ຜູ້ນໍາ ສຫລ ແລະ ຫວຽດນາມ ຫາລືກັນ ເລື້ອງການຄ້າ ແລະສິດທິມະນຸດ

ປະທານາທິບໍດີສະຫະລັດ ທ່ານບາຣັກ ໂອບາມາ ແລະທ່ານ
ເຈືອງ ເຕິ່ນ ຊາງ ປະທານປະ​ເທດຫວຽດນາມໄດ້ປຶກສາຫາລື
ກັນກ່ຽວກັບ​ເລື້ອງການຄ້າ ແລະສິດທິມະນຸດ ເວລາທ່ານທັງ
ສອງພົບປະກັນ​ໃນວັນພະຫັດອາທິດ​ແລ້ວ​ນີ້ຢູ່ທີ່ທໍານຽບຂາວ.
ດັ່ງທີ່ ຜູ້ສື່ຂ່າວວີໂອເອ Ken Klein ລາຍງານມານັ້ນ ກໍ​ແມ່ນ
ວ່າ ທ່ານທັງສອງ​ ໄດ້ຮັບປາກວ່າ ຈະຊ່ວຍກັນເລັ່ງລັດ​ການ ເຮັດຂໍ້ຕົກລົງການຄ້າລະດັບຂົງເຂດຄື​ຂໍ້​ຕົກລົງ TPP ນັ້ນ ໃຫ້
ສໍາເລັດພາຍໃນທ້າຍປີນີ້. ດາຣາມີລາຍລະອຽດມາສະເໜີທ່ານ
ໃນອັນດັບຕໍ່ໄປ.


ຫຼັງຈາກການພົບປະກັນ ປະທານາທິບໍດີ ບາຣັກ ​ໂອ​ບາ​ມາ
ບອກພວກນັກຂ່າວວ່າ ທ່ານ ແລະທ່ານ ເຈືອງ ເຕິ່ນ ຊາງ ປະທານປະເທດຫວຽດ ນາມ ໄດ້ຕົກລົງກັນທີ່ຈະຊ່ວຍເລັ່ງ ລັດໃຫ້ສໍາເລັດ​ໄວໆ ການ​ເຮັດຂໍ້ຕົກລົງ ພາຄີຂ້າມປາຊິຟິກ
Trans-Pacific Partnership ຫຼື TPP ຊຶ່ງ ເປັນຂໍ້ຕົກລົງດ້ານການຄ້າ ລະຫວ່າງປະ ເທດຊາດຕ່າງໆໃນ ຂົງເຂດອາເມຣິ ກາ ແລະເອເຊຍ.

ທ່ານໂອບາມາ ເວົ້າວ່າ: “ພວກເຮົາມຸ້ງໝັ້ນຕໍ່ເປົ້າໝາຍອັນ​ໃຫຍ່​ໂຕ​ຂອງການເຮັດ ໃຫ້ຂໍ້ຕົກລົງ ການຄ້າສະບັບນີ້ ​ໃຫ້ສໍາເລັດລົງກ່ອນທ້າຍປີ ຍ້ອນວ່າ ພວກເຮົາຮູ້
ດີວ່າ ຂໍ້​ຕົກລົງນີ້ຈະຊ່ວຍສ້າງໜ້າວຽກ ແລະ​ເສີມຂະຫຍາຍການ ລົງທຶນຢູ່​ໃນທົ່ວ
ຂົງເຂດ ແລະຢູ່ໃນປະເທດທັງສອງຂອງ
ພວກເຮົາ.”

ສະມາຊິກສະພາສະຫະລັດຫຼາຍໆຄົນ ພ້ອມທັງກຸ່ມແຮງງານຕ່າງໆ ໄດ້ຮ້ອງຂໍ ທໍານຽບ
ຂາວ ໃຫ້ໂຈະການ ເຈລະຈາ​ເລື້ອງ​ສັນຍາ​ການ​ຄ້າ TPP ກັບ​ຫວຽກ​ນາມໄວ້ກ່ອນ ຈົນ ກວ່າຫວຽດນາມຈະແກ້ໄຂບັນຫາ ຂໍ້ກ່າວ ຫາຕ່າງໆ ທີ່ວ່າຕົນທໍາ​ການກົດຂີ່ປາບປາມ ເສລີພາບຂັ້ນພື້ນຖານຂອງ​ປະຊາຊົນນັ້ນ ເສຍກ່ອນ.

