ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ການສູ້ລົບກັນ ຢູ່ໃນຊູດານ ເຮັດໃຫ້ປະເທດເພື່ອນບ້ານ ຕົກຢູ່ໃນຄວາມສ່ຽງ, ຄວາມຫວັງສຳລັບລັດຖະບານທີ່ນຳພາໂດຍພົນລະເຮືອນແມ່ນມືດມົວ


ຊາວອົບພະຍົບຊູດານ ທີ່ໄດ້ຫຼົບໜີຈາກຄວາມຮຸນແຮງຢູ່ໃນປະເທດຂອງພວກເຂົາເຈົ້າ, ລໍຖ້າຮັບສະບຽງອາຫານຈາກໂຄງການອາຫານໂລກ, ໃກ້ກັບຊາຍແດນໃນ Koufroun, ປະເທດຊາດ ວັນທີ 9 ພຶດສະພາ 2023
ຊາວອົບພະຍົບຊູດານ ທີ່ໄດ້ຫຼົບໜີຈາກຄວາມຮຸນແຮງຢູ່ໃນປະເທດຂອງພວກເຂົາເຈົ້າ, ລໍຖ້າຮັບສະບຽງອາຫານຈາກໂຄງການອາຫານໂລກ, ໃກ້ກັບຊາຍແດນໃນ Koufroun, ປະເທດຊາດ ວັນທີ 9 ພຶດສະພາ 2023

ໂດຍ​ບໍ່​ມີ​ສັນຍານ​ຄວາມ​ຄືບ​ໜ້າ​ໃນ​ການ​ເຈລະຈາ​ສັນຕິພາບ​ລະຫວ່າງ​ບັນດາພັກ​ຝ່າຍທີ່​ສູ້​ລົບກັນ​ຂອງ​ຊູ​ດານ, ນັກ​ວິ​ເຄາະ​ກ່າວ​ເຕືອນ​ວ່າ ຄວາມ​ຂັດ​ແຍ່ງ​ໃນ​ຊູ​ດານ ອາດ​ຈະ​ສົ່ງ​ຜົນ​ກະທົບ​ຮ້າຍ​ແຮງ ​ຕໍ່​ບັນດາປະ​ເທດ​ເພື່ອນ​ບ້ານ​ຂອງຊູດານ, ​ເຊັ່ນ​ດຽວ​ກັນ​ກັບ​ຄວາມ​ຫວັງ​ວ່າ ​ມື້​ນຶ່ງ ຊູ​ດານຈະ​ສາມາດ​ມີລັດຖະ ບານ​ທີ່ນຳ​ພາໂດຍ​ພົນລະ​ເຮືອນ ​ແທນທີ່​ທະຫານ. ມາຣີອາມາ ດີອາລໂລ (Mariama Diallo) ຜູ້​ສື່​ຂ່າວ​ວີ​ໂອ​ເອ ປະ​ຈຳອາ​ຟຣິ​ກາ ມີ​ລາຍ​ງານ​ມາ​ຈາກ​ນະຄອນ​ໄນ​ໂຣ​ບີ, ເຊິ່ງອາດນາສັກ ຈະນຳເອົາລາຍລະອຽດມາສະເໜີທ່ານ ໃນອັນດັບຕໍ່ໄປ.

ເປັນເວລາ 25 ວັນ​ແລ້ວ ນັບ​ຕັ້ງ​ແຕ່​ສົງ​ຄາມ​ຊູ​ດານ​ໄດ້​ເກີດ​ຂຶ້ນ, ບໍ່​ມີສັນຍານທີ່ສະແດງໃຫ້ເຫັນ​ວ່າ ​ພັກ​ຝ່າຍ​ທີ່ເຮັດສົງ​ຄາມກັນ​ ມີ​ເຈດ​ຕະ​ນາ​ທີ່​ຈະ​ເຈ​ລະ​ຈາ​ຢຸດ​ຕິ​ການຕໍ່ສູ້ກັນ​ ໃນຂະນະທີ່ການສູ້ລົບຍັງສືບຕໍ່ດຳເນີນຕໍ່ໄປ.

