຈະ​ຊະ​ນະ​ການ​ເລືອກຕັ້ງ​ໃຫ້​ເປັນ​ຜູ້​ຕາງ​ໜ້າ​ພັກ​ເດ​ໂມ​ແຄ​ຣັດ ແລະ​ພວກ​ເຮົາ​ຈະ​ເຮັດ​ໃຫ້ປະ​ທາ​ນາ​ທິ​ບໍ​ດີທີ່ເປັນ​ອັນ​ຕະ​ລາຍ​ຮ້າຍ​ແຮງຫລາຍ​ທີ່​ສຸດ​ໃນ​ປະ​ຫວັດ​ສາດ​ຂອງ​ປະ​ເທດ ​ຜ່າຍ​ແພ້ໄປ."

ທ່ານ​ນາງ ເອ​ລີ​ຊາ​ເບດ ວໍ​ເຣນ ທີ່​ໄດ້​ຮັບ​ຄະ​ແນນ​ລາກ​ຫລັງ​ໝູ່​ຫລາຍ​ທີ່​ສຸດນັ້ນ ແນະ​ນຳ​ໃຫ້​ພວກ​ສະ​ໜັບ​ສະ​ໜຸນ​ທ່ານ​ນາງ ​ໃຫ້​ປ່ອນ​ບັດ​ເອົາ​ຕາມ​ຄວາມ​ຮູ້​ສຶກ​ໃນ​ໃຈ​ຂອງ​ເຂົາ​ເຈົ້າ ບໍ່​ແມ່ນ​ອີງ​ໃສ່​ພວກ​ນັກຊ່ຽວ​ຊານ​ເວົ້າ.

ສະ​ມາ​ຊິກ​ສະ​ພາ​ສູງເອ​ລີ​ຊາ​ເບດ ວໍ​ເຣນ, ຜູ້​ສະ​ໝັກ​ເລືອກ​ຕັ້ງປະ​ທາ​ນາ​ທິ​ບໍ​ດີ ຈາກພັກ​ເດ​ໂມ​ແຄ​ຣັດທ່ານ​ນຶ່ງ​ເວົ້າ​ວ່າ:
"ແລະ​ໃຫ້​ເລືອກ​ເອົາ​ບຸກ​ຄົນ​ທີ່​ທ່ານ​ຄິດ​ວ່າ ຈະ​ເປັນປະ​ທາ​ນາ​ທິ​ບໍ​ດີຂອງ​ສະ​ຫະ​ລັດ​ອາ​ເມ​ຣິ​ກາ ​ທີ່​ດີ​ທີ່​ສຸດ."

ມະ​ຫາ​ເສດ​ຖີ​ເງິນ​ຕື້ ໄມ​ໂຄ ບ​ລູມ​ເບີກ (Michael Bloomberg) ໄດ້​ຮັບ​ໄຊ​ຊະ​ນະ​ຢູ່​ໃນ​ແຕ່​ເກາະ​ຊາ​ມົວ​ຂອງ​ອາ​ເມ​ຣິ​ກາ​ເທົ່າ​ນັ້ນ ແຕ່​ກໍ​ມີ​ຄວາມຮູ້​ສຶກ​ກະ​ຕື​ລື​ລົ້ນ ຢູ່​ໃນ​ລັດ​ຟ​ລໍ​ຣິ​ດາທີ່​ຈະ​ຈັດ​ການ​ເລືອກ​ຕັ້ງ​ຂັ້ນ​ຕົ້ນ​ຂອງ​ຕົນ​ຂຶ້ນ ​ໃນ​ສອງ​ອາ​ທິດ​ຂ້າງ​ໜ້ານີ້.

