ລິ້ງ ສຳຫລັບເຂົ້າຫາ

logo-print

ຟີ​ລິບ​ປີນນໍາໃຊ້ໂທລະສັບມືຖື ເພື່ອ​ເພີ່ມພູນ ຜົນລະປູກເຂົ້າ


ຊາວນາໃນຟິລິບປີນຮັບຂໍ້ມູນຂ່າວສານກ່ຽວກັບການໃສ່ຝຸ່ນປຸຍທາງໂທລະສັບມືຖື

ໂຄງການໃໝ່ອັນນຶ່ງໄດ້ສະເໜີໃຫ້ຄໍາແນະນໍາ ແກ່ຊາວນາຂອງຟີລິບປິນ ກ່ຽວກັບ ວິທີການ ເອົາປຸຍໃສ່ນາ ໂດຍຜ່ານໂທລະສັບມືຖືຂອງພວກເຂົາເຈົ້າ. Simone Orendain ຜູ້ສື່ຂ່າວ ວີໂອເອ ທີ່ນະຄອນຫລວງມະນີລາ ມີລາຍງານ ກ່ຽວກັບໂຄງການດັ່ງກ່າວ ທີ່ລິເລີ້ມຂຶ້ນ ໂດຍສະຖາບັນຄົ້ນຄວ້າເຂົ້າສາກົນ ຫລື International Rice Research Institute ຊຶ່ງວັນນະ ສອນຈະນໍາເອົາລາຍລະອຽດ ມາສະເໜີທ່ານໃນອັນດັບຕໍ່ໄປ.

ພວກ​ນັກວິທະຍາສາດ ທີ່ສະ​ຖາ​ບັນ​ຄົ້ນຄວ້າເຂົ້າສາກົນ ຫລື IRRI ທີ່​ນະຄອນຫລວງ
ມາ​ນີລາ ​ໄດ້​ໃຊ້​ເວລາ 18 ປີ ທໍາ​ການ​ປັບ​ປຸງລະບົບນຶ່ງ​ທາງ​ຄອມ​ພີ​ວ​ເຕີ ເພື່ອ​ຈະ​ໃຫ້ຄຳ
ແນະນຳ​ແກ່​ຊາວນາກ່ຽວກັບ​ວ່າ ພວກ​ເຂົາ​ເຈົ້າຄວນຈະ​ໃສ່ຝຸ່ນປຸຍໃນ​ປະລິມານຫລາຍ
ປານ​ໃດ ເພື່ອ​ຈະໃຫ້​ໄດ້ຜົນເກັບກ່ຽວ​ເຂົ້າຫລາຍ​ທີ່​ສຸດນັ້ນ.

ປີ​ກາຍ​ນີ້, ພວກ​ເຂົາ​ເຈົ້າ​ໄດ້​ແນວຄິດ​ໃໝ່​ ໃນ​ການນຳ​ໃຊ້ເທັກ​ໂນ​ໂລ​ຈີ​ອັນ​ນຶ່ງ ທີ່​ເຂົາ​ເຈົ້າ
ເຊື່ອ​ວ່າ​ ເປັນ​ອັນທໍາ​ອິດໃນ​ໂລກ ຄືທ່ານ Roland Buresh ນັກວິທະຍາສາດ​ອາວຸ​ໂສ
ຂອງ IRRI​ ໄດ້​ປະດິດ​ສ້າງວິ​ທີ​ການ​ອັນ​ນຶ່ງ​ຂຶ້ນມາທີ່​ສົ່ງຄໍາແນະນໍາໃນ​ການເອົາ​ປຸຍ​ໃສ່​ນາ
ໄປ​ໃຫ້​ພວກ​ຊາວນາຟີ​ລິບປີນທີ່ຢູ່​ຫ່າງ​ໄກ​ສອກຫລີກໂດຍ​ການຂຽນ​ຂໍ້ຄວາມ SMS ສົ່ງ​
ໄປທາງ​ໂທລະສັບມື​ຖື ຊຶ່ງເທັກໂນ​ໂລ​ຈີທີ່​ວ່ານີ້ແມ່ນແທດເໝາະຫລາຍກັບປະເທດ​ນຶ່ງ ທີ່​
ມີ​ປະຊາຊົນ​ເກືອບຮອດ 100% ມີ​ໂທລະສັບມື​ຖື.

