ການຕັດສິນຈຳຄຸກ 15 ປີ ໂດຍ ຣັດເຊຍ ຕໍ່ເຈົ້າໜ້າທີ່ຮັກສາຄວາມປອດໄພຊາວ ເອສໂຕເນຍ ໃນຂໍ້ຫາການສອດແນມ ໃນສັບປະດາທີ່ຜ່ານມາ ແມ່ນເຫດການຄັ້ງຫຼ້າສຸດຖ້າມການຄວາມເຄັ່ງຕຶງທີ່ສູງຂຶ້ນ ລະຫວ່າງມອສໂກ ແລະບັນດາປະເທດໃນເຂດທະເລ
ບາລຕິກ. ດັ່ງທີ່ທ່ານ Henry Ridgwell ລາຍງານ, ອົງການ NATO ຢ້ານວ່າ ຣັດເຊຍ ກຳລັງພະຍາຍາມທີ່ຈະຍຸຍົງໃຫ້ເກີດຄວາມບໍ່ສະຫງົບ ໃນໝູ່ປະຊາກອນ ທີ່ເປັນຊາວ ຣັດເຊຍ.
ພຸດທະສອນ ມີລາຍລະອຽດສຳລັບເລື່ອງນີ້ ມານຳສະເໜີທ່ານ.
ເຈົ້າໜ້າທີ່ຫຼາຍຄົນຈາກ ບັນດາປະເທດໃນເຂດທະເລ ບາລຕິກ ແລະ ສະມາຊິກອົງການ NATO ຫຼາຍຄົນໄດ້ເຂົ້າຮ່ວມໃນພິທີເປີດສູນການສື່ສານແຜນຍຸດທະສາດ ແຫ່ງຄວາມເປັນເລີດ ຂອງກຸ່ມປະເທດດັ່ງກ່າວໃນນະຄອນ Riga ປະເທດ ລັດເວຍ ໃນວັນພະຫັດ ອາທິດ ແລ້ວນີ້, ເຊິ່ງເປັນສະຖານທີ່ໜຶ່ງ ທີ່ແນໃສ່ການປາບປາມສົງຄາມທາງ ຄອມພິວເຕີ ແລະ ການໂຕ້ຕອບຕໍ່ການໂຄສະນາຊວນເຊື່ອຂອງ ຣັດເຊຍ. ໜຶ່ງໃນຈຳນວນຜູ້ທີ່ໄດ້ເຂົ້າຮ່ວມ ພິທີດັ່ງກ່າວ ແມ່ນສະມາຊິກສະພາສູງສະຫະລັດ ທ່ານ John McCain.
ທ່ານ McCain ກ່າວວ່າ “ສູນແຫ່ງນີ້ ສາມາດຊ່ວຍນຳເອົາຄວາມຈິງ ແລະ ສະພາບທີ່ແທ້ຈິງມາສູ່ປະຊາຊົນທັງໝົດ ຂອງບັນດາປະເທດ NATO, ລວມທັງບັນດາປະເທດ ໃນເຂດທະເລ ບາລຕິກ, ແລະ ຂ້າພະເຈົ້າກໍໝັ້ນໃຈວ່າພວກເຮົາສາມາດຕອບໂຕ້ການໂຄສະນາຊວນເຊື່ອນັ້ນ ເພາະວ່າ ການໂຄສະນາຊວນເຊື່ອດັ່ງກ່າວແມ່ນບໍ່ມີຄວາມ ຈິງ.”
ນັກວິເຄາະ ຣັດເຊຍ ທ່ານ Igor Sutyagin ຈາກສະຖາບັນ Royal United ຂອງ ອັງກິດ ໄດ້ເຕືອນວ່າ ມອສໂກ ແມ່ນກຳລັງພະຍາຍາມເຮັດໃຫ້ບັນດາປະເທດໃນເຂດທະເລ ບາລຕິກ ອະດີດ ສະຫະພາບໂຊວຽດ ທີ່ປະກອບດ້ວຍເອສໂຕເນຍ, ລັດເວຍ ແລະ ລິດຕູເອເນຍ ບໍ່ມີຄວາມໝັ້ນຄົງ ເຊິ່ງເປັນຂໍ້ກ່າວຫາທີ່ ຣັດເຊຍ ໄດ້ປະຕິເສດ.
ທ່ານ Sutyagin ກ່າວວ່າ “ມີການຍຸແຍ່ບາງຢ່າງ ທີ່ພະຍາຍາມສ້າງຄວາມເຄັ່ງຕຶງທາງ ສັງຄົມຂຶ້ນ ຢູ່ພາຍໃນສັງຄົມຂອງ ເອສໂຕເນຍ, ພາຍໃນສັງຄົມຂອງບັນດາປະເທດ ໃນເຂດທະເລ ບາລຕິກ. ດັ່ງນັ້ນມັນກຳລັງເລີ່ມຂຶ້ນ, ໃນຄວາມຮູ້ສຶກນີ້ໄພຂົ່ມຂູ່ແມ່ນຂ້ອນຂ້າງຈະເປັນຈິງ, ມັນຢູ່ນີ້ແຫຼະ.”
ທ່ານ Sutyagin ກ່າວວ່າ ມອສໂກ ແມ່ນກຳລັງບັນຊາການໂຄສະນາຊວນເຊື່ອໃສ່ພວກທີ່ບໍ່ແມ່ນຄົນສັນຊາດປະເທດດັ່ງກ່າວ ທີ່ອາໄສຢູ່ໃນບັນດາປະເທດເຂດທະເລ ບາລຕິກ ເຊິ່ງເປັນຜູ້ທີ່ຖືໜັງສືເດີນທາງປະເທດ ຣັດເຊຍ.