ທ່ານໄມ​ໂຄ ບ​ລູມ​ເບີກ, ຜູ້​ສະ​ໝັກ​ເລືອກ​ຕັ້ງປະ​ທາ​ນາ​ທິ​ບໍ​ດີຈາກພັກ​ເດ​ໂມ​ແຄ​ຣັດທ່ານ​ນຶ່ງ​ເວົ້າ​ວ່າ:
"ຖ້​າ​ຫາກຂ້າ​ພະເຈົ້າໄດ້​ເປັນຜູ້​ຖືກ​ແຕ່ງ​ຕັ້ງ​ໃຫ້​ຕາງໜ້າ​ພັກ, ຂ້າ​ພະ​ເຈົ້າຂໍ​ໃຫ້​ສັນ​ຍາ​ກັບ​ທ່ານ​ແນວ​ນີ້. ພວກ​ເຮົາ​ຈະ​ເຮັດ​ໃຫ້​ດໍ​ໂນ​ລ ທ​ຣຳ ​ຜ່າຍ​ແພ້​ຢູ່​ໃນ​ລັດ​ຟ​ລໍ​ຣິ​ດາ ແລະ ໃນ​ລັດ​ທີ່ບໍ່​ມີ​ຄວາມ​ແນ່ນອນ​ອື່ນໆ​ອີກ ຢູ່​ທົ່ວ​ປະ​ເທດ."

​ສ່ວນປະ​ທາ​ນາ​ທິ​ບໍ​ດີ ດໍ​ໂນ​ລ ທ​ຣຳນັ້ນ ​ເວົ້າ​ວ່າ ທ່ານ​ຈະ​ທຳ​ການ​ໂຕວາ​ທີ​ກັບຜູ້​ສະ​ໝັກ​ມາ​ຈາກພັກ​ເດ​ໂມ​ແຄ​ຣັດທີ່​ໄດ້​ຮັບ​ໄຊ​ຊະ​ນະ ​ດ້ວຍ​ຄວາມ​ຍິນ​ດີເປັນ​ຢ່າງ​ຍິ່ງ ຢູ່ໃນ​ຫລາຍ​ອາ​ທິດ​ຂ້າງ​ໜ້າ ກ່ອນການ​ເລືອກ​ຕັ້ງທີ່​ຈະ​ຈັດ​ຂຶ້ນ​ໃນ​ວັນ​ທີ 3 ພະ​ຈິກນີ້.

ອ່ານ​ຂ່າວນີ້​ເພີ້ມ​ເປັນ​ພາ​ສາ​ອັງ​ກິດ​ຢູ່​ຂ້າງ​ລຸ່ມນີ້

Former Vice President Joe Biden's campaign for the Democratic Party's presidential nomination got a boost on Tuesday, as he won at least eight of the 14 states where voters made their choice in party primary elections. Early Wednesday, Senator Bernie Sanders was ahead in California, the biggest prize in the contest, and Texas was too close to call. VOA's Mike O'Sullivan has more of the results from Super Tuesday.

Voters went to the polls in a broad swath of states -- from Virginia to California -- which was Tuesday's biggest prize.

As the votes were counted, Biden trailed Sanders in California, but scored win after win in other states.

Joe Biden, Democratic Presidential Candidate:
"And they said Joe when you get to Super Tuesday it will be over. Well, it may be over for the other guy. Tell that to the folks in Virginia, North Carolina, Alabama, Tennessee, Oklahoma, Arkansas, Minnesota."

And Biden won in Massachusetts, the home state of his rival, Senator Elizabeth Warren.

The race tightened Monday, when former South Bend, Indiana Mayor Pete Buttigieg and Minnesota Senator Amy Klobuchar withdrew and endorsed Biden.

Sanders scored wins in his home state of Vermont, Utah and Colorado.

Bernie Sanders, Presidential Candidate:
"We're going to win the Democratic nomination and we are going to defeat the most dangerous president in the history of this country."

Elizabeth Warren, trailing badly, urged supporters to follow their hearts and not the pundits.

Senator Elizabeth Warren, Democratic President Candidate:
"And vote for the person you think will make the best president of the United States of America."

Billionaire businessman Michael Bloomberg won only in American Samoa, but was upbeat in Florida, which will hold its primary in two weeks.

Michael Bloomberg, Democratic President Candidate:
"If I'm the nominee, let me make you this promise. We will beat Donald Trump in Florida and in swing states around the country."

President Donald Trump says he will gladly debate the winning Democrat in the weeks before the November 3 election.

