ປະຊາຊົນຊາອຸດີອາຣາເບຍຫລາຍສິບຄົນໄດ້ທໍາການປະທ້ວງຢູ່ນອກກະຊວງພາຍໃນ ທີ່ນະຄອນຫລວງ Riyadh ໃນວັນອາທິດມື້ນີ້ ຮຽກຮ້ອງໃຫ້ປ່ອຍພວກນັກໂທດ.
ມີຕໍາຫລວດປາບການຈະລາຈົນໃນຈໍານວນຫລວງຫລາຍ ທໍາການເຝົ້າຍາມຢູ່ກະຊວງດັ່ງກ່າວ ແລະພວກທີ່ເຫັນເຫດການເວົ້າວ່າ ພວກປະທ້ວງຈໍານວນນຶ່ງໄດ້ຖືກຈັບກຸມ ຫລັງຈາກພະຍາຍາມທີ່ຈະເຂົ້າໄປໃນຕຶກກະຊວງນັ້ນ.
ການປະທ້ວງແມ່ນໄດ້ຖືກເກືອດຫ້າມໃນ Saudi Arabia ແລະຜ່ານມາ ກະສັດ Abdullah ໄດ້ສະເໜີໃຫ້ສິ່ງຍ້ອມນໍ້າໃຈຕ່າງໆເພື່ອປ້ອງ ກັນບໍ່ໃຫ້ການກໍ່ວຸ້ນວາຍທີ່ໄດ້ແຜ່ລາມໄປໃນທົ່ວໂລກອາຣັບນັ້ນ ເກີດຂຶ້ນໃນປະເທດຂອງພະອົງ. ແຕ່ກໍໄດ້ມີການປະທ້ວງເລັກໆນ້ອຍໆເກີດຂຶ້ນຫລາຍຄັ້ງໃນປະເທດດັ່ງກ່າວ.
ໃນວັນສຸກຜ່ານມານີ້ ກະສັດ Abdullah ໄດ້ຊົງໃຫ້ຄໍາໜັ້ນສັນຍາວ່າ ຈະທໍາການປະຕິຮູບແລະໃຫ້ເງິນສົດຍ້ອມນໍ້າໃຈ ແກ່ພວກຊາວເມືອງ.
ກະສັດ Abdullah ທີ່ມີພະຊົນມາຍຸ 86 ພັນສາ ໄດ້ເດີນທາງໄປປິ່ນປົວໂຕຢູ່ຕ່າງປະເທດເປັນເວລາ 3 ເດືອນ ແລະໄດ້ຊົງກັບຄືນເມືອ Saudi Arabia ເມື່ອເດືອນກຸມພາຜ່ານມານີ້ເອງ.