ເຈົ້າໜ້າທີ່ໃນພາກຕາເວັນຕົກສຽງເໜືອຂອງປາກີສຖານກ່າວວ່າ ຈໍາ ນວນຜູ້ເສຍຊີວິດຍ້ອນການວາງລະເບີດສອງຄັ້ງຕິດຕໍ່ກັນໃນເມືອງ Peshawar ໃນຄືນວັນເສົາຜ່ານມານີ້ ໄດ້ເພີ້ມຂຶ້ນເປັນຢ່າງນ້ອຍ 34 ຄົນແລ້ວ.
ພວກເຈົ້າໜ້າທີ່ທ້ອງຖິ່ນກ່າວວ່າ ມີຫລາຍກວ່າ 90 ຄົນຮວມທັງພວກນັກຂ່າວແລະຕໍາຫລວດຫລາຍຄົນ ໄດ້ຮັບບາດເຈັບໃນເຫດລະເບີດດັ່ງ ກ່າວ ແລະເຕືອນວ່າ ຈໍານວນຜູ້ເສຍຊີວິດສາມາດເພີ່ມຂຶ້ນອີກໄດ້ ເນື່ອງຈາກຜູ້ບາດເຈັບມີອາການສາຫັດຫລາຍຄົນ.
ເຫດລະເບີດບັ້ນທໍາອິດນັ້ນບໍ່ໃຫຍ່ປານໃດ ແຕ່ໄດ້ດຶງເອົາພວກເຈົ້າໜ້າທີ່ຕໍາຫລວດ ພະນັກ ງານຊ່ອຍກູ້ໄພແລະຜູ້ຄົນທີ່ຢາກເບິ່ງ ໄປຍັງບ່ອນເກີດເຫດເປັນຈໍານວນຫລວງຫລາຍ ຊຶ່ງໃນເວລາພຽງບໍ່ເທົ່າໃດນາທີຕໍ່ມາ ເຫດລະເບີດຄັ້ງທີສອງທີ່ໃຫຍ່ກວ່າ ແລະສົງໄສວ່າເກີດຈາກຜູ້ວາງລະເບີດສະລະຊີບກໍໄດ້ສັ່ນສະເທືອນບໍລິເວນນັ້ນ ສົ່ງຜົນໃຫ້ມີຜູ້ບາດເຈັບແລະລົ້ມຕາຍນັ້ນ.
ບໍ່ມີຜູ້ໃດຫລືກຸ່ມໃດອ້າງເອົາຄວາມຮັບຜິດຊອບສໍາລັບການໂຈມຕີຄັ້ງນີ້ ແຕ່ພວກຫົວຮຸນແຮງ
ກຸ່ມຕາລີບັນໄດ້ໃຫ້ຄໍາໜັ້ນສັນຍາວ່າຈະທໍາການແກ້ແຄ້ນຕໍ່ການສັງຫານນາຍໂອຊາມາບິນລາ
ເດັນ ຜູ້ນໍາເຄືອຂ່າຍອາລກາອິດາໂດຍໜ່ວຍລົບພິເສດຂອງສະຫະລັດໃນພາກເໜືອຂອງປາ
ກີສຖານໃນຕົ້ນເດືອນແລ້ວນີ້.
ເຫດລະເບີດດັ່ງກ່າວມີຂຶ້ນໃນເວລາບໍ່ເທົ່າໃດຊົ່ວໂມງ ຫລັງຈາກປະທານາທິບໍດີ Hamid Karzai ແຫ່ງອັຟການີສຖານແລະທ່ານ Leon Panetta ຫົວໜ້າກົມສືບຂ່າວລັບ CIA ຂອງສະຫະລັດທໍາການຢ້ຽມຢາມກຸງອີສລາມາບັດ. ທ່ານ Karzai ໄດ້ຮຽກຮ້ອງໃຫ້ປາກີສ
ຖານກໍາຈັດບ່ອນລີ້ຊ່ອນຂອງພວກຫົວຮຸນແຮງໃນເຂດຊົນເຜົ່າເລາະຕາມຊາຍແດນອັຟການີສຖານແລະປາກີສຖານນັ້ນ ໃນຂະນະດຽວກັນທ່ານ Panetta ໄດ້ທໍາການໂອ້ລົມເລື້ອງ
ການຊອກຫາຊ່ອງທາງໃນການສົ່ງເສີມການແບ່ງປັນຂໍ້ມູນຂ່າວລັບກັນໃຫ້ເຂັ້ມແຂງຂຶ້ນໃນອະນາຄົດ.
ເຈົ້າໜ້າທີ່ປາກີສຖານທ່ານນຶ່ງກ່າວວ່າ ການກໍ່ການຮ້າຍກໍາລັງເພີ່ມທະວີຂຶ້ນຍ້ອນຄວາມບໍ່ໄວ້ວາງໃຈກັນ ລະຫວ່າງປາກີສຖານ ອັຟການີສຖານ ແລະສະຫະລັດນັ້ນ.