ລາຍງານບລອກສົດ! ຜົນການເລືອກຕັ້ງ ປະທານາທິບໍດີ ສະຫະລັດ 2020

ລາຍງານບລອກສົດ! ການເລືອກຕັ້ງ ໃນ ສະຫະລັດ ປີ 2020

ອະດີດຮອງປະທານາທິບໍດີິສະຫະລັດ ທ່ານໂຈ ໄບເດັນ ຊຶ່ງເປັນບຸກຄົນທີ່ຮູ້ຈັກກັນດີໃນວົງການເມືອງຂອງນະຄອນ ຫຼວງວໍຊິງຕັນ ເກືອບເຄິ່ງສັດຕະວັດແລ້ວນັ້ນ ຄາດຄະເນກັນວ່າ ຈະເປັນຜູ້ຊະນະການເລືອກຕັ້ງປະທານາທິບໍດີຂອງສະຫະລັດ ແລະຈະໄດ້ສາບານຕົວເຂົ້າຮັບຕຳແໜ່ງໃນວັນທີ 20 ມັງກອນຈະມາ ເປັນປະທານາທິບໍດີທີ່ມີອາຍຸແກ່ທີ່ສຸດ ໃນປະຫວັດສາດ. ທ່ານໄບເດັນ ສັງກັດພັກເດໂມແຄຣັດ ທີ່ໄດ້ເປັນສະມາຊິກສະພາສູງມາ 36 ປີ ແລະ 8 ປີ ເປັນຮອງປະທານາທິບໍດີ ໃນສະໄໝປະທານາທິບໍດີບາຣັກໂອບາມາ ແມ່ນຄາດກັນໂດຍອົງການຂ່າວຕ່າງໆ ໄດ້ເອົາຊະນະປະທານາທິບໍດີດໍໂນລ ທຣຳ ທີ່ລົງສະໝັກແຂ່ງຂັນເອົາຕຳແໜ່ງຕື່ມອີກ ໃນການໂຄສະນາຫາສຽງທີ່ຂົມຂື່ນ ແລະຫຼັງຈາກໄດ້ມີການນັບບັດຄະແນນສຽງຫຼັງຈາກການເລືອກຕັ້ງມາໄດ້ຫຼາຍມື້ແລ້ວ. ຄະແນນສຽງແມ່ນຍັງຈະໄດ້ຮັບການຢືນຢັນຢ່າງເປັນທາງການ ແລະພວມໄດ້ຮັບການທ້າທາຍຢູ່ໃນສານ ແຕ່ກໍຄາດກັນວ່າ ຈະຜ່ານຜ່າໄປໄດ້. ທ່ານໄບເດັນ ໄດ້ຊະນະຕຳແໜ່ງປະທານາທິບໍດີ ໂດຍໄດ້ຮັບຄະແນນຈາກຜູ້ແທນລັດ ຢ່າງໜ້ອຍ 270 ຄະແນນ ຂອງຈຳນວນທັງໝົດ 538 ຄະແນນ. ການໄດ້ຮັບໄຊຊະຂອງທ່ານໄບເດັນ ເຮັດໃຫ້ທ່ານທຣຳເປັນປະທານາທິບໍດີຄົນທີ 3 ໃນຮອບສີ່ທົດສະວັດ ທີ່ບໍ່ສາມາດໄດ້ຮັບເລືອກ ໃຫ້ເຂົ້າຮັບຕຳແໜ່ງຕື່ມອີກ ຫຼັງຈາກໄດ້ຂຶ້ນເປັນປະທານາທິບໍດີ 4 ປີແລ້ວ.

00:30 8.11.2020

ລາຍງານຂ່າວຫຼ້າສຸດ ໃນເຊົ້າວັນເສົາມື້ນີ້ແຈ້ງວ່າ ທ່ານໂຈ ໄບເດັນ ແລະທ່ານນາງຄາມາມາ ແຮຣິສ ຜູ້ສະໝັກເປັນປະທານາທິບໍດີ ຈາກພັກເດໂມແຄຣັດ ໄດ້ຮັບຄະແນນ 273 ຄະແນນສຽງຂອງຜູ້ຕາງໜ້າລັດແລ້ວ ເຊີນເບິ່ງແຜນທີ່ການເລືອກຕັ້ງໃນສະຫະລັດຂອງເຮົາຕື່ມ!