ທ່ານນາງ ຣາວິນາ ຊໍາດາຊານີ (Ravina Shamdasani) ໂຄສົກ ຂອງສຳ ນັກງານສິດທິມະນຸດຂອງສະຫະປະຊາຊາດ ກ່າວຕໍ່ວີໂອເອ ໃນລະຫວ່າງການຢ້ຽມຢາມນະຄອນຫຼວງໄນໂຣບີເມື່ອບໍ່ດົນມານີ້ວ່າ ສະຖານະການແມ່ນມີຄວາມໜ້າເປັນຫ່ວງ.

ທ່ານນາງ ຣາວິນາ ຊໍາດາຊານີ:

"ແມ່ນ, ມີການຢຸດຍິງ, ແມ່ນແລ້ວ, ນັ້ນພາໃຫ້ມີຄວາມຜ່ອນຄາຍ, ຄວາມສະ ຫງົບຈຳນວນນຶ່ງ, ເຊິ່ງປະຊາຊົນສາມາດອອກຈາກບ້ານເຮືອນຂອງເຂົາເຈົ້າ ແລະພະຍາຍາມຫລົບຫນີໄດ້, ແຕ່ການໂຈມຕີທາງອາກາດ ຍັງດຳເນີນຕໍ່ໄປ. ການເຂົ້າຍຶດເອົາທຳນຽບປະທານາທິບໍດີ ເພື່ອຈຸດປະສົງທາງທະຫານ ໂດຍກອງ​ກຳ​ລັງ​ເຄື່ອນ​ທີ່​ຢ່າງວ່ອງ​ໄວ ຫຼື RSF ແມ່ນຍັງດຳເນີນຕໍ່ໄປ. ແລະເຖິງແມ່ນວ່າປະຊາຊົນຜູ້ທີ່ພະຍາຍາມທີ່ຈະຫນີ, ໃນລະຫວ່າງທາງ, ພວກເຂົາເຈົ້າບໍ່ພຽງແຕ່ກຳລັງປະເຊີນກັບຄວາມສ່ຽງທາງດ້ານຄວາມປອດໄພ ເທົ່ານັ້ນ, ແຕ່ ຍັງຖືກຂົ່ມຂູ່ເອົາຊັບສິນອີກດ້ວຍ. ມີການຂາດເຂີນຢາ, ອາຫານ, ນ້ຳມັນເຊື້ອໄຟຢ່າງຮຸນແຮງ. ສະຖານະ​ການ​ແມ່ນກຳລັງເພີ່ມສູ່ລະດັບຄວາມຂັດແຍ່ງຢ່າງເຕັມຮູບແບບ.”

ຄວາມຂັດ​ແຍ້ງ​ ​ມີ​ທ່າ​ອ່ຽງ​ທີ່​ຈະ​ສົ່ງ​ຜົນ​ກະ​ທົບ​ຕໍ່​ທັງໝົດ​ພາກ​ພື້ນ​ແລະພື້ນທີ່​ ທີ່ໄກອອກໄປ, ທ່ານກະວາກູ ນະວາມາ (Kwaku Nwamah), ສາ​ສະ​ດາ​ຈານ​ດ້ານ​ການ​ເມືອງ​ລະຫວ່າງປະເທດ​ຂອງ​ມະ​ຫາ​ວິ​ທະ​ຍາ​ໄລ​ອາ​ເມຣິ​ກັນໃນ​ນະ​ຄອນ​ຫຼວງວໍ​ຊິງ​ຕັນ ກ່າວ​ຕໍ່ວີ​ໂອ​ເອວ່າ:

“ຊູ​ດານ​ມີ​ເພື່ອນ​ບ້ານ 7 ປະເທດ, ເຊິ່ງທັງ​ໝົດ​ລ້ວນ​ແຕ່​ມີ​ຄວາມ​ບໍ່​ໝັ້ນ​ຄົງແບບ​ຊຳ​ເຮື້ອ ໃນລະດັບນຶ່ງ. ດັ່ງນັ້ນ, ຄວາມຂັດແຍ້ງນີ້ ສາມາດຂະຫຍາຍໄປສູ່ລະ ດັບພາກພື້ນໄດ້ພາຍໃນນຶ່ງນາທີ. ມັນຍັງສາມາດກະຫຍາຍອອກໄປທົ່ວທະເລແດງ ເຂົ້າໄປໃນ ຊາອຸດີ ອາຣາເບຍ, ເຢເມນ. ດັ່ງນັ້ນ, ມີຫຼາຍສິ່ງຫຼາຍຢ່າງ ທີ່ອາດຜິດພາດໄດ້ໃນພາກພື້ນນັ້ນ."

