ລິ້ງ ສຳຫລັບເຂົ້າຫາ

ຫ້ອງຮຽນລໍ້ຍູ້ ຊ່ວຍຖົມຊ່ອງຫວ່າງ ດ້ານການສຶກສາ ໃນຟີລິບປິນ

  • ທອງປານ ເທບວົງສາ

ຫ້ອງຮຽນເຄຶ່ອນທີ່ລໍ້ຍູ້ ຫຼື Kariton ເພື່ອຄົນຈົນ ໃນຟິລິບປິນ

​ໃນ​ປະ​ເທດ​ຟິລິບ​ປິນ ​ໂຮງຮຽນ​ເລີ່​ມ​ເປີດ​ຮຽນ​ປະ​ຈໍາປີ ​​ໃນ​ເດືອນ​ມີຖຸນາ ​ແລະກໍມີພວກນັກຮຽນ ຈໍານວນ​ນຶ່ງ ​ທີ່​​ໄດ້​ອອກ​​ໂຮງ​ຮຽນ​​ໄປ​ແລ້ວໃນ​ເຂດນະຄອນຫຼວງ​ມະນິລາ ຍ້ອນ​ຄວາມທຸກ​ຍາກ​ນັ້ນ ຫວັງວ່າ​ຈະ​ສາມາດກັບຄືນ​ເຂົ້າ​ໄປ​ຮຽນ​ຕາມ​ປົກກະຕິ​ໄດ້ອີກ. ປັດຈຸບັນ​ນີ້ ມີ​ການຈັດ​ຕັ້ງ​ປະຕິບັດໂຄງການ​ທົດ​ລອງ​ໂຄງການ​ນຶ່ງ​ຂອງ​ລະບົບ​ການ​ສຶກສາ​ແຫ່ງ​ຊາດ​ ​ເພື່ອ​ຊ່ວຍ​ສອນ ພວກນັກຮຽນ​ດັ່ງກ່າວ​ນີ້​​ໃຫ້​ສາມາດ​ຮຽນ​ທັນ​ໝູ່ ຢູ່​ອັນ​ທີ່​ເອິ້ນ​ວ່າ ​ຫ້ອງ​ຮຽນລໍ້​ຍູ້​ ຫຼື​ຫ້ອງ​ຮຽນ​ເຄື່ອນທີ່. ຫ້ອງ​ຮຽນ​​​ເຄື່ອນທີ່ເຫຼົ່າ​ນີ້ຈະ​ເຄື່ອນຍ້າຍໄປ​ປັກ​ຫຼັກ​ຢູ່​ຕາມ​ແຈ​ຖະໜົນ​ ໃນ​ຄຸ້ມ​ຢູ່​ອາ​​​ໃສ​ທີ່​ທຸກ​ຈົນ​ທີ່​ສຸດ​ 6 ຄຸ້ມ ຂອງ​ເຂດ​ນະຄອນຫລວງ​ມະນີ​ລາ ພ້ອມ​ດ້ວຍ​ປື້​ມອ່ານ ​ອຸບປະກອນ​ການ​ຮຽນ ອາຫານ ​ແລະ​ບັນດາ​ຄູ​ອາສາສະໝັກ. ຜູ້​ສື່​ຂ່າວ​ວີ​ໂອ​ເອ ຊາຍ​ມອນ ອໍ​ເຣິ່ນ​ເດນ ​ໄດ້​ໄປ​ຢ້ຽມຢາມ​ຫ້ອງ​ຮຽນ​ເຄື່ອນທີ່ດັ່ງກ່າວ​ ແລະສົ່ງ​ລາຍ​ງານ​ມາ ຊຶ່ງ​ທອງ​ປານ ມີ​ລາຍ​ລະອຽດ​ມາສະ​ເໜີທ່ານ ຂ້າງລຸ່ມ​.

ຢູ່​ແຈ​ຖະໜົນສາຍນຶ່ງ​ ໃນ​ຄຸ້ມ Novaliches ກໍ້າ​ເໜືອ​ຂອງ​ມະນິລາ ພວກ​ເດັກນ້ອຍ​ຫຼາຍ​ສິບ​ຄົນ​ກໍາລັງ​ຫຍຸ້ງ​ກັບ​ການ​ຮຽນ ຢູ່​ກ້ອງ​ຜ້າ​ເຕັ້ນ​ກັນ​ແດດ ຮ້ອນ. ​ເດັກ​ເຫຼົ່ານີ້​ ທີ່ມີ​ອາຍຸຫ້າ ຫາ ​18 ປີ ພາກັນ ອ່ານ ຂຽນ ແຕ້ມ ແລະ​ຄິດ​ໄລ່​ເລກ ​ແລະນັ່ງຮຽນ​ຢູ່​ຕັ່ງ​ພລາສຕິກ ​ອ້ອມໂຕ໊​ະທີ່ ​ຢືມ​ມາ​ຈາກ​ຫ້ອງການເທດ​ສະບາ​ນ​ເມືອງ​ທ້ອງຖິ່ນ.

