ຫຼາຍໆພື້ນທີ່ໃນພາກຕາເວັນຕົກຂອງສະຫະລັດ ແມ່ນກຳລັງ
ປະສົບກັບໄພແຫ້ງແລ້ງ ຢ່າງຮຸນແຮງທີ່ສຸດ ເຊິ່ງໄດ້ກໍ່ໃຫ້ເກີດ
ໄຟໄໝ້ປ່າລາມໄປທົ່ວ ແລະ ການຂາດແຄນນ້ຳ ແຕ່ບັນດາ
ນັກວິທະຍາສາດ ທຳນາຍວ່າ ການປ່ຽນແປງດ້ານດິນຟ້າອາກາດ
ໃນບາງສ່ວນ ຈະບໍ່ພຽງແຕ່ສົ່ງຜົນກະທົບຕໍ່ພາກຕາເວັນຕົກຂອງ
ອາເມຣິກາເທົ່ານັ້ນ ແຕ່ຍັງຈະສົ່ງຜົນກະທົບ ຕໍ່ຫຼາຍພາກສ່ວນ
ຂອງເຂດເອເຊຍ ອອສເຕຣເລຍ ແລະ ອາຟຣິການຳດ້ວຍ. ຜູ້ສື່
ຂ່າວວີໂອເອ Elizabeth Lee ມີລາຍລະອຽດຈາກ ນະຄອນ
ລອສ ແອນເຈີລິສ ເຊິ່ງໄຊຈະເລີນສຸກ ຈະນຳມາສະເໜີທ່ານໃນ
ອັນດັບຕໍ່ໄປ.
ໃນຂະນະທີ່ ໄພແຫ້ງແລ້ງ ຍັງມີຢູ່ຕໍ່ໄປອີກປີນຶ່ງ ໃນພາກໃຕ້ຂອງລັດຄາລີຟໍເນຍ ຫຼາຍໆຄົນ
ໄດ້ປ່ຽນແປງ ເດີ່ນບ້ານທັງໝົດຫຼືບາງສ່ວນ ຂອງພວກເຂົາເຈົ້າ ດ້ວຍການປູກພວກຕົ້ນໄມ້
ທີ່ເປັນພັນຂອງພື້ນເມືອງ.
ທ່ານນາງ Jan Muntz ເວົ້າວ່າ “ມັນເຮັດໃຫ້ທຸກໃຈຫຼາຍ ແລະ ພວກຕົນໄມ້ເຫຼົ່ານີ້
ເຕີບໃຫຍ່ຢູ່ນະແຫ່ງນີ້ ໄດ້ປະມານ 80 ຫຼື 90 ປີແລ້ວ.”
ພວກຕົ້ນໄມ້ສ່ວນຫຼາຍຢູ່ໃນບໍລິເວນນະຄອນລອສ ແອນເຈີລິສ ບໍ່ແມ່ນ ພັນພື້ນເມືອງ
ແລະ ຕ້ອງການນ້ຳຢ່າງຫຼວງຫຼາຍ. ມູນນິທິ Theodore Payne ໂດຍຜ່ານສວນກ້າ
ຕົ້ນໄມ້ຂອງຕົນ ໄດ້ພະຍາຍາມ ສົ່ງເສີມ ແລະໃຫ້ການອົບຮົມແກ່ຄົນທົ່ວໄປ ຮູ້ຈັກກ່ຽວ
ກັບພວກຕົ້ນໄມ້ພື້ນເມືອງ ຂອງລັດກາລີຟໍເນຍ ມາໄດ້ ຫຼາຍທົດສະວັດແລ້ວ. ເມື່ອຫຼາຍ
ປີຜ່ານມານີ້ ມີຜູ້ຄົນຈຳນວນຫລວງຫຼາຍ ໄດ້ຫັນມາສົນໃຈເພີ້ມຂຶ້ນ.