ທ່ານ Sutyagin ກ່າວວ່າ “ພວກເຂົາບໍ່ຕ້ອງການສັນຊາດ. ແຕ່ວ່າມັນບໍ່ໄດ້ໝາຍຄວາມວ່າ ພວກເຂົາຢາກສະໜັບສະໜູນ ຣັດເຊຍ, ຢາກໃຫ້ ຣັດເຊຍ ເຂົ້າມາຫຍຸ້ງກ່ຽວກັບຊີວິດຂອງພວກເຂົາ.”
ເອສໂຕເນຍ, ລັດເວຍ ແລະ ລິດຕູເອເນຍ ແມ່ນສະມາຊິກຂອງ NATO ແລະ ໄດ້ຮັບສິດໃນການປົກປ້ອງພາຍໃຕ້ສົນທິສັນຍາມາດຕາທີ 5 ຂອງກຸ່ມປະເທດດັ່ງກ່າວ ກ່ຽວກັບການປົກປ້ອງພັນທະມິດຮ່ວມກັນ.
ທ່ານ Sutyagin ກ່າວວ່າ ໃນເດືອນ ກັນຍາ 2014 ຣັດເຊຍ ໄດ້ຈັບກຸມເຈົ້າໜ້າທີ່ຄວາມປອດໄຟຊາວເອສໂຕເນຍ ທ່ານ Eston Kohver ຢູ່ເຂດຊາຍແດນຂອງປະເທດທັງສອງ ແລະ ສັບປະດາທີ່ຜ່ານມາ ໄດ້ຕັດສິນຈຳຄຸກລາວ ເປັນເວລາ 15 ປີໃນຂໍ້ຫາການສອດແນມ.
ເອສໂຕເນຍ ຢືນຢັນວ່າ ລາວເປັນຜູ້ບໍລິສຸດ ແລະໄດ້ຖືກຈັບກຸມຢູ່ດິນແດນຂອງ ເອສໂຕເນຍ ແລະ ມັນກໍມີຄວາມຄຸມເຄືອເປັນຢ່າງຍິ່ງສຳລັບ NATO.
ທ່ານ Sutyagin ກ່າວວ່າ “ພວກເຂົາເຄີຍມີກໍລະນີຂອງການລ່ວງລ້ຳດິນແດນຂອງ NATO ມາແລ້ວ, ໃນ ເອສໂຕເນຍ ເມື່ອທ່ານ Kohver ໄດ້ຖືກລັກພາໂຕ ແລະ ບໍ່ມີໃຜສະແດງປະຕິກິລິຍາກ່ຽວກັບເລື່ອງນີ້. ດັ່ງນັ້ນ ຍ້ອນແນວນັ້ນລະໄພຂົ່ມຂູ່ມັນຈິ່ງມີຢູ່ນີ້ ແລະ ນັ້ນກໍແມ່ນບົດຮຽນອັນໜຶ່ງ. ຍ້ອນກົນລະຍຸດຕັດໃສ້ກອກ Salami ປ່ຽງຕໍ່ປ່ຽງ, ແລະ ນັ້ນກໍແມ່ນປ່ຽງທຳອິດ.”
ເອສໂຕເນຍ ໄດ້ຕອບກັບຕໍ່ ຄວາມຮູ້ສຶກຂອງໄພຂົ່ມຂູ່ຈາກ ຣັດເຊຍ ໂດຍເພີ້ມການໃຊ້ຈ່າຍ ໃນດ້ານປ້ອງກັນປະເທດຂຶ້ນ 2 ເປີເຊັນຂອງ GDP ຫຼື ຜະລິດຕະພັນມວນລວມພາຍໃນປະເທດ. ບັນດາປະເທດ ໃນເຂດທະເລບາລຕິກ ອື່ນໆບໍ່ໄດ້ປະຕິບັດຕາມການເຄື່ອນ ໄຫວຂອງ ເອສໂຕເນຍ, ອີງຕາມທ່ານ Lukasz Kulesa ຈາກກຸ່ມນະໂຍບາຍປ້ອງກັນປະເທດ ເຄືອ ຂ່າຍຜູ້ນຳຢູໂຣບ.
ທ່ານ Kulesa ກ່າວວ່າ “ລິດຕູເອເນຍ ແລະ ລັດເວຍ ເປັນສອງປະເທດທີ່ເຄີຍເວົ້າຫຼາຍ ກ່ຽວກັບຄວາມບໍ່ສະບາຍໃຈຂອງພວກເຂົາ ກັບ ຣັດເຊຍ, ແຕ່ໃຊ້ຈ່າຍປະມານ 1 ເປີເຊັນຂອງ GDP ໃນດ້ານປ້ອງກັນປະເທດ.”
ສະຫະລັດ ໄດ້ສົ່ງລົດຖັງ, ປືນໃຫຍ່ ແລະ ອາວຸດໜັກອື່ນໆໄປຕັ້ງຢູ່ໃນ ເອສໂຕເນຍ, ລັດເວຍ ແລະ ລິດຕູເອເນຍ. ວໍຊິງຕັນ ກ່າວວ່າ ຕົນມີຄວາມຮັບໝັ້ນໝາຍທີ່ຈະປ້ອງກັນຜືນແຜ່ນດິນ ອັນຄົບຖ້ວນຂອງພວກເຂົາ.
