ໃນຄຳປາໄສປະຈຳປີຕໍ່ລັດຖະສະພາສະຫະລັດແລະປະ
ຊາຊົນຊາວອະເມຣິກັນ ຈຳນວນຫຼາຍສິບລ້ານຄົນທີ່ພາ
ກັນເບິ່ງທາງໂທລະພາບນັ້ນ ປະທານາທິບໍດີໂອບາມາໄດ້
ຮຽກຮ້ອງໃຫ້ສະຫະລັດທຳການລົງທຶນເພີ່ມຂຶ້ນເຂົ້າໃສ່
ດ້ານການສຶກສາ ໂຄງລ່າງພື້ນຖານ ແລະການປະດິດຄິດ
ສ້າງໃໝ່ທາງດ້ານວິທະຍາສາດ.
ທ່ານກ່າວວ່າ ສະຫະລັດຈຳເປັນຕ້ອງໄດ້ທຳການປະ
ດິດຄິດສ້າງທີ່ເກັ່ງທີ່ສຸດ ໃຫ້ການສຶກສາທີ່ດີທີ່ສຸດ ແລະ
ສ້າງສາພັດທະນາໃຫ້ດີທີ່ສຸດ ລື່ນປະເທດອື່ນໆໃນໂລກ
ຊຶ່ງທ່ານກ່າວຕໍ່ໄປວ່າ:
“ພວກເຮົາຕ້ອງເຮັດໃຫ້ອະເມຣິກາເປັນບ່ອນທີ່ດີທີ່
ສຸດໃນໂລກ ສໍາລັບທໍາທຸລະກິດ. ພວກເຮົາຕ້ອງຮັບ
ຜິດຊອບການຂາດດຸນຂອງພວກເຮົາ ແລະປະຕິຮູບ
ລັດຖະບານຂອງພວກເຮົາ. ນັ້ນຄືວິທີທາງທີ່ປະຊາ
ຊົນຂອງພວກເຮົາຈະປະສົບກັບຄວາມຈະເຣີນຮຸ່ງ
ເຮືອງ ນັ້ນຄືວິທີທາງທີ່ພວກເຮົາຈະເອົາຊະນະ
ອະນາຄົດໄດ້.”
ຄຳປາໄສເທື່ອທີ 2 ຂອງປະທານາທິບໍດີໂອບາມາຕໍ່ທັງສອງສະພາຂອງສະຫະລັດທີ່ຫ້ອງ
ປະຊຸມຂອງສະພາຕໍ່າໃນຄືນວານນີ້ ສ່ວນໃຫຍ່ແລ້ວແມ່ນໄດ້ເພັ່ງເລັງໃສ່ບັນຫາພາຍໃນປະ
ເທດ ໂດຍສະເພາະກໍແມ່ນເລື່ອງເສດຖະກິດ.
ບ່ອນນັ່ງບ່ອນນຶ່ງຢູ່ໃນຫ້ອງປະຊຸມນັ້ນ ໄດ້ຖືກປະໃຫ້ວ່າງໄວ້ສຳລັບສະມາຊິກສະພາຕໍ່າ
Gabrielle Giffords ຈາກລັດອາຣິໂຊນາ ທີ່ກຳລັງພັກຟື້ນ ຫຼັງຈາກໄດ້ຖືກຍິງໃນການ
ພະຍາຍາມຄາດຕະກຳ ເມື່ອວັນທີ 8 ມັງກອນຜ່ານມາ.
ການໂຈມຕີທີ່ເປັນເຫດໃຫ້ມີຜູ້ເສຍຊີວິດ 6 ຄົນດັ່ງກ່າວໄດ້ພາໃຫ້ມີການລິເລີ່ມການສົນ
ທະນາຫາລືໃນລະດັບຊາດ ກ່ຽວກັບຄວາມຈຳເປັນ ໃນການທີ່ຈະຕ້ອງມີມາລະຍາດທີ່ດີ
ຂຶ້ນໃນວົງການເມືອງຂອງສະຫະລັດ.
ດ້ວຍເຫດຜົນທີ່ວ່ານີ້ ສະມາຊິກລັດຖະສະພາຈາກທັງພັກເດໂມແຄຣັທແລະພັກຣີພັບບລີ
ກັນຈຳນວນນຶ່ງຈຶ່ງໄດ້ພາກັນນັ່ງຄຽງຄູ່ກັນ ໃນລະຫວ່າງການກ່າວຄຳປາໄສຂອງປະທາ
ນາທິບໍດີຕໍ່ລັດຖະສະພາແລະປະເທດຊາດ ໃນປີນີ້ ແທນທີ່ຈະນັ່ງກັນຄົນລະຟາກ ດັ່ງໄດ້
ເຄີຍປະຕິບັດກັນມາ.