ທ່ານ Buresh ​ເວົ້າວ່າ ທົ່ງ​ນາ​ແຕ່​ລະ​ບ່ອນ​ແມ່ນ​ບໍ່ຄື​ກັນ ສະນັ້ນມັນ​ຈຶ່ງເປັນ​ການ​ຍາກ​ທີ່
ພວກ​ຊາວນາ​ຈະ​ສາມາດປະ​ເມີນຫລື​ກະ​ໄດ້​ວ່າ ຄວນ​ຈະ​ໃສ່​ປຸຍ​ຫລາຍ​ປານໃດ ຊຶ່ງທ່ານ
ຊີ້​ແຈງ​ເຖິງ​ສາ​ເຫດດັ່ງນີ້:

"ມັນອາດຈະເປັນວິທີການທີ່ແຕກຕ່າງໄປ ໃນການຄຸ້ມຄອງສິ່ງເສດເຫຼືອຈາກ
ຜົນລະປູກ. ມັນອາດສາມາດມີພວກອາຫານບໍາລຸງພືດທີ່ໃຊ້ຄືນໄດ້ເພື່ອຫຼໍ່ລ້ຽງ
ພວກພືດພັນທີ່ເຮົາຈະປູກຕໍ່ໄປ. ມັນອາດຈະເປັນວິທີການສັບປ່ຽນໝຸນວຽນ
ຜົນລະປູກທີ່ແຕກຕ່າງກັນຫຼືບໍ່ ກໍອາດຈະເປັນຄວາມແຕກຕ່າງໃນຜົນລະປູກ.
ປັດໄຈຕ່າງໆເຫລົ່ານີ້ ແຕ່ລະອັນສົ່ງຜົນກະທົບຕໍ່ປະລິມານອາຫານບໍາລຸງພືດ
ທີ່ເຮົາຈະໃຊ້ນັ້ນ.
"

ການດໍານາໃນ ຟິລິບປິນ
ການດໍານາໃນ ຟິລິບປິນ
ນັບ​ແຕ່​ວັນ​ຈັນ​ທີ່ຜ່ານມານີ້ເປັນຕົ້ນໄປ ພວກຊາວນາຈະ
ສາມາດໂທລະສັບໄປ​ຍັງນໍ​າເບີບໍລິການຟຣີ (Toll Free)
ຈາກໂທລະສັບມືຖືຂອງເຂົາເຈົ້ານັ້ນໄດ້ແລະຕອບຄໍາຖາມ
ຊຸດນຶ່ງ ກ່ຽວກັບທົ່ງ​ນາຂອງເຂົາເຈົ້າ. ແລ້ວ​ເຂົາ​ເຈົ້າ​ກໍ​ຈະ
ໄດ້​ຮັບຂໍ້ມູນແລະເຄັດລັບຕ່າງໆກ່ຽວ​ກັບ​ວິທີນໍາໃຊ້ປຸຍ
ທີ່​ໄດ້ຜົນດີທີ່ສຸດ. ລະບົບທີ່​ວ່ານີ້ທັງໝົດແມ່ນ​ເປັນ​ລະ​ບົບ
ອັດຕະ​ໂນ​ມັດ​ທີ່​ບັນທຶກສຽງ​ໄວ້​ໃນ​ຄອມ​ພິວ​ເຕີ້ແລະກະຈາຍ
ຂໍ້ມູນໃນ 4 ພາສາທີ່ໃຊ້ກັນໃນຟິລິບປີນນັ້ນ ຊຶ່ງຮວມທັງ
ພາສາອັງກິດນໍາ. ນີ້​ຄື​ໂຕ​ຢ່າງ​ນຶ່ງ​ຂອງ​ສຽງ​ບັນທຶກທີ່​ພວກ
ຊາວນາ​ຈະ​ໄດ້​ຍິນ ​ເວລາ​ເຂົາ​ເຈົ້າ​ໂທລະສັບ​ເຂົ້າ​ໄປ.

