ຊາວອາເມຣິກັນຈໍານວນຫລາຍລ້ານຄົນ ໄດ້ຢຸດງານໃນວັນຈັນມື້ນີ້ ເນື່ອງໃນວັນຄົບຮອບ
ວັນຄ້າຍວັນເກີດຂອງປະທານາທິບໍດີສະຫະລັດຜູ້ທໍາອິດ ຄືທ່ານ George Washington.
ໃນຂະນະທີ່ວັນຢຸດພັກລາດຊະການຢ່າງເປັນທາງການໃນມື້ນີ້ ເປັນການຮັບຮູ້ເຖິງວັນເກີດ
ຂອງປະທານາທິບໍດີ George Washington ແຕ່ວັນນີ້ກໍໄດ້ຖືກຂະໜານນາມວ່າເປັນ
Presidents’ Day ຫລືວັນປະທານາທິບໍດີ ທີ່ມີຄວາມໝາຍກ້ວາງອອກໄປກວ່ານັ້ນຄື
ເປັນວັນສະເຫຼີມສະຫຼອງ ບັນດາຜູ້ນໍາຂອງປະເທດ.
ເບິ່ງວີດີໂອການສະຫລອງວັນປະທານາທິບໍດີ ຢູ່ Mt Vernon ເຮືອນຂອງ
ມື້ລາງປະທານາທິບໍດີ George Washington:
ໂຮງການລັດຖະບານກາງສ່ວນໃຫຍ່ ແມ່ນປິດໃນມື້ນີ້ ພ້ອມທັງທະນາຄານ, ຕະຫຼາດຮຸ້ນ
ແລະໄປສະນີ. ສ່ວນຫ້າງຮ້ານຕ່າງໆນັ້ນແມ່ນວ່າຈະເປີດໃຫ້ບໍລິການແລະຈະມີການລົດ
ລາຄາພິເສດ ເພື່ອເພີ່ມຍອດຂາຍ ເນື່ອງໃນໂອກາດວັນດັ່ງກ່າວນີ້.
ເດືອນກຸມພານີ້ ແມ່ນເປັນເດືອນເກີດຂອງ 2 ປະທານາທິບໍດີ ຄືທ່ານ George
Washington ໃນປີ 1732) ແລະທ່ານ Abraham Lincon ໃນປີ 1809.
ວັນຢຸດເພື່ອສະເຫຼີມສະຫຼອງແລະເປັນກຽດເນື່ອງໃນວັນຄ້າຍວັນເກີດຂອງປະທານາທິບໍດີ
Washington ໄດ້ສະຫຼອງກັນເປັນຄັ້ງທໍາອິດໃນ ປີ 1885. ທ່ານວໍຊິງຕັນເກີດເມື່ອວັນທີ
22 ເດືອນກຸມພາ,ແຕ່ວ່າທາງ ລັດຖະສະພາໄດ້ຮັບຜ່ານກົດໝາຍໃນປີ 1968 ໃຫ້ທໍາການ
ສະເຫຼີມສະຫຼອງວັນເກີດຂອງທ່ານໃນວັນຈັນທີ 3 ຂອງເດືອນກຸມພາ.