ທ່ານນາງ Kitty Connolly ຈາກມູນນິທິ Theodore Payne ເວົ້າວ່າ “ທ່ານຈະໃຊ້ນ້ຳ
ໜ້ອຍລົງ ສະນັ້ນ ໃນສວນຕົ້ນໄມ້ພື້ນເມືອງ ລັດກາລີຟໍເນຍ ກໍຂຶ້ນຢູ່ກັບ ວິທີການ
ປູກນັ້ນ ທ່ານຈະປະຢັດນ້ຳໄດ້ ເຖິງ 50 ຫາ 80 ເປີເຊັນ ເມື່ອທຽບກັບ ສວນຕົ້ນ
ໄມ້ທົ່ວໄປ.”
ທ່ານ Bill Patzert ນັກພະຍາກອນອາກາດ ກ່າວວ່າ ການຂາດແຄນ ນ້ຳ ອາດຈະບໍ່ເປັນ
ບັນຫາ ໃນລະດູໜາວທີ່ຈະມາເຖິງນີ້.
ທ່ານ Patzert ເວົ້າວ່າ “ອັນນີ້ເບິ່ງຄືວ່າ ຍັງມີຄວາມຫວັງຫຼາຍທີ່ສຸດ ສຳຫລັບ ເງິນ
ມັດຈຳ ຂອງການບັນເທົາທຸກໄພແຫ້ງແລ້ງ ໃນເຂດຕາ ເວັນຕົກຂອງອາເມຣິກາ.
ພວກເຮົາມີຄວາມຫວັງຫຼາຍ ສຳຫລັບ ປາກົດການ El Nino ນີ້.”
ປາກົດການ El Nino ແມ່ນໝາຍເຖິງ ສະພາບຂອງນ້ຳທະເລໃນເຂດ ມະຫາສະມຸດ
ປາຊີຟິກ ທີ່ອຸ່ນກວ່າທຳມະດາ ຢູ່ທີ່ເສັ້ນສູນສູດຂອງໂລກ. ບັນດານັກວິທະຍາສາດ ຄາດ
ໝາຍວ່າ ຈະມີປາກົດການ El Nino ຂະນາດໃຫຍ່ ທີ່ຈະເກີດຂຶ້ນໃນທ້າຍປີນີ້ ແລະ ຈະ
ເລີຍເຂົ້າໄປໃສ່ປີໜ້າ. ໃນການຄາດຄະເນນີ້ ໄລຍະຕົ້ນໆຂອງປີໜ້າ ພາກສ່ວນທີ່ເປັນ
ສີຂຽວນັ້ນ ສະແດງໃຫ້ເຫັນເຖິງຂົງເຂດບ່ອນທີ່ປຽກຊຸ່ມ ໃນຍາມລະດູໜາວ ແມ່ນມັກຈະ
ເກີດຂຶ້ນຫຼາຍກວ່າປົກກະຕິ.
ແຕ່ຜົນກະທົບຂອງປາກົດການ El Nino ນັ້ນ ແມ່ນໄດ້ກວມເອົາ ບໍ່ພຽງແຕ່ສະຫະລັດ
ເທົ່ານັ້ນ.
ທ່ານ Patzert ເວົ້າວ່າ “ບາງເຂດ ຊຶ່ງຕາມທຳມະດາແລ້ວ ມີສະພາບ ທີ່ແຫ້ງ ເຊັ່ນ
ຢູ່ພາກຕາເວັນຕົກຂອງອາເມຣິກາ ປະເທດເປຣູ ແລະ ເອກົວດໍ ແມ່ນຈະມີຝົນຕົກ
ໜັກ. ຢູ່ທີ່ເອເຊຍຕາເວັນອອກສຽງໃຕ້ ອິນໂດເນເຊຍ ແລະ ຟີລິບປິນ ແລະ ພາກ
ເໜືອຂອງອອສເຕຣເລຍ ພວກເຂົາໄດ້ປະສົບກັບໄພແຫ້ງແລ້ງ ຢ່າງໜັກໜ່ວງ.
ແມ່ນກະທັງ ຢູ່ໃນອາຟຣິກາໃຕ້ ພວກເຂົາໄດ້ປະສົບກັບໄພແຫ້ງແລ້ງ ແລະ ດັ່ງ
ນັ້ນ ຈຶ່ງບໍ່ມີທະວີບໃດນຶ່ງ ທີ່ບໍ່ໄດ້ຮູ້ສຶກເຖິງຮ່ອງຮອຍ ຂອງປາກົດການ El Nino
ອັນໃຫຍ່ນີ້.”
