ເບິ່ງວີດີໂອລາຍງານພາສາອັງກິດ:
ຟັງລາຍງານພາສາລາວ:
ຈີນເປັນປະເທດນຶ່ງໃນບໍ່ເທົ່າໃດປະເທດທີ່ໄດ້ສະແດງຄວາມສະໜັບສະໜຸນຢ່າງເປີດເຜີຍຕໍ່
ປາກີສຖານ ເວລາມີຂ່າວອອກມາວ່າບຸກຄົນທີ່ຕ້ອງການຕົວຫລາຍທີ່ສຸດຂອງໂລກ ກໍຄື
ນາຍໂອຊາມາ ບິນ ລາເດັນ ນັ້ນ ໄດ້ອາໃສຢູ່ໃນເມືອງນຶ່ງ ຫ່າງຈາກນະຄອນຫລວງອິສລາ
ມາບັດຂອງປາກິສຖານ ພຽງປະມານ 120 ກິໂລແມດ.
ສອງອາທິດຫລັງຈາກການບຸກຈູ່ໂຈມແບບລັບໆຂອງອາເມຣິກາ ທີ່ໄດ້ສັງຫານນາຍບິນ ລາ
ເດັນ ອັນເປັນເຫດໃຫ້ຄວາມສໍາພັນລະຫວ່າງສະຫະລັດ ແລະປາກິສຖານ ຕົກຮວບລົງສູ່
ລະດັບຕໍ່າສຸດຄັ້ງໃໝ່ອີກບັ້ນນຶ່ງນັ້ນ ນາຍົກລັດຖະມົນຕີປາກິສຖານ ທ່ານ Yousuf Raza
Gilani ກໍໄດ້ເດີນທາງໄປນະຄອນຫລວງປັກກິ່ງ. ໃນເວລານັ້ນ ຫລາຍໆຄົນພາກັນສົງໃສ
ຄິດວ່າປາກິສຖານກໍາລັງອວ່າຍໜ້າໄປຫາຈີນ ເພື່ອເປັນການທົດແທນຄວາມສໍາພັນດ້ານ
ການທະຫານແລະການທູດອັນກວ້າງຂວາງ ກັບວໍຊິງຕັນນັ້ນ ຫລືແນວໃດ?
ນັກວິເຄາະຫລາຍໆຄົນ ເຊ່ນອະດີດລັດຖະມົນຕີຕ່າງປະເທດ Inam-ul Haq ບໍ່ເຫັນພ້ອມ
ກັບການສັນນິຖານແບບນັ້ນ ໂດຍກ່າວວ່າ ປະເທດປາກິສຖານ ທີ່ອ່ອນແອທັງໃນດ້ານການ
ເມືອງແລະການເສດຖະກິດນັ້ນ ແມ່ນຈໍາເປັນຕ້ອງໄດ້ຮັກສາແລະຜູກຄວາມສໍາພັນທີ່ດີ ກັບ
ພວກປະເທດມະຫາອໍານາດທັງຫລາຍຂອງໂລກເອົາໄວ້. ທ່ານ Ul Haq ເວົ້າວ່າ:
“ນອກນັ້ນແລ້ວ ປາກິສຖານກໍບໍ່ສາມາດທີ່ເອົາ ມະຫາອໍານາດໃດນຶ່ງ ໄປຕໍ່ຕ້ານ
ກັບອີກມະຫາອໍານາດນຶ່ງໄດ້. ມັນຈະເປັນການໄຮ້ສາລະແລະໂງ່ເງົ່າ ທີ່ຈະເຊື່ອ
ວ່າພວກເຮົາຈະເຮັດແບບນັ້ນໄດ້ ແລະຄວາມພະຍາຍາມໃດໆທີ່ຈະເຮັດດັ່ງນັ້ນ
ກໍຈະເປັນການບໍ່ມອງການໄກ ແລະເປັນການຄັດຕໍ່ຜົນປະໂຫຍດ ໂດຍສິ້ນເຊີງ.”
ແຕ່ຄວາມສໍາພັນຂອງປາກິສຖານກັບຈີນນັ້ນ ກໍບໍ່ແມ່ນວ່າຈະປາສະຈາກການທ້າທາຍໃດໆ.