ໃນຄຳປາໄສນັ້ນປະທານາທິບໍດີໂອບາມາໄດ້ໃຊ້ສຳນວນທີ່ມອງເຫດການໄປໃນທາງດີທີ່
ສຸດໃນການບັນລະຍາຍເຖິງການຟື້ນໂຕຄືນຂອງເສດຖະກິດສະຫະລັດ.
“ເວລານີ້ ພວກເຮົາຢູ່ໃນທ່າທີ່ຈະກ້າວໄປສູ່ຄວາມກ້າວໜ້າແລ້ວ. ສອງປີຫຼັງ ຈາກສະພາວະເສດຖະກິດຕົກຕໍ່າຢ່າງຮ້າຍແຮງທີ່ສຸດເທົ່າທີ່ພວກເຮົາສ່ວນ
ໃຫຍ່ໄດ້ປະສົບມາ ຕະຫລາດຫຸ້ນກໍໄດ້ຟື້ນໂຕຄືນມາຢ່າງແຂງແຮງ ພວກບໍ
ລິສັດຕ່າງໆ ກໍໄດ້ກໍາໄລຫລາຍຂຶ້ນ. ເສດຖະກິດແມ່ນກໍາລັງເຕີບໂຕຂື້ນມາ
ອີກ”
ແຕ່ໃນຂະນະດຽວກັນ ທ່ານໂອບາມາກໍຮັບຮູ້ວ່າອັດຕາຄົນຫວ່າງງານແມ່ນຍັງສູງຢູ່ແລະ
ຊາວອະເມຣິກັນຢາກໃຫ້ພວກຜູ້ນຳຂອງເຂົາເຈົ້າເພັ່ງເລັງໃສ່ການສ້າງວຽກເຮັດງານທຳ.
ປະທານາທິບໍດີໄດ້ກຳນົດແຜນການ ເພື່ອປັບປຸງຄວາມສາມາດໃນການແຂ່ງຂັນຂອງສະ
ຫະລັດ ຊຶ່ງໃນນັ້ນແມ່ນຮວມທັງການເພີ່ມການໃຊ້ຈ່າຍຂອງລັດຖະບານ ເພື່ອຊ່ອຍເສີມ
ຂະຫຍາຍການສຶກສາຄົ້ນຄວ້າແລະການພັດທະນາໂດຍສະເພາະແລ້ວແມ່ນໃນດ້ານເທັກ ໂນໂລຈີກ່ຽວກັບພະລັງງານທີ່ສະອາດ.
ພ້ອມນີ້ ທ່ານຍັງຮຽກຮ້ອງໃຫ້ມີການເອົາມາດຕະການລິເລີ່ມໃໝ່ຂອງລັດຖະບານກາງ
ເພື່ອປັບປຸງໂຮງຮຽນແລະມະຫາວິທະຍາໄລຕ່າງໆຂອງສະຫະລັດຕະຫຼອດທັງການລົງ ທຶນເພື່ອຍົກລະດັບຫຼືປັບປຸງໂຄງລ່າງພື້ນຖານຂອງປະເທດ ແລະປະຕິຮູບລັດຖະບານ.
ໃນການກ່າວຕອບ ຂອງພັກຣີພັບບລີກັນນັ້ນ ສະມາຊິກສະພາຕໍ່າ Paul Ryan ປະ
ທານຄະນະກຳມະການງົບປະມານ ຂອງສະພາຕໍ່າສະຫະລັດກ່າວວ່າ ປະທານາທິບໍດີ
ໂອບາມາຍັງສືບຕໍ່ໃຊ້ຈ່າຍເງິນຂອງລັດຖະບານຫຼາຍໂພດ. ທ່ານ Ryan ເວົ້າວ່າ
"ການກາງຕໍ່ເຈົ້າໜ້າທີ່ລັດຖະບານໃຫ້ຄວາມອຸບປະຖຳສະໜັບສະໜຸນເພື່ອ
ໃຫ້ມີການປະດິດຄິດສ້າງ ການແຂ່ງຂັນແລະທາງເລືອກທີ່ດີສຳລັບຜູ້ບໍຣິ
ໂພກນັ້ນ ບໍ່ເຄີຍໄດ້ຜົນມາກ່ອນ ແລະກໍຈະບໍ່ໄດ້ຜົນຄືເກົ່າໃນເວລານີ້. ພວກ
ເຮົາຈຳເປັນຕ້ອງໄດ້ວາງທິດທາງໃໝ່."