23:51 7.11.2020

ມາຮອດເຊົ້າວັນເສົາມື້ນີ້ ຕາມເວລາໃນພາກຕາເວັນອອກຂອງສະຫະລັດ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍງານໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214 ຄະແນນ. ທ່ານໄບເດັນຕອ້ງການອີກພຽງ 17 ຄະແນນ ຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາ ແມ່ນຕ້ອງການອີກ 56 ຄະແນນຈຶ່ງຈະຮອດ 270 ຄະແນນເພື່ອຈະເຂົ້າກຳຕຳແໜ່ງຕື່ມອີກ 4 ປີ. ເວລານີ້ຫຼາຍລັດຍັງສືບຕໍ່ນັບຄະແນນກັນຢູ່ ແລະລັດຈໍເຈຍ ໄດ້ປະກາດໃນວັນສຸກມື້ວານນີ້ວ່າ ຕົນຈະນັບຄະແນນ ຄືນໃໝ່ທັງໝົດ ຍ້ອນວ່າ ປະທານາທິບໍດີດໍໂນລ ທຣຳ ຜູ້ສະໝັກຂອງພັກຣີພັບບລີກັນ ແລະຜູ້ທ້າຊິງ ຫຼືຄູ່ແຂ່ງຈາກພັກເດໂມແຄຣັດ ທ່ານໂຈ ໄບເດັນ ມີຄະແນນໃກ້ຄຽງກັນຫຼາຍ.

18:52 7.11.2020

ໃນຕອນຄ່ຳຂອງວັນພະຫັດວານນີ້ ປະທານາທິບໍດີດໍໂນລ ທຣຳ ໄດ້ກ່າວອ້າງ ໂດຍບໍ່ມີຫຼັກຖານວ່າ ທ່ານໄດ້ຖືກສໍ້ໂກງ ໃຫ້ອອກຈາກຕໍາແໜ່ງ ໃນສະໄໝທີສອງ. ທ່ານກ່າວວ່າ “ຖ້າທ່ານນັບບັດຄະແນນສຽງທີ່ປ່ອນແບບຖືກຕ້ອງຕາມກົດໝາຍ, ຂ້າພະເຈົ້າຈະໄດ້ຊະນະຢ່າງງ່າຍໆ.” ທ່ານກ່າວຕໍ່ໄປອີກວ່າ "ຖ້າທ່ານນັບບັດຄະແນນສຽງທີ່ຜິດກົດໝາຍ, ພວກເຂົາສາມາດພະຍາຍາມລັກເອົາການເລືອກຕັ້ງໄປ ຈາກພວກເຮົາໄດ້." ທ່ານທຣໍາ ໄດ້ໃຊ້ເວລາ 16 ນາທີ ຢືນກ່າວຄໍາປາໄສ ຢູ່ຫ້ອງປະຊຸມຖະແຫລງຂ່າວ ໃນທຳນຽບຂາວ ໂດຍກ່າວວ່າ ຄະແນນນຳໜ້າຂອງທ່ານທີ່ມີຢູ່ໃນລັດຕ່າງໆກຳລັງຖືກ "ລັກເອົາອອກໄປຢ່າງລັບໆ ເທື່ອລະເລັກລະນ້ອຍ" ໃນຂະນະທີ່ມີການນັບຄະແນນສຽງຍັງສືບຕໍ່ດໍາເນີນໄປຢູ່ນັ້ນ. ມາຮອດວັນສຸກ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາແໜ່ງໄວ້ ໃນອີກ 4 ປີຕໍ່ໜ້າ.