ທ່ານໂອບາມາ ເວົ້າວ່າ ທ່ານໄດ້ຍົກເອົາບັນຫາດັ່ງກ່າວນີ້ ຂຶ້ນມາສົນທະນາໃນການພົບ ປະກັບທ່ານ​ເຈືອງ ແຕ່ທ່ານກໍບໍ່ໄດ້ໃຫ້ລາຍລະອຽດໃດໆ.

ທ່ານໂອບາມາ ເວົ້າອີກວ່າ: “ພວກເຮົາໄດ້ເນັ້ນຢໍ້າເຖິງເລຶ່ອງທີ່ວ່າສະຫະລັດ ຍັງ ສືບຕໍ່ເຊື່ອວ່າ ພວກເຮົາ ທັງໝົດຕ້ອງເຄົາລົບນັບຖືບັນຫາສໍາຄັນຕ່າງໆເຊັ່ນ ເສລີພາບໃນການສະແດງຄວາມຄິດເຫັນ ເສລີພາບ​ໃນການນັບຖື ສາສະໜາ ​ໃນການເຕົ້າໂຮມກັນເປັນຕົ້ນ ແລະພວກເຮົາ​ໄດ້ລົມກັນຢ່າງເປີດ ເຜີຍແລະກົງ
ໄປກົງມາທີ່ສຸດ ກ່ຽວກັບທັງ​ເລື້ອງຄວາມກ້າວໜ້າທີ່ຫວຽດນາມ ກໍາລັງສ້າງຂຶ້ນ ແລະສິ່ງທ້າທາຍຕ່າງໆ
ທີ່ຍັງຄ້າງຄາຢູ່.”

ທາງ​ຝ່າຍຜູ້ນໍາຫວຽດນາມນັ້ນ ໃຫ້​ຮ່ອງຮອຍວ່າ ບໍ່​ໄດ້ມີການ​ບັນລຸຂໍ້ຕົກລົງ ກັນໃດໆ
ຊຶ່ງ​ທ່ານ​ກ່າວ​ຜ່ານ​ນາຍ​ພາສາ​ວ່າ:

“ນອກນີ້ແລ້ວ ພວກເຮົາຍັງໄດ້ລົມ​ກັນ​ກ່ຽວ​ກັບບັນຫາ ມູນເຊື້ອຂອງສົງຄາມ ໂຮມທັງດ້ານສິດທີມະນຸດ ຊຶ່ງເປັນບັນຫາທີ່ພວກເຮົາ ຍັງຕົກລົງກັນບໍ່​ໄດ້ ແລະຍັງມີຄວາມເຫັນແຕກຕ່າງກັນຢູ່.”

ເມື່ອວັນພຸດອາທິດ​ແລ້ວ​ນີ້ ທ່ານ Ed Royce ປະທານຄະນະກໍາມະການ ກິດຈະ
ການ ຕ່າງປະເທດຂອງສະພາຕໍ່າສະຫະລັດ ສັງກັດພັກຣີພັບບລິກັນ ໄດ້ຮຽກຮ້ອງ
ໃຫ້ ທ່ານ ໂອບາມາ ​ສອບ​ຖາມປະທານ​ເຈືອງ ກ່ຽວກັບເລື້ອງສິດ ທິມະນຸດນັ້ນ.