ປະທານາທິບໍດີໂອບາມາໄດ້ກ່າວຕອບຕໍ່ການສະແດງຄວາມວິຕົກກັງວົນຂອງພັກຣີພັບ
ບລີກັນ ກ່ຽວກັບການຂາດດຸນງົບປະມານຂອງລັດຖະບານກາງ ໂດຍໄດ້ສະເໜີທີ່ຈະບໍ່
ເພີ່ມຫຼືຮັກສາການໃຊ້ຈ່າຍຂອງລັດຖະບານສຳລັບພາກສ່ວນພົນລະເຮືອນໃຫ້ຢູ່ລະດັບ
ປັດຈຸບັນເປັນເວລາ 5 ປີ.
ທ່ານເວົ້າວ່າແຜນການດັ່ງກ່າວຈະຊ່ອຍຫຼຸດການຂາດດຸນງົບປະມານລົງຫຼາຍກວ່າ 400
ພັນລ້ານໂດລາ ພາຍໃນ ໄລຍະເວລາ 10 ປີ.
ໃນຖະແຫຼງການສະບັບນຶ່ງ ທີ່ນຳອອກເຜີຍແຜ່ກ່ອນຄຳປາໄສ ຂອງປະທານາທິບໍດີນັ້ນ ປະທານສະພາຕໍ່າຂອງສະຫະລັດ ທ່ານ John Boehner ເອີ້ນຂໍ້ສະເໜີຂອງປະທານາ
ທິບໍດີວ່າ “ຍັງບໍ່ພຽງພໍ”.
ສ່ວນໃນດ້ານອື່ນໆນັ້ນທ່ານໂອບາມາເວົ້າວ່າ ວໍຊິງຕັນຄວນທຳການປະຕິຮູບກ່ຽວກັບ
ນະໂຍບາຍຄົນເຂົ້າເມືອງຂອງສະຫະລັດທີ່ເປັນບັນຫາຍັງມີການຖົກຖຽງໂຕ້ແຍ້ງນັ້ນ.
“ຂ້າພະເຈົ້າຮູ້ດີວ່າການອະພິປາຍຖົກຖຽງກັນນັ້ນແມ່ນຈະຍາກແລະໃຊ້ເວລາ
ພໍສົມຄວນແຕ່ໃນຄໍ່າຄືນນີ້ ຂໍໃຫ້ພວກເຮົາຈົ່ງມາຕົກລົງກັນດໍາເນີນຄວາມພະ
ຍາຍາມອັນນັ້ນ. ພວກເຮົາຈົ່ງຢ່າຂັບໄລ່ໃສສົ່ງ ພວກຊາວໜຸ່ມທັງຫລາຍ ທີ່
ມີຄວາມຮູ້ຄວາມສາມາດ ມີຄວາມຮັບຜິດຊອບ ແລະສາມາດ ເຮັດວຽກໃນ
ຫ້ອງຄົ້ນຄວ້າຂອງພວກເຮົາໄດ້ ເລິ່ມທຸລະກິດໃໝ່ໆໄດ້ແລະສ້າງຄວາມຈະ
ເຣີນຮຸ່ງເຮືອງ ແກ່ປະເທດຊາດຂອງພວກເຮົາ”
ກ່ຽວກັບກິດຈະການຕ່າງປະເທດນັ້ນ ປະທານາທິບໍດີໂອບາມາ ເວົ້າວ່າ ຖານະຊື່ສຽງ
ຂອງສະຫະລັດຢູ່ໃນໂລກ ແມ່ນໄດ້ຮັບການຟື້ນຟູແລ້ວ.
ທ່ານໂອບາມາກ່າວວ່າ ສົງຄາມໃນອີຣັກພວມຈະສິ້ນສຸດລົງແລະພວມມີຄວາມກ້າວໜ້າ ໄປສູ່ການມອບໂອນຄວາມຮັບຜິດຊອບໃນທີ່ສຸດ ໃນການຮັກສາຄວາມປອດໄພຢູ່ອັຟ-
ການິສຖານໃຫ້ແກ່ຊາວອັຟການິສຖານແລະຕາໜ່າງກໍ່ການຮ້າຍອາລ ກາຍດາກໍພວມ ພາກັນຫຼົບໜີຢ່າງບໍ່ເປັນຂະບວນ.