ມີລໍ້ໄມ້​ທາສີ​ຂຽວລໍ້​ນຶ່ງ ​ຈອດ​ຢູ່ໃກ້​ທາງ​ເຂົ້າຫ້ອງ​ຮຽນ​ເຄື່ອນທີ່. ລໍ້ນີ້ ທີ່ເອີ້ນ​ວ່າ kariton ​ໃນ​ພາສາ​ຟິລິບ​ປິນ ​ສ້າງ​ແບບ​ຕູ້​ໄມ້​ມີ​ລໍ້ ທີ່​ໃຊ້​ບັນທຸກເຄື່ອງໃຊ້ໂຮງຮຽນ ປື້​ມ ພ້ອມ​ດ້ວຍອຸບປະ
ກອນ​ອະນາ​ໄມ ​ແລະ​ອາຫານ.

​ເດັກ​ທັງ​ໝົດ​ທີ່​ມາ​ຮຽນ​ຢູ່​ຫ້ອງຮຽນ​ລໍ້​ຍູ້ນີ້​ ແມ່ນ​ເດັກ​ທີ່​ເລ່ລ່ອນຢູ່​ຕາມ​ຖະໜົນ​ຫົນທາງ ບໍ່ໄດ້​ຮຽນໜັງສື.

ນາງ Yolanda Penalosa ​ເປັນ​ຄູ​ສອນ​ໂຮງຮຽນ​ສາທາລະນະ ທີ່​ອາສາ​ສະໝັກມາຊ່ວຍສອນ
​ຢູ່ຫ້ອງ​ຮຽນເຄື່ອນທີ່ນີ້. ພວກ​ອາສາ​ສະໝັກ​ຈະມາ​ ສອນ​ສອງ​ຊົ່ວ​ໂມງທຸກໆ​ວັນ​ເສົາ ​ໂດຍສອນ​ເດັກນ້ອຍ​ເທື່ອ​ລະ​ຄົນ. ທໍາ​ອິດ​ນັ້ນ ​ເຂົາ​ເຈົ້າ​ຈະຕີ​ລາຄາ​ເບິ່ງລະດັບຄວາມ​ຮູ້​ຂອງເດັກ​ກ່ອນວ່າ ​ຢູ່​ໃນ​ຂັ້ນ​ໃດ. ​ເປົ້າໝາຍ​ກໍ​ຄືເພື່ອນໍາ​ເອົາ​ພວກ​ເຂົາ​ເຈົ້າ ກັບ​ຄືນ​ໄປຮຽນ​ໃນໂຮງຮຽນ​ທໍາ​ມະ​ດາ. ນາງ Penalosa ກ່າວເຖິງ​ສາ​ເຫດ​ທີ່​ພາ​ໃຫ້​ເດັກນ້ອຍ​ເຫລົ່າ​ນີ້ ຕ້ອງ​ອອກ​ຈາກ​ໂຮງຮຽນ ວ່າ:

ຍ້ອນ​ເຫດຜົນ​ທີ່​ວ່າ ພໍ່​ບໍ່​ມີ​ວຽກ​ເຮັດ​ງານ​ທໍາ ພໍ່​ແມ່​ແຍກ​ທາງ​ກັນ ​ເຫດຜົນ​ເຫລົ່າ​ນີ້​
ຈຶ່ງ​ເຮັດ​ໃຫ້​ພວກ​ເຂົາ​ເຈົ້າຢຸດ ​ບໍ່​ໄປໂຮງຮຽນ.

​ໃນ​ຟິລິບ​ປິນ ໂຮງຮຽນ​ສາທາລະນະ​ແມ່ນ​ຈະ​ຟີ​ ​ແຕ່​ອຸບປະກອນ​ການ​ຮຽນ ​ເຄຶ່ອງແບບ ​ແລະ​ອາຫານ​ນັ້ນບໍ່​ຟີ ນັກຮຽນ​ຕ້ອງ​ໄດ້​ຊື້ເອົາ. ​ຄ່າ​ໃຊ້​ຈ່າຍແມ່ນເກີນ​ກວ່າ​ ທີ່​ຄອບຄົວ​ຍາກຈົນຈະ​ສາມາດ​ຊື້​ໄດ້.