ສຽງ​ບັນທຶກ​ນີ້ເວົ້າວ່າ: “ທ່ານຈະໄດ້ຮັບຂໍ້ມູນທາງ SMS ທີ່ສົ່ງ​ໄປ​ທາງ ໂທລະສັບ
ມື​ຖື​ຂອງ​ທ່ານ ທີ່​ຈະ​ບອກວ່າ ທ່ານ​ຄວນຈະໃຊ້ປຸຍໜ້ອຍຫຼາຍປານໃດໃສ່​ໄຮ່​ນາ
ຂອງທ່ານນັ້ນ ຈຶ່ງ​ຈະ​ໄດ້ຜົນ​ເກັບ​ກ່ຽວ​ຫລາຍ​ທີ່​ສຸດຕໍ່​ປະລິມານ​ປຸຍ​ທີ່​ໃຊ້​ນັ້ນ. ​
ເວລາ​ໃດທີ່ທ່ານຢາກຈະຟັງລື້ມຄືນ ກໍໃຫ້ກົດເຄື່ອງໝາຍດອກ​ຈັນ ຂ້າງ​ລຸ່ມ
ດ້ານຊ້າຍຂອງ​ແຜງໂທລະສັບ.”

ແລະເມື່ອ​ເຂົາ​ເຈົ້າ​ຕອບ​ຄໍາ​ຖາມ​ໃນການສໍາລວດຈົບລົງແລ້ວ ພວກຊາວນາກໍຈະໄດ້ຮັບຂໍ້
ຄວາມ SMS ທີ່​ບອກວ່າ ​ເຂົາ​ເຈົ້າ​ຄວນ​ຈະ​ໃຊ້​ປຸຍ​ໃນ​ປະລິມານ​ທໍ່ໃດ. ແລະຖ້າພວກເຂົາ
ເຈົ້າຕ້ອງການ​ຄວາມ​ຊ່ວຍ​ເຫລືອ​ຕື່ມ​ອີກ ​ເຂົາ​ເຈົ້າກໍສາມາດໂທ​ໄປ​ຍັງເບີໂທລະສັບຟຣີ
ອີກເບີນຶ່ງ ​ເພື່ອໂອ້ລົມກັບຜູ້ຊ່ຽວຊານຂອງກະຊວງກະສິກໍານັ້ນໄດ້.

ທ່ານ Buresh ກ່າວວ່າ ຖ້າ​ຫາກ​ມີ​ການ​ນໍາໃຊ້​ເທັກ​ໂນ​ໂລ​ຈີ​ທີ່​ວ່າ​ນີ້ ຢ່າງ​ຖືກຕ້ອງ​ແລ້ວ
ພວກກະສິກອນກໍ​ອາດສາມາດມີ​ລາຍໄດ້ຕື່ມ​ອີກ 100 ໂດລາ ຈາກ​ຜົນ​ເກັບ​ກ່ຽວເຂົ້າຂອງ
ເຂົາ​ເຈົ້າ ຕໍ່ນຶ່ງເຮັກຕາ. ໃນປະ​ເທດ​ຟີ​ລິບ​ປີນ ກໍ​ຄື​ໃນແຫ່ງອື່ນໆ​ໃນເອເຊຍນັ້ນ ພວກຊາວ
ນາຈໍານວນຫຼາຍນັ້ນແມ່ນປູກເຂົ້ານ້ອຍກ່ວາ 1 ເຮັກຕາ.

ເວລາ​ນີ້ ພວກນັກວິທະຍາສາດຂອງສະ​ຖາ​ບັນ IRRI ແມ່ນກໍາລັງທໍາງານກັບ​ເພື່ອນຮ່ວມ
ງານຊາວອິນໂດເນເຊຍ ເພື່ອປັບລະບົບ​ໃຫ້​ຄໍາ​ແນະນໍາດັ່ງກ່າວ ໃຫ້ເຂົ້າກັບທີ່ນັ້ນ ແລະ​ ພວກເຂົາເຈົ້າມີແຜນການຈະເອົາເທັກ​ໂນ​ໂລ​ຈີ​ອັນນີ້ ​ໄປ​ແຜ່ຜາຍ​ທີ່ ຫວຽດນາມ ອິນເດຍ
ແລະ ບັງກລາແດສ ໃນ​ໄລຍະຫຼາຍປີຂ້າງໜ້ານີ້.

