ກຳລັງຮັກສາຄວາມປອດໄພ ອິສຣາແອລ ກ່າວວ່າຜູ້ຊາຍ ປາເລສໄຕນ໌ ຄົນໜຶ່ງ ທີ່ໄດ້ແທງທະຫານ ໃນເຂດ West Bank ໃນວັນພະຫັດມື້ນີ້ ໄດ້ຖືກຍິງບາດເຈັບສາຫັດ, ໃນກໍລະນີຄວາມຮຸນແຮງຫລ້າສຸດ ເຊິ່ງອົງ ການສະຫະປະຊາຊາດ ໄດ້ເຕືອນວ່າ ແມ່ນກຳລັງກາຍເປັນ “ຄວາມຫະຍານະ.”
ໃນຖະແຫຼງການສະບັບໜຶ່ງ ກອງທັບ ອິສຣາແອລ ໄດ້ກ່າວວ່າ ທະຫານຜູ້ທີ່ຖືກແທງນັ້ນ ໄດ້ຮັບບາດເຈັບພຽງໜ້ອຍດຽວຈາກເຫດການ ເຊິ່ງໄດ້ເກີດຂື້ນຢູ່ໃກ້ກັບສຸສານຂອງພະສັງຄະລາດໃນເມືອງ Hebron, ບ່ອນທີ່ພວກຕັ້ງຖິ່ນຖານຊາວ ອິສຣາແອລ ໄດ້ກໍ່ໃຫ້ເກີດຄວາມເຄັ່ງຕຶງສູງ ຢູ່ທີ່ນັ້ນ.
ການກໍ່ຄວາມຮຸນແຮງຂອງຊາວປາເລສໄຕນ໌ ເປັນເວລາດົນກວ່າໜຶ່ງເດືອນຜ່ານມາ ໄດ້ເຮັດໃຫ້ຊາວ ອິສຣາແອລ 11 ຄົນ ແລະ ຊາວປາເລສໄຕນ 58 ຄົນເສຍຊີວິດ. ອິສຣາແອລ ກ່າວວ່າຊາວ ປາເລສໄຕນ໌ ສ່ວນໃຫຍ່ໄດ້ຖືກຂ້າຕາຍໃນເວລາໂຈມຕີ ຫຼື ພະຍາຍາມທີ່ຈະຍິງ ຫຼື ແທງປະຊາຊົນ, ຕຳຫຼວດ ຫຼື ທະຫານ ອິສຣາແອລ.
ຄວາມຮຸນແຮງໄດ້ລະເບີດຂຶ້ນເມື່ອຂ່າວລືໄດ້ກະຈາຍໄປທົ່ວບ້ານຂອງຊາວ ປາເລສໄຕນ໌ ວ່າ ອິສຣາແອລ ກຳລັງວາງແຜນທີ່ຈະຍຶດເອົາສະຖານທີ່ສັກສິດ ທັງສຳລັບຊາວມຸສລິມ ແລະຊາວອິສຣາແອລ ໃນພາກຕາເວັນອອກຂອງນະຄອນ Jerussalem. ອິສຣາແອລ ໄດ້ປະຕິເສດຕໍ່ຂ່າວລືດັ່ງກ່າວນັ້ນຢ່າງຕໍ່ເນື່ອງ.
ອົງການຂ້າຫຼວງໃຫຍ່ດ້ານສິດທິມະນຸດ ຂອງສະຫະປະຊາຊາດ ໃນວັນພຸດວານນີ້ໄດ້ກ່າວ ວ່າຄວາມຮຸນແຮງຈະ“ດຶງດູດພວກເຂົາເຈົ້າເຂົ້າສູ່ຄວາມຫາຍານະ” ຖ້າວ່າມັນບໍ່ຢຸດລົງໃນທັນທີ.
ທ່ານ Zeid Ra’ad al Hussein ໄດ້ກ່າວວ່າ “ຄົນຜູ້ທີ່ຢ້ານກົວເຊິ່ງກັນແລະກັນ, ຜູ້ທີ່ຢ້ານກົວແຮງຈູງໃຈທີ່ສອດຄ່ອງຕໍ່ກັນແລະກັນ ແລະ ຢ້ານກົວຫຼາຍຕໍ່ອະນາຄົດ. ຄວາມຢ້ານກົວນັ້ນ, ນອກຈາກໄດ້ຖືກກວດ ກາ, ມັນຈະກາຍເປັນເວລາທີ່ສັບສົນ, ແລະ ຕາຍຕົວ.. ການພິຈາລະ ນາກ່ຽວກັບມະນຸດສະທຳທັງຫຼາຍ ຈະກາຍເປັນເລື່ອງຮອງລົງໄປ.”