ໃນຂະນະທີ່ ປາກົດການ El Nino ແກ່ຍາວອອກໄປ ປະມານ ປີນຶ່ງ ຮູບແບບຂອງສະພາບ
ອາກາດ ອີກອັນນຶ່ງທີ່ກຳລັງກໍ່ໂຕຂຶ້ນຢູ່ນັ້ນ ອາດແກ່ຍາວດົນໄປກວ່ານີ້.
ໃນການສຳພາດຜ່ານທາງ Skype ນັກວິທະຍາສາດ ຈາກອົງການຄຸ້ມ ຄອງມະຫາສະມຸດ
ແລະ ບັນຍາກາດແຫ່ງຊາດ ສະຫະລັດ ທ່ານ Nate Mantua ກ່າວວ່າ ອັນນັ້ນມັນແມ່ນ
ປາກົດການສະພາບອາກາດ ທີ່ເກີດຂຶ້ນໂດຍສະເພາະ ໃນມະຫາສະມຸດປາຊີຟິກຕອນເໜືອ
ເອີ້ນວ່າ Pacific Decadal Oscillation ຫຼື PDO. ມັນມັກຈະສະແດງຮູບແບບ ຂອງ
ອຸນຫະພູມຂອງນ້ຳທະເລທີ່ອຸ່ນຂຶ້ນ ຫຼື ເຢັນລົງ ທີ່ຈະແກ່ ຍາວອອກໄປເປັນເວລາຫຼາຍປີ
ຫຼື ຫຼາຍທົດສະວັດ.
ທ່ານ Mantua ເວົ້າວ່າ “ແບບຄວາມອົບອຸ່ນ ຂອງ PDO ສົ່ງເສີມໃຫ້ມີຝົນຕົກຫຼາຍ
ເກີນປົກກະຕິ ໃນຕອນໃຕ້ຂອງລັດຄາລີຟໍເນຍ ແລະ ໃນທົ່ວບໍລິເວນ ພາກຕາເວັນ
ຕົກສຽງໃຕ້ຂອງສະຫະລັດ ແລະ ພາກເໜືອຂອງເມັກຊິໂກ ສະນັ້ນ ມັນຈະເອື້ອ
ອຳນວຍໃຫ້ ມີການຜ່ອນຄາຍ ສະ ພາບທີ່ແຫ້ງແລ້ງເຫຼົ່ານີ້ ໃນເຂດພາກຕາເວັນ
ຕົກສຽງໃຕ້.”
ສະພາບອາກາດ ແມ່ນບໍ່ສາມາດຄາດຄະເນໄດ້. ແລະ ໃນປາກົດການ El Ninos ໃຫຍ່
ສອງຄັ້ງທີ່ຜ່ານມາ ໄດ້ເກີດການຫັນປ່ຽນ ໄປເປັນສະ ພາບທີ່ເຢັນຢ່າງວ່ອງໄວ ແລະ ການ
ປ່ຽນແປງໃນຮູບແບບຂອງ PDO. ສະນັ້ນ ສິ່ງໜຶ່ງ ທີ່ອາດເປັນໄປໄດ້ ກໍຄື ທາງພາກຕາເວັນ
ຕົກສຽງໃຕ້ຂອງສະຫະລັດ ອາດຈະໄດ້ຮັບຝົນຕົກພຽງປີດຽວ.
ຊາວສວນເຫຼົານີ້ ກ່າວວ່າ ບໍ່ວ່າຈະມີຝົນຕົກຫຼືໄພແຫ້ງແລ້ງກໍຕາມ ເດີ່ນບ້ານຂອງພວກເຂົາ
ເຈົ້ານັ້ນ ໄດ້ຖືກກະກຽມໄວ້ແລ້ວ ດ້ວຍການປູກຕົ້ນໄມ້ພື້ນເມືອງຂອງລັດຄາລີຟໍເນຍທີ່ປັບ
ຕົວໄດ້ ເພື່ອຮັບມືກັບສະພາບໃດ ກໍຕາມ ຂອງທຳມະຊາດ ທີ່ຈະເກີດຂຶ້ນ ຕໍ່ພວກເຂົາເຈົ້າ.
