ຈຳນວນນັກທ່ອງທ່ຽວຈີນ ທີ່ເດີນທາງໄປຕ່າງປະເທດ ໃນລະ
ຍະບຸນປີໃໝ່ກຸດຈີນເດືອນແລ້ວ ໄດ້ເພີ້ມສູງຂຶ້ນສູ່ລະດັບໃໝ່ໃນ
ປີນີ້ ແລະເປັນເທຶ່ອທຳອິດ ທີ່ ພວກເດີນທາງໄປຕ່າງປະເທດ
ມີຫຼາຍກວ່າ ຈຳນວນພວກເດີນທາງຢູ່ພາຍໃນປະເທດ.
Shannon Van Sant ລາຍງານຈາກຮົງກົງ ບ່ອນບັນດາເຈົ້າ
ໜ້າທີ່ກ່າວວ່າ ບັນຍາກາດຄວາມວຸ້ນວາຍທາງການເມືອງ ໃນປີ
ກາຍນີ້ ມີສ່ວນເຮັດໃຫ້ຈຳນວນນັກທ່ອງທ່ຽວ ທີ່ມາຈາກຈີນແຜ່ນ
ດິນໃຫຍ່ ຫລຸດລົງ. ກິ່ງສະຫວັນ ມີ ລາຍລະອຽດຂອງເລື້ອງນີ້
ມາສະເໜີທ່ານ.
ອີງຕາມສື່ມວນຊົນ ຂອງລັດຖະບານຈີນແລ້ວ ຈຳນວນນັກທ່ອງ
ທ່ຽວຈາກຈີນແຜ່ນດິນໃຫຍ່ ທີ່ໄປຢ້ຽມຢາມຮົງກົງ ໄດ້ຫລຸດລົງເປັນຄັ້ງທຳອີດ ນັບແຕ່ປີ 2013 ເປັນຕົ້ນມາ.
ການຫລຸດລົງຂອງນັກທ່ອງທ່ຽວຈາກຈີນແຜ່ນດິນໃຫຍ່ ມີຂຶ້ນຫລັງຈາກເກີດການປະທ້ວງ
ເປັນເວລາຫຼາຍໆເດືອນ ຂອງພວກນິຍົມປະຊາທິປະໄຕ ທີ່ພາກັນກີດກັ້ນຖະໜົນຫົນທາງ
ສາຍຕ່າງໆໃນຮົງກົງ. ພວກປະທ້ວງໄດ້ຮຽກຮ້ອງໃຫ້ມີການເລືອກຕັ້ງໂດຍກົງເອົາຜູ້ນຳ
ຂອງຮົງກົງ.
ທ່ານ Raymond Yeung ນັກເສດຖະສາດອະວຸໂສ ປະຈຳອົງການ ANZ ກ່າວວ່າ ການ
ຫລຸດລົງຂອງນັກທ່ອງທ່ຽວ ອາດເປັນຜົນກະທົບຕໍ່ການເຕີບໂຕ ທາງດ້ານເສດຖະກິດຂອງ
ຮົງກົງ ທີ່ໄດ້ຮັບເງິນເປັນຈຳນວນຫຼວງຫຼາຍ ຈາກ ນັກທ່ອງທ່ຽວ ທີ່ເດີນທາງມາຈາກຈີນ
ແຜ່ນດິນໃຫຍ່.
ທ່ານ Yeung ກ່າວວ່າ “ຂ້າພະເຈົ້າຄິດວ່າ ການໃຊ້ຈ່າຍ
ເງິນຂອງບັນດານັກທ່ອງທ່ຽວຈາກຈີນແຜ່ນດິນໃຫຍ່ ແມ່ນ
ປະກອບເປັນ ບາງທີ ນຶ່ງສ່ວນສາມຂອງເສດຖະກິດທັງໝົດ
ຂອງຮົງກົງເພາະສະນັ້ນຖ້າຫາກເຂົາເຈົ້າຕັດການໃຊ້ຈ່າຍ
ລົງ ທີ່ອາດຈະເປັນຜົນກະທົບຕໍ່ພາກສ່ວນການຄ້າປີກ
ຫຍ່ອຍ.”
