ລາຍງານກ່ຽວກັບການແຜ່ລະບາດຂອງເຊື້ອໄວຣັສທີ່ພາໃຫ້ເປັນໂຣກມື ຕີນ ແລະປາກເປື່ອຍ ຫຼື HFMD ໄດ້ໂຜ່ຂຶ້ນມາ ຢູ່ໃນປະເທດຕ່າງໆທົ່ວຂົງເຂດເອເຊຍ ເມື່ອບໍ່ເທົ່າໃດເດືອນຜ່ານມານີ້ ສ່ວນໃຫຍ່ແມ່ນພວກເດັກນ້ອຍ ທີ່ໄດ້ຮັບຜົນກະທົບທີ່ສຸດ.
ປະເທດທີ່ຖືກກະທົບຮ້າຍແຮງກວ່າໝູ່ ຄືຈີນ ທີ່ມີຜູ້ເປັນພະຍາດນີ້ຫລາຍກວ່າ ນຶ່ງລ້ານສອງແສນຄົນ ແລະເສຍຊີວິດ 350 ກວ່າຄົນ.
ບັນດາເຈົ້າໜ້າທີ່ການແພດໃນຍີ່ປຸ່ນ ຮ່ອງກົງ ເກົາຫຼີໃຕ້ ມາເລເຊຍ ສິງຄະໂປ ໄທ ໃຕ້ຫວັນ ແລະຫວຽດນາມ ປະເທດເຫລົ່ານີ້ທັງໝົດ ຕ່າງກໍໄດ້ລາຍງານໃຫ້ຊາບກ່ຽວກັບກໍລະນີຜູ້ປ່ວຍເປັນໂຣກນີ້ ຊຶ່ງສ່ວນໃຫຍ່ແມ່ນພວກເດັກນ້ອຍທີ່ມີອາຍຸຕໍ່າກວ່າ 10 ປີ.
ຢູ່ຫວຽດນາມນັ້ນ ມີເດັກນ້ອຍເປັນພະຍາດນີ້ຫລາຍເຖິງ 63,000 ຄົນ ໃນນັ້ນ 30 ຄົນເສຍ
ຊີວິດ ໃນຂະນະທີ່ສິງຄະໂປລາຍງານວ່າ ມີເດັກນ້ອຍ 26,000 ຄົນ ຕິດເຊື້ອໄວຣັສດັ່ງກ່າວ.
ພະຍາດ HFMD ເປັນພະຍາດມີຢູ່ທົ່ວໄປ ແລະຕິດຕໍ່ກັນໄດ້ງ່າຍໃນກຸ່ມເດັກນ້ອຍ ແຕ່ບັນດາ
ນັກຄົ້ນຄວ້າກໍຍັງພະຍາຍາມໃຫ້ຮຽນຮູ້ເຂົ້າໃຈ ວ່າດ້ວຍເຫດໃດ ອັດຕາການຕິດເຊື້ອໃນປີນີ້
ຈຶ່ງສູງກວ່າທີ່ຜ່ານມາ.
Dr. Brent Burkholder ເປັນຜູ້ຮັກສາການແທນ ຜູ້ຕາງໜ້າອົງການອະນາໄມໂລກ ປະຈໍາ
ປະເທດໄທ. ທ່ານ Burkholder ກ່າວວ່າ:
“ພວກເຮົາເຫັນ ອັດຕາຄົນຕິດເຊື້ອໄວຣັສນີ້ ສູງກວ່າອັດຕາສະເລ່ຍຂອງປີຜ່ານມາ
ໜ້ອຍນຶ່ງ ທີ່ປະເທດໄທ ແຕ່ກໍຍັງພົບເຫັນເຊ່ນກັນວ່າ ໃນປະເທດອື່ນໆໃນຂົງເຂດເ
ອເຊຍຕາເວັນອອກສຽງໃຕ້ ເຊັ່ນ ສິງຄະໂປ ຫວຽດນາມ ແລະປະເທດອື່ນໆ ກໍລາຍ
ງານວ່າ ມີອັດຕາຜູ້ ຕິດເຊື້ອພະຍາດນີ້ ສູງກວ່າຜ່ານມາໜ້ອຍນຶ່ງ. ສະນັ້ນ ຈຶ່ງຍັງ
ບໍ່ແຈ້ງຂາວເທື່ອວ່າ ເປັນຫຍັງຈຶ່ງເປັນເຊັ່ນນີ້. ບາງເທື່ອມັນອາດເປັນຍ້ອນມີການ
ລາຍງານເພີ່ມຂຶ້ນ ແລະບາງເທື່ອອາດເປັນຍ້ອນລັກສະນະໝຸນວຽນແຜ່ຜາຍອອກໄປ
ຂອງເຊື້ອໄວຣັສດັ່ງກ່າວນີ້ ກໍເປັນໄດ້.”