ຄືໃນທ້າຍເດືອນກໍລະກົດຜ່ານມານັ້ນ ພວກທີ່ສົງໃສວ່າ ເປັນຊາວວິເກີຫົວແບ່ງແຍກດິນແດນ
ໃນຂົງເຂດຊິນຈຽງທີ່ວຸ້ນວາຍຂອງຈີນ ໄດ້ສັງຫານປະຊາຊົນຫລາຍກວ່າ 20 ຄົນ ໃນການ
ໂຈມຕີແບບກໍ່ການຮ້າຍ ຫລາຍໆບັ້ນ ຊຶ່ງຈີນໄດ້ກ່າວຫາພວກກຸ່ມອິສລາມຫົວຮຸນແຮງຈັດ
ທີ່ມີຖານປະຕິບັດການຢູ່ໃນປາກິສຖານ ວ່າໄດ້ໃຫ້ການເຝິກແອບແກ່ພວກກະບົດວິເກີ ທີ່
ນັບຖືສາສະໜາອິສລາມເປັນສ່ວນໃຫຍ່ ທີ່ເຊຶ່ອມໂຍງກັບຂະບວນການອິສລາມນອກກົດ
ໝາຍເທີກີສຖານຕາເວັນອອກ ຫລື ETIM ນັ້ນ.
ພວກຜູ້ນໍາການເມືອງແລະທະຫານລະດັບສູງຂອງທັງສອງປະເທດ ໄດ້ປະຕິຍານທີ່ຈະຕໍ່ສູ້ກັບ
ພວກກຸ່ມກໍ່ການຮ້າຍຮ່ວມກັນ ແລະໄດ້ທໍາການເຝິກຊ້ອມ ປະຕິບັດການປາບປາມການກໍ່
ການຮ້າຍຮ່ວມກັນ. ຜູ້ບັນຊາການທະຫານສູງສຸດຂອງປາກິສຖານ ແລະພວກເຈົ້າໜ້າທີ່
ທະຫານລະດັບສູງຂອງຈີນ ກໍໄດ້ ຮັບປາກທີ່ຈະໃຫ້ຄວາມຮ່ວມມືກັນ ໃນເລຶ່ອງນີ້. ນາຍພົນ
AShfaq Pervez Kayani ຜູ້ບັນຊາການສູງສຸດປາກິສຖານກ່າວວ່າ:
“ມີຫລາຍໆພາກສ່ວນຂອງຂະບວນການ ETIM ທີ່ປະຕິບັດການ ຢູ່ໃນພື້ນທີ່
ເຂດຊາຍແດນຂອງປາກິສຖານແລະອັຟການິສຖານ ເຖິງແມ່ນວ່າ ຢູ່ໃນພື້ນທີ່
ເຫລົ່ານັ້ນ ພວກເຮົາມີການຮ່ວມມືກັນຢ່າງໃກ້ຊິດ ແລະມີການແລກປ່ຽນຂໍ້ມູນ
ສືບລັບກັນ. ພວກເຮົາໄດ້ປະຕິບັດການຢ່າງສຸດຂີດເພື່ອ ທັບມ້າງການຂົ່ມຂູ່
ຂອງຂະບວນການ ETIM ນີ້ ແລະພວກຫົວຮຸນແຮງອື່ນໆ ສໍາລັບຈີນ.”
ສ່ວນນາຍພົນ Hou Shusen ຮອງຫົວໜ້າກອງບັນຊາການສູງສຸດຂອງຈີນກໍກ່າວວ່າ:
“ການເຝິກອົບລົມຕໍ່ຕ້ານການກໍ່ການຮ້າຍຮ່ວມກັນນັ້ນ ແມ່ນຈະຊ່ວຍພວກເຮົາ
ໃນການຕໍ່ສູ້ຕ້ານຢັນກັບພວກກໍາລັງກໍ່ການຮ້າຍຢູ່ໃນຂົງເຂດ ແລະສ້າງຄວາມ
ຮ່ວມມືທີ່ແໜ້ນແຟ້ນເລິກເຊິ່ງຍິ່ງຂຶ້ນ ເພື່ອຄວາມສະຫງົບສຸກ ແລະຄວາມໝັ້ນ
ຄົງໃນຂົງເຂດຫລາຍຂຶ້ນ.”