ໜັງສືພິມ Global Time ຂອງທາງການຈີນ ລາຍງານວ່າ ມີຊາວ
ຈີນຈາກ ແຜ່ນດິນໃຫຍ່ຫລາຍກວ່າ 675,000 ໄດ້ຢ້ຽມຢາມຮົງກົງ
ໃນຫ້າມື້ທຳອິດຂອງວັນພັກປີໃໝ່ ເລີ້ມແຕ່ວັນພຸດໄປຫາວັນອາທິດ.
ໂຕເລກດັ່ງກ່າວໄດ້ຫລຸດລົງ 0.16 ເປີເຊັນຈາກປີກາຍນີ້. ໃນວັນ
ອັງຄານອາທິດແລ້ວນີ້ ຫົວໜ້າບໍລິຫານຮົງກົງ ທ່ານ Leung Chun-ying ກ່າວວ່າ ຈຳນວນຂອງຊາວຈີນແຜ່ນດິນໃຫຍ່ ທີ່ໄດ້ຮັບອະນຸຍາດໃຫ້ເດີນທາງໄປຢ້ຽມຢາມຮົງກົງ ໃນນາມພວກນັກທ່ອງທ່ຽວ ນັ້ນ ໄດ້ຫລຸດລົງຫ້າເປີເຊັນ ປຽບທຽບໃສ່ລະຍະດຽວກັນ ຂອງປີກາຍນີ້.
ຈໍານວນນັກທ່ອງທ່ຽວຈີນຈາກແຜ່ນດິນໃຫຍ່ ທີ່ເດີນທາງໄປປະເທດເອເຊຍອື່ນໆ ໄດ້ເພີ້ມຂື້ນຢ່າງຫລວງຫລາຍ. ໂຕເລກນັກທ່ອງທ່ຽວໄປຢ້ຽມຢາມ Macao ໃນ ແຕ່ລະປີ ເພີ້ມຂຶ້ນ 6.7
ເປີເຊັນ ໃນຂະນະທີ່ອົງການຂ່າວ chinanews.com ລາຍງານວ່າ ຈຳນວນນັກທ່ອງທ່ຽວຈີນ
ຈາກແຜ່ນດິນໃຫຍ່ ໄປຢ້ຽມຢາມຍີ່ປຸ່ນ ໃນເດືອນມັງກອນປີນີ້ ໄດ້ເພີ້ມຂື້ນ 45 ເປີເຊັນ ເປັນ
ປະມານ 226,000 ຄົນ ປຽບທຽບໃສ່ປີກາຍນີ້.
ສື່ມວນຊົນຈີນ ໃຫ້ເຫດຜົນກ່ຽວກັບການຫລຸດລົງຂອງນັກທ່ອງທ່ຽວຈາກຈີນແຜ່ນດິນໃຫຍ່
ວ່າ ເປັນຍ້ອນການປະທ້ວງນິຍົມປະຊາທິປະໄຕ ໃນຮົງກົງ. ລະຫວ່າງການປະທ້ວງໃນປີ
ກາຍນີ້ ສື່ມວນຊົນຂອງລັດຖະບານຈີນ ສ່ວນໃຫຍ່ແລ້ວແມ່ນບໍ່ໄດ້ຫົວຊາ ກ່ຽວກັບການ
ຮ້ອງທຸກທາງດ້ານການເມືອງຂອງຊາວຮົງກົງ ແຕ່ກັບລາຍງານວ່າ ການປະທ້ວງສ່ວນໃຫຍ່
ແມ່ນເກີດຈາກຄວາມຢ້ານກົວ ແລະຄວາມກຽດຊັງ ຕໍ່ຊາວຈີນຈາກແຜ່ນດິນໃຫຍ່.
ພວກປະທ້ວງຫລາຍໆຄົນ ໃນເວລານັ້ນ ໄດ້ສະແດງຄວາມບໍ່
ພໍໃຈຂອງເຂົາເຈົ້າ ຕໍ່ລັດຖະບານກາງຂອງຈີນ ຢູ່ນະຄອນຫຼວງ
ປັກກິ່ງ ທີ່ຄວບຄຸມນະໂຍບາຍຮົງກົງ ໂດຍກ່າວວ່າ ເຂົາເຈົ້າບໍ່
ມີບັນຫາຫຍັງກັບຊາວຈີນແຜ່ນດິນໃຫຍ່.
