ບັນດາເຈົ້າໜ້າທີ່ໃນນະຄອນຫລວງ Seoul ຂອງເກົາຫລີໃຕ້ກ່າວວ່າ ພວກທີ່ຕ້ອງສົງໃສ
ວ່າເປັນໂຈນທະເລໂຊມາເລຍ 5 ຄົນ ທີ່ຖືກຈັບໄດ້ໃນລະຫວ່າງການບຸກເຂົ້າໄປຊ່ອຍພວກ
ລູກເຮືອໃນກຳປັ່ນບັນທຸກສິນຄ້າລຳນຶ່ງທີ່ຖືກຈີ້ໃນບໍລິເວນທະເລອາເຣບຽນນັ້ນ ໄດ້ໄປເຖິງ
ເກົາຫຼີໃຕ້ແລ້ວເ ພື່ອຖືກນໍາໂຕຂຶ້ນສານດໍາເນີນຄະດີທີ່ອາດມີຂຶ້ນໄດ້ນັ້ນ.
ໜ່ວຍທະຫານຍາມຝັ່ງຂອງເກົາຫຼີໃຕ້ເວົ້າວ່າ ຄົນໂຊມາເລຍ 5 ຄົນດັ່ງກ່າວໄດ້ໄປເຖິງເມືອງ
Busan ໃນພາກຕາເວັນອອກສຽງໃຕ້ຂອງເກົາຫຼີໃຕ້ ໃນວັນອາ ທິດມື້ນີ້ ແລະກໍໄດ້ຖືກນໍາ
ໄປຂັງໄວ້ທີ່ສູນກັກຂັງໃນທັນທີ ເພື່ອລໍຖ້າການສອບປາກຄໍາ. ທັງ 5 ຄົນປະເຊີນກັບການ
ຖືກຈຳຄຸກຕະຫລອດຊີວິດ.
ຜູ້ຊາຍພວກນີ້ ຖືກພວກໜ່ວຍກ້າຕາຍ ຫຼືກອມມັງໂດຂອງເກົາຫຼີໃຕ້ຈັບໄດ້ ຕອນທີ່ພວກເຂົາ
ເຈົ້າບຸກຂຶ້ນໄປໃນເຮືອ Samho Jewelry ໃນຕົ້ນເດືອນນີ້ ນຶ່ງອາທິດລຸນຫລັງທີ່ພວກໂຈນ
ທະເລໄດ້ຢຶດເອົາເຮືອລໍານັ້ນ ພ້ອມກັບລູກເຮືອ 21 ຄົນ.
ໂຈນທະເລ 8 ຄົນໄດ້ຖືກສັງຫານ ແລະຄັບຕັນເຮືອໄດ້ຖືກຍິງທີ່ທ້ອງ ແລະເວລານີ້ ກໍຍັງ
ຢູ່ໃນອາການເຈັບສາຫັດ ທີ່ໜ້າເປັນຫ່ວງຢູ່.
