ໂຣກຕັບອັກເສບແມ່ນຊື່ຂອງອາການຕິດເຊື້ອໄວຣັສກຸ່ມນຶ່ງ ທີ່ທໍາການຈູ່ໂຈມຕັບ ແລະພາ
ໃຫ້ເປັນໂຣກຕັບອັກເສບຊະນິດຕ່າງໆ ທີ່ເອີ້ນວ່າ ຊະນິດ ເອ, ບີ, ຊີ ແລະຕໍ່ໆໄປ. ຄາດ
ຄະເນກັນວ່າ ມີຜູ້ຄົນປະມານ 2 ພັນລ້ານຄົນ ຕິດເຊື້ອໂຣກຕັບອັກເສບຊະນິດ ບີ. ອັດຕາ
ການຕິດເຊື້ອນີ້ທີ່ສູງທີ່ສຸດ ແມ່ນຢູ່ໃນປະເທດຈີນ ແລະຂົງເຂດອື່ນໆຂອງທະວີບເອເຊຍ.
ອົງການອະນາໄມໂລກ WHO ເວົ້າວ່າ ການຕິດເຊື້ອເຫລົ່ານີ້ ສ່ວນຫລາຍແມ່ນເກີດຂຶ້ນ
ແຕ່ຕອນຍັງນ້ອຍ.
ໂຣກຕັບອັກເສບຊະນິດ ບີ ແມ່ນແຜ່ລາມໄປຕິດຕໍ່ໃສ່ຜູ້ອື່ນໄດ້ ໂດຍຜ່ານການສໍາຜັດກັບ
ເລືອດ ຫລືທາດແຫລວຊະນິດອື່ນ ທີ່ມີການຕິດເຊື້ອພະຍາດນີ້. ແມ່ສາມາດທີ່ຈະສົ່ງຕໍ່
ເຊື້ອໂຣກນີ້ໄປຫາລູກໄດ້ ຕັ້ງແຕ່ຕອນລູກເກີດມາ. ການສັກຢາ ແລະການຮ່ວມເພດທີ່ບໍ່
ມີການປ້ອງກັນຄວາມປອດໄພ ກໍສາມາດທີ່ຈະເຮັດໃຫ້ເຊື້ອໄວຣັສຊະນິດນີ້ ແຜ່ລາມອອກ
ໄປໄດ້ເຊ່ນກັນ. ນັກຊ່ຽວຊານເວົ້າວ່າ ເຊື້ອພະຍາດນີ້ສາມາດມີຊີວິດຢູ່ລອດໄດ້ຢ່າງໜ້ອຍ
ອາທິດນຶ່ງຫລັງຈາກ ມັນອອກຈາກຮ່າງກາຍຂອງຄົນ. ໂຣກຕັບອັກເສບ ຊະນິດບີ ມີຢູ່
ສອງປະເພດ-- ຄືປະເພດທີ່ເຈັບແຮງໜັກໆບາດດຽວ ແລະປະເພດຊໍ້າເຮື້ອ. ປະເພດທີ່
ເຈັບແຮງໜັກໆບາດດຽວ ແມ່ນມີອາການປ່ວຍແກ່ຍາວເປັນຫລາຍໆອາທິດ, ແຕ່ວ່າ
ການປິ່ນປົວໃຫ້ຫາຍດີນັ້ນ ສາມາດແກ່ຍາວເປັນຫລາຍເດືອນ. ປະເພດຊໍ້າເຮື້ອທີ່ປົວບໍ່
ເຊົານັ້ນ ສາມາດພາໃຫ້ເສຍຊີວິດຍ້ອນໂຣກຕັບແຂງໄດ້ ຫລືບໍ່ກໍເຮັດໃຫ້ຕັບເປັນບາດແຜ
ແລະເປັນມະເຮັງຕັບ.
ເຖິງຢ່າງໃດກໍຕາມ ຄົນທີ່ເປັນໂຣກຕັບອັກເສບໄລຍະຍາວນັ້ນ ສາມາດມີຊີວິດຍືນໄດ້ເປັນ
ເວລາຫລາຍໆປີ ແລະຮອດບໍ່ຮູ້ອີກດ້ວຍຊໍ້າວ່າ ພວກເຂົາເຈົ້າມີການຕິດເຊື້ອພະຍາດນີ້.
ພວກທີ່ມີທາງເປັນພະຍາດຕັອັກເສບ ຊະນິດ ບີ ທີ່ຊໍາເຮື້ອຫລາຍທີ່ສຸດນັ້ນ ແມ່ນພວກ
ເດັກນ້ອຍ. ຢູ່ໃນສະຫະລັດ ພວກນັກຊ່ຽວຊານທີ່ສູນຄວບຄຸມ ແລະປ້ອງກັນພະຍາດ
ໄດ້ຊຸກຍູ້ໃຫ້ຜູ້ສະໜອງການບໍລິການທາງການແພດທັງຫລາຍ ທໍາການກວດພວກຄົນ
ເຈັບທີ່ເປັນຊາວເອເຊຍ-ອາເມຣິກັນ ກໍຄືຄົນອາເມຣິກັນເຊື້ອສາຍເອເຊຍ ເພື່ອຊອກຫາ
ພະຍາດນີ້. ທ່ານໝໍ ຈອນ ວອດ ກ່າວວ່າ:
"ເວົ້າບ່ອນສຸດກໍຄືວ່າ--ເນື່ອງຈາກວ່າ ຄົນທີ່ມີເຊື້ອສາຍ ເອເຊຍທີ່ເຂົ້າມາຢູ່
ສະຫະລັດ ສ່ວນໃຫຍ່ແມ່ນມາຈາກພວກປະເທດທີ່ມີການແຜ່ລະບາດຂອງ
ເຊື້ອໂຣກນີ້, ພວກເຂົາເຈົ້າຈຶ່ງຄວນຖືກກວດເພື່ອຊອກຫາໂຣກຕັບອັກເສບ
ຊະນິດ ບີ ປະເພດທີ່ຊໍ້າເຮື້ອ."
