ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ເຈົ້າໜ້າທີ່ ກ່າວວ່າ ນັກລົບ ກຸ່ມລັດອິສລາມ 50,000 ຄົນ ຖືກຂ້າຕາຍຢູ່ຊີເຣຍ ແລະອີຣັກ


ລົດລະເບີດແຕກຂຶ້ນໃກ້ໆກັບລົດຫຸ້ມເກາະ ຂອງກຳລັງພິເສດ ອີຣັກ ຂະນະທີ່ບຸກຄືບໜ້າ ໄປສູ່ເມືອງ Mosul.
ລົດລະເບີດແຕກຂຶ້ນໃກ້ໆກັບລົດຫຸ້ມເກາະ ຂອງກຳລັງພິເສດ ອີຣັກ ຂະນະທີ່ບຸກຄືບໜ້າ ໄປສູ່ເມືອງ Mosul.

ແນວ​ໂຮມ ​ພາຍ​ໃຕ້​ການ​ນຳພາ​ຂອງ​ສະຫະລັດ ​ໄດ້​ສັງຫານ​ພວກ​ນັກ​ລົບ ​ກຸ່ມ​ລັດອິສລາມ​ ປະມານ 50,000 ຄົນ ນັບ​ຕັ້ງ​ແຕ່​ປະທານາທິບໍດີ ​ບາຣັກ ​ໂອ​ບາ​ມາ ມີ​ຄຳ​ສັ່ງ​ໃຫ້​ປະຕິບັດ​ງານ​ທາງ​ທະຫານ​ຕໍ່​ກຸ່ມ​ດັ່ງກ່າວ ເມື່ອ​ເດືອນ​ສິງຫາ​ປີ 2014 ອີງ​ຕາມ​ຄຳ​ເວົ້າຂອງ​ເຈົ້າໜ້າ ​ທີ່​ອະ​ວຸ​ໂສ​ທາງ​ທະຫານ​ທ່ານ​ນຶ່ງ.

​ເຈົ້າໜ້າ​ທີ່ໆ​ຂໍ​ສະຫງວນ​ຊື່​ທ່ານ​ນີ້ ກ່າວ​ຕໍ່​ພວກ​ນັກ​ຂ່າວວ່າ ຈຳນວນດັ່ງກ່າວນີ້ ແມ່ນຖື​ວ່າ​ “ເປັນ​ການ​ກະ​ປະມານ​ແບບ​ລະມັດລະວັງ.”

ສ່ວນ​ເຈົ້າໜ້າ​ທີ່​ອະ​ວຸ​ໂສ ​ຄົນທີ​ສອງ ກ່າວ​ຕໍ່​ວີ​ໂອ​ເອວ່າ 50,000 ຄົນ​ນີ້​ແມ່ນ​ຖືກ​ຂ້າຕາຍ​ໂດຍ​ສະ​ເພາະ​ຢູ່​ໃນ​ຊີ​ເຣຍ​ແລະ​ອີຣັກ ​ແລະ​ບໍ່​ໄດ້​ຮວມ​ພວກ​ນັກ​ລົບ​ກຸ່ມ​ລັດອິສລາມ​ທີ່​ຖືກ ​ຂ້າ​ຕາຍ​ຢູ່​ໃນ​ປະ​ເທດ​ອື່ນໆ​ເຊັ່ນ​ລີ​ເບຍ​ແລະອັຟກາ​ນິສຖານ.

ການ​ກະ​ປະມານ​ນີ້ ​ແມ່ນ​ເພື່ອ​ສະ​ແດງ​ໃຫ້​ເຫັນ​ວ່າ ການ​ໂຈມ​ຕີ​ທາງ​ອາກາດ​ຂອງ​ປະ​ເທດ​ແນວໂຮມພາຍ​ໃຕ້​ການ​ນຳພາ​ຂອງ​ສະຫະລັດ​ມີ​ປະສິດທິ​ຜົນ​ຫຼາຍປານ​ໃດ​ໃນ​ໄລຍະ​ສອງ​ປີ​ທີ່​ຜ່ານ​ມານີ້.