ຟິລິບປີນເປັນປະເທດທີ່ສັ່ງ​ຊື້ເຂົ້າຈາກ​ຕ່າງປະ​ເທດຫລາຍທີ່ສຸດ​ໃນ​ໂລກ ແຕ່​ເວລາ​ນີ້ ທາງ
ກະຊວງກະສິກໍາຂອງ​ຟີ​ລິບ​ປີນກໍ​ກໍາລັງພະຍາຍາມຊຸກຍູ້ໃຫ້ມີການ​ເພີ່ມ​ທະວີການ​ຜະລິດ
ເຂົ້າຢູ່ພາຍໃນປະເທດ​ໃຫ້​ຫລາຍ​ຂຶ້ນ ໂດຍສະເພາະຫຼັງຈາກທີ່ລາຄາເຂົ້າ​ໃນ​ຕະຫລາດ​ໂລກ
ໄດ້ຖີບຕົວສູງຂຶ້ນຢ່າງ​ຫລວງຫລາຍ ​ໃນ​ປີ 2008 ນັ້ນ.

ລາຍງານບລອກສົດ! ຜົນການເລືອກຕັ້ງ ປະທານາທິບໍດີ ສະຫະລັດ 2020

ລາຍງານບລອກສົດ! ການເລືອກຕັ້ງ ໃນ ສະຫະລັດ ປີ 2020

ອະດີດຮອງປະທານາທິບໍດີິສະຫະລັດ ທ່ານໂຈ ໄບເດັນ ຊຶ່ງເປັນບຸກຄົນທີ່ຮູ້ຈັກກັນດີໃນວົງການເມືອງຂອງນະຄອນ ຫຼວງວໍຊິງຕັນ ເກືອບເຄິ່ງສັດຕະວັດແລ້ວນັ້ນ ຄາດຄະເນກັນວ່າ ຈະເປັນຜູ້ຊະນະການເລືອກຕັ້ງປະທານາທິບໍດີຂອງສະຫະລັດ ແລະຈະໄດ້ສາບານຕົວເຂົ້າຮັບຕຳແໜ່ງໃນວັນທີ 20 ມັງກອນຈະມາ ເປັນປະທານາທິບໍດີທີ່ມີອາຍຸແກ່ທີ່ສຸດ ໃນປະຫວັດສາດ. ທ່ານໄບເດັນ ສັງກັດພັກເດໂມແຄຣັດ ທີ່ໄດ້ເປັນສະມາຊິກສະພາສູງມາ 36 ປີ ແລະ 8 ປີ ເປັນຮອງປະທານາທິບໍດີ ໃນສະໄໝປະທານາທິບໍດີບາຣັກໂອບາມາ ແມ່ນຄາດກັນໂດຍອົງການຂ່າວຕ່າງໆ ໄດ້ເອົາຊະນະປະທານາທິບໍດີດໍໂນລ ທຣຳ ທີ່ລົງສະໝັກແຂ່ງຂັນເອົາຕຳແໜ່ງຕື່ມອີກ ໃນການໂຄສະນາຫາສຽງທີ່ຂົມຂື່ນ ແລະຫຼັງຈາກໄດ້ມີການນັບບັດຄະແນນສຽງຫຼັງຈາກການເລືອກຕັ້ງມາໄດ້ຫຼາຍມື້ແລ້ວ. ຄະແນນສຽງແມ່ນຍັງຈະໄດ້ຮັບການຢືນຢັນຢ່າງເປັນທາງການ ແລະພວມໄດ້ຮັບການທ້າທາຍຢູ່ໃນສານ ແຕ່ກໍຄາດກັນວ່າ ຈະຜ່ານຜ່າໄປໄດ້. ທ່ານໄບເດັນ ໄດ້ຊະນະຕຳແໜ່ງປະທານາທິບໍດີ ໂດຍໄດ້ຮັບຄະແນນຈາກຜູ້ແທນລັດ ຢ່າງໜ້ອຍ 270 ຄະແນນ ຂອງຈຳນວນທັງໝົດ 538 ຄະແນນ. ການໄດ້ຮັບໄຊຊະຂອງທ່ານໄບເດັນ ເຮັດໃຫ້ທ່ານທຣຳເປັນປະທານາທິບໍດີຄົນທີ 3 ໃນຮອບສີ່ທົດສະວັດ ທີ່ບໍ່ສາມາດໄດ້ຮັບເລືອກ ໃຫ້ເຂົ້າຮັບຕຳແໜ່ງຕື່ມອີກ ຫຼັງຈາກໄດ້ຂຶ້ນເປັນປະທານາທິບໍດີ 4 ປີແລ້ວ.

