ປະຊາຊນລາວຫຼາຍກວ່າ 200,000 ຄອບຄົວ ໃນ 2,547 ບ້ານ ຍັງຄົງດຳລົງຊີວິດຢູ່ໃນຄວາມທຸກຍາກທີ່ສຸດ ແລະ ວິກິດການທາງດ້ານ ເສດຖະກິດເຮັດໃຫ້ ລາຍໄດ້ ສະເລ່ຍ ຕໍ່າກວ່າ 1,000 ໂດລາ ຕໍ່ຄົນຕໍ່ປີອີກດ້ວຍ.
ເຈົ້າຫນ້າທີ່ຂັ້ນສູງໃນກອງທຶນຫລຸດຜ່ອນປັນຫາຄວາມທຸກຍາກແຫ່ງຊາດ ເປີດເຜີຍວ່າພາຍໃຕ້ພາວະປັນຫາວິກິດການເສດຖະກິດທີ່ຍັງບໍ່ສາມາດແກ້ໄຂໃຫ້ດີຂື້ນໄດ້ນັ້ນ ເມື່ອສົມທົບດ້ວຍໄພນໍ້າຖ້ວມທີ່ສົ່ງຜົນກະທົບຕໍ່ປະຊາຊນລາວ 50,889 ຄອບຄົວໃນພື້ນທີ່ 1,337 ບ້ານຂອງ 125 ເມືອງ ແລະ ເນື້ອທີ່ການຜະລິດກະສິກໍາກວ່າ 30,000 ເຮັກຕາ ໄດ້ຮັບຄວາມເສຍຫາຍທັງໝົດ ຄິດເປັນມູນຄ່າ 720 ກວ່າຕື້ກີບນັ້ນ ກໍຄືປັດໄຈສໍາຄັນທີ່ເຮັດໃຫ້ປະຊາຊົນລາວ ຕ້ອງປະສົບກັບຄວາມຍາກຈົນເພີ່ມຂຶ້ນຫລາຍກວ່າໃນປີ 2023 ຢ່າງແນ່ນອນ ດັ່ງທີ່ເຈົ້າໜ້າທີ່ຂັ້ນສູງຂອງລາວ ໄດ້ໃຫ້ການຢືນຢັນວ່າ:
“ປີ 2023 ທັ່ວປະເທດມີຄອບຄົວທີ່ພົ້ນທຸກທັ້ງໝົດ 1,260,083 ຄອບຄົວ ກວມເອົາ 83.13% ຂອງຄອບຄົວທັງໝົດ, ແລະ ຍັງມີ 208,231 ຄອບຄົວ ທີ່ຍັງບໍ່ທັນພົ້ນຈາກຄວາມທຸກຍາກ ກວມເອົາ 16.87%. ໃນນັ້ນ, ມີບ້ານພົ້ນທຸກ 5,855 ບ້ານ ກວມເອົາ 69,69% ແລະບ້ານບໍ່ພົ້ນທຸກຍັງເຫຼືອ 2,547 ບ້ານ ກວມເອົາ 30,31% ຂອງຈໍານວນບ້ານທັງໝົດໃນປະເທດ.”
ສ່ວນທ່ານ ຄຳແພງ ໄຊສົມແພງ ເຈົ້າແຂວງໆ ຫົວພັນ ຖະແຫລງວ່າ: ການພັດທະນາທາງເສດຖະກິດ-ສັງຄົມ ຢູ່ແຂວງຫົວພັນ ມີຄວາມຄືບໜ້າຍ່າງຊັກຊ້າ ຍ້ອນວ່າ ມີຂໍ້ຈຳກັດທາງດ້ານທຶນຮອນ, ບຸກຄະລາກອນ ວິຊາການ ແລະທີ່ຕັ້ງພູມສາດທີ່ພື້ນທີ່ສ່ວນຫຼາຍແມ່ນເຂດພູດອຍ. ສະນັ້ນ, ຈຶ່ງເປັນອຸປະສັກຕໍ່ການຜະລິດກະສິກຳ ແລະ ການພັດທະນາໂຄງການພື້ນຖານຕ່າງໆ ຈຶ່ງໄດ້ສົ່ງຜົນກະທົບຕໍ່ການພັດທະນາ ເພື່ອຍົກລະດັບຄຸນນະພາບຊີວິດແລະການເປັນຢູ່ຂອງປະຊາຊົນ ໃນແຂວງຢ່າງຫລີກລ່ຽງບໍ່ໄດ້ ເຫັນໄດ້ຈາກລວມຍອດຜະລິດຕະພັນພາຍໃນ (GDP) ທີ່ສາມາດຄິດໄລ່ເປັນລາຍຮັບສະເລ່ຍຂອງປະຊາຊົນໃນແຂວງຫົວພັນ ໄດ້ພຽງແຕ່ 900 ໂດລາຕໍ່ຄົນຕໍ່ປີ ໃນປັດຈຸບັນ, ດັ່ງທີ່ ທ່ານ ຄຳແພງ ໄດ້ໃຫ້ການຢືນຢັນວ່າ
“ທັງແຂວງພວກເຮາເນື້ອທີ່ປູກຝັງກະບໍ່ຫລາຍປານໃດ ເພາະວ່າ ເປັນພູເຂາປ່າດົງສູງຊັນ ແຕ່ວ່າ ພວກເຮົາກໍພະຍາຍາມເຮັດເພື່ອໃຫ້ພໍ່ແມ່ປະຊາຊົນນຳໃຊ້ເນື້ອທີ່ດັງກ່າວປູກພືດຊະນິດຕ່າງໆ, ໂດຍສະເພາະແມ່ນເຂົ້າສາລີ, ມັນຕົ້ນ, ຫຼືພືດຜັກຕ່າງໆ. ສໍາລັບການນໍາໃຊ້ພາຍໃນ ແລະສົ່ງອອກຕ່າງປະເທດ ໂດຍສະເພາະແມ່ນສົ່ງໄປຫວຽດນາມ ເຮັດໃຫ້ສະເລ່ຍໃສ່ຫົວຄົນກໍຢູ່ໃນປະມານ 900 ໂດລາສະຫະລັດຕໍ່ຄົນຕໍ່ປີ ຖ້າທຽບໃສ່ແຂວງອື່ນໆ ກະຖືວ່າ ຍັງນ້ອຍ ແຂວງອື່ນໆ ເພິ່ນກະຢູ່ໃນ 2,000-3,000 ໂດລາສະຫະລັດຕໍ່ຄົນຕໍ່ປີ.”