ທ້າວ​ນ້ອຍ Marvin ອາຍຸ​ເຈັດ​ປີ ​ບໍ່​ໄປໂຮງຮຽນ ຫຼັງ​ຈາກ​ພາຍຸໃຕ້​ຝຸ່ນໄດ້​ພັດ​ເອົາ​ເຮືອນ​ຂອງ​ຄອບຄົວ​ຂອງ​ລາວ​ໄປ. ທ້າວ Marvin ຈະ​ໃຊ້​ເວລາ​ສ່ວນ​ໃຫຍ່​ຫຼິ້ນ​ຢູ່ບອກ​ບ້ານ ​ແລະເຮັດ​ວຽກ​ເຮືອນຊ່ວຍ​ແມ່. ​ມາ​ວິນ​ເວົ້າວ່າ​ ພໍ່​ຂອງ​ລາວກໍ​ບໍ່​ມີ​ວຽກ​ເຮັດ.

ເດັກນ້ອຍທີ່ຮຽນນໍາຫ້ອງຮຽນລໍ້ຍູ້ ໃນຟີລິບປີນ
ເດັກນ້ອຍທີ່ຮຽນນໍາຫ້ອງຮຽນລໍ້ຍູ້ ໃນຟີລິບປີນ

ມາ​ວິນ​ເວົ້າ​ວ່າ ພໍ່​ຂອງ​ລາວໃຊ້​ຊີວິດ ຈົມຢູ່​ກັບ​ການ​ພະນັນ​ແລະ​ດື່ມ​ເຫຼົ້າ. ​ເນຶ່ອງຈາກ​ວ່າ ມາ​ວິນ​ໄດ້​ເຂົ້າຮຽນ​ຢູ່​ໂຮງຮຽນ​ອະນຸ​ບານມາ​ກ່ອນ​ແລ້ວ ຄູຂອງ​ລາວ​ຈຶ່ງເວົ້າ​ວ່າ ​ໂອກາດ​ທີ່​ມາ​ວິນ​ຈະ​ໄດ້​ກັບ​ຄືນ​ໄປ​ເຂົ້າ​ໂຮງຮຽນ​ຕາມ​ປົກກະຕິ​ ​ໃນເດືອນມີຖຸນານີ້ ແມ່ນ​ສູງ​ຫຼາຍ

ນາຍ Efren Penaflorida ​ເປັນ​ຜູ້​ສ້າງ​ຫ້ອງ​ຮຽນ​ເຄື່ອນທີ່ນີ້​ຂຶ້ນ​ມາ ​ເພື່ອອໍານວຍໃຫ້​ເດັກ
ນ້ອຍ​ ​ສາມາດ​ໄປ​ເຂົ້າ​ໂຮງຮຽນ​ໄດ້. ບໍລິ​ສັດ Dynamic Teen Company ຫລື ​ໄວ​ລຸ່ນທີ່​
ມີ​ພະລັງ ຂອງລາວ ​ເປັນ​ຜູ້​ບໍລິຫານ​ໂຄງການ​ຫ້ອງ​ຮຽນ​ເຄື່ອນທີ່ ​ແລະຊອກ​ຫາຜູ້ໃຈ​ບຸນ
ມາອຸບປະຖໍາ​ພວກ​ນັກຮຽນ​ ທີ່​ຂັດ​ສົນເຫລົ່າ​ນີ້. ລາວ​ກ່າວ​ວ່າ:

“ຫ້ອງ​ຮຽນ​ເຄື່ອນ​ທີ່ ຫລື Kariton ນີ້ ປຽບ​ເໝືອນ​ຫົວທຽນ​ກະ​ຕຸ້ນ​ໄຟ​ລົດ. ມັນ​
ເປັນ​ສິ່ງ​ລໍ້​ໃຈ​ຢ່າງ​ນຶ່ງ ​ເພື່ອ​ຊັກ​ຈູງ ​ນັກຮຽນ​ໃຫ້​ຮັກຫອມ​ກາ​ນຮໍ່າຮຽນ​ ອ້າ​ແຂນ​ຮັບ
​ເອົາ​ການ​ຮຽນ ​ເພາະວ່າ​ພວກ​ເຮົາ ເຊື່ອ​ວ່າ ຖ້າ​ຫາກ​ພວກ​ເດັກ​ເຫຼົ່າ​ນີ້ ສາມາດ​ຮັກ​
ການ​ຮໍ່າຮຽນ​ແລ້ວ ການ​ຮຽນກໍ​ຈະ​ຮັກ​ແລະ​ອ້າ​ແຂນ​ຮັບ​ເອົາ​ພວກ​ເຂົາ​ຄືນ.
​”