ທ່ານ Royce ເວົ້າວ່າ: “ປະທານາທິບໍດີສະຫະລັດ ຈະ​ກົ້ມ​ໜ້າ​ໄປ​ຍັງ​ອີກ​
ຟາກ​ນຶ່ງຂອງໂຕະ ​ແລ້ວຖາມປະທານ ​ເຈືອງ ຫລື​ບໍ່ ວ່າ “ທ່ານປະທານ
ທ່ານຈະປ່ອຍ ຕົວພວກນັກໂທດການເມືອງ ທີ່ຄັດຄ້ານລັດຖະບານເຫຼົ່າ
ນີ້ ໄດ້ຫຼືບໍ່? ທ່ານຢາກ ມີຄວາມສໍາພັນທີ່ໃກ້ຊິດກວ່າເກົ່າກັບສະຫະລັດ
​ເພາະ ສະ​ນັ້ນ ທ່ານຈະປ່ອຍ ຕົວພວກຂຽນ​ຄວາມ​ເຫັນລົງເວັບໄຊ້ຊາວ
ໝຸ່ມນີ້ໄດ້ບໍ່?”

ການຢ້ຽມຢາມວໍຊິງຕັນຂອງທ່ານຊາງ ມີຂຶ້ນ ​ໃນເວລາທີ່​ກ່າວ​ກັນ​ວ່າ ປະເທດ
ຄອມ ມິວນີສຫວຽດນາມ ກໍາລັງທົບທວນຄວາມສໍາພັນຂອງຕົນ ກັບຈີນຄືນໃໝ່
ແລະພິຈາລະນາ ທີ່​ຈະ​ປ່ອຍໃຫ້ມີປະຊາທິປະໄຕ
ຫຼາຍຂຶ້ນກວ່າເກົ່າ.

ນອກ​ນັ້ນ ຜູ້ນໍາສະຫະລັດແລະຫວຽດນາມ ຍັງໄດ້ປຶກສາຫາລືກັນ ເລື້ອງຄວາມ
ພະຍາຍາມ ເພື່ອແກ້ໄຂບັນຫາຂໍ້ຂັດແຍ້ງກັນທາງທະເລກັບຈີນ ຢ່າງສັນຕິ ໃນ
ຂົງເຂດທະເລ ຈີນໃຕ້ ແລະພາກສ່ວນອື່ນໆຂອງຂົງເຂດເອເຊຍປາຊິຟິກ.

ທ່ານໂອບາມາ ເວົ້າວ່າ ທ່ານດີໃຈແລະຂອບໃຈຕໍ່ຄວາມຮ່ວມມືຂອງຫວຽດນາມ ກັບຄວາມພະຍາຍາມຂອງສະຫະລັດ ເພື່ອເກັບກູ້ສິ່ງເສດເຫລືອຂອງ ທະຫານສະ
ຫະລັດ ທີ່ຫາຍສາບສູນໃນປາງສົງຄາມຫວຽດນາມນັ້ນ. ພ້ອມນີ້ ທ່ານໂອບາມາ
ຍັງໄດ້ຮັບປາກ ວ່າ ຈະປະຕິບັດງານກັບລັດຖະບານຫວຽດນາມ ໃນການແກ້ໄຂ
ບັນຫາດ້ານສະພາບ ແວດລ້ອມແລະດ້ານສຸຂະພາບທີ່ຍັງສືບຕໍ່ເກີດຂຶ້ນ ຢູ່ໃນ ຫວຽດນາມຍ້ອນສົງຄາມນັ້ນ.

ໃນໂອກາດນີ້ ປະທານເຈືອງ ເຕິ່ນ ຊາງ ໄດ້ເຊື້ອເຊີນປະທານາທິບໍດີໂອບາມາ
ໃຫ້ໄປຢ້ຽມຢາມ​ຫວຽດນາມ ຊຶ່ງ​ທ່ານ​ໂອ​ບາ​ມາ​ກໍ​ໄດ້​ຕອບ​ວ່າ ທ່ານ ຈະ​ພະຍາຍາມ​
ໄປ​ໃຫ້​ໄດ້ ກ່ອນ​ສິ້ນ​ສຸດ​ວາລະ​ການ​ດໍາລົງ​ຕໍາ​ແໜ່​ງຂອງ​ທ່ານ ​ໃນ​ທ້າຍ​ປີ 2016.