00:30 8.11.2020

ລາຍງານຂ່າວຫຼ້າສຸດ ໃນເຊົ້າວັນເສົາມື້ນີ້ແຈ້ງວ່າ ທ່ານໂຈ ໄບເດັນ ແລະທ່ານນາງຄາມາມາ ແຮຣິສ ຜູ້ສະໝັກເປັນປະທານາທິບໍດີ ຈາກພັກເດໂມແຄຣັດ ໄດ້ຮັບຄະແນນ 273 ຄະແນນສຽງຂອງຜູ້ຕາງໜ້າລັດແລ້ວ ເຊີນເບິ່ງແຜນທີ່ການເລືອກຕັ້ງໃນສະຫະລັດຂອງເຮົາຕື່ມ!

23:51 7.11.2020

ມາຮອດເຊົ້າວັນເສົາມື້ນີ້ ຕາມເວລາໃນພາກຕາເວັນອອກຂອງສະຫະລັດ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍງານໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214 ຄະແນນ. ທ່ານໄບເດັນຕອ້ງການອີກພຽງ 17 ຄະແນນ ຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາ ແມ່ນຕ້ອງການອີກ 56 ຄະແນນຈຶ່ງຈະຮອດ 270 ຄະແນນເພື່ອຈະເຂົ້າກຳຕຳແໜ່ງຕື່ມອີກ 4 ປີ. ເວລານີ້ຫຼາຍລັດຍັງສືບຕໍ່ນັບຄະແນນກັນຢູ່ ແລະລັດຈໍເຈຍ ໄດ້ປະກາດໃນວັນສຸກມື້ວານນີ້ວ່າ ຕົນຈະນັບຄະແນນ ຄືນໃໝ່ທັງໝົດ ຍ້ອນວ່າ ປະທານາທິບໍດີດໍໂນລ ທຣຳ ຜູ້ສະໝັກຂອງພັກຣີພັບບລີກັນ ແລະຜູ້ທ້າຊິງ ຫຼືຄູ່ແຂ່ງຈາກພັກເດໂມແຄຣັດ ທ່ານໂຈ ໄບເດັນ ມີຄະແນນໃກ້ຄຽງກັນຫຼາຍ.

18:52 7.11.2020

ໃນຕອນຄ່ຳຂອງວັນພະຫັດວານນີ້ ປະທານາທິບໍດີດໍໂນລ ທຣຳ ໄດ້ກ່າວອ້າງ ໂດຍບໍ່ມີຫຼັກຖານວ່າ ທ່ານໄດ້ຖືກສໍ້ໂກງ ໃຫ້ອອກຈາກຕໍາແໜ່ງ ໃນສະໄໝທີສອງ. ທ່ານກ່າວວ່າ “ຖ້າທ່ານນັບບັດຄະແນນສຽງທີ່ປ່ອນແບບຖືກຕ້ອງຕາມກົດໝາຍ, ຂ້າພະເຈົ້າຈະໄດ້ຊະນະຢ່າງງ່າຍໆ.” ທ່ານກ່າວຕໍ່ໄປອີກວ່າ "ຖ້າທ່ານນັບບັດຄະແນນສຽງທີ່ຜິດກົດໝາຍ, ພວກເຂົາສາມາດພະຍາຍາມລັກເອົາການເລືອກຕັ້ງໄປ ຈາກພວກເຮົາໄດ້." ທ່ານທຣໍາ ໄດ້ໃຊ້ເວລາ 16 ນາທີ ຢືນກ່າວຄໍາປາໄສ ຢູ່ຫ້ອງປະຊຸມຖະແຫລງຂ່າວ ໃນທຳນຽບຂາວ ໂດຍກ່າວວ່າ ຄະແນນນຳໜ້າຂອງທ່ານທີ່ມີຢູ່ໃນລັດຕ່າງໆກຳລັງຖືກ "ລັກເອົາອອກໄປຢ່າງລັບໆ ເທື່ອລະເລັກລະນ້ອຍ" ໃນຂະນະທີ່ມີການນັບຄະແນນສຽງຍັງສືບຕໍ່ດໍາເນີນໄປຢູ່ນັ້ນ. ມາຮອດວັນສຸກ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາແໜ່ງໄວ້ ໃນອີກ 4 ປີຕໍ່ໜ້າ.