ພາຍ​ໃນ​ປາຍ​ປີ​ການ​ສຶກສາໜ້ານີ້ ທ່ານ Armin Luistro ລັດຖະມົນຕີ​ກະຊວງສຶກສາ​ ຢາກ​ໃຫ້
​ມີ​ຫ້ອງ​ຮຽນ​ລໍ້​ຍູ້​ແບບ​ນີ້ຕື່ມ​ອີກ​ຢ່າງ​ໜ້ອຍ​ສິບ​ຫ້ອງ ​ ຢູ່​ໃນ​ມະ​ນີລາແລະ​ຢູ່​ຕາມ​ຫົວ​ເມືອງ​ໃຫຍ່​ອື່ນໆ ​ໃນ​ຂັ້ນ​ຕໍ່​ໄປ ຊຶ່ງ​ທ່ານ​ກ່າວ​ວ່າ:

“ທັງ​ໝົດ​ທີ່​ກ່າວ​ມາ​ນີ້ ​ແມ່ນເພື່ອ​ສຸມ​ໃສ່​ຕອບ​ສະໜອງຄວາມ​ຕ້ອງການ​ຂອງເດັກ
ຢູ່​ທີ່ບ່ອນ​ເດັກ​ຄົນ​ນັ້ນ​ຢູ່. ໃນ​ກໍລະນີ​ນີ້​ໂດຍ​ສະ​ເພາະ​ນັ້ນ ພວກ​ເຂົາ​ ໄດ້ ຮຽນຮູ້​ວິທີ
ການ​ຢູ່​ລອດ​ຕາມ​ຖະໜົນ​ຫົນ​ທາງ ​ໄດ້​ຮຽນ​ຮູ້​ຄວາມ​ມີ​ອິດ​ສະລະ​ ເສລີຈາ​ກການ
ໃຊ້​ຊີ​ວິດຢູ່​ບົນຖະໜົນ ​ແລະ​ພວກ​ເຮົາ​ກໍ​ບໍ່​ຢາກ​ຕັດເສລີພາບ​ນັ້ນຈາກ​ພວກ​ເຂົາ​
ໃນທັນທີ.”

ທີ່​ຫ້ອງ​ຮຽນ​ເຄື່ອນທີ່ຢູ່​ຄຸ້ມ Novaliches ນັ້ນ ນາງ Marietoni Candelaria ອາຍຸ 18 ປີ ຕັ້ງໜ້າ​ຕັ້ງ​ຕາລໍ​ຖ້າໂອກາດ​ທີ່ ມື້​ໃດ​ມື້​ນຶ່ງ​ນາງ​ຈະ​ໄດ້​ເຕົ້າ​ໂຮມ​ກັນ​ກັບນ້ອງໆຫ້າ​ຄົນຂອງ​ນາງ​. ພວກ​ເຂົາ​ເຈົ້າ​ໄດ້ຖືກ​ພໍ່​ແມ່​ປະ​ຖິ້ມ ​ເມື່ອ​ນຶ່ງ​ປີຜ່ານມາ ​ແລະ​ກໍ​ໄດ້ແຍກ​ຍ້າຍ​ກັນ​ໄປ​ຂໍ​ເພີ່ງ​ພາອາ​ໃສຢູ່​ນໍາ​ພວກ​ພີ່ນ້ອງ​ຫລາຍໆຄົນ ທີ່​ບໍ່ສາມາດ​ສົ່ງ​ເສຍ​ໃຫ້​ເຂົາ​ເຈົ້າ​ໄປ​ຮຽນ​ໄດ້​ນັ້ນ.

ນາງ Canderlaria ​ເວົ້າວ່າ ການ​ທີ່​ມີ​ໂອກາດ​ໄດ້​ຮໍ່າຮຽນ​ຢູ່​ຫ້ອງ​ຮຽນ​ເຄື່ອນ ທີ່​ນີ້​ແມ່ນ​ສໍາຄັນ​ຫຼາຍ. ​ນາງຕັ້ງ​ໃຈ​ຈະຮຽນໃຫ້ຈົບ​ອຸດົມ ແລະພະຍາຍາມ​ຫາທຶນ​ສຶກສາຕໍ່​ໃນ​ມະຫາວິທະ​ຍາ​ໄລ ​ແລ້ວກໍ​ຫາວຽກ​ເຮັດ​ງານ​ທໍາ ​ເພື່ອ​ວ່າ​ນາງ​ຈະສາມາດ​ລ້ຽງ​ດູ​ນ້ອງໆ​ຂອງ​ນາງ ຢູ່​ພາຍ​ໃຕ້​ຊາຍ​ຄາ​ດຽວ​ກັນໄດ້.

XS
SM
MD
LG