ຜູ້ຕາງຫນ້າຈາກກອງທັບຊູດານ ແລະກອງ​ກຳ​ລັງ​ເຄື່ອນ​ທີ່​ຢ່າງວ່ອງ​ໄວ ໄດ້ປະຊຸມຢູ່ໃນເມືອງ ເຈດດາ (Jeddah) ຂອງ ຊາອູດີ ອາຣາເບຍ (Saudi).

ໃນຂະນະທີ່ຄວາມຕ້ອງການໃນທັນທີແມ່ນການພະຍາຍາມເຈລະຈາການຢຸດຍິງ ແລະວາງພື້ນຖານ ສໍາລັບການປຶກສາຫາລືທີ່ກວ້າງຂວາງ, ທ່ານນາງ ຊູຊານ ສຕິແກນທ໌ (Susan Stigant), ຜູ້ອໍານວຍການອາຟຣິກາຂອງສະຖາບັນສັນຕິ ພາບຂອງສະຫະລັດ ເວົ້າວ່າ ມີຄວາມກັງວົນ ກ່ຽວກັບຊູດານຈະຕ່າວກັບຄືນໄປຫາລັດຖະບານທີ່ນໍາພາໂດຍພົນລະເຮືອນ.

"ປະຊາຊົນຈໍານວນຫຼາຍ ໄດ້ສະແດງຄໍາຖາມ ແລະຄວາມກັງວົນ ກ່ຽວກັບບົດ ບາດຂອງພົນລະເຮືອນ ແລະພົນລະເມືອງ ແລະຜູ້ນໍາທາງດ້ານການເມືອງ ທີ່ຈະຕ້ອງເປັນສູນກາງຂອງການປຶກສາຫາລືຢ່າງແທ້ຈິງ ກ່ຽວກັບອະນາຄົດທາງດ້ານການເມືອງໃດກໍ່ຕາມ ແລະໃຜແມ່ນຜູ້ທີ່ເປັນແນວຫນ້າແທ້ໆ ໃນປັດຈຸບັນນີ້ ທີ່ຮັບຜິດຊອບຕໍ່ວິກິດການດ້ານມະນຸດສະທໍາ ພາຍໃນຊູດານ.”

ຫົວໜ້າຂອງກຳລັງສະໜັບສະໜູນວ່ອງໄວ, ນາຍພົນໂມ​ຮຳ​ເມດ ແຮມ​ດານ ​ດາ​ກາໂລ (Mohamed Hamdan Dagalo), ກ່າວ​ໃນ​ການ​ປະກາດ​ທາງ Twitter ​ເມື່ອ​ບໍ່​ດົນ​ມາ​ນີ້​ວ່າ ທ່ານ​ ແລະ RSF ​ແມ່ນ “ມຸ່ງ​ໝັ້ນ​ຕໍ່​ປະຊາທິປະ​ໄຕ ​ແລະ ການ​ຫັນປ່ຽນ​ໄປ​ເປັນ​ລັດຖະບານ ​ທີ່​ນຳພາ​ໂດຍ​ພົນລະ​ເຮືອນ.”

ດ້ານກອງທັບຝ່າຍກົງກັນຂ້າມກັບນາຍພົນ ດາກາໂລ, ນາຍພົນອັບ​ແດ​ລ ແຟດ​ຕາ ອາ​ລ-ເບີ​ຮານ (Abdel Fattah al-Burhan) ບໍ່ໄດ້ໃຫ້ຄໍາໝັ້ນສັນຍາເຊັ່ນນັ້ນ - ເຖິງແມ່ນວ່າ ມັນເປັນທີ່ໜ້າສັງເກດວ່າ ທ່ານນາຍພົນ ດາກາໂລ ແລະ ທ່ານນາຍພົນ ເບີຮານ ໄດ້ຮ່ວມມືກັນ ເພື່ອໂຄ່ນລົ້ມລັດຖະບານປະສົມ ພົນລະເຮືອນ - ທະຫານ ຂອງຊູດານໃນເດືອນຕຸລາ 2021.