ລາຍໄດ້ສະເລ່ຍຂອງປະຊາຊົນລາວໃນແຂວງຫົວພັນດັງກ່າວນີ້ແມ່ນຕໍ່າກວ່າລາຍໄດ້ສະເລ່ຍຂອງປະຊາຊົນລາວ ໃນເຂດນະຄອນຫຼວງວຽງຈັນເຖິງ 2.4 ເທົ່າ ແຕ່ວ່າຍ້ອນວິກິດການທາງເສດຖະກິດ ແລະ ພາວະທີ່ຄ່າເງິນກີບຕົກຕໍ່າລົງຢ່າງໜັກໜ່ວງ. ຈຶ່ງໄດ້ສົ່ງຜົນກະທົບຢ່າງໜັກໜ່ວງ ແລະເຮັດໃຫ້ລາຍໄດ້ສະເລ່ຍຂອງປະຊາຊົນລາວໃນເຂດນະຄອນຫຼວງວຽງຈັນ ຫຼຸດລົງຈາກ 64 ລ້ານກວ່າກີບ ໃນປີ 2023 ລົງເຫຼືອ 48 ລ້ານກວ່າກີບຕໍ່ຄົນ, ຫຼືພຽງ 1,920 ໂດລາຕາມອັດຕາແລກປ່ຽນຕົວຈິງ ແລະ ເຖິງແມ່ນວ່າເສດຖະກິດຂອງນະຄອນຫຼວງວຽງຈັນ ຂະຫຍາຍຕົວ 5.7% ກໍຕາມ, ແຕ່ດ້ວຍການທີ່ຄ່າເງິນກີບໄດ້ຫຼຸດລົງຢ່າງຫຼວງຫຼາຍ. ຈືງເຮັດໃຫ້ລາຍໄດ້ສະເລ່ຍຂອງຄົນລາວໃນເຂດນະຄອນຫຼວງວຽງຈັນ ໄດ້ຫຼຸດລົງຫຼາຍກວ່າ 3.3 ເທົ່າ ທຽບໃສ່ປີ 2022 ເຊິ່ງປະຊາຊົນລາວໃນເຂດນະຄອນຫຼວງວຽງຈັນ ມີລາຍໄດ້ສະເລ່ຍເຖິງ 6,379 ໂດລາຕໍ່ຄົນຕໍ່ປີນັ້ນ.
ສ່ວນນັກຊ່ຽວຊານດ້ານການເງິນແລະການທະນາຄານໃນອາຊຽນ ໄດ້ຄາດຄະເນສະພາບການເສດຖະກິດອາຊຽນໃນປີ 2024 ວ່າ GDP ລວມຂອງ 10 ປະເທດສະມາຊິກອາຊຽນຈະມີມູນຄ່າທັງໝົດ 4,161,842 ລ້ານໂດລາສະຫະລັດ, ໃນນັ້ນ ອິນໂດເນເຊຍ. ຍັງເປັນປະເທດທີ່ມີ GDP ສູງທີ່ສຸດ, ຮອງລົງມາແມ່ນ ປະເທດໄທ, ສິງກະໂປ, ຟີລິບປິນ, ຫວຽດນາມ, ມາເລເຊຍ, ມຽນມາ, ກຳປູເຈຍ, ບຣູໄນ ແລະ ລາວ ຕາມລຳດັບ. ສຳລັບ ລາວ ຖືເປັນປີທີ 3 ທີ່ມູນຄ່າ GDP ຫຼຸດລົງ ແລະ ຕໍ່າກວ່າ GDP ຂອງບຣູໄນ.
ທັງນີ້ໂດຍຜູ້ຊ່ຽວຊານດ້ານການເງິນແລະການທະນາຄານໃນອາຊຽນ. ຄາດຄະເນວ່າ GDP ຂອງລາວ ໃນປີ 2024 ຈະມີມູນຄ່າລວມບໍ່ເກີນ 14,110 ລ້ານໂດລາສະຫະລັດ, GDP ຂອງບຣູໄນຈະມີມູນຄ່າທັງໝົດປະມານ 15,780 ລ້ານໂດລາ.
ແຕ່ຢ່າງໃດກໍຕາມ ດ້ວຍການຫຼຸດລົງຢ່າງຕໍ່ເນື່ອງຂອງຄ່າເງິນກີບນັ້ນ ຈຶ່ງໄດ້ສົ່ງຜົນກະທົບເຮັດໃຫ້ GDP ຂອງລາວ ຈະມີມູນຄ່າລວມພຽງແຕ່ 13,455 ລ້ານໂດລາ ເມື່ອທຽບໃສ່ອັດຕາແລກປ່ຽນທາງການທີ່ທະນາຄານແຫ່ງຊາດລາວກຳນົດ.
ຟໍຣັມສະແດງຄວາມຄິດເຫັນ