ຄວາມສົນໃຈໄດ້ເພ່ງເລັງໄປໃສ່ທີ່ກໍາປູເຈຍເມື່ອຕົ້ນເດືອນນີ້ ເວລາບັນດາເຈົ້າໜ້າທີ່ລາຍ
ງານວ່າ ມີເດັກນ້ອຍ 60 ຄົນກໍາລັງຈະເສຍຊີວິດຍ້ອນພະຍາດລຶກລັບນີ້. ຕໍ່ມາ ທາງກະ
ຊວງສາທາລະນະສຸກຂອງກໍາປູເຈຍແລະ ອົງການອະນາໄມໂລກ ຫຼື WHO ໄດ້ອອກ
ຖະແຫຼງການຮ່ວມສະບັບນຶ່ງ ຢືນຢັນວ່າ ພະຍາດມື ຕີນ ແລະປາກເປື່ອຍ ໄດ້ເອົາຊີວິດ
ເດັກນ້ອຍໄປແລ້ວ 54 ຄົນ.
ບັນດານາຍແພດ ໄດ້ຖິ້ມໂທດອັດຕາການເສຍຊີວິດທີ່ສູງຂຶ້ນ ບາງລາຍນັ້ນ ໃສ່ພວກສຸກ
ສາລາ ທີ່ໃຊ້ຢາ steroid ເພື່ອປິ່ນປົວຄົນເຈັບທີ່ມີອາການ ເປັນໄຂ້ ຮາກອອກ ຜືນຄັນ
ແລະເປັນຕຸ່ມຜຸພອງ. ຢາ steroid ນັ້ນສ້າງຄວາມອ່ອນແອໃຫ້ແກ່ລະບົບພູມຕ້ານທານ
ເຊື້ອໄວຣັສໃນຮ່າງກາຍ.
ແຕ່ບັນດານັກຄົ້ນຄວ້າເຊື່ອວ່າ ການປິ່ນປົວທີ່ບໍ່ດີ ບໍ່ແມ່ນເປັນພຽງເຫດຜົນ ເທົ່ານັ້ນຂອງການເສຍຊີວິດເພີ່ມຂຶ້ນ ຍ້ອນເຊື້ອໄວ
ຣັສ HFMD. ທ່ານ ວິຕ ສຸວັນ
ວານິດຊະກິດ ເປັນພະນັກງານ
ຄົ້ນຄວ້າປະຈໍາໂຮງຮຽນສາທາ
ລະນະສຸກ John Hopkins
Bloomberg. ທ່ານວິຕເວົ້າວ່າ:
“ໄວຣັສພວກນີ້ເປັນປະເພດທີ່
ໝຸນວຽນແຜ່ຜາຍຫລາຍສົມ
ຄວນ ເປັນເຊື້ອໄວຣັສຊະນິດ
ຕົ້ນໆ. ພວກເດັກນ້ອຍຈະຕິດ
ເຊື້ອໄວຣັສນີ້. ໃນເວລາສ່ວນໃຫຍ່ແທ້ໆແລ້ວ ມັນຈະມີອາການປ່ວຍທີ່ບໍ່ເຈາະຈົງ ຄືປ່ວຍເປັນ
ໄຂ້ ບາງທີມີອາການທ້ອງຂີ້ຮາກໜ້ອຍນຶ່ງ ມີໄວຣັສໃນລໍາໃສ້ ແລະກໍເຊົາໄປ. ແຕ່ປີນີ້ ອາດ
ຕ້ອງໄດ້ໃຫ້ຄວາມເອົາໃຈໃຈສ່ເປັນພິເສດຕໍ່ເຊື້ອໄວຣັສນີ້ ຍ້ອນວ່າມັນຮ້າຍແຮງຂຶ້ນ ແລະໜ້າ
ເປັນຫ່ວງຫຼາຍຂຶ້ນກວ່າເກົ່າ.”