“ພວກເຮົາໄດ້ສົ່ງສານອອກໄປແລ້ວ ຈາກເຂດຊາຍແດນ ຂອງອັຟການີສ
ຖານ ໄປຮອດແຫລມອາເຣເບຍ ໄປຈົນເຖິງພາກສ່ວນທັງໝົດ ຂອງໂລກ
ນັ້ນກໍຄືວ່າ ພວກເຮົາຈະບໍ່ລົດລະຈະບໍ່ລັງເລໃຈ ແລະພວກເຮົາຈະເອົາຊະ
ນະພວກທ່ານໄດ້.”
ປະທານາທິບໍດີໂອບາມາ ກ່າວວ່າ ສະຫະລັດ ແມ່ນຢືນຢູ່ກັບປະຊາຊົນຊາວຕູນີເຊຍ ໃນຄວາມໄຝ່ຝັນຢາກມີປະຊາທິປະໄຕຂອງພວກເຂົາເຈົ້າ ແລະທ່ານຂໍສະແດງຄວາມ
ຄຳນັບຮັບຕ້ອນ ຕໍ່ການປ່ອນບັດລົງປະຊາມະຕິຢ່າງສັນຕິ ເພື່ອຄວາມເປັນເອກກະ
ລາດໃນພາກໃຕ້ຊູດານ.
“ປະຊາຊົນຫລາຍພັນຄົນພາກັນຢືນລຽນແຖວກັນໃນເວລາກ່ອນຂ້ອນແຈ້ງ
ເພື່ອລໍຖ້າລົງຄະແນນສຽງ. ປະຊາຊົນເຕັ້ນລໍາມ່ວນຊື່ນກັນ ຢູ່ຕາມຖະໜົນ
ຫົນທາງ. ຊາຍຄົນນຶ່ງຜູ້ທີ່ສູນເສຍອ້າຍນ້ອງຂອງລາວສີ່ຄົນໄປໃນສົງຄາມ
ກ່າວສະຫຼຸບພາບເຫດການຢູ່ອ້ອມຂ້າງລາວວ່າຂົງເຂດນີ້ໄດ້ເປັນສະໜາມ
ລົບຕະຫລອດເວລາສ່ວນໃຫຍ່ຂອງຊີວິດຂອງຂ້ອຍ ບັດນີ້ ພວກເຮົາຕ້ອງ
ການທີ່ເປັນອິດສະຫລະເສລີ”
ທ່ານໂອບາມາໄດ້ປະກາດວ່າ ທ່ານຈະເດີນທາງໄປຢ້ຽມຢາມປະເທດບຣາຊີລ ຊີເລ່
ແລະແອລຊານວາດໍ ໃນທ້າຍເດືອນມີນາຈະມານີ້.
ນອກນັ້ນ ທ່ານຍັງຮຽກຮ້ອງໃຫ້ສະມາຊິກລັດຖະສະພາຂອງສະຫະລັດໃຫ້ສັດຕະ
ຍາບັນ ຕໍ່ຂໍ້ຕົກລົງການຄ້າເສລີ ກັບເກົາຫຼີໃຕ້ ແລະເວົ້າວ່າ ທ່ານຈະສືບຕໍ່ທຳການ
ຕົກລົງ ໃນທຳນອງດຽວກັນນ ກັບປານາມາ ແລະໂຄລອມເບຍ. ແຕ່ປາກົດວ່າ ບໍ່
ໄດ້ມີການເອີ່ຍເຖິງ ຂັ້ນຕອນການເຈລະຈາສັນຕິພາບໃນພາກຕາເວັນອອກກາງທີ່ ພວມຕົກຢູ່ໃນສະພາບບໍ່ໄປບໍ່ມາໃນເວລານີ້.
ໃນວັນພຸດມື້ນີ້ປະທານາທິບໍດີໂອບາມາຈະເດີນທາງໄປຢ້ຽມຢາມລັດວິສຄັນຊິນໃນ
ພາກກາງຕອນເໜືອຂອງສະຫະລັດບ່ອນທີ່ທ່ານຈະເລີ້ມໂຄສະນາປຸກລະດົມກ່ຽວ
ກັບຂໍ້ລິເລີ່ມຕ່າງໆຂອງທ່ານ ທີ່ທ່ານໄດ້ກ່າວໃນຄຳປາໄສຂອງທ່ານໃນຄືນວັນອັງ
ຄານວານນີ້.