ແຕ່ໃນໄລຍະຫລາຍໆເດືອນຜ່ານມານີ້ ຫລັງຈາກລັດຖະບານ
ໄດ້ທັບມ້າງການ ປະທ້ວງແລ້ວ ພວກປະທ້ວງບາງກຸ່ມ ກໍໄດ້ເລີ້ມ
ແນເປົ້າໝາຍໃສ່ນັກທ່ອງທ່ຽວຈາກ ຈີນແຜ່ນດິນໃຫຍ່ ທີ່ຮ້ານ
ຊັບພະສິນຄ້າຮົງກົງ ໂດຍຮ້ອງໂຮວ່າ “ກັບຄືນເມືອບ້ານ ພວກ
ແມງຈັກຈັ່ນ.”
ພວກໂຮມຊຸມນຸມເດີນຂະບວນກ່າວວ່າ ການປະທ້ວງຂອງເຂົາ
ເຈົ້າ ແມ່ນໄດ້ຮັບ ແຮງກະຕຸ້ນ ສ່ວນນຶ່ງແມ່ນໂດຍບັນດານັກຄ້າຂາຍ ຫລື ຊາວຈີນແຜ່ນດິນໃຫຍ່ ທີ່ເດີນທາງໄປຮົງກົງ ເພື່ອຊື້ສິນຄ້າເປັນຈຳນວນຫລາຍ ແລ້ວນຳໄປຂາຍໃນລາຄາຖືກ ຢູ່ຈີນແຜ່ນດິນໃຫຍ່.
ທ່ານ Yeung ກ່າວວ່າ “ຕາມສັນຍາລັກແລ້ວນີ້ບໍ່ແມ່ນໃນ
ທາງບວກ ແລະອາດ ຈະເປັນການສົ່ງສັນຍານໃນທາງບໍ່
ດີໃຫ້ແກ່ແຜ່ນດິນໃຫຍ່ ທີ່ວ່າປະຊາຊົນຮົງກົງ ບໍ່ຍິນດີຕ້ອນ
ຮັບພວກນັກທ່ອງທ່ຽວຈີນ ມັນອາດຈະເປັນຜົນກະທົບໃນ
ທາງລົບບາງຢ່າງແລະອາດຈະເຮັດໃຫ້ເຂົາເຈົ້າບໍ່ມີຄວາມ
ກະຕືລືລົ້ນ ທີ່ຈະເດີນທາງມາຍັງຮົງກົງ ເປັນທາງເລືອກ
ບ່ອນທຳອິດ.”
ເພື່ອເປັນການສະໜອງຕອບຕໍ່ການຮ້ອງທຸກ ກ່ຽວກັບພວກຊື້
ສິນຄ້າເປັນຈຳນວນ ຫຼວງຫຼາຍຈາກຈີນແຜ່ນດິນໃຫຍ່ນັ້ນ ຫົວ
ໜ້າບໍລິຫານຮົງກົງ ທ່ານ Leung Chun-ying ຫວ່າງມໍ່ໆມາ
ນີ້ກ່າວວ່າ ທ່ານຈະພິຈາລະນາ ເພື່ອຈຳກັດຈຳນວນນັກທ່ອງ
ທ່ຽວຈີນ ທີ່ໄດ້ຮັບອະນຸຍາດໃຫ້ເຂົ້າໄປໃນຮົງກົງ.
ເວັບໄຊທ໌ ສະມາຄົມທ່ອງທ່ຽວແຫ່ງຊາດຂອງຈີນ ລາຍງານວ່າ ໃນລະຫວ່າງວັນພັກບຸນປີໃໝ່ກຸດຈີນ ມີຊາວຈີນ ຫລາຍກວ່າຫ້າລ້ານຄົນ ໄດ້ເດີນທາງໄປປະເທດຕ່າງໆ ນອກເໜືອ
ຈາກຮົງກົງ ແລະມາກາວແລ້ວ.
ຮົງກົງ ສະຫຼອງ ກຸດຈີນ