ກະຊວງສາທາລະນະສຸກຂອງໄທ ໄດ້ລາຍງານວ່າ ມີຄົນຕິດເຊື້ອໄວຣັສນີ້ 13,160 ກວ່າລາຍ
ໃນປີນີ້ ຊຶ່ງເປັນອັດຕາຕິດເຊື້ອທີ່ສູງທີ່ສຸດໃນໄລຍະຫ້າປີ. ໃນຕະຫຼອດປີ 2011 ມີຄົນຕິດເຊື້ອ
ໄວຣັສນີ້ 18,000 ຄົນແລະເສຍຊີວິດຫົກຄົນ. ທ່ານວິຕກ່າວວ່າ ລະບົບການຕິດຕາມສິ້ງຊອມ
ເບິ່ງທີ່ດີຂຶ້ນ ແລະຄວາມຕື່ນຕົວຢູ່ໃນຂົງເຂດ ອາດໄດ້ນໍາໄປສູ່ການລາຍງານຂ່າວໃນອັດຕາ
ທີ່ເພີ່ມສູງຂຶ້ນນັ້ນ.
ເມື່ອວັນອັງຄານອາທິດແລ້ວນີ້ ບັນດາເຈົ້າໜ້າທີ່ສາທາລະນະສຸກໄທ ໄດ້ຢືນຢັນການເສຍຊີວິດ
ຍ້ອນໄວຣັສ HFMD ຄົນທໍາອິດໃນໄທໃນປີນີ້ ຊຶ່ງໄດ້ແກ່ເດັກນ້ອຍອາຍຸສອງປີເຄິ່ງ. ເຈົ້າໜ້າທີ່
ກ່າວວ່າ ໂຮງຮຽນ 60 ແຫ່ງທົ່ວປະເທດລາຍງານວ່າ ໄດ້ມີການແຜ່ລະບາດຂອງເຊື້ອໄວຣັສ
ນີ້ ແລະໂຮງຮຽນຫຼາຍສິບແຫ່ງ ໄດ້ປິດລົງເພື່ອຍັບຍັ້ງການແຜ່ລາມ.
Eric John-Abo ຜູ້ຊ່ຽວຊານດ້ານສາທາລະນະສຸກ ປະຈໍາສູນກາງ ຕຽມພ້ອມຮັບມືກັບໄພພິບັດເອເຊຍ ທີ່ປະເທດໄທ ກ່າວວ່າ ລະບົບສາທາລະນະ ສຸກຂອງໄທນັ້ນ ມີການຈັດຕັ້ງຕຽມພ້ອມໄວ້ເປັນຢ່າງດີ ເພື່ອຮັບມືກັບເຫດ ສຸກເສີນດ້ານສຸຂະພາບແບບນີ້ ລຸນຫຼັງຈາກການແຜ່ລະບາດຂອງເຊື້ອໄວ ຣັສ ໄຂ້ຫວັດນົກ ແລະພະຍາດຂົ່ມຂູ່ອື່ນໆ ໃນໄລຍະບໍ່ເທົ່າໃດປີຜ່ານມາ. ທ່ານ ອາໂບ ເວົ້າວ່າ:
“ເນຶ່ອງຈາກວ່າ ໄທມີປະສົບການກ່ຽວກັນໄຂ້ຫວັດນົກ ຫລື ເອວຽນ ຟລູ ແລະໄດ້ມີການ
ວາງແຜນຮັບມືກັບການແຜ່ລະບາດຂອງໄຂ້ຫວັດນົກມາແລ້ວໃນອະດີດ ດັ່ງນັ້ນ ໄທຈຶ່ງມີ
ໂຄງສ້າງ ກໍຄືໂຄງສ້າງດ້ານສາທາລະນະສຸກ ຕຽມພ້ອມໄວ້ແລ້ວ. ລະບົບການສິ້ງຊອມຕິດ
ຕາມເບິ່ງກໍມີພ້ອມ ແລະກະທໍາກັນມາຕະຫຼອດ ສະນັ້ນ ເຂົາເຈົ້າກໍຈະສາມາດກວດເຫັນ
ຜູ້ຕິດເຊື້ອຢູ່ໃນທົ່ວປະເທດໄດ້ຢ່າງງ່າຍດາຍ ແລະລະບົບການຄຸ້ມຄອງສາທາລະນະສຸກ
ກໍມີພ້ອມເຊັ່ນກັນ.”
ບັນດາເຈົ້າໜ້າທີ່ການແພດ ຄາດວ່າເຊື້ອໄວຣັສນີ້ ຍັງຄົງຈະຄຸກຄາມຢູ່ຕໍ່ໄປ ອີກຢ່າງໜ້ອຍ
ຫຼາຍອາທິດ ກ່ອນການແຜ່ລະບາດຢູ່ທົ່ວຂົງເຂດຈະຫລຸດຕໍ່າລົງໄປ.