ປະຊາຊົນຣັດເຊຍກໍາລັງພາກັນອອກໄປປ່ອນບັດ ໃນການເລືອກຕັ້ງປະທານາທິບໍດີ ທີ່ມີທ່າທາງວ່າ ຈະອໍານວຍໃຫ້ທ່ານ Vladimir Putin ໄດ້ກັບຄືນມາຄອງອໍານາດໃນວັງ Kremlin ອີກເປັນສະໄໝທີສາມ ຄັ້ງປະວັດສາດຂອງປະເທດນັ້ນ.
ພວກນັກສັງເກດການອາສາສະມັກ ທີ່ຕິດຕາມເບິ່ງການເລືອກຕັ້ງຈໍານວນຫລາຍກວ່າ 2 ແສນຄົນກໍາລັງຈັບຕາເບິ່ງການປ່ອນບັດຢ່າງໃກ້ ຊິດ ໃນຄວາມຫວັງເພື່ອຫລີກລ່ຽງບໍ່ໃຫ້ມີການກ່າວຫາເລື່ອງການສໍ້ໂກງບັດເລືອກຕັ້ງ ຄືກັນກັບທີ່ພັກຝ່າຍຄ້ານໄດ້ກ່າວຫາໃນການເລືອກຕັ້ງ ເອົາສະມາຊິກລັດຖະສະພາໃນວັນທີ 4 ເດືອນທັນວາປີຜ່ານມານີ້.
ພວກຊົມໃຊ້ອິນເທີແນັດຕື່ມອີກ 6 ແສນຄົນ ໄດ້ລົງທະບຽນເພື່ອຕິດຕາມເບິ່ງພວກກ້ອງ
ຖ່າຍຮູບເຂົ້າເວັບໄຊ້ທ໌ ທີ່ຕິດຕັ້ງໄວ້ຢູ່ໝ່ວຍປ່ອນບັດທັງໝົດເກືອບ 1 ແສນແຫ່ງໃນທົ່ວ
ປະເທດຣັດເຊຍນັ້ນ.
ທ່ານ Putin ຊຶ່ງປັດຈຸບັນນີ້ ພວມດໍາລົງຕໍາແໜ່ງນາຍົກລັດຖະມົນຕີກໍາລັງພະຍາຍາມໃຫ້
ໄດ້ກັບຄືນມາເປັນປະທານາທິບໍດີຄືນອີກ ຊຶ່ງທ່ານເຄີຍດໍາລົງຕໍາແໜ່ງນີ້ມາແລ້ວ 8 ປີ ແຕ່
ປີ 2000 ຫາ 2008 ນັ້ນ. ກ່ອນມີການດັດແກ້ລັດຖະທໍາມະນູນ ກົດໝາຍຫ້າມທ່ານດໍາ
ລົງຕໍາແໜ່ງປະທານາທິບໍດີ 3 ສະໄໝລຽນຕິດ.
ການສໍາຫລວດຫາງສຽງປະຊາຊົນກ່ອນການເລືອກຕັ້ງທໍານາຍວ່າ ທ່ານພູຕິນຈະໄດ້ຮັບ
ສຽງສະໜັບສະໜຸນຈາກປະຊາຊົນຢ່າງໜ້ອຍ 62 ເປີເຊັນຂອງຈໍານວນຄະນຽງສຽງທັງ
ໝົດ ຊຶ່ງເປັນຈໍານວນພຽງພໍເພື່ອ ຫລີກລ່ຽງການປ່ອນບັດເລືອກຕັ້ງຮອບຕັດສິນຊີ້ຂາດ
ນັ້ນ.
ແຕ່ການກ່າວຫາວ່າ ມີການສໍ້ໂກງບັດຄະແນນສຽງໃນການເລືອກຕັ້ງເອົາສະມາຊິກລັດຖະ
ສະພາໃນເດືອນທັນວາປີຜ່ານມາ ແລະຄວາມເປັນໄປໄດ້ໃນການດໍາລົງຕໍາແໜ່ງປະທານາ
ທິບໍດີຕື່ມອີກ 12 ປີຂອງທ່ານພູຕິນນັ້ນ ໄດ້ຍັງຜົນໃຫ້ມີຜູ້ປະທ້ວງໃນຈໍານວນຫລວງຫລາຍ
ຢ່າງບໍ່ເຄີຍມີມາກ່ອນໃນຣັດເຊຍ ອອກມາເດີນຂະບວນຕໍ່ຕ້ານລັດຖະບານໃນຫວ່າງບໍ່ເທົ່າ
ໃດສັບປະດາຜ່ານມານີ້.
ເບິ່ງວີດີໂອລາຍງານກ່ຽວກັບພວກອາສາສະມັກສັງເກດການເລືອກຕັ້ງ
ຮັບການເຝິກແອບ:
