ພວກນັກພະຍາກອນອາກາດກ່າວວ່າ ມີການຄາດຄະເນວ່າຫິມະ
ຈະຕົກລົງມາຕື່ມອີກຫຼາຍກວ່ານຶ່ງແມັດ ໃນວັນພະຫັດມື້ນີ້ ຢູ່ເມືອງ
Buffalo ລັດ New York ທາງພາກຕາເວັນອອກສຽງເໜືອຂອງ
ສະຫະລັດ 2 ມື້ຫຼັງຈາກທີ່ພາຍຸຫິມະຂະໜາດແຮງ ໄດ້ຕົກລົງ
ມາຖົມ ເມືອງດັ່ງກ່າວ.
ຫິມະຊຸດໃໝ່ນີ້ ຈະຕົກລົງມາຕື່ມໃສ່ຫິມະເກົ່າ ທີ່ສູງ 1 ແມັດເຄິ່ງ
ແລ້ວນັ້ນ ຊຶ່ງໄດ້ເຮັດໃຫ້ຜູ້ຄົນຂັງຕົນເອງຢູ່ກັບບ້ານເຮືອນຂອງ
ພວກເຂົາເຈົ້າ ແລະພວກທີ່ຂັບຍວດຍານພາຫະນະ ກໍໄດ້ຕິດ
ຄ້າງຢູ່ໃນລົດຂອງພວກເຂົາເຈົ້າ ຕາມຖະໜົນສາຍສຳຄັນໆ
ໃນລັດ New York. ພວກນັກພາຍາກອນອາກາດ ກ່າວວ່າ
ໃນທີ່ສຸດປະລິມານຂອງຫິມະລວມກັນແລ້ວ ກໍຈະເທົ່າກັບຫິມະທີ່ພວກເຂົາເຈົ້າໄດ້ຮັບຕະລອດທັງລະດູໜາວ.
ມີ 7 ຄົນ ໄດ້ຮັບການຢືນຢັນວ່າເສຍຊີວິດແລ້ວ ທີ່ພົວພັນກັບພາຍຸຫົວນີ້ ຊຶ່ງຮວມທັງຊາຍ
ຜູ້ນຶ່ງທີ່ພົບເຫັນວ່າເສຍຊີວິດໃນລົດ ທີ່ຖືກຖົມດ້ວຍຫິມະ. ມີອີກ 4 ຄົນ ທີ່ີມີລາຍງານວ່າ ເສຍຊີວິດຍ້ອນບັນຫາຫົວໃຈ.
ຜູ້ປົກຄອງລັດນິວຢອກ ທ່ານ Andrew Cuomo ໄດ້ປະກາດພາວະສຸກເສີນ ໃນ 10 ເມືອງ
ຫຼືຄາວຕີ້ທາງພາກຕາເວັນຕົກຂອງລັດ New York. ທ່ານ Cuomo ໄດ້ບອກກັບພວກນັກຂ່າວໃນວັນພຸດວານນີ້ວ່າ ພາຍຸຫິມະຫົວນີ້ ອາດຈະທຳລາຍສະຖິຕິໃນເລື່ອງຫິມະຕົກ ຫຼັງຈາກມັນສິ້ນສຸດລົງແລ້ວນັ້ນ.