ການ​ເປີດ​ເຜີຍ ​ກ່ຽວ​ກັບຈຳນວນ​ທີ່​ຖືກ​ຂ້າ​ຕາຍ​ດັ່ງກ່າວ ມີ​ຂຶ້ນ​ໃນ​ຂະນະ​ທີ່​ພັນ​ເອກ John Dorrian ​ໂຄສົກ​ຂອງ​ແນວ​ໂຮມຢູ່​ໃນ​ອີຣັກກ່າວ​ວ່າ ກຳລັງຂອງ​ກຸ່ມ​ລັດ​ອິສລາມ​ໃນເມືອງ Mosul ພວມ​ສູນ​ເສຍ​ພວກ​ນັກ​ລົບ​ໃນ​ອັດຕາ​ທີ່​ທີ່​ຫາ​ມາ​ທົດ​ແທນ​ບໍ່​ໄດ້ຍ້ອນ​ວ່າ​ພວກ​ເຂົາ​ໄດ້​ຖືກ​ປິດ​ລ້ອມ​ໂດຍສິ້ນ​ເຊີງ ທີ່​ບໍ່​ສາມາດ​ສົ່ງ​ກຳລັງ​ມາ​ໜຸນ​ໄດ້.

ພັນ​ເອກ Dorrian ກ່າວ​ຕໍ່​ພວກ​ນັກ​ຂ່າວ​ ໃນ​ວັນ​ພະຫັດ​ວານ​ນີ້ວ່າ “ພວກ​ເຂົາ​ຈະ​ບໍ່​ຍອມ ​ໄປແບບ​ງຽບໆ ​ແຕ່​ພວກ​ເຂົາຈະ​ຕ້ອງ​ໄດ້​ໄປ.”

ທ່ານ​ກ່າວ​ວ່າ ກຳລັງ​ຕໍ່ຕ້ານ​ກຸ່ມ​ລັດ​ອິສລາມ​ໄດ້​ເຫັນກຸ່ມ​ກໍ່​ການ​ຮ້າຍ​ນີ້ນຳ​ໃຊ້​ພວກນັກ​ລົບ ​ທີ່ໜຸ່ມ​ນ້ອຍ​ກວ່າ​ເກົ່າ ຂະນະ​ທີ່​ຈຳນວນ​ນັກ​ລົບ​ຂອງ​ພວກ​ເຂົາ​ຫລຸດ​ລົງ ທີ່ ​ເມືອງ Mosul ຊຶ່ງ​ເປັນ​ຍຸດ​ທະ​ສາດ​ທີ່​ທ່ານ​ກ່າວ​ວ່າ “ບໍ່​ຢ້ານ​ບາບ​ເລີຍ​ນັ້ນ.”

​ເຈົ້າໜ້າ​ທີ່​ອະ​ວຸ​ໂສ​ທ່ານ​ນຶ່ງ​ທີ່​ທຳນຽບຫ້າ​ແຈ​ກ່າວ​ຕໍ່​ພວກ​ນັກ​ຂ່າວ​ວ່າ ຈຳນວນ​ນັກລົບ​ຂອງ​ກຸ່ມ​ລັດ​ອິສລາມ​ທີ່​ຫລຸດ​ລົງ ມີ​ທ່າ​ທາງ​ວ່າ ​ຈະ​ເປັນ​ເຫດ​ໃຫ້​ກຸ່ມ​ດັ່ງກ່າວ ​ຫັນໄປ​ໃຊ້ໃນ​ອັນ​ທີ່​ທ່ານ​ເອີ້ນວ່າ “AQ-I 2.0” ຊຶ່ງ​ໝາຍ​ຄວາມ​ວ່າ ​ເປັນ​ການ​ຍົກ​ລະດັບ​ຂອງກຸ່ມ​ອາລກາ​ອີ​ດາ​ຢູ່​ໃນ​ອີຣັກຂັ້ນຕໍ່​ໄປ​.

ອ່ານຂ່າວນີ້ຕື່ມເປັນພາສາອັງກິດ

XS
SM
MD
LG