ການສະແດງອອກເຖິງຄວາມເປັນເອກະພາບກັນຢ່າງເປີດເຜີຍເຫລົ່ານີ້ ແມ່ນກົງກັນຂ້າມ
ກັນຢ່າງເຫັນໄດ້ແຈ່ມແຈ້ງ ກັບຄວາມສໍາພັນຂອງປາກິສຖານກັບວໍຊິງຕັນ ຊຶ່ງໃນປີທີ່ຜ່ານ
ມາແມ່ນເຕັມໄປດ້ວຍຄວາມເຫັນທີ່ຂັດແຍ້ງກັນຢ່າງເປີດເຜີຍ ຫລາຍກວ່າຖະແຫລງການ
ກ່ຽວກັບການຮ່ວມໄມ້ຮ່ວມມືກັນ.
ທ່ານ Muhshahid Hussain ອະດີດສະມາຊິກສະພາສູງຂອງປາກີສຖານ ທີ່ເວລານີ້
ເປັນປະທານສະຖາບັນປາກິສຖານ-ຈີນ ຊຶ່ງເປັນໜ່ວຍງານຄົ້ນຄ້ວາອິດສະຫຼະທີ່ປະຕິບັດ
ງານເພື່ອຊຸກຍູ້ສົ່ງເສີມຄວາມສໍາພັນສອງຝ່າຍນັ້ນ ກ່າວວ່າ ການສະໜັບສະໜຸນທີ່ມີມາ
ເປັນເວລາຍາວນານຂອງຈີນຕໍ່ປະເທດອີສລາມປະເທດດຽວທີ່ມີນີວເຄລຍຂອງໂລກ
ໂດຍບໍ່ສໍາຄັນວ່າແມ່ນໃຜຈະຢູ່ໃນອໍານາດໃນອິສລາມາບັດກໍຕາມນັ້ນ ແມ່ນໄດ້ນໍາໄປສູ່
ຄວາມເຫັນພ້ອມກັນທາງດ້ານການເມືອງຢ່າງກວ້າງຂວາງ ນໍາການມີຄວາມສໍາພັນທີ່
ໃກ້ຊິດກັບປັກກິ່ງ ມາຕະຫລອດ. ທ່ານ Muhshahid Hussain ເວົ້າວ່າ:
“ເລຶ່ອງຈີນແມ່ນເປັນນຶ່ງໃນສາມບັນຫາສໍາຄັນໃນປາກີສຖານ ທີ່ໄດ້ຮັບຄວາມ
ເຫັນພ້ອງຕ້ອງກັນຢ່າງສິ້ນເຊີງ ຄືບັນຫາໂຄງການນີວເຄລຍ ບັນຫາຂັດແຍ້ງ
ເລື່ອງແຄວ້ນແຄສເມຍກັບອິນເດຍ ແລະຄວາມສໍາພັນກັບຈີນ ຊຶ່ງທັງໝົດນີ້
ແມ່ນໄດ້ຮັບຄວາມເຫັນພ້ອມນໍາກັນ ໃນຕະຫລອດທຸກແນວທາງການເມືອງ.”
ແຕ່ເຖິງແມ່ນມີການສະໜັບສະໜຸນຈີນ ຈາກວົງການການເມືອງໃນປາກິສຖານຢ່າງ
ກວ້າງຂວາງກໍຕາມ ພວກທີ່ມີຄວາມສົງໃສບໍ່ແນ່ໃຈທັງຫລາຍກໍກ່າວວ່າ ເພື່ອຈະສ້າງ
ຄວາມສໍາພັນສອງຝ່າຍໃຫ້ເຂັ້ມແຂງຍິ່ງຂຶ້ນນັ້ນ ກ່ອນອື່ນໝົດ ປາກີສຖານຈະຕ້ອງແກ້
ໄຂວິກິດການອັນໜັກໜ່ວງດ້ານເສດຖະກິດ ການເມືອງ ສະຖາບັນ ແລະຄວາມໝັ້ນຄົງ
ຂອງຕົນໃຫ້ໄດ້ເສຍກ່ອນ ກ່ອນທີ່ຈະສາມາດສ້າງຄວາມສໍາພັນກັບຈີນ ໃຫ້ກວ້າງຂວາງ
ອອກໄປອີກໄດ້.
