ກຸ່ມພວກຫົວຮຸນແຮງລັດອິສລາມ ຊຶ່ງຄວບຄຸມບາງເຂດຂອງຊີເຣຍ
ແລະ ອີຣັກ ໄດ້ຮັບເອົາການໃຫ້ຄຳໝັ້ນສັນຍາ ທີ່ຈະມອບຄວາມຈົງ
ຮັກພັກດີ ຂອງກຸ່ມຫົວຮຸນແຮງຈັດ ໂບໂກ ຮາຣຳ ທີ່ມີຖານປະຕິບັດ
ງານ ຢູ່ໄນຈີເຣຍ.
ໃນຖະແຫລງການທີ່ເປັນສຽງບັນທຶກໃນວັນພະຫັດວານນີ້ ທ້າວ
Abu Mohammed al-Adnani ໂຄສົກຂອງພວກລັດອິສລາມ
ໄດ້ຍິນດີຮັບເອົາ ໃນອັນທີ່ຜູ້ກ່ຽວເອີ້ນວ່າ ເປັນການຂະຫຍາຍຕົວ
ຂອງກຸ່ມທີ່ໄດ້ປະກາດຕົນວ່າ ເປັນລັດທີ່ປົກຄອງໂດຍສາສະໜາ
ອິສລາມ ໄປຍັງອາຟຣິກາຕາເວັນຕົກ.
ໂຄສົກ al-Adnani ເວົ້າວ່າ “ຜູ້ນຳລັດອິສລາມ ຂໍໃຫ້ພະເຈົ້າປົກປ້ອງທ່ານ ໄດ້ຮັບ
ເອົາການສາບານມອບຄວາມຈົງຮັກພັກດີ ຂອງອ້າຍນ້ອງຊາວຊູນີ ເພື່ອເຮັດສົງ
ຄາມ ສັກສິດທາງສາສະໜາ. ພວກເຮົາສັນລະເສີນ ຊາວມຸສລິມຂອງພວກເຮົາ
ແລະ ອ້າຍນ້ອງນັກຕໍ່ສູ້ເພື່ອສາສະໜາ ໃນອາຟຣິກາຕາເວັນຕົກ ຕໍ່ການສະແດງ
ຄວາມຈົງຮັກພັກດີຂອງພວກເຂົາເຈົ້ານັ້ນ.”
ຜູ້ນຳຂອງກຸ່ມໂບໂກ ຮາຣຳ ທ້າວ Abubakar Shekau ໄດ້ປະກາດ ໃນວີດີໂອເມື່ອອາທິດ ແລ້ວນີ້ ວ່າ ກຸ່ມຂອງຕົນ “ຈະຮັບຟັງ ແລະ ເຊື່ອຟັງ” ຜູ້ນຳລັດອິສລາມ ທ້າວ Abu Bakr al-Baghdadi.
ຂອບເຂດທີ່ທັງສອງກຸ່ມ ຈະປະສານງານ ຄວາມພະຍາຍາມຮ່ວມກັນແນວໃດນັ້ນ ແມ່ນຍັງບໍ່ເປັນທີ່ຈະແຈ້ງເທື່ອ.
ພວກກະບົດອິສລາມອື່ນໆອີກຫລາຍໆກຸ່ມ ໃນທົ່ວໂລກ ກໍຍັງອ້າງວ່າ ພວກຕົນໄດ້ມອບ
ຄວາມຈົງຮັກພັກດີຕໍ່ກຸ່ມລັດອິສລາມ ແຕ່ຫາກສ່ວນໃຫຍ່ແລ້ວ ປາກົດວ່າ ເປັນພຽງການ
ຮ່ວມກັນແບບສັນຍາລັກເທົ່ານັ້ນ.
ເມື່ອຕົ້ນອາທິດນີ້ ປະທານາທິບໍດີໄນຈີເຣຍ ທ່ານ Goodluck Jonathan ກ່າວຖະແຫລງ
ຕໍ່ວີໂອເອວ່າ ພວກນັກຕໍ່ສູ້ຂອງກຸ່ມໂບໂກ ຮາຣຳ ໄດ້ຮັບການເຝິກແອບຢູ່ຄ້າຍຕ່າງໆ ໃນ
ເຂດຕາເວັນອອກກາງ ທີ່ດຳເນີນງານໂດຍພວກຫົວຮຸນແຮງລັດອິສລາມ.
