ປ.ໂອບາມາ ພົບປະກັບ ປະທານາບໍດີ ຄົນໃໝ່ ຂອງ ຢູເຄຣນ (ວີດີໂອ/ສະໄລດ໌)

ສະຫະລັດໄດ້ສະເໜີໃຫ້ການຊ່ວຍເຫລືອທີ່ບໍ່ແມ່ນອາວຸດຮ້າຍ
ແຮງແກ່ຢູເຄຣນໃນ ມູນຄ່າ 5 ລ້ານໂດລາເພື່ອສະໜັບສະໜຸນ
ກອງທັບຂອງປະເທດດັ່ງກ່າວໃນການດຳເນີນຄວາມພະຍາຍາມ
ເພື່ອສູ້ລົບກັບພວກແບ່ງແຍກດິນແດນນິຍົມຣັດເຊຍ ຢູ່ ໃນເຂດ
ພາກຕາເວັນອອກຂອງຢູເຄຣນ.

ປະທານາທິບໍດີສະຫະລັດ ທ່ານ Barack Obama ປະກາດວ່າ
ເງິນຈຳນວນ ດັ່ງກ່າວຈະນຳໄປຊື້ເສື້ອເກາະກັນລູກປືນ ກ້ອງສ່ອງ
ຍາມກາງຄືນ ແລະອຸບປະກອນສື່ສານ ໃນວັນພຸດມື້ນີ້ ຂະນະ
ທີ່ທ່ານພົບປະ ກັບປະທານາທິບໍດີ ທີ່ໄດ້ຮັບ ເລືອກໃໝ່ຂອງຢູເຄຣນ ທ່ານ Petro Poroshenko ​ທີ່ນະຄອນວໍຊໍ ປະເທດ ໂປແລນ.

ປະທານາທິບໍດີໂອບາມາກ່າວວ່າ ປະຊາຄົມນາໆຊາດຕ້ອງໃຫ້ການສະໜັບສະໜຸນ
ການດຳເນີນຄວາມພະຍາຍາມເພື່ອເຈລະຈາກັບຣັດເຊຍແລະຄ້ຳປະກັນວ່າ ຣັດເຊຍ
ບໍ່ໄດ້ໃຫ້ການຊ່ວຍເຫຼືອດ້ານການເງິນ ດ້ານອາວຸດ ຫລືການສະໜັບສະ ໜຸນຕໍ່ພວກ
ແບ່ງແຍກດິນແດນໃນຢູເຄຣນ. ທ່ານເວົ້າວ່າ ໂລກຂອງເຮົາຕ້ອງ ເຕັມໃຈອອກກົດ
ໝາຍກ່ຽວກັບຜົນທີ່ຕິດຕາມມາຕໍ່ຣັດເຊຍ.

ປະທານາທິບໍດີໂອບາມາ ຈະມ້ວນທ້າຍການຢ້ຽມຢາມໂປແລນດ້ວຍ​ການ​ກ່າວ​ຄຳປາ
ໄສ ເນື່ອງໃນພິທີສະຫຼອງ​ວັນ​ອິດ​ສະລະ​ພາບ ​ຊຶ່ງ​ເປັນຂີດໝາຍຄົບ​ຮອບ 25 ປີ​ໃນການ
​ເລືອກ​ຕັ້ງສະພາແຫ່ງຊາດຢ່າງ​ເສລີ​ເທື່ອທຳ​ອິດ​ຂອງ​ໂປ​ແລນ.

ຫລັງ​ຈາກ​ນັ້ນ ທ່ານ​ກໍຈະ​ເດີນທາງ​ໄປ​ນະຄອນ Brussels ​ເພື່ອເຂົ້າຮ່ວມ​ກອງ​ປະຊຸມ
ຍອດຜູ້ນຳຂອງກຸ່ມ​ 7 ​ປະ​ເທດທີ່ຈະເລີນທາງດ້ານອຸດສາຫະກຳ ຊຶ່ງ​ໄດ້​ມີການຈັດແຈງ
ຂຶ້ນ​ຢ່າງ​ວ່ອງ​ໄວ ຫລັງ​ຈາກ​ໄດ້ຕັດສິນ​ໃຈ​ບໍ່ໄປຮ່ວມກອງປະຊຸມ ຂອງກຸ່ມ​ຈີ 8 ທີ່ຣັດເຊຍ​
ຈະ​ເປັນ​ເຈົ້າພາບ​ ຢູ່​ເມືອງ Sochi ໃນອາທິດນີ້. ການ​ບໍ່ໄປຮ່ວມກອງປະຊຸມດັ່ງກ່າວ ກໍແມ່ນ​ເພື່ອ​ຕອບ​ໂຕ້​ຕໍ່ການທີ່ຣັດ​ເຊຍໄດ້ບຸກເຂົ້າໄປໃນແຫຼມ Crimea ​ເມື່ອ​ເດືອນ​ມີ​ນາ
ຜ່ານມາ.