19:29 6.11.2020

ໃນຕອນບ່າຍວັນພະຫັດມື້ນີ້ ຕາມເວລາໃນເຂດພາກຕາເວັນອອກຂອງສະຫະລັດ ທ່ານໂຈ ໄບເດັນ ໄດ້ປາກົດຕົວເປັນເວລາສັ້ນໆ ທີ່ນະຄອນວິລມິງຕັນ ໃນລັດເດລາແວ ໂດຍກ່າວວ່າ "ບັດທຸກໆບັດຈະຕ້ອງໄດ້ຖືກນັບ." ທ່ານກ່າວຕື່ມວ່າ "ມັນແມ່ນກ່ຽວກັບວ່າ ປະຊາຊົນໃນປະເທດນີ້ ໄດ້ສະແດງອອກເຖິງການຕັດສິນໃຈຂອງພວກເຂົາເຈົ້າແບບໃດ ແລະມັນເປັນຄວາມປະສົງຂອງຜູ້ມີສິດປ່ອນບັດ ບໍ່ມີໃຜ ແລະບໍ່ມີສິ່ງໃດທັງໝົດ ທີ່ໄດ້ເລືອກເອົາປະທານາທິບໍດີຂອງສະຫະລັດ."

06:13 6.11.2020

ໃນເວລາ 12 ໂມງເຄິ່ງຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທ່ານໂຈ ໄບເດັນ ຄູ່ແຂ່ງຈາກພັກເດໂມແຄຣັດ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ແຕ່ທ່ານປະທານາທິບໍດີ ດໍໂນລ ທຣຳ ໄດ້ຮັບຕື່ມອີກນຶ່ງຄະແນນ ເພີ້ມຂຶ້ນເປັນ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນຊຶ່ງຄາດໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້. ລາຍງານຂ່າວແຈ້ງວ່າ ມາຮອດວັນພະຫັດມື້ນີ້ ທ່ານໄບເດັນແມ່ນນຳໜ້າ ໃນຄະແນນສຽງຂອງປະຊາຊົນ ຄືໄດ້ 71 ລ້ານ 6 ແສນຄົນ ປຽບທຽບໃສ່ທ່ານທຣຳ ທີ່ໄດ້ຮັບ​ແຕ່ 68​ ລ້ານ 1 ແສນຄົນ ອີງຕາມອົງການຄົ້ນຄວ້າເອດີສັນແລະອົງການຂ່າວເອພີ.

00:38 6.11.2020

ມາຮອດ 7:00 ຕອນເຊົ້າຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທັງທ່ານໂຈ ໄບເດັນ ແລະປະທານາທິບໍດີດໍໂນລ ທຣຳ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້ ແຕ່ພວກທ່ານກໍສາມາດຕິດຕາມເບິ່ງໜ້າເວັບໄຊຂອງພວກເຮົາ ກ່ຽວກັບຄະແນນຫລ້າສຸດ.

19:20 5.11.2020

ມາຮອດ 9:00 ຕອນຄໍ່າຂອງວັນພຸດ, ທີ 4 ພະຈິກ ທ່ານໂຈ ໄບເດັນໄດ້ຄະແນນຈາກຜູ້ແທນລັດຕື່ມອີກສອງລັດ ຄືມິຊິແກນ ແລະວິສຄັນຊິນ ຈຶ່ງເຮັດໃຫ້ທ່ານນໍາໜ້າ ທ່ານທຣໍາ ໂດຍມີ 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້!

ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ
ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ

08:42 5.11.2020
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ

ມາເຖິງປັດຈຸບັນນີ້ ຄະແນນຈາກຜູ້ແທນ ຂອງທ່ານດໍໂນລ ທຣຳ ແລະທ່ານໂຈ ໄບເດັນ ສູສີກັນ 213 ຕໍ່ 220 ໃນຂະນະນີ້ ຍັງເຫຼືອອີກຢູ່ 9 ລັດທີ່ຍັງບໍ່ທັນສຳເລັດການນັບຄະແນນສຽງເທື່ອ ປະກອບດ້ວຍລັດ ເມນ ເພັນຊີລເວເນຍ ຄາໂຣໄລນາເໜືອ ຈໍເຈຍ ມິຊິແກນ ວິສຄັນຊິນ ເນວາດາ ອາຣິໂຊນາ ແລະອາລາສກາ ຄາດກັນວ່າ ຜົນການນັບບັດເລືອກຕັ້ງ ທີ່ສົ່ງເຂົ້າໄປທາງໄປສະນີ ຈະເລີ້ມຂຶ້ນໃນຕອນເຊົ້າ ວັນທີ 4 ພະຈິກນີ້ ຢູ່ໃນສະຫະລັດ ແລະຈະໃຊ້ເວລາຫຼາຍສົມຄວນ ບໍ່ຮູ້ວ່າ ຈະແລ້ວເສັດໃນມື້ນີ້ຫຼືບໍ່!

16:01 4.11.2020

ລາຍງານກ່ຽວກັບການນັບຄະແນນສຽງໃນເບື້ອງຕົ້ນຈາກລັດຕ່າງໆທາງພາກຕາເວັນອອກ ທີ່ໄດ້ປິດໜ່ວຍເລືອກຕັ້ງ

ມື້ນີ້ ປະທານາທິບໍດີ ດໍໂນລ ທຣໍາທີ່ສັງກັດພັກຣີພັບບລິກັນ ແລະຄູ່ແຂ່ງຂອງ ທ່ານກໍຄື ອະດີດຮອງປະທານາທິບໍດີ ໂຈ ໄບເດັນໄດ້ຮັບໄຊຊະນະໃນຫລາຍລັດ ແລ້ວ ຂະນະທີ່ຜົນຂອງການເລືອກຕັ້ງກໍາລັງອອກມາເລື້ອຍໆຢູ່ ແລະຊາວອາເມຣິ ກັນຕັດສິນໃຈວ່າໃຜຈະບໍລິຫານປະເທດຈາກທໍານຽບຂາວໃນນຶ່ງສະໄໝກໍຄື 4 ປີຕໍ່ໜ້າ ຊຶ່ງເລີ້ມຈາກເດືອນມັງກອນຈະມາເຖິງນີ້.

ໜ່ວຍເລືອກຕັ້ງຂອງບັນດາລັດຢູ່ໃນເຂດແຄມຝັ່ງທະເລທາງຕາເວັນອອກ ແລະ ຫລາຍໆລັດໃນເຂດພາກໃຕ້ ແລະພາກຕາເວັນຕົກຕອນກາງ ຂອງປະເທດ ໄດ້ປິດລົງ ແລະກໍໄດ້ເລີ້ມນັບຄະແນນສຽງແລ້ວ. ສ່ວນບັນດາລັດໃນພາກຕາເວັນ ຕົກຂອງປະເທດກໍກໍາລັງປິດໜ່ວຍປ່ອນບັດລົງ ແລະກໍຈະເລີ້ມນັບບັດເລືອກຕັ້ງ ໃນໄວໆນີ້.

ໃນຊົ່ວໂມງທີ່ຈະມາເຖິງນີ້ ຄວນເອົາໃຈໃສ່ຕິດຕາມການນັບຄະແນນສຽງໃນລັດທີ່ຕັ້ງແຄມມະຫາສະໝຸດແອດແລນຕິກ ຄືລັດຟລໍຣິດາ ແລະ ຄາໂລໄຣນາເໜືອ- ເຊິ່ງທັງສອງລັດນີ້ໄດ້ຊ່ວຍໃຫ້ທ່ານທຣໍາ ໄດ້ຮັບໄຊຊະນະໃນປີ 2016 ແລະບ່ອນທີ່ການຢັ່ງຫາງສຽງທ້າຍປີນີ້ສະແດງໃຫ້ເຫັນວ່າທ່ານທຣໍາ ແລະທ່ານໄບເດັນມີ ຄະແນນສູສີກັນ. ລັດເພັນໂຊວາເນຍ ທີ່ເປັນລັດຍາດແຍ່ງກັນ ກໍ່ແມ່ນຈຸດສຸມຂອງຄວາມສົນໃຈອີກແຫ່ງນຶ່ງ ແຕ່ອາດຈະບໍ່ລາຍງານຜົນເລືອກຕັ້ງທີ່ສົມບູນເປັນເວລາຫຼາຍມື້. ນັກວິເຄາະກ່າວວ່າທັງສາມລັດແມ່ນມີຄວາມຈຳເປັນ ສຳລັບທ່ານທຣໍາ ຖ້າເພິ່ນຕ້ອງການດຳລົງຕຳແໜ່ງ ເປັນສະໄໝທີສອງແລະຫລີກລ້ຽງການເປັນປະທານາທິບໍດີສະຫະລັດ ຄົນທີສາມໃນສີ່ທົດສະວັດທີ່ຜ່ານມາທີ່ຈະເສຍໄຊຢູ່ໃນການເລືອກຕັ້ງຄືນ.