19:29 6.11.2020

ໃນຕອນບ່າຍວັນພະຫັດມື້ນີ້ ຕາມເວລາໃນເຂດພາກຕາເວັນອອກຂອງສະຫະລັດ ທ່ານໂຈ ໄບເດັນ ໄດ້ປາກົດຕົວເປັນເວລາສັ້ນໆ ທີ່ນະຄອນວິລມິງຕັນ ໃນລັດເດລາແວ ໂດຍກ່າວວ່າ "ບັດທຸກໆບັດຈະຕ້ອງໄດ້ຖືກນັບ." ທ່ານກ່າວຕື່ມວ່າ "ມັນແມ່ນກ່ຽວກັບວ່າ ປະຊາຊົນໃນປະເທດນີ້ ໄດ້ສະແດງອອກເຖິງການຕັດສິນໃຈຂອງພວກເຂົາເຈົ້າແບບໃດ ແລະມັນເປັນຄວາມປະສົງຂອງຜູ້ມີສິດປ່ອນບັດ ບໍ່ມີໃຜ ແລະບໍ່ມີສິ່ງໃດທັງໝົດ ທີ່ໄດ້ເລືອກເອົາປະທານາທິບໍດີຂອງສະຫະລັດ."

06:13 6.11.2020

ໃນເວລາ 12 ໂມງເຄິ່ງຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທ່ານໂຈ ໄບເດັນ ຄູ່ແຂ່ງຈາກພັກເດໂມແຄຣັດ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ແຕ່ທ່ານປະທານາທິບໍດີ ດໍໂນລ ທຣຳ ໄດ້ຮັບຕື່ມອີກນຶ່ງຄະແນນ ເພີ້ມຂຶ້ນເປັນ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນຊຶ່ງຄາດໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້. ລາຍງານຂ່າວແຈ້ງວ່າ ມາຮອດວັນພະຫັດມື້ນີ້ ທ່ານໄບເດັນແມ່ນນຳໜ້າ ໃນຄະແນນສຽງຂອງປະຊາຊົນ ຄືໄດ້ 71 ລ້ານ 6 ແສນຄົນ ປຽບທຽບໃສ່ທ່ານທຣຳ ທີ່ໄດ້ຮັບ​ແຕ່ 68​ ລ້ານ 1 ແສນຄົນ ອີງຕາມອົງການຄົ້ນຄວ້າເອດີສັນແລະອົງການຂ່າວເອພີ.

00:38 6.11.2020

ມາຮອດ 7:00 ຕອນເຊົ້າຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທັງທ່ານໂຈ ໄບເດັນ ແລະປະທານາທິບໍດີດໍໂນລ ທຣຳ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້ ແຕ່ພວກທ່ານກໍສາມາດຕິດຕາມເບິ່ງໜ້າເວັບໄຊຂອງພວກເຮົາ ກ່ຽວກັບຄະແນນຫລ້າສຸດ.

19:20 5.11.2020

ມາຮອດ 9:00 ຕອນຄໍ່າຂອງວັນພຸດ, ທີ 4 ພະຈິກ ທ່ານໂຈ ໄບເດັນໄດ້ຄະແນນຈາກຜູ້ແທນລັດຕື່ມອີກສອງລັດ ຄືມິຊິແກນ ແລະວິສຄັນຊິນ ຈຶ່ງເຮັດໃຫ້ທ່ານນໍາໜ້າ ທ່ານທຣໍາ ໂດຍມີ 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້!

ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ
ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ

08:42 5.11.2020
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ

ມາເຖິງປັດຈຸບັນນີ້ ຄະແນນຈາກຜູ້ແທນ ຂອງທ່ານດໍໂນລ ທຣຳ ແລະທ່ານໂຈ ໄບເດັນ ສູສີກັນ 213 ຕໍ່ 220 ໃນຂະນະນີ້ ຍັງເຫຼືອອີກຢູ່ 9 ລັດທີ່ຍັງບໍ່ທັນສຳເລັດການນັບຄະແນນສຽງເທື່ອ ປະກອບດ້ວຍລັດ ເມນ ເພັນຊີລເວເນຍ ຄາໂຣໄລນາເໜືອ ຈໍເຈຍ ມິຊິແກນ ວິສຄັນຊິນ ເນວາດາ ອາຣິໂຊນາ ແລະອາລາສກາ ຄາດກັນວ່າ ຜົນການນັບບັດເລືອກຕັ້ງ ທີ່ສົ່ງເຂົ້າໄປທາງໄປສະນີ ຈະເລີ້ມຂຶ້ນໃນຕອນເຊົ້າ ວັນທີ 4 ພະຈິກນີ້ ຢູ່ໃນສະຫະລັດ ແລະຈະໃຊ້ເວລາຫຼາຍສົມຄວນ ບໍ່ຮູ້ວ່າ ຈະແລ້ວເສັດໃນມື້ນີ້ຫຼືບໍ່!

