ສານແຫ່ງນຶ່ງໃນປາກິສຖານໄດ້ຕັດສິນວ່າ ພວກແມ່ໝ້າຍ 3 ຄົນຂອງ ມື້ລາງນາຍໂອຊາມາ ບິນລາເດັນ ຜູ້ນໍາເຄືອຂ່າຍ ອານ ກາອິດາ ພ້ອມດ້ວຍລູກສາວຂອງລາວ 2 ຄົນ ມີຄວາມຜິດ ໃນຂໍ້ຫາຖານພັກອາໄສຢູ່ໃນປະເທດຢ່າງຜິດກົດໝາຍ ແລະຕັດສິນໂທດຈໍາຄຸກເຂົາເຈົ້າເປັນເວລາ 45 ມື້. ສານໄດ້ສັ່ງໃຫ້ເນລະເທດພວກເຂົາເຈົ້າເຊ່ນກັນ.
ທະນາຍຄວາມຂອງແມ່ຍິງທັງ 5 ຄົນກ່າວວ່າ ພວກລູກຄວາມຂອງຕົນໄດ້ຖືກປັບໄໝຄົນລະ 110 ໂດລາ ແລະກໍໄດ້ເສຍຄ່າປັບໄໝໄປແລ້ວ.
ພວກນາງໝ້າຍ ຊຶ່ງ 2 ຄົນເປັນຄົນ Saudi Arabia ແລະຄົນນຶ່ງ ເປັນຊາວ Yemen ພ້ອມດ້ວຍລູກ 10 ຄົນ ໄດ້ຖືກເຈົ້າໜ້າທີ່ປາກິສ ຖານຄວບຄຸມໂຕໄວ້ ຕັ້ງແຕ່ນາຍ ໂອຊາມາ ບິນ ລາເດັນ ຖືກຂ້າຕາຍໂດຍພວກໜ່ວຍທະຫານ Navy Seals ຂອງສະຫະລັດຢູ່ບໍລິເວນບ້ານທີ່ຜູ້ກ່ຽວອາໄສຢູ່ ໃນເມືອງ Abbottabad ຂອງປາກິສຖານເມື່ອວັນທີ 2 ພຶດສະພາ ປີ 2011 ຜ່ານມາ.
ພວກແມ່ຍິງເຫຼົ່ານີ້ໄດ້ຖືກຈັບກຸມຢ່າງເປັນທາງການໃນວັນທີ 3 ມີນາ ແລະຈະໄດ້ຮັບຄະແນນສໍາລັບເວລາທີ່ພວກເຂົາເຈົ້າໄດ້ຖືກຄຸມຂັງມາກ່ອນແລ້ວນັ້ນ ຊຶ່ງຈະຫລຸດຜ່ອນໂທດຂັງຄຸກລົງມາເປັນ 2 ສັບປະດາ.
ອົງການຂ່າວຝຣັ່ງລາຍງານວ່າ ການດໍາເນີນຄະດີໃນວັນຈັນມື້ນີ້ໄດ້ດໍາເນີນໄປພາຍໃຕ້ການເປັນປະທານຂອງຜູ້ພິພາກສາທ່ານນຶ່ງ ໃນສານທີ່ຈັດຕັ້ງຂຶ້ນຊົ່ວຄາວ ໃນເຮືອນຫຼັງທີ່ພວກແມ່ຍິງເຫຼົ່ານີ້ໄດ້ອາໄສຢູ່ມາ ແລະຈະເປັນບ່ອນທີ່ເຂົາເຈົ້າຈະຖືກກັກຂັງໄວ້ຕໍ່ໄປອີກ 2 ອາທິດນັ້ນ.