ສຳລັບທ່ານໄບເດັນແລ້ວ ການໄດ້ໄຊຊະນະໃນລັດໃດກໍ່ຕາມໃນ 3 ລັດນັ້ນແມ່ນຈະເພີ່ມໂອກາດໃຫ້ທ່ານໄດ້ຮັບຕຳແໜ່ງປະທານາທິບໍດີໃນການພະຍາຍາມຄັ້ງທີສາມຂອງທ່ານ. ທ່ານໄດ້ສູນເສຍການແຂ່ງຂັນເປັນຜູ້ຕາງໜ້າພັກເດໂມແຄຣັດ ເພື່ອເຂົ້າຮ່ວມການເລືອກຕັ້ງປະທານາທິບໍດີ ໃນປີ 1988 ແລະ 2008 ມາແລ້ວ.

ໃນການເລືອກເອົາຜູ້ນໍາປະເທດນັ້ນສະຫະລັດແມ່ນໃຊ້ລະບົບປະຊາທິປະໄຕແບບທາງອ້ອມ ຊຶ່ງບໍ່ໄດ້ເອົາຕາມຄະແນນນິຍົມຂອງປະຊາຊົນທັງຊາດ. ຜົນຂອງການເລືອກຕັ້ງແມ່ນຖືກຕັດສິນໂດຍການເລືອກຕັ້ງຢູ່ໃນແຕ່ລະລັດໃນທົ່ວປະເທດ ທີ່ມີ 50 ລັດ ແລະນະຄອນຫລວງວໍຊິງຕັນ. ເພື່ອຈະໃຫ້ໄດ້ໄຊຊະນະ ໃນການເລືອກຕັ້ງ, ຜູ້ສະໝັກປະທານາທິບໍດີຕ້ອງໄດ້ຮັບ 270 ຄະແນນສຽງ ຈາກຜູ້ແທນໃນລັດ ທີ່ມີສະມາຊິກທັງໝົດ 538 ຄົນ ກໍຄື 538 ສຽງນັ້ນ.

ການເລືອກຕັ້ງປະທານາທິບໍດີສະຫະລັດຈັດຂຶ້ນໃນທຸກໆ 4 ປີໃນວັນອັງຄານທໍາອິດຂອງເດືອນພະຈິກ ຊຶ່ງປີນີ້ກໍກົງກັບວັນທີ 3 ກໍຄືມື້ນີ້ເອງ. ຕາມປົກກະຕິແລ້ວປະຊາຊົນອາເມຣິກັນພາກັນໄປປ່ອນບັດດ້ວຍຕົວເອງຢູ່ສະຖານທີ່ບ່ອນບັດຕ່າງໆ. ແຕ່ວ່າໃນປີນີ້ຍ້ອນການລະບາດຂອງໄວຣຣັສໂຄໂຣນາຫລາຍໆ ລັດແມ່ນຈັດໃຫ້ມີການປ່ອນບັດກ່ອນການເລືອກຕັ້ງ ຊຶ່ງຜູ້ມີສິດປ່ອນບັດ ເລືອກຕັ້ງ ສາມາດສົ່ງບັດລົງຄະແນນສຽງຂອງຕົນໄປທາງໄປສະນີ ຫລືໄປປ່ອນບັດດ້ວຍ ຕົວເອງກ່ອນວັນເລືອກຕັ້ງຕາມສະຖານທີ່ທີ່ຈັດໄວ້ໃຫ້ໃນເມືອງ ແລະເຂດເລືອກ ຕັ້ງຕ່າງໆ ອີງຕາມກົດລະບຽບຂອງແຕ່ລະລັດ.

10:47 4.11.2020
ມີລາຍງານ ຕື່ມອີກ
XS
SM
MD
LG