ເຈົ້າໜ້າທີ່ຣັດເຊຍລາຍງານວ່າ ການໂຈມຕີດ້ວຍເຮືອບິນບໍ່ມີຄົນຂັບຂອງຢູເຄຣນ ໃນວັນອັງຄານມື້ນີ້ ໄດ້ແນເປົ້າໃສ່ ນະຄອນຫຼວງມົສກູ ແລະຫລາຍເຂດທາງພາກຕາເວັນຕົກຂອງຣັດເຊຍ.
ທ່ານ ອັນເດຣ ຄລີໂຊບວ໌ (Andrey Klychov), ຜູ້ປົກຄອງເຂດໂອຣີໂຢລ (Oryol), ກ່າວວ່າ ເຮືອບິນບໍ່ມີຄົນຂັບລຳນຶ່ງ ໄດ້ຕົກຢູ່ສະຖານທີ່ເກັບນໍ້າມັນ, ເຊິ່ງເຮັດໃຫ້ເກີດໄຟໄໝ້ ແຕ່ບໍ່ມີຜູ້ເສຍຊີວິດ ຫຼື ໄດ້ຮັບບາດເຈັບແຕ່ຢ່າງໃດ.
ເຮືອບິນບໍ່ມີຄົນຂັບຂອງຢູເຄຣນ ຍັງໄດ້ໂຈມຕີເຂດແບລໂກຣອດ (Belgorod) ທີ່ມີຊາຍແດນຕິດກັບຢູເຄຣນ ເຮັດໃຫ້ປະຊາຊົນຈຳນວນນຶ່ງ ບໍ່ມີໄຟຟ້າໃຊ້, ອີງຕາມການກ່າວຂອງຜູ້ປົກຄອງເຂດ.
ເຈົ້າຄອງນະຄອນມົສກູ ທ່ານ ເຊີເກ ໂຊເບຍນິນ (Sergei Sobyanin) ກ່າວວ່າ ລະບົບປ້ອງກັນໄຟທາງອາກາດຂອງຣັດເຊຍ ໄດ້ທຳລາຍເຮືອບິນບໍ່ມີຄົນຂັບລຳນຶ່ງ ທີ່ກຳລັງບິນໄປທີ່ນະຄອນຫຼວງຂອງຣັດເຊຍ. ທ່ານໄດ້ລາຍງານວ່າ ບໍ່ມີຄວາມເສຍຫາຍ ຫຼືການບາດເຈັບຈາກຊາກຫັກພັງທີ່ຕົກລົງມາ.
ບັນດາເຈົ້າໜ້າທີ່ໃນຂົງເຂດ ທູລາ (Tula) ແລະ ເຄີສ (Kursk) ໄດ້ລາຍງານວ່າ ເຮືອບິນບໍມີຄົນຂັບຂອງຢູເຄຣນ ໄດ້ຖືກທຳລາຍໃນບັນດາເຂດດັ່ງກ່າວ ໃນວັນອັງຄານມື້ນີ້.
ຢູ່ໃນຢູເຄຣນ, ເຈົ້າໜ້າທີ່ໄດ້ອອກແຈ້ງການເຕືອນໄພທາງອາກາດໃນຫຼາຍຂົງເຂດໃນຊ່ວງຂ້າມຄືນ.
ຟໍຣັມສະແດງຄວາມຄິດເຫັນ