16:01 4.11.2020

ລາຍງານກ່ຽວກັບການນັບຄະແນນສຽງໃນເບື້ອງຕົ້ນຈາກລັດຕ່າງໆທາງພາກຕາເວັນອອກ ທີ່ໄດ້ປິດໜ່ວຍເລືອກຕັ້ງ

ມື້ນີ້ ປະທານາທິບໍດີ ດໍໂນລ ທຣໍາທີ່ສັງກັດພັກຣີພັບບລິກັນ ແລະຄູ່ແຂ່ງຂອງ ທ່ານກໍຄື ອະດີດຮອງປະທານາທິບໍດີ ໂຈ ໄບເດັນໄດ້ຮັບໄຊຊະນະໃນຫລາຍລັດ ແລ້ວ ຂະນະທີ່ຜົນຂອງການເລືອກຕັ້ງກໍາລັງອອກມາເລື້ອຍໆຢູ່ ແລະຊາວອາເມຣິ ກັນຕັດສິນໃຈວ່າໃຜຈະບໍລິຫານປະເທດຈາກທໍານຽບຂາວໃນນຶ່ງສະໄໝກໍຄື 4 ປີຕໍ່ໜ້າ ຊຶ່ງເລີ້ມຈາກເດືອນມັງກອນຈະມາເຖິງນີ້.

ໜ່ວຍເລືອກຕັ້ງຂອງບັນດາລັດຢູ່ໃນເຂດແຄມຝັ່ງທະເລທາງຕາເວັນອອກ ແລະ ຫລາຍໆລັດໃນເຂດພາກໃຕ້ ແລະພາກຕາເວັນຕົກຕອນກາງ ຂອງປະເທດ ໄດ້ປິດລົງ ແລະກໍໄດ້ເລີ້ມນັບຄະແນນສຽງແລ້ວ. ສ່ວນບັນດາລັດໃນພາກຕາເວັນ ຕົກຂອງປະເທດກໍກໍາລັງປິດໜ່ວຍປ່ອນບັດລົງ ແລະກໍຈະເລີ້ມນັບບັດເລືອກຕັ້ງ ໃນໄວໆນີ້.

ໃນຊົ່ວໂມງທີ່ຈະມາເຖິງນີ້ ຄວນເອົາໃຈໃສ່ຕິດຕາມການນັບຄະແນນສຽງໃນລັດທີ່ຕັ້ງແຄມມະຫາສະໝຸດແອດແລນຕິກ ຄືລັດຟລໍຣິດາ ແລະ ຄາໂລໄຣນາເໜືອ- ເຊິ່ງທັງສອງລັດນີ້ໄດ້ຊ່ວຍໃຫ້ທ່ານທຣໍາ ໄດ້ຮັບໄຊຊະນະໃນປີ 2016 ແລະບ່ອນທີ່ການຢັ່ງຫາງສຽງທ້າຍປີນີ້ສະແດງໃຫ້ເຫັນວ່າທ່ານທຣໍາ ແລະທ່ານໄບເດັນມີ ຄະແນນສູສີກັນ. ລັດເພັນໂຊວາເນຍ ທີ່ເປັນລັດຍາດແຍ່ງກັນ ກໍ່ແມ່ນຈຸດສຸມຂອງຄວາມສົນໃຈອີກແຫ່ງນຶ່ງ ແຕ່ອາດຈະບໍ່ລາຍງານຜົນເລືອກຕັ້ງທີ່ສົມບູນເປັນເວລາຫຼາຍມື້. ນັກວິເຄາະກ່າວວ່າທັງສາມລັດແມ່ນມີຄວາມຈຳເປັນ ສຳລັບທ່ານທຣໍາ ຖ້າເພິ່ນຕ້ອງການດຳລົງຕຳແໜ່ງ ເປັນສະໄໝທີສອງແລະຫລີກລ້ຽງການເປັນປະທານາທິບໍດີສະຫະລັດ ຄົນທີສາມໃນສີ່ທົດສະວັດທີ່ຜ່ານມາທີ່ຈະເສຍໄຊຢູ່ໃນການເລືອກຕັ້ງຄືນ.