ຄວາມຂັດແຍ້ງທີ່ກຳລັງດຳເນີນຢູ່ ໄດ້ເຮັດໃຫ້ເກີດການອົບພະຍົບ ໄປທີ່ປະ ເທດເພື່ອນບ້ານຫຼາຍປະເທດ, ລວມທັງຊູດານໃຕ້, ບ່ອນທີ່ຫຼາຍຄົນໄດ້ຈາກມາ ເມື່ອສອງສາມປີກ່ອນ ໃນເວລາທີ່ປະເທດດັ່ງກ່າວປະສົບກັບສົງຄາມກາງເມືອງເຊັ່ນກັນ.

ປະຈຸບັນນີ້ ບາງຄົນໄດ້ຖືກບັງຄັບໃຫ້ກັບຄືນເມືອ, ທ່ານນາງ ຊາຣ໌ລອຕຕ໌ ຮອລຄວິສຕ໌ (Charlotte Hallquist), ໂຄສົກຂອງອົງການອົບພະຍົບ ສະຫະປະຊາຊາດໃນຊູດານໃຕ້ກ່າວວ່າ.

"ພວກເຮົາບັນທຶກໄດ້ເກືອບ 45,000 ຄົນ ແຕ່ວ່າຕົວເລກອາດຈະສູງກວ່ານັ້ນຫຼາຍ. ມັນ​ເປັນ​ໂສກນາດຕະກຳ​ຂັ້ນສຸດທ້າຍ​ຂອງ​ການ​ຍ້າຍ​ຖິ່ນ​ຖານ​ຄັ້ງ​ທີ​ສອງ. ພວກເຂົາເຈົ້າໄດ້ຫລົບຫນີຈາກປະເທດຂອງພວກເຂົາໃນລະຫວ່າງສົງຄາມກາງເມືອງ, ພວກເຂົາສະແຫວງຫາຄວາມປອດໄພຢູຸ່ໃນຊູດານ ແລະປະຈຸບັນນີ້ ພວກເຂົາກໍາລັງຫລົບຫນີກັບຄືນໄປຊູດານໃຕ້.”

ທ່ານ​ນາງ​ກ່າວ​ວ່າ ຫລາຍ​ຄົນ​ໄດ້​ໃຊ້​ເວ​ລາ​ຫຼາຍ​ມື້​ຢູ່​ໃນ​ຖະ​ໜົນ, ຍ່າງ, ຂຶ້ນ​ລົດເມ ຫຼື​ໃຊ້​ກວຽນທີ່ແກ່ໂດຍລາ ເພື່ອ​ຂ້າມ​ຊາຍ​ແດນ​ໄປ​ສູ່​ລັດອັປເປີໄນລ໌ (Upper Nile), ໃນ​ຊູ​ດານ​ໃຕ້.

ທ່ານນາງ ຮອລຄວິສຕ໌ (Hallquist) ກ່າວຕື່ມ​ວ່າ ພວກ​ເຂົາ​ເຈົ້າ​ມາ​ຮອດ​ແບບໝົດ​ແຮງ ​ແລະ​ຫິວ​. ອົງການ​ອົບ​ພະຍົບກຳລັງ​ໃຫ້ການ​ຊ່ວຍ​ເຫຼືອ​ສຸກ​ເສີນ​ ຢູ່ທີ່​ຊາຍ​ແດນ ​ແລະ​ຍົກຍ້າຍປະຊາຊົນ​ໄປ​ທີ່​ເມືອງ ແຣັງຄ໌ (Renk).

ແຕ່ ເມືອງ ແຣັງຄ໌ (Renk) ມີຊັບພະຍາກອນທີ່ຈໍາກັດ,​ ທ່ານນາງກ່າວ, ແລະອົງການກໍາລັງຊຸກຍູ້ໃຫ້ປະຊາຊົນ ຍ້າຍອອກໄປຈາກບ່ອນນັ້ນ.

ອ່ານລາຍງານນີ້ເປັນພາສາອັງກິດຕື່ມ

XS
SM
MD
LG