ສໍາລັບໂຣກຕັບອັກເສບ ຊະນິດ ບີ ປະເພດທີ່ເຈັບແຮງແຕ່ບໍ່ຊໍ້າເຮືອນັ້ນ ຄົນເຈັບອາດຈະໄດ້
ຮັບການດູແລ ເພື່ອເພີ້ມທາດແຫລວເຂົ້າໃນຮ່າງກາຍ ແຕ່ວ່າບໍ່ມີການປິ່ນປົວໃຫ້ຫາຍຂາດ. ພວກທ່ານໝໍທັງຫລາຍສາມາດປິ່ນປົວພວກຄົນເຈັບທີ່ເປັນໂຣກນີ້ແບບຊໍາເຮື້ອນັ້ນ ໂດຍການ
ໃຊ້ສານໂປຣຕີນ interferon ແລະ ຢາຕ້ານເຊື້ອໄວຣັສ. ແຕ່ວ່າຢາພວກນີ້ ມີລາຄາແພງ
ເກີນໄປ ສໍາລັບພວກທີ່ຢູ່ໃນເຂດທຸກຈົນຂອງໂລກ.
ຢາວັກຊີນປ້ອງກັນໂຣກຕັບອັກເສບ ຊະນິດ
ບີ ໄດ້ມີໄວ້ໃຫ້ໃຊ້ ມາໄດ້ ສາມສິບປີແລ້ວ.
ນັກຄົ້ນຄວ້າທີ່ໄດ້ຄົ້ນພົບຢາວັກຊີນກັນພະ
ຍາດຊະນິດນີ້--ແລະຄົ້ນພົບໂຣກຕັບອັກເສບ
ຊະນິດ ບີເອງ--ແມ່ນຄົນອາເມຣິກັນ ທີ່ຊື່ວ່າ
ບາຣັກ ບລູມເບີກ (Baruch Blumberg).
ດຣ. ບລູມເບີກ ຍັງໄດ້ສະແດງໃຫ້ເຫັນວ່າ
ເຊື້ອໄວຣັສປະເພດນີ້ ສາມາດພາໃຫ້ເປັນ
ໂຣກມະເຮັງຕັບໄດ້.
ທ່ານ ແລະນັກຄົ້ນຄວ້າອີກຜູ້ນຶ່ງ ທີ່ສູນໂຣກ
ມະເຮັງ ຟອ໊ກສ໌ ເຈສ ຫລື Fox Chase
Cancer Center ໃນເມືອງ ຟີລາແດລ
ເຟຍ, ທ່ານ ເອີວິງ ມິລແມນ, ໄດ້ປະດິດ
ຢາວັກຊິນ ຊະນິດນີ້ໃນປີ 1969. ແຕ່ວ່າ ດຣ. ບລູມເບີກເວົ້າວ່າ ມັນໄດ້ໃຊ້ເວລາຢູ່ໄລ
ຍະນຶ່ງກ່ວາຈະຊອກຫາບໍລິສັດຜະລິດຢາ ທີ່ຍິນດີຈະຜະລິດວັກຊິນອັນນີ້.
ທ່ານບລໍາເບີກມີຄວາມສົນໃຈ ໃນການສຶກສາພະຍາດທີ່ມາຈາກການຕິດເຊື້ອ ໃນຕອນທີ່
ທ່ານໄປເຮັດວຽກອາສາສະມັກ ຢູ່ປະເທດ ຊູຣີນາມ ໃນຂະນະທີ່ທ່ານລົງຝຶກຫັດວຽກການ
ແພດ.
ຜົນການຄົ້ນພົບໂຣກຕັບອັກເສບ ຊະນິດ ບີ ຂອງທ່ານໄດ້ ຊ່ວຍຊີວິດຂອງຄົນໄວ້ໄດ້ຫລາຍ
ຄົນ ແລະກໍເຮັດໃຫ້ທ່ານໄດ້ຮັບລາງວັນໂນແບລ ຂະແໜງການແພດ. ແຕ່ວ່າ ທ່ານກໍຍັງມີ ຄວາມສົນໃຈໃນດ້ານອື່ນໆອີກ--ລວມທັງການຊອກຫາສິ່ງທີ່ມີຊີວິດ ຢູ່ໃນອາວະກາດ.
ໃນຕອນທ້າຍໆຊຸມປີ 1990 ທ່ານໄດ້ຊ່ວຍກໍ່ຕັ້ງແລະເປີດສະຖາບັນດ້ານຊີວະວິທະຍາຢູ່ເທິງ
ດວງດາວ ຂອງອົງການການບິນແລະອາວະກາດແຫ່ງຊາດ ຫລື ນາຊາ ຂອງສະຫະລັດ.
ທ່ານບລໍາເບີກກໍາລັງຮ່ວມກອງປະຊຸມຂອງອົງການດ້ານອາວະກາດອັນນຶ່ງ ທີ່ລັດຄາລິຟໍເນຍ
ໃນເດືອນ ເມສາ ເວລາທ່ານເສຍຊີວິດລົງ ທີ່ປາກົດວ່າແມ່ນຍ້ອນໂຣກຫົວໃຈວາຍ. ດຣ.
ບລູມເບີກ ມີອາຍຸໄດ້ 85 ປີ ໃນຕອນນັ້ນ.
