ເຈົ້າໜ້າທີ່ອິນເດຍກ່າວວ່າ ມືປືນ 4 ຄົນແລະຍາມ 2 ຄົນໄດ້ເສຍ
ຊີວິດໃນການ ໂຈມຕີຖານທັບອາກາດແຫ່ງນຶ່ງ ທີ່ແກ່ຍາວມາຕະ
ຫລອດມື້ ທີ່ລັດ Punjab ໃກ້ໆຊາຍແດນຂອງປາກິສຖານ.
ພວກມືປືນໄດ້ເປີດສາກໂຈມຕີຖານທັບອາກາດ Pathankot ໃນ
ຕອນເຊົ້າວັນເສົາມື້ນີ້ ແລະສຽງປືນຮອບໃໝ່ ແມ່ນຍັງໄດ້ຍິນຫຼາຍ
ຊົ່ວໂມງຕໍ່ມາ.
ເຈົ້າໜ້າທີ່ອິນເດຍກ່າວວ່າ ພວກເຂົາເຈົ້າກຳລັງພະຍາຍາມຈະລະ
ບຸໂຕວ່າພວກຄົນຮ້າຍຈຸນີ້ແມ່ນໃຜ. ແຕ່ແນວໃດກໍຕາມ ເຈົ້າໜ້າທີ່
ຮັກສາຄວາມສະຫງົບ ຂອງອິນເດຍ ບາງຄົນກ່າວວ່າ ຕົນເຊື່ອວ່າ
ພວກໂຈມຕີແມ່ນສະມາຊິກຂອງກຸ່ມ Jaish- e-Mohammed ຫຼືກອງທັບພະເຈົ້າໂມຮຳ
ເມັດ ຊຶ່ງເປັນກຸ່ມຫົວຮຸນແຮງ ທີ່ມີຖານປະຕິບັດງານ ຢູ່ໃນປາກິສຖານ ທີ່ຢາກໃຫ້ແຄວ້ນ
ແຄັສເມຍ ຊຶ່ງອິນເດຍປົກຄອງຢູ່ນັ້ນ ເປັນເອກກະລາດ.
ລັດຖະມົນຕີກະຊວງພາຍໃນຂອງອິນເດຍທ່ານ Rajnath Singh ກ່າວໃນການໃຫ້ຄວາມ
ເຫັນທາງໂທລະພາບທີ່ໃຊ້ຄຳເວົ້າແບບລະມັດລະວັງວ່າ ປາກິສຖານເປັນເພື່ອນບ້ານຂອງ
ເຮົາແລະພວກເຮົາຕ້ອງການສັນຕິພາບ ບໍ່ແມ່ນພຽງແຕ່ກັບປາກິສຖານເທົ່ານັ້ນແຕ່ກັບທຸກ
ປະເທດເພື່ອນບ້ານ. ພວກເຮົາຕ້ອງການສັນຕິພາບ ແຕ່ຖ້າພວກກໍ່ການຮ້າຍຫາກທຳການ
ໂຈມຕີຕໍ່ດິນແດນຂອງອິນເດຍແລ້ວ ພວກກໍຈະທຳການຕອບໂຕ້ທີ່ເໝາະສົມ.
ໃນປີກາຍນີ້ ພວກມືປືນໄດ້ໂຈມຕີເມືອງຊາຍແດນແຫ່ງນຶ່ງ ໃນລັດ Punjab ທີ່ເຮັດໃຫ້ຢ່າງ
ນ້ອຍ 7 ຄົນເສຍຊີວິດຮວມທັງນາຍຕຳຫຼວດຈຳນວນນຶ່ງ. ອິນເດຍຖິ້ມໂທດໃນການໂຈມຕີ
ດັ່ງກ່າວໃສ່ພວກຫົວຮຸນແຮງ ທີ່ແຊກຊຶມເຂົ້າໄປຈາກປາ ກິສຖານ.
ການໂຈມຕີເທື່ອຫຼ້າສຸດນີ້ ມີຂຶ້ນພຽງນຶ່ງອາທິດຫລັງຈາກນາຍົກລັດຖະມົນຕີອິນເດຍທ່ານ
Narendra Modi ໄດ້ໄປຢ້ຽມຢາມປາກິສຖານ ຄັ້ງປະຫວັດສາດ ທີ່ບໍ່ມີການປະກາດໃຫ້
ຊາບລ່ວງໜ້າເພື່ອພົບປະກັບນາຍົກລັດຖະມົນຕີ Nawaz Sharif ຊຶ່ງເປັນການຢ້ຽມຢາມ
ເທື່ອທຳອິດ ໂດຍນາຍົກລັດຖະມົນຕີອິນເດຍໃນຮອບນຶ່ງທົດສະວັດກວ່າໆ. ການໄປຢ້ຽມ
ຢາມດັ່ງກ່າວ ແມ່ນຖືກເບິ່ງກັນວ່າ ເປັນຮ່ອງຮອຍໃນຄວາມສຳພັນທີ່ເປັນມິດກັນຫຼາຍຂຶ້ນ
ລະຫວ່າງສອງປະເທດເພື່ອນບ້ານທີ່ມີອາວຸດນິວເຄລຍ.
ອິນເດຍ ໄດ້ກ່າວຫາປາກິສຖານວ່າ ຕິດອາວຸດ ແລະໃຫ້ການຝຶກແອບແກ່ພວກກະບົດ ທີ່
ພວມທຳການຕໍ່ສູ້ເພື່ອຄວາມເປັນເອກກະລາດຂອງແຄວ້ນແຄັສເມຍ ຈາກອິນເດຍ ແລະ
ຮວມເຂົ້າກັນເປັນສ່ວນນຶ່ງຂອງປາກິສຖານ. ແຕ່ປາກິສຖານໄດ້ປະຕິເສດຕໍ່ຂໍ້ຫາດັ່ງກ່າວ.