ສຳລັບທ່ານໄບເດັນແລ້ວ ການໄດ້ໄຊຊະນະໃນລັດໃດກໍ່ຕາມໃນ 3 ລັດນັ້ນແມ່ນຈະເພີ່ມໂອກາດໃຫ້ທ່ານໄດ້ຮັບຕຳແໜ່ງປະທານາທິບໍດີໃນການພະຍາຍາມຄັ້ງທີສາມຂອງທ່ານ. ທ່ານໄດ້ສູນເສຍການແຂ່ງຂັນເປັນຜູ້ຕາງໜ້າພັກເດໂມແຄຣັດ ເພື່ອເຂົ້າຮ່ວມການເລືອກຕັ້ງປະທານາທິບໍດີ ໃນປີ 1988 ແລະ 2008 ມາແລ້ວ.

ໃນການເລືອກເອົາຜູ້ນໍາປະເທດນັ້ນສະຫະລັດແມ່ນໃຊ້ລະບົບປະຊາທິປະໄຕແບບທາງອ້ອມ ຊຶ່ງບໍ່ໄດ້ເອົາຕາມຄະແນນນິຍົມຂອງປະຊາຊົນທັງຊາດ. ຜົນຂອງການເລືອກຕັ້ງແມ່ນຖືກຕັດສິນໂດຍການເລືອກຕັ້ງຢູ່ໃນແຕ່ລະລັດໃນທົ່ວປະເທດ ທີ່ມີ 50 ລັດ ແລະນະຄອນຫລວງວໍຊິງຕັນ. ເພື່ອຈະໃຫ້ໄດ້ໄຊຊະນະ ໃນການເລືອກຕັ້ງ, ຜູ້ສະໝັກປະທານາທິບໍດີຕ້ອງໄດ້ຮັບ 270 ຄະແນນສຽງ ຈາກຜູ້ແທນໃນລັດ ທີ່ມີສະມາຊິກທັງໝົດ 538 ຄົນ ກໍຄື 538 ສຽງນັ້ນ.

ການເລືອກຕັ້ງປະທານາທິບໍດີສະຫະລັດຈັດຂຶ້ນໃນທຸກໆ 4 ປີໃນວັນອັງຄານທໍາອິດຂອງເດືອນພະຈິກ ຊຶ່ງປີນີ້ກໍກົງກັບວັນທີ 3 ກໍຄືມື້ນີ້ເອງ. ຕາມປົກກະຕິແລ້ວປະຊາຊົນອາເມຣິກັນພາກັນໄປປ່ອນບັດດ້ວຍຕົວເອງຢູ່ສະຖານທີ່ບ່ອນບັດຕ່າງໆ. ແຕ່ວ່າໃນປີນີ້ຍ້ອນການລະບາດຂອງໄວຣຣັສໂຄໂຣນາຫລາຍໆ ລັດແມ່ນຈັດໃຫ້ມີການປ່ອນບັດກ່ອນການເລືອກຕັ້ງ ຊຶ່ງຜູ້ມີສິດປ່ອນບັດ ເລືອກຕັ້ງ ສາມາດສົ່ງບັດລົງຄະແນນສຽງຂອງຕົນໄປທາງໄປສະນີ ຫລືໄປປ່ອນບັດດ້ວຍ ຕົວເອງກ່ອນວັນເລືອກຕັ້ງຕາມສະຖານທີ່ທີ່ຈັດໄວ້ໃຫ້ໃນເມືອງ ແລະເຂດເລືອກ ຕັ້ງຕ່າງໆ ອີງຕາມກົດລະບຽບຂອງແຕ່ລະລັດ.

10:47 4.11.2020
ມີລາຍງານ ຕື່ມອີກ

ທ່ານອາດຈະມັກເລື້ອງນີ້ຄືກັນ

XS
SM
MD
LG