ບໍລິສັດນ້ຳມັນຍັກໃຫຍ່ Royal Dutch Shell ໄດ້ຕົກລົງທີ່ຈະ
ຈ່າຍເງິນຫຼາຍກວ່າ 83 ລ້ານໂດລ່າ ເພື່ອແກ້ໄຂບັນຫາກັບຜູ້ຄົນ
ຫຼາຍພັນຄົນຂອງປະຊາຄົມຊາວປະມົງ ໃນພາກໃຕ້ຂອງໄນເຈີເຣຍ
ກ່ຽວກັບການຮົ່ວໄຫຼຂອງນ້ຳມັນ 2 ຄັ້ງ.
ບໍລິສັດນ້ຳມັນ Shell ໄດ້ຕົກລົງທີ່ຈະຈ່າຍເງິນຈຳນວນ 3 ພັນ
200 ໂດລ່າ ໃຫ້ແກ່ແຕ່ລະບຸກຄົນ ຂອງຈຳນວນຫຼາຍກວ່າ 15 ພັນຄົນ ພ້ອມທັງ ອີກ 30 ລ້ານໂດລ່າ ໃຫ້ແກ່ປະຊາຄົມຊາວປະມົງ Bodo ໃນບໍລິເວນສາມຫລ່ຽມປາກແມ່ນ້ຳໄນເຈີ ທີ່ອຸດົມດ້ວຍນ້ຳມັນນັ້ນ.
ການຕົກລົງທີ່ວ່ານີ້ ແມ່ນໃນອັນທີ່ທາງບໍລິສັດອະທິບາຍວ່າ ເປັນການຮົ່ວໄຫຼສອງຄັ້ງ ທີ່ໄດ້ ສ້າງຄວາມເສຍໃຈຢ່າງສູງຢູ່ໃນຂົງເຂດ ເມື່ອປີ 2008. ບໍລິສັດຍັງກ່າວອີກວ່າ ຕົນມີຄວາມ ໝັ້ນໝາຍຢ່າງເຕັມທີ່ ຕໍ່ການລ້າງເກັບກວາດ ທຳຄວາມສະອາດ ຢູ່ຕໍ່ໄປ.
ຕົ້ນຕໍນັ້ນ ພວກໂຈດຢາກໄດ້ເງິນ 400 ລ້ານໂດລ່າຈາກບໍລິສັດ Shell ໃນການຟ້ອງຮ້ອງທີ່ຍືດເຍື້ອມານານມາເປັນເວລາ 3 ປີ ນັ້ນ ໂດຍທີ່ທາງບໍລິສັດ ສະເໜີຈ່າຍໃຫ້ ແກ່ປະຊາຄົມຊາວປະມົງ ພຽງ 6 ພັນໂດລ່າ. ຊຶ່ງເງິນ 3 ພັນ 200 ໂດລ່ານີ້ ທີ່ຕົກລົງກັນນັ້ນ ແມ່ນຈຳນວນເງິນປະມານ 3 ປີ ຂອງລາຍຮັບສະເລັ່ຍທີ່ຕ່ຳສຸດຂອງຊາວໄນເຈີເຣຍ.
ອົງການນິລະໂທດກຳສາກົນ ໄດ້ກະປະມານວ່າ ການຮົ່ວໄຫຼທີ່ວ່ານີ້ແມ່ນພົວພັນກັບນ້ຳມັນ ຫລາຍກວ່າ 100 ພັນຖັງ. ບໍລິສັດ Shell ໃນຂັ້ນຕົ້ນໄດ້ກະວ່າ ປະມານ 4 ພັນຖັງ ແຕ່ຕໍ່ມາເວົ້າວ່າ ໂຕເລກແມ່ນຫລາຍກວ່ານັ້ນ ແຕ່ບໍ່ໄດ້ສະເພາະເຈາະຈົງວ່າ ມີເທົ່າໃດແທ້.
